#ଶୁଭ ପ୍ରଭାତ 🌄 #🌞ସୁପ୍ରଭାତ🌞 #ଜୟ ଶ୍ରୀ ରାମ #🙏ଜୟ ଶ୍ରୀରାମ #🤰ମୋ ମା'🤗
ଜଗଦବନ-ବିଧୌ ତ୍ୱଂ ଜାଗରୂକା ଭବାନି
ତବ ତୁ ଜନନି ନିଦ୍ରାମାତ୍ମବତ୍ କଲ୍ପୟିତ୍ୱା ।
ପ୍ରତିଦିବସମହଂ ତ୍ୱାଂ ବୋଧୟାମି ପ୍ରଭାତେ
ତ୍ୱୟି କୃତମପରାଧଂ ସର୍ୱମେତଂ କ୍ଷମସ୍ୱ ॥ ୧॥
ଯଦି ପ୍ରଭାତଂ ତବ ସୁପ୍ରଭାତଂ
ତଦା ପ୍ରଭାତଂ ମମ ସୁପ୍ରଭାତମ୍ ।
ତସ୍ମାତ୍ ପ୍ରଭାତେ ତବ ସୁପ୍ରଭାତଂ
ବକ୍ଷ୍ୟାମି ମାତଃ କୁରୁ ସୁପ୍ରଭାତମ୍ ॥ ୨॥
ଗୁରୁ ଧ୍ୟାନମ୍ ।
ଯସ୍ୟାଙ୍ଘ୍ରିପଦ୍ମ-ମକରନ୍ଦ-ନିଷେବଣାତ୍ ତ୍ୱଂ
ଜିହ୍ୱାଂ ଗତାଽସି ବରଦେ ମମ ମନ୍ଦବୁଦ୍ଧେଃ ।
ଯସ୍ୟାମ୍ବ ନିତ୍ୟମନଘେ ହୃଦୟେ ବିଭାସି
ତଂ ଚନ୍ଦ୍ରଶେଖର-ଗୁରୁଂ ପ୍ରଣମାମି ନିତ୍ୟମ୍ ॥ ୩॥
ଜୟେଜ୍ଜୟେନ୍ଦ୍ରୋ ଗୁରୁଣା ଗୃହୀତୋ
ମଠାଧିପତ୍ୟେ ଶଶିଶେଖରେଣ ।
ଯଥା ଗୁରୁସ୍ସର୍ୱ-ଗୁଣୋପପନ୍ନୋ
ଜୟତ୍ୟସୌ ମଙ୍ଗଲମାତନୋତୁ ॥ ୪॥
ଶୁଭଂ ଦିଶତୁ ନୋ ଦେବୀ କାମାକ୍ଷୀ ସର୍ୱମଙ୍ଗଲା
ଶୁଭଂ ଦିଶତୁ ନୋ ଦେବୀ କାମକୋଟୀ-ମଠେଶଃ ।
ଶୁଭଂ ଦିଶତୁ ତଚ୍ଛିଷ୍ୟଃ ସଦ୍ଗୁରୁର୍ନୋ ଜୟେନ୍ଦ୍ରୋ
ସର୍ୱଂ ମଙ୍ଗଲମେବାସ୍ତୁ ମଙ୍ଗଲାନି ଭବନ୍ତୁ ନଃ ॥ ୫॥
॥ ଶୁଭମ୍ ॥
॥ ଶ୍ରୀଃ ॥
କାମାକ୍ଷି ଦେବ୍ୟମ୍ବ ତବାର୍ଦ୍ର-ଦୃଷ୍ଟ୍ୟା
ମୂକଃ ସ୍ୱୟଂ ମୂକକବିର୍ୟଥାଽସୀତ୍ ।
ତଥା କୁରୁ ତ୍ୱଂ ପରମେଶ-ଜାୟେ
ତ୍ୱତ୍ପାଦ-ମୂଲେ ପ୍ରଣତଂ ଦୟାର୍ଦ୍ରେ ॥
ଉତ୍ତିଷ୍ଠୋତ୍ତିଷ୍ଠ ବରଦେ ଉତ୍ତିଷ୍ଠ ଜଗଦୀଶ୍ୱରି ।
ଉତ୍ତିଷ୍ଠ ଜଗଦାଧାରେ ତ୍ରୈଲୋକ୍ୟଂ ମଙ୍ଗଲଂ କୁରୁ ॥ ୧॥
ଶୃଣୋଷି କଚ୍ଚିଦ୍-ଧ୍ୱନିରୁତ୍ଥିତୋଽୟମ୍
ମୃଦଙ୍ଗଭେରୀ-ପଟହାନକାନାମ୍ ।
ବେଦଧ୍ୱନିଂ ଶିକ୍ଷିତ-ଭୂସୁରାଣାମ୍ ।
ଶୃଣୋଷି ଭଦ୍ରେ କୁରୁ ସୁପ୍ରଭାତମ୍ ॥ ୨॥
ଶୃଣୋଷି ଭଦ୍ରେ ନନୁ ଶଙ୍ଖ-ଘୋଷମ୍
ବୈତାଲିକାନାଂ ମଧୁରଂ ଚ ଗାନମ୍ ।
ଶୃଣୋଷି ମାତଃ ପିକ-କୁକ୍କୁଟାନାମ୍
ଧ୍ୱନିଂ ପ୍ରଭାତେ କୁରୁ ସୁପ୍ରଭାତମ୍ ॥ ୩॥
ମାତର୍ନିରୀକ୍ଷ୍ୟ ବଦନଂ ଭଗବାନ୍ ଶଶାଙ୍କୋ
ଲଜ୍ଜାନ୍ୱିତଃ ସ୍ୱୟମହୋ ନିଲୟଂ ପ୍ରବିଷ୍ଟଃ ।
ଦ୍ରଷ୍ଟୁଂ ତ୍ୱଦୀୟ ବଦନଂ ଭଗବାନ୍ ଦିନେଶୋ
ହ୍ୟାୟାତି ଦେବି ସଦନଂ କୁରୁ ସୁପ୍ରଭାତମ୍ ॥ ୪॥
ପଶ୍ୟାମ୍ବ କେଚିଦ୍-ଧୃତପୂର୍ଣକୁମ୍ଭାଃ
କେଚିଦ୍-ଦୟାର୍ଦ୍ରେ ଧୃତପୁଷ୍ପମାଲାଃ ।
କାଚିତ୍ ଶୁଭାଙ୍ଗ୍ୟୋ ନନୁ ବାଦ୍ୟହସ୍ତାଃ
ତିଷ୍ଠନ୍ତି ତେଷାଂ କୁରୁ ସୁପ୍ରଭାତମ୍ ॥ ୫॥
ଭେରୀମୃଦଙ୍ଗ-ପଣବାନକ-ବାଦ୍ୟହସ୍ତାଃ
ସ୍ତୋତୁଂ ମହେଶଦୟିତେ ସ୍ତୁତି-ପାଠକାସ୍ତ୍ୱାମ୍ ।
ତିଷ୍ଠନ୍ତି ଦେବି ସମୟଂ ତବ କାଙ୍କ୍ଷମାଣାଃ
ହ୍ୟୁତ୍ତିଷ୍ଠ ଦିବ୍ୟଶୟନାତ୍ କୁରୁ ସୁପ୍ରଭାତମ୍ ॥ ୬॥
ମାତର୍ନିରୀକ୍ଷ୍ୟ ବଦନଂ ଭଗବାନ୍ ତ୍ୱଦୀୟମ୍
ନୈବୋତ୍ଥିତଃ ଶଶିଧିୟା ଶୟିତସ୍ତବାଙ୍କେ ।
ସମ୍ବୋଧୟାଶୁ ଗିରିଜେ ବିମଲଂ ପ୍ରଭାତମ୍
ଜାତଂ ମହେଶଦୟିତେ କୁରୁ ସୁପ୍ରଭାତମ୍ ॥ ୭॥
ଅନ୍ତଶ୍ଚରନ୍ତ୍ୟାସ୍ତବ ଭୂଷଣାନାମ୍
ଝଲ୍ଝଲ୍ଧ୍ୱନିଂ ନୂପୁର-କଙ୍କଣାନାମ୍ ।
ଶ୍ରୁତ୍ୱା ପ୍ରଭାତେ ତବ ଦର୍ଶନାର୍ଥୀ
