#❤ സ്നേഹം മാത്രം 🤗 #🙏 ഭക്തി Status #🙋‍♀️ എൻ്റെ സ്റ്റാറ്റസുകൾ #💑 സ്നേഹം #വാടാമലരുകൾ ശ്രീ മാത്രേ നമഃ 🙏* *മൂകാംബിക ക്ഷേത്രം - ചരിത്രം ഭാഗം 32* *രഥത്തിൽ സംപ്രീതയായി ഉപവിഷ്ടയായ ദേവി താഴെ നിൽക്കുന്ന ഭക്തർക്കു അനുഗ്രഹം ചൊരിയുന്നു. ഓരോ ചക്രത്തിലും ഓരോ ദേവന്മാർ സന്നിഹിതരാണെന്നാണ് വിശ്വാസം; അതിലൂടെ എല്ലാ ദേവതകളുടെയും സാന്നിധ്യം രഥത്തിൽ ഉൾക്കൊള്ളപ്പെട്ടിരിക്കുന്നു. ഇതാണ് രഥത്തിന്റെ മഹത്തായ പ്രാധാന്യം. രഥം നിർമിക്കുമ്പോൾ പ്രത്യേക അളവുകളും മാനദണ്ഡങ്ങളും പാലിക്കപ്പെടുന്നു. വാസ്തുശാസ്ത്രസിദ്ധാന്തങ്ങൾക്കും അതിൽ പ്രത്യേക പ്രാധാന്യമുണ്ട്. ദേവിയെ എഴുന്നള്ളിക്കുന്നതിന് മുമ്പ് രഥശുദ്ധി നിർബന്ധമാണ്. അതിനായി ഹോമവും ബലിയും നടത്താറുണ്ട്. ആചാരക്രമങ്ങൾ എല്ലാം പൂർത്തിയാക്കിയ ശേഷമാണ് അമ്മയെ രഥത്തിൽ എഴുന്നള്ളിക്കുന്നത്*. *കൊല്ലൂർ മൂകാംബിക ക്ഷേത്രത്തിലെ ദീപസ്തംഭത്തിനും മനുഷ്യശരീരത്തിനും തമ്മിൽ ആത്മീയബന്ധമുണ്ടെന്ന് ആചാരപരമായി പറയുന്നു. ദീപസ്തംഭം കുണ്ഡലിനി ശക്തിയുടെ പ്രതീകമായാണ് കണക്കാക്കുന്നത്. മനുഷ്യശരീരത്തിൽ അടങ്ങിയിരിക്കുന്ന ആന്തരിക ശക്തി മുകളിലേക്ക് ഉയരുന്നതിന്റെ പ്രതീകാത്മക അവതാരമാണ് അത്.* *പൂർവപീഠത്തിലാണ് ദീപസ്തംഭം സ്ഥിതി ചെയ്യുന്നത്. അതിന്റെ അടിഭാഗത്ത് അഷ്ടഗജങ്ങളും നാഗങ്ങളും കൊത്തുപ്പണി രൂപത്തിൽ കാണാം. അതിന് മുകളിൽ വലിയ ആനയുടെ രൂപവും, അതിനുമുകളിൽ മൂലാധാരചക്രത്തിന്റെ അധിപനായ ഗണപതിയും പ്രതിഷ്ഠിതനായിരിക്കുന്നു. ഗണപതി മൂലാധാരത്തിന്റെ അധിപനായിരിക്കുന്നതിന്റെ സന്ദേശം വ്യക്തമാണ് — മോക്ഷമാർഗത്തിൽ ഉണ്ടാകാവുന്ന വിഗ്നങ്ങൾ നീക്കുക എന്നത്. അതിനുമുകളിലാണ് സഹസ്രാരപത്മത്തിന്റെ പ്രതീകമായ ദീപം. മനുഷ്യന്റെ മനസ്സ് അന്തർമാർഗത്തിലൂടെ ഉയർന്ന് സഹസ്രാരചക്രത്തിലെത്തുമ്പോൾ ലഭിക്കുന്ന ആത്മജ്ഞാനത്തിന്റെയും മോക്ഷാനുഭവത്തിന്റെയും സൂചനയാണ് ഇത്. ദീപസ്തംഭത്തിന്റെ ഏറ്റവും മുകളിലായി സഹസ്രാരപത്മത്തെ അനുസ്മരിപ്പിക്കുന്ന താമരാകൃതിയും കാണാം.* *കൊല്ലൂർ മൂകാംബിക ക്ഷേത്രത്തിലെ ദീപസ്തംഭം അത്യുന്നതമായ ആത്മീയ പ്രതീകമാണ്. അത് കാണുന്നയുടൻ സഹസ്രാരപത്മം മനസ്സിൽ തെളിയണം എന്നതാണ് ആചാരപരമായ ഭാവം. ഇവിടെ നാഥദീപം തെളിയിക്കൽ പ്രധാന വഴിപാടുകളിലൊന്നാണ്.