പഴയകാലത്തെപ്പറ്റി പറയാൻ നൂറു നാവാണ് മനുഷ്യരിൽ പലർക്കും .. പക്ഷേ, വേറേ പലർക്കുമത് ഓർക്കാൻപോലും ഇഷ്ടമല്ലാത്ത വേദനകളാണ് !! ചിലർക്കത് കളിപ്പാട്ടങ്ങളുടെ കിലുക്കമാണെങ്കിൽ, മറ്റു പലർക്കുമത് വിശന്നവയറിൻ്റെ നോവാണ് ! വീഴ്ചകളുടെ ആഴം കണ്ടവർക്ക് പിന്നീട് വരാനിരിക്കുന്ന ഒരു താഴ്ചയും ഭയമുണ്ടാക്കില്ല. അവർ , അവരുടെ ജീവിതം തകർച്ചകളിൽ നിന്ന് തുന്നിച്ചേർത്തതാണ് നനുത്ത മണ്ണിൽ വളരുന്ന ചെടികൾക്ക് ചെറിയൊരു കാറ്റടിച്ചാൽ പോലും വേരുകൾക്ക് ഇളക്കം തട്ടും. പാറയിടുക്കുകളിൽ, കൊടുങ്കാറ്റുകളോട് പോരാടി വളരുന്ന വന്മരങ്ങളുടെ വേരുകൾ ഭൂമിയുടെ ആഴങ്ങളിലേക്കാണ് ഇറങ്ങിച്ചെല്ലുന്നത്. അടിത്തറ ഇളക്കുന്ന കാറ്റുകൾ ആ മരങ്ങളെ ആടിയുലച്ചേക്കാം, പക്ഷേ അവയെ വീഴ്ത്താൻ കഴിയില്ല. ഭൂതകാലത്തിൽ കഠിനമായ പ്രതിസന്ധികളിലൂടെ കടന്നുപോയ മനുഷ്യരും ഇതുപോലെയാണ്. അനുഭവങ്ങളുടെ തീക്കാറ്റിൽ ഉലഞ്ഞുലഞ്ഞ് ഒടുവിൽ പാറപോലെ ഉറച്ചുപോയവരാണവർ !! കഠിനമായ വേദനകളുടെയും കണ്ണീരിന്റെയും ഭൂതകാലം ഒരു മനുഷ്യനെ കൂടുതൽ കരുത്തനാക്കിമാറ്റും .. നഷ്ടപ്പെടാൻ ഒന്നുമില്ലാത്ത അവസ്ഥയല്ല അത്, എന്ത് നഷ്ടപ്പെട്ടാലും വീണ്ടും പൂത്തുലയാൻ കഴിയുമെന്ന ആത്മവിശ്വാസമാണത് .. വീഴ്ചകൾ അവരെ ഭയപ്പെടുത്തുന്നില്ല, വീണിടത്തുനിന്ന് എങ്ങനെ എഴുന്നേൽക്കണമെന്ന് അവർ പഠിച്ചിട്ടുണ്ടാവും .. അവർ സ്വന്തം ജീവിതം കൊണ്ട് പഠിച്ചവരാണ്. ആടിയുലഞ്ഞ ഭൂതകാലമുള്ളവർക്ക് ചുറ്റും അനുഭവങ്ങളുടെ ഒരു അദൃശ്യ കവചമുണ്ട്. ... അത്രമേൽ സുന്ദരമല്ലാത്ത ഭൂതകാലമാണ് മനുഷ്യരെ അത്രമേൽ കരുത്തരാക്കുന്നത് !! അവർക്കൊരിക്കലും പരാജയങ്ങളെ ഭയമുണ്ടാകില്ല .. അവരെ ഭയപ്പെടുത്താൻ ആർക്കും കഴിയുകയുമില്ല .. അല്ലെങ്കിലും, തോറ്റു തോറ്റ് തോൽവിയോടുള്ള പേടിമാറിയ മനുഷ്യരെയൊക്കെ ആർക്കാണ് ഭയപ്പെടുത്താനാവുക ? ........................ ♥️✍️ #✍️Life_Quotes #👨‍👨‍👧‍👦 ജീവിതം #💭 Best Quotes #💓 ജീവിത പാഠങ്ങള്‍ #🙋‍♀️ എൻ്റെ സ്റ്റാറ്റസുകൾ ˡⁱˢᵗᵉⁿᵉʳ ⁱⁿ ˢⁱˡᵉⁿᶜᵉ