ബൊമ്മലാട്ടം സീസൺ 2 വായിച്ചു തുടങ്ങും മുൻപ് ലിങ്കിൽ കയറി ആദ്യ ഭാഗങ്ങൾവായിക്കുക https://sharechat.com/post/mVeGO1D?d=n&ui=v64j8rk&e1=c#ബൊമ്മലാട്ടം S2 ((EP01)) തീര്‍ത്തും അപ്രതീക്ഷിതമായി കോബ തന്‍റെ അരയില്‍ നിന്നും തോക്കെടുത്ത് കാഞ്ചി വലിച്ചു. ഠേ..!! വലതു തോളില്‍ വെടിയുണ്ട തറച്ച് കരണ്‍ പിന്നോട്ട് തെറിച്ചു വീണു. അവന്‍ വേദനയാൽ പിടഞ്ഞു പോയി. ഒട്ടും പ്രതീക്ഷിക്കാതെ കോബ കരുക്കള്‍ നീക്കിയിരിക്കുന്നു. വേദനയുടെ കാഠിന്യം അവന്‍റെ ശിരസ്സില്‍ പോലും വിങ്ങി. ത്ഫൂ..!! ബാസ്റ്റര്‍ഡ്.!! കരണിന്‍റെ കണ്ണുകള്‍ ഉഗ്ര കോപത്താൽ കത്തി ജ്വലിച്ചു. വല്ല വിധേനെയും അവന്‍ എഴുന്നേറ്റ് നിന്നു. "ഈ കളി ഇതുകൊണ്ടും അവസാനിച്ചിട്ടില്ല കരണ്‍. ദി ബ്ലഡി ഹൂഡിമാൻ..!! ഇത് തുടര്‍ന്നുകൊണ്ടേയിരിക്കും." പറഞ്ഞു തീര്‍ത്തതും അയാള്‍ അടുത്ത വെടി പൊട്ടിക്കുകയായിരുന്നു. ഠേ..!! കാറ്റിനു പോലും കരണിനെ പിടിച്ചു നിര്‍ത്താന്‍ കഴിഞ്ഞില്ല. അടങ്ങാത്ത ആവേശത്തില്‍ അവനെ പിടിക്കാന്‍ ശ്രമിക്കുംതോറും താഴേക്ക് ഊര്‍ന്നു വീഴുന്നു. ആ നിമിഷം കരണിന്‍റെ നോട്ടം ആകാശത്തെ വെളിച്ചത്തിൽ അശേഷം ചലിക്കാതെ നിന്നു. അവിടെ മരിയയും അശ്വിനിയും തിളങ്ങി നില്‍ക്കുന്നു. വര്‍ഷങ്ങള്‍ മുമ്പ് മെക്സിക്കോയില്‍ സംഭവിച്ച ആ കഥ ആകാശത്തെ പ്രകാശത്തില്‍ തെളിയുന്നു.! *********************************************************************************************************************** ഏതാനും വര്‍ഷങ്ങള്‍ മുമ്പ്., വളരെ തന്ത്രപരമായും സാഹസികമായും കരണ്‍ അശ്വിനിയെ വലിയൊരു ആപത്തില്‍ നിന്നും രക്ഷിച്ചെടുത്തു. തന്നെ കരുതലോടെ സംരക്ഷിച്ച പുരുഷനോട് പ്രണയം മാത്രമായിരുന്നില്ല അശ്വിനിക്കുണ്ടായത്. അവളവനെ കൂടുതല്‍ ആരാധിക്കുകയുമായിരുന്നു. അശ്വിനിയെ പോലെയൊരു പെണ്‍കുട്ടിയെ സ്വന്തമാക്കാന്‍ ഏത് പുരുഷനും ആഗ്രഹിക്കും. തന്‍റെ ജീവിതത്തില്‍ പെണ്ണേ വേണ്ട എന്ന കരണിന്‍റെ പാറപോലത്തെ ഉറച്ച തീരുമാനം ചിന്നഭിന്നമാക്കി തകര്‍ത്തെറിയാന്‍ അശ്വിനിക്ക് കഴിഞ്ഞെങ്കില്‍ അവള്‍ തന്നെ യഥാര്‍ത്ഥ പെണ്ണ്. സ്നേഹത്തിന്‍റെ കൂറ്റന്‍ മല ഉള്ളില്‍ കൊണ്ടു