ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/mpN8Rl0?d=n&ui=v64j8rk&ബൊമ്മലാട്ടം ((15)) സഞ്ജനയുടെ വിചിത്രമായ ആ ചിരി എക്സിന്‍റെ വായടിപ്പിച്ചു. അപ്പോഴായിരുന്നു തനിക്ക് പിന്നിലെ പ്രത്യേകമായ ആ ശബ്ദത്തെ അയാള്‍ തിരിച്ചറിഞ്ഞത്. ഗണ്‍ ലോഡ് ചെയ്യുന്ന ശബ്ദവുമായി അതിന് നല്ല സാമ്യമുണ്ടായിരുന്നു. "സംശയിക്കണ്ട എക്സ്. ഇത് ഗണ്‍ ലോഡ് ചെയ്ത ശബ്ദം തന്നെയാണ്. നിന്‍റെ ശിരസ്സാണ് ഞാന്‍ ലക്ഷ്യം വച്ചിരിക്കുന്നത്. അവളുടെ നേര്‍ക്ക് ചൂണ്ടിയ ഗണ്‍ താഴെയിട്ട് നിനക്ക് മെല്ലെ തിരിയാം. ഇല്ലെങ്കില്‍ ശിരസ്സ് പിളര്‍ന്ന് വിട പറയാം. ചോയ്സ് നിന്‍റേതാണ്." എക്സ് പരിഹാസമായി ഒന്നു ചിരിച്ചു തലയാട്ടി. സഞ്ജനയുടെ നേര്‍ക്ക് ചൂണ്ടിയ ഗണ്‍ താഴെയിട്ട് അയാള്‍ മെല്ലെ തിരിഞ്ഞു. കരണ്‍ ആയിരുന്നുവത്. എക്സിന്‍റെ വലതു ഭാഗത്ത് തോക്കു ചൂണ്ടി റസാഖും നില്‍ക്കുന്നു. താഴെ കിടന്ന ഗണ്‍ എടുത്ത് സഞ്ജനയും എക്സിനെ പിന്നില്‍ ചൂണ്ടി നിന്നു. മൂവരും മൂന്നു ദിശകളിലായി അയാളെ വളഞ്ഞു കഴിഞ്ഞിരിക്കുന്നു. "WOW!! Perfect Timing..! നല്ലൊരു പദ്ധതി. കിടിലന്‍ ടീം വര്‍ക്ക്. എന്‍റെ ആദരവ് എന്നും നിങ്ങള്‍ക്കുണ്ടാവും." എക്സ് പരിഹാസമായി പറഞ്ഞു. "നല്ലത്..! പക്ഷേ ഞങ്ങളില്‍ നിന്നും ആദരവ് പോയിട്ട് ഒരല്‍പ്പം കരുണ പോലും നീ പ്രതീക്ഷിക്കരുത്. അത് നിന്നെ സഹായിക്കില്ല." തോക്കില്‍ ബലമായി പിടിച്ച് കരണും പറഞ്ഞു. "ഇങ്ങനെ ഏറെ നേരം നിങ്ങള്‍ക്ക് നില്‍ക്കാന്‍ കഴിയില്ല. എന്നെയും കൊണ്ട് പുറത്തിറങ്ങിയേ തീരൂ. താങ്കള്‍ക്ക് ഉറപ്പുണ്ടോ അത് സാധ്യമാണെന്ന്??!" "ഇല്ല, പക്ഷേ നിന്നേം കൊണ്ടേ ഞങ്ങള്‍ ഈ കളം വിടൂ..." "ഹഹഹഹ..! ആ ധൈര്യം സമ്മതിക്കണം. ശരി, ഒന്നു ശ്രമിച്ചു നോക്കൂ. ഭാഗ്യം നിങ്ങളെ എത്രമാത്രം തുണയ്ക്കുമെന്ന് കണ്ടറിയാം." കരണ്‍ പുച്ഛമായി ചുണ്ടു കോട്ടിയ ശേഷം റസാഖിനെ ഒന്നു നോക്കിയതും അയാള്‍ മുന്നോട്ട് വന്ന് എക്സിന്‍റെ കൈകള്‍ പിന്നിലേക്ക് ചേര്‍ത്തു കെട്ടി. "ഉം.. നടക്ക്.!" എക്സിന്‍റെ തലയില്‍ തോക്ക് ചൂണ്ടി റസാഖ് കല്‍പ്പിച്ചതും വല്ലാത്തൊരു നോട്ടം അയാള്‍ കരണിലേക്കെറിഞ്ഞു. കളി ഇതുകൊണ്ടൊന്നും തീര്‍ന്നില്ല എന്നായിരുന്നു ആ നോട്ടത്തിന്‍റെ പൊരുള്‍! "നടക്കാനാണ് പറഞ്ഞത്..." റസാഖ് ഒച്ചയിട്ടതും എക്സ് മുന്നോട്ട് ചുവടുകള്‍ വെച്ചു. കതക് തുറന്ന് വരുന്ന യജമാനന്‍റെ അവസ്ഥ കണ്ട് ബോഡീഗാര്‍ഡ്സ് ഒന്നടങ്കം പതറി. മിന്നലിന്‍റെ വേഗതയില്‍ അവര്‍ വേഗം അരയിലെ തോക്കുകളെടുത്ത് കരണിനും ടീമിനും നേര്‍ക്ക് ചൂണ്ടി. "No.. No.. No..! പരാക്രമം ഒന്നും കാണിക്കണ്ട. അങ്ങനെയുണ്ടായാല്‍ നിങ്ങളുടെ വെടിയുണ്ട തറച്ചായിരിക്കും ഇവന്‍ തീരുക... എല്ലാവരും തോക്ക് താഴെയിടാന്‍ ഇനി ഞാന്‍ പ്രത്യേകം പറയണോ?!" കരണ്‍ കല്‍പ്പിച്ചു. "തോക്ക് താഴെയിടടാ..!" എക്സിന്‍റെ ശിരസില്‍ ചേര്‍ത്ത തോക്ക് അല്‍പ്പം കൂടി ബലപ്പെടുത്തി റസാഖ് ആക്രോഷിച്ചു. "Hey Drop Your Weapons.!" എക്സ് നിര്‍ദ്ധേശിച്ചു. അപ്രകാരം അവരെല്ലാം തോക്ക് താഴേക്കിട്ട് കൈ ഉയര്‍ത്തി. "എടീ ഉരുമ്പെട്ടവളെ, ഇതിനാണോ നീ കാമം നടിച്ച് ഇവിടേക്ക് കയറിയത്? നീ മുടിഞ്ഞു പോകുമെടി നാ** മോളേ!" കാമിനി ദീദി ശാപ വാക്കുകള്‍ പുറപ്പെടുവിച്ചതും സഞ്ജന അവരുടെ കൈത്തുട നോക്കി വെടിയുതിര്‍ത്തു. ഠേ...!!! വലിയൊരു നിലവിളിയോടെ കാമിനി നിലംപതിച്ചു. "ഇനി ശബ്ദിച്ചാല്‍ അടുത്ത വെടിയുണ്ട നിങ്ങളുടെ തലയില്‍ തറയ്ക്കും. മാംസം പുറത്തേക്ക് തെറിച്ച് നിങ്ങൾ ചാവും.!" സഞ്ജനയുടെ ഉഗ്ര കോപത്തില്‍ കാമിനി നിശബ്ദമായി മോങ്ങി. വളരെ കരുതലോടെ ഓരോ ചുവടും അവര്‍ മുന്നോട്ടു വെച്ചു. തിരിച്ചടിക്കാന്‍ നല്ലൊരു അവസരം കിട്ടാതെ ബോഡീഗാര്‍ഡ്സ് ഒരുപോലെ വിഷമിച്ചു. "സഞ്ജനാ?!" കരണ്‍ വിളിച്ചതും മനസ്സിലായെന്ന പോലെ അവള്‍ വേഗം മാദകിയില്‍ നിന്നുമിറങ്ങി സെക്കന്‍റുകള്‍ക്കുള്ളില്‍ ബീറ്റുമായി തിരികെയെത്തുകയായിരുന്നു. ഒരിക്കല്‍ കൂടി കരണും റസാഖും ബോഡീഗാര്‍ഡ്സിനെ നോക്കി ബീറ്റിന്‍റെ പിന്‍സീറ്റില്‍ കയറിയിരുന്നു. "Go.. Go.. Go.. Sanjana..!" കരണ്‍ ഓര്‍ഡര്‍ ഇട്ടതും വല്ലാത്ത തരം കാതടിപ്പിക്കുന്ന ശബ്ദം കാറില്‍ നിന്നും പുറപ്പെടുവിച്ച് സഞ്ജന മുന്നോട്ട് പായ്ച്ചു. എക്സിന്‍റെ ബോഡീഗാര്‍ഡ്സ് വെറുതെ വിടാന്‍ ഒരുക്കമല്ലായിരുന്നു. തങ്ങളുടെ സ്കോര്‍പ്പിയോയില്‍ കയറി ബീറ്റിന് പിന്നാലെ അവരും കുതിച്ചു. "സര്‍, അവര്‍ പിന്നാലെ തന്നെയുണ്ട്...!" മിററില്‍ നോക്കി സഞ്ജന അറിയിച്ചതും കരണ്‍ പുറകോട്ട് ഒന്നു നോക്കി. രണ്ട് കറുത്ത സ്കോര്‍പ്പിയോ തങ്ങളുടെ പിന്നാലെ ചീറി വരുന്ന കാഴ്ച. "നിങ്ങളെ അവര്‍ വെറുതെ വിടില്ല. വെറുതെ കളിക്കാന്‍ നില്‍ക്കണ്ട..." എക്സ് വീണ്ടും പുച്ഛമായി ചിരിച്ചു പറഞ്ഞതും "വായടക്കടാ നായേ..!" റസാഖിന്റെ കരുത്ത മുഷ്ടി അയാളുടെ കീഴ്ത്താടിയില്‍ ശക്തിയായി പതിച്ചു. റോഡ് നിരത്തില്‍ ഒന്നിനു പിന്നാലെ ഒന്നായി മൂന്നു കാറുകളും കുതിച്ചു കൊണ്ടേയിരുന്നു. ആദ്യം കണ്ട ഇടറോഡിലേക്ക് സഞ്ജന കാര്‍ പായ്ച്ചു കയറ്റി. വിടാന്‍ ഉദ്ധേശമില്ലാതെ സ്കോര്‍പ്പിയോകളും പിന്നാലെ കയറി. ഠേ..! ഠേ..! എതിരാളികള്‍ വെടിയുതിര്‍ത്തു. അവ ലക്ഷ്യം പിഴച്ച് ബീറ്റില്‍ തട്ടി എങ്ങോട്ടോ തെറിച്ചു പോയി. "റസാഖ്..!" കരണ്‍ വിളിച്ചതും റസാഖ് തയ്യാറായി കാറിന്‍റെ ഡോര്‍ തുറന്ന് അതിസാഹസികമായി എഴുന്നേറ്റ് നിന്നു. ഠേ.! ഠേ.! ഠേ.! റസാഖിന്‍റെ തോക്കില്‍ നിന്നും വെടിയുണ്ടകള്‍ ചീറി പാഞ്ഞു. പക്ഷേ ലക്ഷ്യം കണ്ടില്ല. "Sanjana Watch Out..!" കരണ്‍ ഉച്ചത്തില്‍ വിളിച്ചു. അപ്പോഴാണ് എതിരെ നിന്നും ഓട്ടോറിക്ഷ വരുന്നത് അവള്‍ ശ്രദ്ധിച്ചത്. ശ്വാസ വേഗതയില്‍ ഹാന്‍റ് ബ്രേക്ക് വലിച്ചു പിടിച്ച് ബ്രേക്ക് ചവിട്ടി ഡ്രിഫറ്റ് ചെയ്ത് അടുത്തു കണ്ട വളവിലേക്ക് അവള്‍ ഓടിച്ചു കയറ്റി. നിയന്ത്രണം തെറ്റിയ റസാഖ് പുറത്തേക്ക് തെറിച്ചു വീണു. "ഹേയ് റസാഖ്..!!" കരണ്‍ ചാടി റസാഖിന്‍റെ കൈയ്യില്‍ ബലമായി പിടിത്തമിട്ടു. സഞ്ജനയക്ക് കാര്‍ നിര്‍ത്താന്‍ സാധിക്കില്ല. ഇടുങ്ങിയ വഴിയിലൂടെ മൂന്ന് കാറും ഒരുപോലെ കുതിക്കുകയായിരുന്നു. റസാഖിന്‍റെ അരയ്ക്ക് കീഴ്പ്പോട്ട് വെളിയിലാണുള്ളത്. അയാളുടെ കാല്‍മുട്ട് റോഡിലുരഞ്ഞു. "റസാഖ് ബലമായി പിടിച്ചു കയറി വാ.." കരണ്‍ ഒച്ചയിട്ടു വിളിച്ചു. അയാള്‍ പരിശ്രമിക്കുകയായിരുന്നു. ഠേ.! ഠേ.! സ്കോര്‍പ്പിയോയില്‍ നിന്നും വീണ്ടും വെടിയുതിര്‍ന്നു. റസാഖിന്‍റെ ഭാഗത്തെ തുറന്ന ഡോര്‍ ചില്ല് അവ തകര്‍ത്തു കളഞ്ഞു. കലി പൂണ്ട റസാഖ് തന്‍റെ തോക്കില്‍ നിന്നും സ്കോർപിയോയിലേക്ക് ചറപറാ നിറയൊഴിച്ചു. ഭാഗ്യം തുണച്ചതിനാല്‍ മുന്‍സീറ്റിലിരിക്കുന്നവന്‍റെ ശിരസ്സ് അത് തകര്‍ത്തു കളയുകയായിരുന്നു. തല്‍ക്ഷണം പ്രാണന്‍ വെടിഞ്ഞ് അയാള്‍ നിശ്ചലമായി. "പ്ഭാ നായേ..!" സ്കോര്‍പ്പിയോ ഡ്രൈവ് ചെയ്യുന്നയാള്‍ മരിച്ചവനെ നിഷ്കരുണം തൊഴിച്ച് പുറത്തേക്കിട്ടു. "സര്‍..!?" അപ്പോഴാണ് സഞ്ജനയുടെ വിളിയുതിര്‍ന്നത്. കരണ്‍ മുന്നിലേക്ക് നോക്കി. സര്‍വ്വേ കല്ല് തെളിഞ്ഞു വരുന്നു. അത് റസാഖിന്‍റെ ഭാഗത്താണ് പാഞ്ഞടുക്കുന്നത്. സഞ്ജന എങ്ങനെയൊക്കെ കാര്‍ ഒതുക്കിയോടിച്ചാലും ആ കല്ലില്‍ റസാഖ് ചെന്നിടിക്കുക തന്നെ ചെയ്യും. ചിലപ്പോള്‍ നട്ടെല്ല് തകരാം. കാര്‍ നിര്‍ത്താനും