ଦ୍ୱାରି ସ୍ଥିତୋଽହଂ କୁରୁ ସୁପ୍ରଭାତମ୍ ॥ ୮॥
ବାଣୀ ପୁସ୍ତକମମ୍ବିକେ ଗିରିସୁତେ ପଦ୍ମାନି ପଦ୍ମାସନା
ରମ୍ଭା ତ୍ୱମ୍ବର-ଡମ୍ବରଂ ଗିରିସୁତା ଗଙ୍ଗା ଚ ଗଙ୍ଗାଜଲମ୍ ।
କାଲୀ ତାଲୟୁଗଂ ମୃଦଙ୍ଗ-ଯୁଗଲଂ ବୃନ୍ଦା ଚ ନନ୍ଦା ତଥା ।
ନୀଲା ନିର୍ମଲ-ଦର୍ପଣଂ ଧୃତବତୀ ତାସାଂ ପ୍ରଭାତଂ ଶୁଭମ୍ ॥ ୯॥
ଉତ୍ଥାୟ ଦେବି ଶୟନାଦ୍ଭଗବାନ୍ ପୁରାରିଃ
ସ୍ନାତୁଂ ପ୍ରୟାତି ଗିରିଜେ ସୁରଲୋକ-ନଦ୍ୟାମ୍ ।
ନୈକୋ ହି ଗନ୍ତୁମନଘେ ରମତେ ଦୟାର୍ଦ୍ରେ
ହ୍ୟୁତ୍ତିଷ୍ଠ ଦେବି ଶୟନାତ୍ କୁରୁ ସୁପ୍ରଭାତମ୍ ॥ ୧୦॥
ପଶ୍ୟାମ୍ବ କେଚିତ୍ଫଲ-ପୁଷ୍ପହସ୍ତାଃ
କେଚିତ୍ପୁରାଣାନି ପଠନ୍ତି ମାତଃ ।
ପଠନ୍ତି ବେଦାନ୍ବହବସ୍ତବାଗ୍ରେ
ତେଷାଂ ଜନାନାଂ କୁରୁ ସୁପ୍ରଭାତମ୍ ॥ ୧୧॥
ଲାବଣ୍ୟ-ଶେବଧିମବେକ୍ଷ୍ୟ ଚିରଂ ତ୍ୱଦୀୟମ୍
କନ୍ଦର୍ପ-ଦର୍ପଦଲନୋଽପି ବଶଂ ଗତସ୍ତେ ।
କାମାରି-ଚୁମ୍ବିତ-କପୋଲୟୁଗଂ ତ୍ୱଦୀୟଂ
ଦ୍ରଷ୍ଟୁଂ ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୧୨॥
ଗାଙ୍ଗେୟ-ତୋୟମମବାହ୍ୟ ମୁନୀଶ୍ୱରାସ୍ତ୍ୱାଂ
ଗଙ୍ଗାଜଲୈଃ ସ୍ନପୟିତୁଂ ବହବୋ ଘଟାଂଶ୍ଚ ।
ଧୃତ୍ୱା ଶିରଃସୁ ଭବତୀମଭିକାଙ୍କ୍ଷମାଣାଃ
ଦ୍ୱାରି ସ୍ଥିତା ହି ବରଦେ କୁରୁ ସୁପ୍ରଭାତମ୍ ॥ ୧୩॥
ମନ୍ଦାର-କୁନ୍ଦ-କୁସୁମୈରପି ଜାତିପୁଷ୍ପୈଃ
ମାଲାକୃତା ବିରଚିତାନି ମନୋହରାଣି ।
ମାଲ୍ୟାନି ଦିବ୍ୟ-ପଦୟୋରପି ଦାତୁମମ୍ବ
ତିଷ୍ଠନ୍ତି ଦେବି ମୁନୟଃ କୁରୁ ସୁପ୍ରଭାତମ୍ ॥ ୧୪॥
