പിന്നെന്താ... വേറെന്താ? ഗൾഫുകാരന്റെയും നാട്ടിലെ ഭാര്യയുടെയും ഫോൺ സംഭാഷണങ്ങൾ ശ്രദ്ധിച്ചിട്ടുണ്ടോ? പത്ത് മിനിറ്റ് സംസാരിച്ചാൽ അതിൽ എട്ട് മിനിറ്റും കടന്നുപോകുന്നത് ഈ രണ്ട് ചോദ്യങ്ങളിലൂടെയാണ്: "പിന്നെന്താ…?വേറെന്താ…? സത്യത്തിൽ പറയാൻ വിശേഷങ്ങൾ ഒന്നുമില്ലാഞ്ഞിട്ടല്ല, മറിച്ച് ആ ശബ്ദം കേട്ടു കൊണ്ടിരിക്കാനുള്ള ഒരമിത ആവേശമാണ് ഈ 'ചോദ്യക്കളി'ക്ക് പിന്നിൽ. പക്ഷേ, ഈ ചോദ്യങ്ങൾക്കിടയിൽ പലപ്പോഴും ഭാര്യമാർ പറയാൻ ആഗ്രഹിക്കുന്ന പല കാര്യങ്ങളും ഭർത്താക്കന്മാർ കേൾക്കാതെ പോകുന്നു എന്നതാണ് പരാതി. പ്രവാസി ഭർത്താവ് റൂമിലെത്തി ഫോൺ വിളിക്കുമ്പോൾ പുള്ളിക്കാരന്റെ മനസ്സിൽ ഒരു ലക്ഷ്യമേയുള്ളൂ: നാട്ടിലെ ആ ശബ്ദം കേട്ട് ഒന്ന് റിലാക്സ് ചെയ്യുക. എന്നാൽ ഭാര്യയുടെ അവസ്ഥയോ? രാവിലെ മുതൽ കുട്ടികളുടെ ബഹളം, അടുക്കളയിലെ പുകച്ചിൽ, അയൽപക്കത്തെ വിശേഷങ്ങൾ... ഇങ്ങനെ ഉള്ളിൽ കെട്ടിക്കിടക്കുന്ന കാര്യങ്ങൾ ആരോടെങ്കിലും ഒന്ന് പറഞ്ഞു തീർക്കാനുള്ള തത്രപ്പാടിലായിരിക്കും അവർ. ഒരാൾക്ക് 'വിശ്രമിക്കണം', മറ്റൊരാൾക്ക് 'വിശേഷങ്ങൾ പറയണം'. ഇവിടെയാണ് കമ്മ്യൂണിക്കേഷൻ ട്രാഫിക് ബ്ലോക്കാവുന്നത്. ഭാര്യയുടെ വർത്തമാനങ്ങൾ ശ്രദ്ധിച്ചു കേൾക്കുക എന്നത് വെറുമൊരു കുടുംബകാര്യമല്ല, അതൊരു സുന്നത്തുകൂടിയാണ്. ഖുർആൻ കൽപ്പിക്കുന്നത് "നിങ്ങൾ അവരോട് മാന്യമായി സഹവർത്തിക്കുക" എന്നാണ്. ഒരു പ്രവാസി തന്റെ ഭാര്യക്ക് നൽകുന്ന ഏറ്റവും വലിയ 'മാന്യത' അവർ പറയുന്നത് കേൾക്കാൻ കാണിക്കുന്ന ആ അല്പസമയമാണ്. ഫോൺ എടുത്ത ഉടനെ പരാതികളുടെ 'ലിസ്റ്റ്' നിരത്താതെ, ആദ്യം അദ്ദേഹത്തിന്റെ വിശേഷങ്ങൾ ചോദിക്കുക. അത് അദ്ദേഹത്തിന് ഒരു ആശ്വാസമാകും."പിന്നെന്താ?" എന്ന് അദ്ദേഹം ചോദിക്കുമ്പോൾ, "വേറെന്താ, നിങ്ങളെ ഒന്ന് കാണാൻ കൊതിയുണ്ട്" എന്ന് മറുപടി പറഞ്ഞു നോക്കൂ. പിന്നെ ആ സംസാരം വേറെ വഴിക്കു പോകും! തന്റെ ഭർത്താവിന്റെ മനസ്സിന് സന്തോഷം നൽകുന്ന വർത്തമാനങ്ങൾ പറയുന്നതും ഒരു തരം സദഖയാണെന്ന് കരുതുക. ചുരുക്കത്തിൽ: ഫോൺ കോളിലെ "പിന്നെന്താ" എന്ന ചോദ്യം വെറുമൊരു ഫില്ലറല്ല, അത് സ്നേഹം കൈമാറാനുള്ള ഒരു പാലമാണ്. ആ പാലത്തിലൂടെ സ്നേഹവും കരുതലുമുള്ള വർത്തമാനങ്ങൾ ഒഴുകട്ടെ!#❤ സ്നേഹം മാത്രം 🤗