* *ക്ഷേത്രത്തിലെ നാലു പ്രധാന അർച്ചകർ — ഗോവിന്ദാഡിഗ, സുബ്രഹ്മണ്യാഡിഗ, നിത്യാനന്ദാഡിഗ, വിഗ്നേശ്വരാഡിഗ — ഇവരാണ് നിത്യപൂജകൾ നിർവഹിക്കുന്നത്. ഇവർ എല്ലാവരും ബിരുദാനന്തര ബിരുദധാരികളുംസംസ്കൃതപണ്ഡിതന്മാരുമാണ്. നാല് അർച്ചകരിൽ മൂന്നു പേർ ഒരേ കുടുംബത്തിൽപ്പെട്ടവരും ഒരാൾ പുറത്തുള്ള കുടുംബത്തിൽപ്പെട്ട ആളുമാണ്. കുടുംബത്തിൽ ആർക്കെങ്കിലും പുലവന്നാൽ പൂജാകർമ്മങ്ങൾക്ക് തടസ്സം വരാതിരിക്കാനായി പതിനെട്ടാണ്ടുകൾക്ക് മുമ്പ് ഈ സമ്പ്രദായം ആരംഭിച്ചതാണെന്ന് പറയപ്പെടുന്നു. ദിവസേന നടക്കുന്ന നാല് പ്രധാന പൂജകൾ ഇവർ നാലു പേരും ഊഴത്തിന് അനുസരിച്ച് നിർവഹിക്കുന്നു. കുടുംബാംഗങ്ങളുടെ തീരുമാനപ്രകാരം ചില വർഷങ്ങളിൽ രാമചന്ദ്രാഡിഗയും മുഖ്യാർച്ചകസ്ഥാനത്ത് വരാറുണ്ട്. നവരാത്രി പോലുള്ള വിശേഷാവസരങ്ങളിൽ നരസിംഹാഡിഗ, സീതാരാമാഡിഗ, മഞ്ജുനാഥാഡിഗ എന്നിവർ മേൽനോട്ടത്തിലും പൂജാകാര്യങ്ങളിലും സഹകരിക്കുന്നു. വൈകുന്നേരത്തെ ആരാധനകൾക്കും ആചാരനിഷ്ഠാനങ്ങൾക്കുമായി ഒരുക്കങ്ങൾ വൈകുന്നേരം ആറുമണിയോടെയാണ് ആരംഭിക്കുന്നത്.* *വൈകുന്നേരം കൊല്ലൂർ മൂകാംബിക ക്ഷേത്രത്തിൽ ദേവിക്കും എല്ലാ ഉപദേവതകൾക്കും വിശേഷമായി ആരതി നടത്തപ്പെടുന്നു. ഇത് ഭക്തർ അത്യന്തം ആകാംക്ഷയോടെ കാത്തിരിക്കുന്ന ദർശനമാണ്. വലിയ ഭക്തിഭാവത്തോടെയും ഉത്സാഹത്തോടെയും നടത്തപ്പെടുന്ന ഈ വൈകുന്നേരത്തെ ആരതി ക്ഷേത്രത്തിലെ പ്രധാന ആചാരങ്ങളിലൊന്നാണ്.* *ആരതിക്ക് മുന്നോടിയായി വൈകുന്നേരം ഏകദേശം 6.30-ഓടെ പ്രദോഷപൂജ നടക്കുന്നു. തുടർന്ന് വൈകുന്നേരം 7 മണിക്ക് ദേവതകൾക്ക് തുർത്ത് മംഗളാരതി നടത്തുന്നു. 7.30-ഓടെ സലാം മംഗളാരതി, രാത്രി 8.30-ന് ദേവന്മാർക്ക് ബലി മംഗളാരതി എന്നിവ അനുഷ്ഠിക്കുന്നു. ഏകദേശം 8.45-ഓടെ ദേവിയെയും പരിവാരദേവതകളെയും പ്രീതിപ്പെടുത്തുന്നതിനായി കാശ്യാ മംഗളാരതി നടത്തപ്പെടുന്നു.* *ഒരു ദിവസത്തിലെ അവസാന ചടങ്ങായ ഈ ആരാധനകൾക്ക് ശേഷം രാത്രി ഏകദേശം 9 മണിയോടെ ക്ഷേത്രവാതിൽ അടയ്ക്കുന്നു. അതിന് ശേഷം ആ ദിവസത്തേക്കുള്ള പൂജാക്രമങ്ങൾ അവസാനിക്കുന്നു. ക്ഷേത്രത്തിലെ പൂജാരിമാരുടെ അഭിപ്രായത്തിൽ പ്രദോഷകാലം അത്യന്തം പ്രാധാന്യമുള്ള സമയമാണ്. ഈ സമയത്ത് എല്ലാ ദേവി-ദേവന്മാരും സന്നിഹിതരായിരിക്കുമെന്ന് വിശ്വാസമുണ്ട്. അതുകൊണ്ടുതന്നെ പ്രദോഷക്കാലത്ത് നടത്തുന്ന പൂജകൾക്ക് പ്രത്യേക മഹത്വമുണ്ടെന്നാണ് പരമ്പരാഗത വിശ്വാസം.* *തുടരും.....* *എഴുതി സമർപ്പിക്കുന്നത് ജെ പി കെ നായർ (കണ്ണൻ സ്വാമി)*