କାଞ୍ଚୀକଲାପ-ପରିରମ୍ଭ-ନିତମ୍ବବିମ୍ବମ୍
କାଶ୍ମୀର-ଚନ୍ଦନ-ବିଲେପିତ-କଣ୍ଠଦେଶମ୍ ।
କାମେଶ-ଚୁମ୍ବିତ-କପୋଲମୁଦାରନାସାଂ
ଦ୍ରଷ୍ଟୁଂ ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୧୫॥
ମନ୍ଦସ୍ମିତଂ ବିମଲଚାରୁ-ବିଶାଲନେତ୍ରମ୍
କଣ୍ଠସ୍ଥଲଂ କମଲ-କୋମଲ-ଗର୍ଭଗୌରମ୍ ।
ଚକ୍ରାଙ୍କିତଂ ଚ ଯୁଗଲଂ ପଦୟୋର୍ମୃଗାକ୍ଷି
ଦ୍ରଷ୍ଟୁଂ ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୧୬॥
ମନ୍ଦସ୍ମିତଂ ତ୍ରିପୁରନାଶକରଂ ପୁରାରେଃ
କାମେଶ୍ୱର-ପ୍ରଣୟକୋପହରଂ ସ୍ମିତଂ ତେ ।
ମନ୍ଦସ୍ମିତଂ ବିପୁଲହାସମବେକ୍ଷିତୁଂ ତେ
ମାତଃ ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୧୭॥
ମାତା ଶିଶୂନାଂ ପରିରକ୍ଷଣାର୍ଥମ୍
ନ ଚୈବ ନିଦ୍ରାବଶମେତି ଲୋକେ ।
ମାତା ତ୍ରୟାଣାଂ ଜଗତାଂ ଗତିସ୍ତ୍ୱମ୍
ସଦା ବିନିଦ୍ରା କୁରୁ ସୁପ୍ରଭାତମ୍ ॥ ୧୮॥
ମାତର୍ମୁରାରି-କମଲାସନ-ବନ୍ଦିତାଙ୍ଘ୍ର୍ୟାଃ
ହୃଦ୍ୟାନି ଦିବ୍ୟମଧୁରାଣି ମନୋହରାଣି ।
ଶ୍ରୋତୁଂ ତବାମ୍ବ ବଚନାନି ଶୁଭପ୍ରଦାନି
ଦ୍ୱାରି ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୧୯॥
ଦିଗମ୍ବରୋ ବ୍ରହ୍ମକପାଲପାଣିଃ
ବିକୀର୍ଣକେଶଃ ଫଣିବେଷ୍ଟିତାଙ୍ଗଃ ।
ତଥାଽପି ମାତସ୍ତବ ଦେବିସଙ୍ଗାତ୍
ମହେଶ୍ୱରୋଽଭୂତ୍ କୁରୁ ସୁପ୍ରଭାତମ୍ ॥ ୨୦॥
ଅୟି ତୁ ଜନନି ଦତ୍ତ-ସ୍ତନ୍ୟପାନେନ ଦେବି