കഴിയാത്ത അവസ്ഥ.! ഒരു സെക്കന്‍റ് പകച്ചു പോയ കരണ്‍ തന്‍റെ രണ്ടു കൈകള്‍ കൊണ്ടും ബലമായി പിടിച്ച് റസാഖിനെ അകത്തേക്ക് വലിച്ചു. "കമോണ്‍ റസാഖ്..!" പരമാവധി ശക്തിയില്‍ കരണ്‍ വലിച്ചതിനെ തുടര്‍ന്ന് റസാഖ് അകത്തു കയറി. സര്‍വ്വേ കല്ല് അയാളിൽ പതിക്കാതെ കൊടുങ്കാറ്റ് പോലെ പിന്നോട്ട് പാഞ്ഞു പോയി. "ഹഹഹഹ..! ഇതൊക്കെ വേണമായിരുന്നോ? അവര്‍ നിങ്ങളെ കൊല്ലാതെ വിടില്ല." അപ്പോഴൊക്കെ എക്സ് തന്‍റെ പുച്ഛവും പരിഹാസവും നിര്‍ത്താന്‍ കൂട്ടാക്കിയില്ല. ആ വഴി കടന്നു പോകുന്നത് പാലത്തിലേക്കാണ്. കലിയടങ്ങാത്ത റസാഖ് വീണ്ടും എഴുന്നേറ്റ് സാഹസികമായി പിന്നോട്ട് വെടിയുതിര്‍ത്തു. എതിരാളികള്‍ ഒന്നു വിടാതെ നിറയൊഴിച്ചതില്‍ ഒരെണ്ണം റസാഖിന്‍റെ ശരീരം തുളച്ചു കയറി. അയാള്‍ പുറത്തേക്ക് തെറിച്ചു. വീണതാവട്ടെ പാലത്തിന്‍റെ താഴേക്കും. "NOOOOO... Rasak..??" സഞ്ജനയും കരണും ഒരുപോലെ അലമുറയിട്ടു വിളിച്ചു. താഴെ പുഴയിലേക്ക് റസാഖ് അലച്ചു വീഴുന്നതു കണ്ട് കരണിനോ സഞ്ജനയ്ക്കോ ഒന്നും ചെയ്യാന്‍ സാധിച്ചില്ല. കാര്‍ നിര്‍ത്തുവാനുള്ള സാഹചര്യവും അവര്‍ക്കില്ലായിരുന്നു. സഞ്ജന തന്‍റെ ശൈലിയില്‍ കുതിച്ചു പാഞ്ഞു കൊണ്ടേയിരുന്നു. കരണിന്‍റെ ക്ഷമ പൂര്‍ണ്ണമായും നശിച്ചു. അവന്‍ ഡോര്‍ തുറന്ന് സാഹസികമായി നിന്നു. പുറകില്‍ വരുന്ന എതിരാളികളുടെ നേര്‍ക്ക് തുടരെത്തുടരെ വെടിയുതിര്‍ത്തതില്‍ മുന്നിലെ സ്കോര്‍പ്പിയോ ഡ്രൈവ് ചെയ്യുന്നവന്‍റെ ശിരസ് തുളച്ചു കയറി. തല്‍ക്ഷണം നിയന്ത്രണം തെറ്റി അത് പാലത്തിന്‍റെ കീഴേക്ക് പതിക്കുകയായിരുന്നു. പാലവും കടന്ന് വീണ്ടും അവര്‍ ഹൈവേയിലേക്ക് കുതിച്ചു കയറി. ഇപ്പോള്‍ അവശേഷിക്കുന്ന സ്കോര്‍പ്പിയോ അവരെ വിടാതെ പിന്തുടര്‍ന്നു കൊണ്ടേയിരുന്നു. "നിങ്ങളൊരു അസാധാരണക്കാരനാണ്. കൃത്യമായി വെടിയുതിര്‍ക്കാന്‍ കഴിവുള്ളയാള്‍." തിരികെ സീറ്റില്‍ കയറിയിരുന്ന കരണിനോട് എക്സ് പുച്ഛത്തോടെ പ്രശംസിച്ചു. അതൊന്നും കേട്ടതായി നടിക്കാതെ കരണ്‍ തന്‍റെ ഗണ്‍ വീണ്ടും ലോഡ് ചെയ്തു നിറച്ച് തിരിഞ്ഞു നോക്കി. വഴിയൊരത്തെ വണ്ടിക്കടകളും കൂടകളുമൊക്കെ ഇടിച്ചു തെറുപ്പിച്ച് ബീറ്റ് അമിത വേഗതയില്‍ കുതിച്ചു പാഞ്ഞുകൊണ്ടേയിരുന്നു. "സര്‍, നമ്മള്‍ എങ്ങോട്ടാണ്?" ശ്വാസമടക്കി സഞ്ജന ചോദിച്ചതില്‍ കരണ്‍ മറുപടി കൊടുത്തു : "പണി തീരാത്ത ഹംപി ബില്‍ഡിങില്‍. അതാണ് നമ്മുടെ ലക്ഷ്യം.! മൂന്ന് കിലോമീറ്ററുകള്‍ ഇനിയുമുണ്ട്. അവിടേക്ക് നമ്മള്‍ എത്തിയേ തീരൂ സഞ്ജന." "അപ്പോള്‍ റസാഖ്?!" "അവന്‍ കഴിവുള്ളവനാണ്. രക്ഷപ്പെട്ടോളും." "സര്‍, പക്ഷേ.!" "ഒരു പക്ഷേയുമില്ല സഞ്ജന., റസാഖിനടുത്തേക്ക് ഒരു തരത്തിലും നമുക്ക് ചെല്ലാന്‍ കഴിയില്ല. അയാള്‍ക്കിപ്പോള്‍ ആവശ്യം ഭാഗ്യം തുണയ്ക്കുക എന്നു മാത്രമാണ്. മറ്റു നിവൃത്തികള്‍ നമ്മുടെ മുന്നില്‍ ഇല്ല. സോ, ഒബേയ് മൈ ഓര്‍ഡര്‍..!" അത്രയും പറയുമ്പോള്‍ പരമാവധി ഗൗരവം മുഖത്തു വരുത്താന്‍ കരണ്‍ ശ്രമിക്കുകയായിരുന്നു. "ഷിറ്റ്.!" തന്‍റെ കോപം ശരീരത്തിലുടനീളം വ്യാപിച്ച സഞ്ജന മുന്നോട്ട് മുന്നോട്ട് കുതിച്ചു കൊണ്ടേയിരുന്നു. അവശേഷിക്കുന്ന സ്കോര്‍പ്പിയോയുടെ നേര്‍ക്ക് കരണ്‍ വെടിയുതിര്‍ക്കാന്‍ തുനിഞ്ഞതും സഞ്ജന ഇടയില്‍ കയറി. "Sir I've A Plan..!" കരണ്‍ പുരികമുയര്‍ത്തി സംശയത്തോടെ അവളെ നോക്കവേ റോഡില്‍ അപകടകരമാം വിധം പൊളിഞ്ഞു കിടക്കുന്ന കുഴിയുടെ നേര്‍ക്ക് സഞ്ജന അമിത വേഗതയില്‍ പായുകയായിരുന്നു. ആ തന്ത്രം മനസ്സിലായ കരണ്‍ പുറകോട്ട് നോക്കി. വേട്ടപ്പട്ടി കണക്കെ അവര്‍ തൊട്ടു പിന്നാലെയുണ്ട്. വെടിയുതിര്‍ക്കുകയും ചെയ്യുന്നുണ്ട്. ഏകദേശം ആ കുഴിയില്‍ അടുത്തെത്തിയതും സഞ്ജന ഒച്ചയിട്ടു : "സര്‍, പിടിച്ചിരുന്നോളൂ..!" അപ്രകാരം കരണ്‍ പിടിച്ചിരുന്നു. സഞ്ജന ഒറ്റ വെട്ടിക്കലിന് കാറിന്‍റെ സഞ്ചാര ദിശ മാറ്റിയതും ഡോറില്‍ ശക്തമായി തലയടിച്ച് എക്സ് ബോധരഹിതനായി കിടന്നു. പുറകേ ചീറി വന്ന സ്കോര്‍പ്പിയോ ഡ്രൈവര്‍ ആ കുഴിയും കല്ലും കണ്ടില്ലായിരുന്നു. എന്തെങ്കിലും ചെയ്യാനാവുന്നതിനു മുന്നേ കല്ലില്‍ അതിശക്തമായിടിച്ച് സ്കോര്‍പ്പിയോ വായുവില്‍ ഉയര്‍ന്നു പൊങ്ങി. മുന്നിലെ ചില്ല് തകര്‍ന്ന് ഡ്രൈവര്‍ പുറത്തേക്ക് തെറിച്ചു. അയാളുടെ ശരീരത്തില്‍ തന്നെ സ്കോര്‍പ്പിയോ വന്നു വീണ് ഭയങ്കരമായ ശബ്ദത്തോടെ മൂന്നു തവണ മലക്കം മറിഞ്ഞു. നിരത്തിലെ ആളുകള്‍ ചിന്നഭിന്നമായി ഓടിയകന്നു. ഹൈവേയിലെ മറ്റു വാഹനങ്ങള്‍ സഡണ്‍ ബ്രേക്കില്‍ നിര്‍ത്തി. സ്കോര്‍പ്പിയോയില്‍ നിന്നും കറുത്ത പുക ഉയര്‍ന്നുകൊണ്ടേയിരുന്നു. അടുത്ത സെക്കന്‍റില്‍ അഗ്നിയാളി പൊട്ടിത്തെറിക്കുന്നതു കണ്ട് കരണ്‍ ഒന്നു നിശ്വസിച്ചു. സഞ്ജന അപ്പോഴും കുതിക്കുകയായിരുന്നു. സാഹസികമായ വലിയൊരു ചേസിംഗിനോടുവില്‍ ബ്ലൂ ബീറ്റ് ഹംപി ബില്‍ഡിങ്ങിന്‍റെ ഗ്രൗണ്ടിലെത്തി നിശ്ചലമായി. മേല്‍ വസ്ത്രത്തില്‍ ബലമായി പിടിച്ചു വലിച്ച് എക്സിനെ കരണ്‍ പുറത്തേയ്ക്കിട്ടു. *********************************************************************************************************************** ഏതാനും നിമിഷങ്ങള്‍ കടന്നു പോയി. ജലപ്രഹരം മുഖത്ത് പതിച്ചപ്പോള്‍ എക്സ് തന്‍റെ കണ്ണുകള്‍ മെല്ലെ തുറന്നു. ആദ്യം മങ്ങിയ പോലത്തെ കാഴ്ചയാണ് അയാള്‍ക്കനുഭവപ്പെട്ടത്. അജ്ഞാതമായ ഒരു രൂപം മുന്നില്‍ നില്‍ക്കുന്നു. അയാള്‍ ശക്തിയായി തല കുടഞ്ഞ് കണ്ണുകള്‍ ഇറുക്കിയടച്ച് തുറന്ന് ഒന്നുകൂടി നോക്കി. ആ കണ്ണുകളില്‍ കരണ്‍ തെളിഞ്ഞു വന്നു. താന്‍ ഇപ്പോഴും രക്ഷപ്പെട്ടിട്ടില്ല എന്ന സത്യം എക്സിന്‍റെ തലച്ചോറിനെ വേദനിപ്പിച്ചു. അയാള്‍ സ്വയം അടിമുടിയൊന്നു നോക്കി. ഇരുമ്പ് കസേരയിലിരുത്തി കൈകാലുകള്‍ വരിഞ്ഞു മുറുക്കി തന്നെ ബന്ദിച്ചിരിക്കുകയാണ്. "ഞാനിപ്പോഴും തടങ്കലില്‍ തന്നെയാണ് അല്ലേ?!" എക്സിന്‍റെ ചോദ്യത്തില്‍ കരണ്‍ മറുപടി കൊടുത്തത് അയാളുടെ വലതു നെഞ്ചില്‍ ഊക്കിലൊരു തൊഴി കൊടുത്തുകൊണ്ടാണ്. കസേരയുള്‍പ്പെടെ അയാള്‍ പുറകോട്ട് പതിച്ചു. ആദ്യം ഹിമേഷ്. ഇപ്പോള്‍ റസാഖ്. ഇരുവരും നേരിട്ട വേദന കരണിനെ കൂടുതല്‍ ക്രോധപ്പെടുത്തി. അവന്‍റെ മുഖം ചുവന്നു വിറച്ചു. അനങ്ങാന്‍ കഴിയാതെ മലര്‍ന്നു കിടക്കുന്ന എക്സിന്‍റെ നെഞ്ചു നോക്കി കരണ്‍ രണ്ടു തവണ കൂടി തൊഴിച്ചു. ഖ്ഹോ..! ഖ്ഹോ..! ശക്തിയായി ചുമയ്ക്കുന്നതിനൊപ്പം രക്തക്കട്ടകള്‍ അയാള്‍ പുറത്തേക്ക് തുപ്പി. അപ്പോഴും സഞ്ജന ഗണ്‍ ചൂണ്ടി നില്‍ക്കുകയായിരുന്നു. കരണ്‍ അയാളുടെ വസ്ത്രത്തില്‍ പിടിത്തമിട്ട് പിന്നോട്ട് വലിച്ച് കസേരയുള്‍പ്പെടെ നേരെ ഇരുത്തി മുഖത്ത് ഒരെണ്ണം കൂടി കൊടുത്തതും മത്തടിച്ച പോലെ എക്സിന്‍റെ ശിരസ്സ് വിറച്ചു. മുന്നിലുള്ളതെല്ലാം അയാള്‍ രണ്ടായി കണ്ടു. ഭൂമിയുടെ കറക്കം ശരീരത്തെ ബാധിച്ചു. ഒരുതരം ഭ്രാന്തമായ അവസ്ഥ.! "പറയടാ..! എന്തിനാണ് നീ ക്രിസ്റ്റല്‍ മാളിലും കൊച്ചിയിലും ബോംബ് വെച്ചത്.? ഇതിനൊക്കെ പിന്നില്‍ നിന്‍റെ കളിയാണോ?! അതോ വേറെ ആരെങ്കിലും ഈ ദുരന്തത്തിന് പിന്നിലുണ്ടോ?!" സംഹാര രൗദ്രത്തോടെ കരണ്‍ ചോദിച്ചതില്‍ എക്സ് ചോര നിറഞ്ഞ വായില്‍ ക്രൂരമായ ചിരി കുത്തി നിറച്ചു. പൊടുന്നനെ അത് വലിയൊരു പൊട്ടിച്ചിരിയിലേക്ക് വഴി മാറി..!! "ഹഹഹഹഹ..!! ഈ കളി ഏതിലേക്കാണ് പോകുന്നതെന്ന് നിനക്കിനിയും മനസ്സിലായില്ലേ മിസ്റ്റര്‍ കരണ്‍..!" ഇടിത്തീ വീണ പോലെ കരണ്‍ നടുങ്ങി പോയി. കാരണം തന്‍റെ എതിരാളി തന്നെ പേര് ചൊല്ലി വിളിച്ചിരിക്കുന്നു. വല്ലാത്ത വിളി.! ജീവിതത്തില്‍ ഇന്നോളം തമ്മില്‍ പരിചയമില്ലാത്ത ഇവന് തന്‍റെ പേര് എങ്ങനെയറിയാമെന്ന സംശയം കരണിന്‍റെ തലച്ചോറിനെ വിങ്ങല്‍പ്പെടുത്തുകയുണ്ടായി. ഇതേ സമയം മറ്റൊരിടത്ത്., കൃത്യമായി പറഞ്ഞാല്‍ മൂവായിരത്തോളം കിലോമീറ്ററുകള്‍ക്കപ്പുറത്തുള്ള മേഘാലയയിലെ ഉമിയാം തടാകത്തിന് ഏകദേശമടുത്തായി സ്ഥിതി ചെയ്യുന്ന മനോഹരമായ വലിയ ബംഗ്ലാവിലെ സ്വിമ്മിംഗ് പൂളില്‍ നിന്നും അര്‍ദ്ധ നഗ്നനായ കരുത്തുറ്റ ഒരു പുരുഷ രൂപം ഉയര്‍ത്തെഴുന്നേറ്റു വന്നു. ശരീരത്തില്‍ നിന്നും താഴേക്ക് ഊര്‍ന്നൊഴുകുന്ന ജലത്തുള്ളികളെ വക വെയ്ക്കാതെ സ്വിമ്മിംഗ് ട്രങ്ക്സ് മാത്രം ധരിച്ച ഉരുക്കു പോലത്തെ ആ വെളുത്ത രൂപം മുന്നോട്ട് ചുവടുകള്‍ വെച്ചു. അയാളുടെ മുതുകിലും മറ്റും വെടിയുണ്ടകള്‍ തറച്ചു കയറിയതിന്‍റേയും ഏതാനും മുറിവുകളുടെയും മായാത്ത പാടുകള്‍ തെളിഞ്ഞിരുന്നു. കറുത്ത സ്യൂട്ടും കോട്ടും ധരിച്ച രണ്ടുപേര്‍ ആ പുരുഷ രൂപത്തെ കണ്ട് ശിരസ്സ് താഴ്ത്തി വണങ്ങി നിന്നു. മറ്റൊരാള്‍ ടര്‍ക്കി വസ്ത്രവുമായി ഓടിയെത്തി അയാളെ പുതപ്പിച്ചു. അതിന്‍റെ അരയിലെ റിബ്ബണ്‍ കെട്ടി നിര്‍ത്തി അയാള്‍ തന്‍റെ ചുവടുകള്‍ മുന്നോട്ട് തന്നെ വെയ്ക്കുകയായിരുന്നു. ഒടുവില്‍ ബംഗ്ലാവിന്‍റെ രഹസ്യ ബേസ്മെന്‍റില്‍ ആ നടത്തം അവസാനിച്ചു. അവിടെ ഒരു യുവാവിനെ ഏതാനും ആളുകള്‍ ക്രൂരമായി മര്‍ദ്ധിക്കുന്നുണ്ടായിരുന്നു. അവന്‍ പൂര്‍ണ്ണമായും നഗ്നനായിരുന്നു. വായില്‍ തുണി തിരുകിയിരുന്നു. കൈകള്‍ പിന്നിലേക്ക് ബന്ദിച്ചിരുന്നു. തങ്ങളിലേക്ക് നടന്നെത്തിയ ഉരുക്കു രൂപത്തെ കണ്ടതും അവര്‍ ബഹുമാനത്തോടെ എഴുന്നേറ്റു നിന്നു. ക്രൂരമായ പ്രഹരങ്ങളേറ്റ് രക്തം വാര്‍ന്ന് തറയില്‍ കിടക്കുന്ന ആ യുവാവ് വേദന നിറഞ്ഞ ശിരസുയര്‍ത്തി ഒന്നു നോക്കി. തന്നെ ഇനിയൊന്നും ചെയ്യരുതെന്ന ദയനീയമായ യാചന അവന്‍റെ കണ്ണുകളില്‍ വല്ലാതെ തെളിയുന്നു. വന്നു നിന്ന ആ ഉരുക്കു രൂപം യുവാവിനെ നോക്കി വലതു കൈ നീട്ടി. ഉടന്‍ തന്നെ കറുത്ത സ്യൂട്ട് ധരിച്ച മറ്റൊരാള്‍ വലിയൊരു കഠാര അയാള്‍ക്ക് സമ്മാനിച്ചു. ക്രൂരമായ ചിരി ചുണ്ടില്‍ വിടര്‍ത്തി അയാള്‍ യുവാവിനെ നോക്കി. അരുത്.. അരുതെന്ന് ആ കണ്ണുകള്‍ യാചിച്ചു കൊണ്ടേയിരുന്നു. വലയില്‍ വീണുപോയ മീന്‍ കുഞ്ഞിനെ പോലെ പിടയുന്ന ആ യുവാവ് മറ്റാരും ആയിരുന്നില്ല. കൃഷ്ണ ഹോട്ടലില്‍ കരണിനും ടീമിനും ഭക്ഷണം വിളമ്പിയ അതേ മുപ്പത്തിയൊന്നു വയസ്സുകാരനായിരുന്നു അത്..! *********************************************************************************************************************** നടുക്കം മാറാതെ കരണ്‍ തരിച്ചു നില്‍ക്കേ എക്സ് തുടര്‍ന്നു : "ഇന്ത്യന്‍ റോ ഇന്‍റലിജന്‍റ് മിസ്റ്റര്‍ കരണിന് ഇതെന്തുപറ്റി?! പതറി പോയോ നീ?! ഭയന്നു പോയോ നീ?! ഇല്ല, നീ ഭയക്കാന്‍ പാടില്ല. ഭയന്നു നിലവിളിക്കാന്‍ നീ പോകുന്നതേയുള്ളൂ കരണ്‍." അയാളുടെ കണ്ണുകളില്‍ അഗ്നി നിറഞ്ഞു. "ഇതൊരു സാധാരണ ബോംബ് സ്ഫോടനമാണെന്നാണോ നീ കരുതിയത് കരണ്‍. അല്ല..! അല്ലേയല്ല..! നീയെന്തു കരുതി, ഞങ്ങളെ സമര്‍ത്ഥമായി നീ കണ്ടു പിടിച്ചെന്നോ??! മഠയാ, എങ്കില്‍ നിനക്കു തെറ്റി. മറ്റേതോ രാജ്യത്ത് ഒളിച്ചു കഴിയുന്ന നിന്നെ ഈ ഇന്ത്യയില്‍ എത്തിക്കാനുള്ള പ്ലാനുകളില്‍ ഒന്നു മാത്രമാണ് ആ ബോംബ് ബ്ലാസ്റ്റ്.! യഥാര്‍ത്ഥത്തില്‍ നീ ഞങ്ങളെയല്ല, ഞങ്ങള്‍ നിന്നെയാണ് കണ്ടെത്തിയതും കളത്തില്‍ ഇറക്കിയതും.!" ഒന്നും പിടികിട്ടാതെ കരണ്‍ ചിന്താകുലനായി. അവന്‍റെ ശിരസ്സ് വല്ലാതെ വേദനിച്ചു. സഞ്ജനയുടെ നോട്ടത്തില്‍ സംശയങ്ങള്‍ കുമിഞ്ഞു വന്നു. അവള്‍ നിശബ്ദം നിന്നു. "ഇതൊരു പ്രതികാരമാണ് കരണ്‍. പണ്ടെങ്ങോ നീ കൈ വിട്ടുപോയ പ്രതികാര കഥ. അതാണ് ഇവിടെ സംഭവിച്ചു കൊണ്ടിരിക്കുന്നത്." "ആരാണ് നീ?! എന്തൊക്കെയാണ് നീ പുലമ്പുന്നത്? ആര്‍ക്കാണ് എന്നോടിത്ര പക?!" കരണ്‍ ആക്രോഷിച്ചു. "ഹഹഹഹഹ..! ഇനിയും നിനക്കത് മനസിലായില്ലെങ്കില്‍ ഈ രാത്രി തന്നെ നീ എല്ലാം അറിയും കരണ്‍..! ഹഹഹഹ..!' എക്സിന്‍റെ രാക്ഷസ ചിരി അന്തരീക്ഷത്തെ കൂടുതല്‍ ഭയാനമാക്കി. അത് ഭിത്തികളില്‍ തട്ടി പ്രതിധ്വനിച്ചു കൊണ്ടേയിയുന്നു. ഠേ..!! പെട്ടെന്നായിരുന്നു ആ വെടിയൊച്ച കരണ്‍ കേട്ടത്. അവന്‍ വെട്ടി തിരിഞ്ഞു നോക്കിയപ്പോള്‍ കണ്ടത് വെടിയേറ്റ് സഞ്ജന തെറിച്ചു വീഴുന്നതായിരുന്നു. കാല്‍ വിരല്‍ മുതല്‍ മുഴുവന്‍ അടിപതറി, കണക്കുകള്‍ പിഴച്ചവനെ പോലെ കരണ്‍ ഭയന്നു പോയി. അവന്‍ സഞ്ജനയെ കോരിയെടുക്കുമ്പോഴും മിസ്റ്റര്‍ എക്സ് അട്ടഹസിച്ചു കൊണ്ടേയിരുന്നു. ഹഹഹഹഹഹ.....!!! ((തുടരും))🔥 രചന : കണ്ണൂർകാരൻ 🥰🥰🥰🥰🥰 #📔 കഥ #🧟 പ്രേതകഥകൾ! #📙 നോവൽ #✍ തുടർക്കഥ #🕵️‍♀️ കുറ്റാന്വേഷണ കഥകൾ