ଦ୍ରବିଡ-ଶିଶୁରଭୂଦ୍ୱୈ ଜ୍ଞାନସମ୍ବନ୍ଧମୂର୍ତିଃ ।
ଦ୍ରବିଡ-ତନୟ-ଭୁକ୍ତ-କ୍ଷୀରଶେଷଂ ଭବାନି
ବିତରସି ଯଦି ମାତଃ ସୁପ୍ରଭାତଂ ଭବେନ୍ମେ ॥ ୨୧॥
ଜନନି ତବ କୁମାରଃ ସ୍ତନ୍ୟପାନ-ପ୍ରଭାବାତ୍
ଶିଶୁରପି ତବ ଭର୍ତୁଃ କର୍ଣମୂଲେ ଭବାନି ।
ପ୍ରଣବ-ପଦ-ବିଶେଷଂ ବୋଧୟାମାସ ଦେବି
ଯଦି ମୟି ଚ କୃପା ତେ ସୁପ୍ରଭାତଂ ଭବେନ୍ମେ ॥ ୨୨॥
ତ୍ୱଂ ବିଶ୍ୱନାଥସ୍ୟ ବିଶାଲନେତ୍ରା
ହାଲାସ୍ୟ-ନାଥସ୍ୟ ନୁ ମୀନନେତ୍ରା ।
ଏକାମ୍ରନାଥସ୍ୟ ନୁ କାମନେତ୍ରା
କାମେଶଜାୟେ କୁରୁ ସୁପ୍ରଭାତମ୍ ॥ ୨୩॥
ଶ୍ରୀଚନ୍ଦ୍ରଶେଖର-ଗୁରୁର୍ଭଗବାନ୍ ଶରଣ୍ୟେ
ତ୍ୱତ୍ପାଦଭକ୍ତି-ଭରିତଃ ଫଲପୁଷ୍ପପାଣିଃ ।
ଏକାମ୍ରନାଥ-ଦୟିତେ ତବ ଦର୍ଶନାର୍ଥୀ
ତିଷ୍ଠତ୍ୟଯଂ ଯତିବରୋ ମମ ସୁପ୍ରଭାତମ୍ ॥ ୨୪॥
ଏକାମ୍ରନାଥ-ଦୟିତେ ନନୁ କାମପୀଠେ
ସମ୍ପୂଜିତାଽସି ବରଦେ ଗୁରୁଶଙ୍କରେଣ ।
ଶ୍ରୀଶଙ୍କରାଦି-ଗୁରୁବର୍ୟ-ସମର୍ଚିତାଙ୍ଘ୍ରିମ୍
ଦ୍ରଷ୍ଟୁଂ ସ୍ଥିତା ବୟମୟେ କୁରୁ ସୁପ୍ରଭାତମ୍ ॥ ୨୫॥
ଦୁରିତ-ଶମନ-ଦକ୍ଷୌ ମୃତ୍ୟୁ-ସନ୍ତ୍ରାସ-ଦକ୍ଷୌ
ଚରଣମୁପଗତାନାଂ ମୁକ୍ତିଦୌ ଜ୍ଞାନଦୌ ତୌ ।
ଅଭୟବରଦ-ହସ୍ତୌ ଦ୍ରଷ୍ଟୁମମ୍ବ ସ୍ଥିତୋଽହଂ
ତ୍ରିପୁରଦଲନ-ଜାୟେ ସୁପ୍ରଭାତଂ ମମାର୍ୟେ ॥ ୨୬॥
ମାତସ୍ତ୍ୱଦୀୟ-ଚରଣଂ ହରିପଦ୍ମଜାଦ୍ୟୈଃ
ବନ୍ଦ୍ୟଂ ରଥାଙ୍ଗ-ସରସୀରୁହ-ଶଙ୍ଖ-ଚିହ୍ନମ୍ ।
ଦ୍ରଷ୍ଟୁଂ ଚ ଯୋଗିଜନ-ମାନସ-ରାଜହଂସଂ
ଦ୍ୱାରି ସ୍ଥିତୋଽସ୍ମି ବରଦେ କୁରୁ ସୁପ୍ରଭାତମ୍ ॥ ୨୭॥
ପଶ୍ୟନ୍ତୁ କେଚିଦ୍ୱଦନଂ ତ୍ୱଦୀୟଂ
ସ୍ତୁବନ୍ତୁ କଲ୍ୟାଣ-ଗୁଣାଂସ୍ତବାନ୍ୟେ ।
ନମନ୍ତୁ ପାଦାବ୍ଜ-ଯୁଗଂ ତ୍ୱଦୀୟାଃ
ଦ୍ୱାରି ସ୍ଥିତାନାଂ କୁରୁ ସୁପ୍ରଭାତମ୍ ॥ ୨୮॥
କେଚିତ୍ସୁମେରୋଃ ଶିଖରେଽତିତୁଙ୍ଗେ
କେଚିନ୍ମଣିଦ୍ୱୀପବରେ ବିଶାଲେ ।
ପଶ୍ୟନ୍ତୁ କେଚିତ୍ତ୍ୱମୃତାବ୍ଧି-ମଧ୍ୟେ
ପଶ୍ୟାମ୍ୟହଂ ତ୍ୱାମିହ ସୁପ୍ରଭାତମ୍ ॥ ୨୯॥
ଶମ୍ଭୋର୍ୱାମାଙ୍କ-ସଂସ୍ଥାଂ ଶଶିନିଭ-ବଦନାଂ ନୀଲ-ପଦ୍ମାୟତାକ୍ଷୀଂ
ଶ୍ୟାମାଙ୍ଗାଂ ଚାରୁହାସାଂ ନିବିଡତର-କୁଚାଂ ପକ୍ୱ-ବିମ୍ବାଧରୋଷ୍ଠୀମ୍ ।
କାମାକ୍ଷୀଂ କାମଦାତ୍ରୀଂ କୁଟିଲ-କଚଭରାଂ ଭୂଷଣୈର୍ଭୂଷିତାଙ୍ଗୀଂ
ପଶ୍ୟାମଃ ସୁପ୍ରଭାତେ ପ୍ରଣତ-ଜନିମତାମଦ୍ୟ ନଃ ସୁପ୍ରଭାତମ୍ ॥ ୩୦॥
କାମପ୍ରଦା କଲ୍ପତରୁର୍ୱିଭାସି
ନାନ୍ୟା ଗତିର୍ମେ ନନୁ ଚାତକୋଽହମ୍ ।
ବର୍ଷସ୍ୟମୋଘାଃ କନକାମ୍ବୁଧାରାଃ
କାଶ୍ଚିତ୍ତୁ ଧାରା ମୟି କଲ୍ପୟାଶୁ ॥ ୩୧॥
ତ୍ରିଲୋଚନ-ପ୍ରିୟାଂ ବନ୍ଦେ ବନ୍ଦେ ତ୍ରିପୁରସୁନ୍ଦରୀମ୍ ।
ତ୍ରିଲୋକ-ନାୟିକାଂ ବନ୍ଦେ ସୁପ୍ରଭାତଂ ମମାମ୍ବିକେ ॥ ୩୨॥
କୃତଜ୍ଞତା
କାମାକ୍ଷି ଦେବ୍ୟମ୍ବ ତବାର୍ଦ୍ର-ଦୃଷ୍ଟ୍ୟା
କୃତଂ ମୟେଦଂ ଖଲୁ ସୁପ୍ରଭାତମ୍ ।
ସଦ୍ୟଃ ଫଲଂ ମେ ସୁଖମମ୍ବ ଲବ୍ଧଂ
ତଥା ଚ ମେ ଦୁଃଖଦଶା ଗତା ହି ॥ ୩୩॥
ପ୍ରାର୍ଥନା
ଯେ ବା ପ୍ରଭାତେ ପୁରତସ୍ତବାର୍ୟେ
ପଠନ୍ତି ଭକ୍ତ୍ୟା ନନୁ ସୁପ୍ରଭାତମ୍ ।
ଶୃଣ୍ୱନ୍ତି ଯେ ବା ତ୍ୱୟି ବଦ୍ଧଚିତ୍ତାଃ
ତେଷାଂ ପ୍ରଭାତଂ କୁରୁ ସୁପ୍ରଭାତମ୍ ॥ ୩୪॥