നടക്കുന്ന പെണ്ണ്. മറ്റാര്‍ക്കും അശ്വിനിയെ വിട്ടു കൊടുക്കാന്‍ കരണും തയ്യാറല്ലായിരുന്നു. ഇരുവരുടെയും അഗാധമായ പ്രണയത്തിന്‍റെ തുടക്കത്തിന് മൊട്ടിട്ടു. എണ്ണിയാലൊടുങ്ങാത്ത സ്വത്ത് വകകള്‍ നോക്കി കൈകാര്യം ചെയ്യാന്‍ ഇളയച്ഛനെ തന്നെ അവള്‍ ഏല്‍പ്പിച്ചു. ഇതിനെല്ലാം വേണ്ടിയാണല്ലോ ഇക്കണ്ട ഭൂകമ്പങ്ങള്‍ അരങ്ങേറിയതും കരണ്‍ അവളുടെ ജീവിതത്തിലേക്ക് യാദൃശ്ചികമായി കടന്നു വന്നതും. വിവാഹ ശേഷം താന്‍ അത്രയേറെ സ്നേഹിക്കുന്ന തന്‍റെ പുരുഷനോടൊത്ത് പറപറക്കാന്‍ അശ്വിനി തിടുക്കം കൂട്ടിയതിന്‍റെ ഫലമായി സ്വിറ്റ്സര്‍ലന്‍ഡില്‍ ആ യാത്ര എത്തി നിന്നു. തന്‍റെ പ്രണയിനിയോടൊത്തുള്ള സന്തോഷകരമായ ജീവിതം വളരെയേറെ ആസ്വദിക്കുകയായിരുന്നു കരണ്‍. സ്നേഹം കൊണ്ട് അവനെ വീര്‍പ്പുമുട്ടിക്കുകയായിരുന്നു അശ്വിനി. സ്വിറ്റ്സര്‍ലന്‍ഡിന്‍റെ ഭംഗി ആസ്വദിക്കാന്‍ പോയതായിരുന്നു ഇരുവരും. സൂര്യ കിരണത്തിൽ അശ്വിനിയുടെ കണ്ണുകള്‍ തിളങ്ങുന്നത് അവനൊന്നു ശ്രദ്ധിച്ചു. വല്ലാത്തതരം തേജസ്സ് അവള്‍ക്കു ചുറ്റായി വലം ചെയ്യപ്പെട്ട് നില്‍ക്കുന്നു. ആ സൗന്ദര്യത്തില്‍ കരണ്‍ സ്വയം മറന്നു. തന്നില്‍ ഇമ വെട്ടാതെ നോക്കി നില്‍ക്കുന്ന കരണിന്‍റെ നേര്‍ക്ക് മനോഹരമായ ചിരി അവള്‍ തൊടുത്തു വിട്ടു. അത് ഹൃദയത്തിന്‍റെ കോണില്‍ തട്ടി ആഴ്ന്നിറങ്ങുന്ന അനുഭൂതി കരണ്‍ തിരിച്ചറിഞ്ഞു. അവനിൽ പ്രണയം നുരഞ്ഞു പൊന്തുന്നു. അശ്വിനിയുടെ അരക്കെട്ടില്‍ മെല്ലെ കൈ ചുറ്റി കരണ്‍ തന്നിലേക്കടുപ്പിച്ചു. അവളുടെ മുടിയിഴകളില്‍ വാത്സല്ല്യത്തോടെ തഴുകി. "നീ എന്നും എന്നെ വീഴ്ത്തിക്കൊണ്ടിരിക്കുകയാണ് അശ്വിനി. നിന്‍റെ സൗന്ദര്യം മാത്രമല്ല എന്നെ മയക്കിയത്. നിന്നിലെ നന്മയും എന്നെ കീഴ്പ്പെടുത്തി കളഞ്ഞു. പറയൂ.., എന്താണ് ഞാന്‍ നിനക്കു വേണ്ടി ചെയ്യേണ്ടത്? നീ എന്തു പറഞ്ഞാലും ഞാന്‍ അനുസരിക്കും.!" തെല്ലൊരു മന്ദഹാസം സൂര്യകാന്തിയെ പോലെ അവളില്‍ വിരിഞ്ഞു. "ഈ ജീവിതത്തില്‍ എനിക്ക് ഏറ്റവും സംരക്ഷണം തോന്നുക നിങ്ങള്‍ എന്‍റെയടുത്തുള്ളപ്പോള്‍ മാത്രമാണ് കരണ്‍. അല്ലാത്തപ്പോള്‍ ഭയത്തിന്‍റെ ഭാരം പേറിയ ജീവിതം മാത്രമായിരിക്കും എനിക്ക്. ഒരപേക്ഷയേ എനിക്കുള്ളൂ. എന്‍റെ കരണ്‍ എന്നും എന്നോടൊപ്പം ഉണ്ടാവണം. ഒരിക്കലും എന്നെ ഉപേക്ഷിക്കരുത്." അശ്വിനിയുടെ കണ്ണുകള്‍ കലങ്ങി. കണ്ഡമിടറി. അതിന് മറുപടിയെന്നോണം കരണിന്‍റെ ചുണ്ടുകള്‍ അവളുടെ ചുവന്ന അധരങ്ങളെ ഒപ്പിയെടുക്കുകയായിരുന്നു. ആ ചുംബനം നിറ മനസ്സോടെ അവള്‍ അതേ നില്‍പ്പില്‍ സ്വീകരിച്ചു. അതിന്‍റെ ചൂടില്‍ അവള്‍ സ്വയം മറന്നു. ഒടുവില്‍ അശ്വിനിയുടെ അധരങ്ങളെ സ്വതന്ത്രമാക്കി കവിളില്‍ കരണ്‍ വിരലോടിച്ചു. "ഇല്ല അശ്വിനി., ഒരാള്‍ക്കും ഒരു ശക്തിക്കും ഞാന്‍ നിന്നെ വിട്ടു കൊടുക്കില്ല. ഒരിടത്തും നീ തോല്‍ക്കില്ല. തോല്‍ക്കാന്‍ ഞാന്‍ സമ്മതിക്കില്ല. അവസാന ശ്വാസം വരെ ഞാന്‍ നിന്‍റെയൊപ്പം തന്നെയുണ്ടാവും. കൂടെത്തന്നെ ഉണ്ടാവും. ഇത് കരണിന്‍റെ വാക്കാണ്." അത്രയും മതിയായിരുന്നു അവള്‍ക്ക്. കരണിനെ ഗാഢമായി കഴുത്തിലൂടെ അശ്വിനി പുണരുകയായിരുന്നു. ×××××××××××××××××× പ്രണയത്തിന്‍റെ മലനിരകള്‍ എത്രത്തോളം അവര്‍ പടുത്തുയര്‍ത്തു? അറിയില്ല., കൃത്യമായി അറിയില്ല. എത്രയൊക്കെ ഊഹിക്കുന്നുവോ അതിന്‍റെ പതിന്മടങ്ങ് ഉയരത്തോളമത്രയും ഇരുവരും പ്രണയിക്കുകയായിരുന്നു. ×××××××××××××××××× നാളുകള്‍ അടര്‍ന്നു കൊഴിഞ്ഞു പോകവേ ഒരു പകല്‍ ഉറങ്ങുകയായിരുന്ന കരണിന്‍റെ കവിളില്‍ അശ്വിനിയുടെ തണുത്ത അധരങ്ങള്‍ പതിഞ്ഞു. അവന്‍ കണ്ണുകള്‍ മെല്ലെ തുറന്ന് മന്ദഹസിച്ചു. അശ്വിനി തന്നോട് പെരുമാറുന്നത് ചിലപ്പോഴൊക്കെ ഇങ്ങനെയാണ്. എന്തെങ്കിലും ആഗ്രഹം പറയുവാനോ അല്ലെങ്കില്‍ സന്തോഷ വാര്‍ത്ത അറിയിക്കാനോ ആദ്യം ചെയ്യുക കരണിന്‍റെ നെറ്റിയിലോ കവിളിലോ മൃദുവായി ഒന്നു ചുംബിക്കും. അവനെ ആദ്യമേ കീഴ്പ്പെടുത്തും. അതിനു ശേഷം മാത്രമേ മനസ്സിലുള്ളത് തുറന്ന് പറയുകയുള്ളൂ. ഇതുവരെ അവളുടെ ഒരാഗ്രഹത്തിനും കരൺ എതിര്‍പ്പ് പ്രകടപ്പിച്ചിട്ടില്ല! "എന്തുപറ്റി!? എന്താ നിന്‍റെ ആഗ്രഹം.? എന്താ നിനക്ക് എന്നോട് പറയാനുള്ളത്..??" കരണ്‍ അവളെ ചേര്‍ത്തു പിടിച്ച് ചോദിച്ചതില്‍ നേര്‍ത്ത കള്ളച്ചിരി മാത്രമായിരുന്നു മറുപടി! "എന്താ നീ ഒന്നും മിണ്ടാത്തത്?! മറ്റര്‍ഹോണില്‍ പോകണോ?!" ഉം..ഉം.. നിഷേധാര്‍ത്ഥത്തില്‍ അവള്‍ തലയാട്ടി. "പിന്നെ., ലോക പ്രശസ്തമായ സ്വിറ്റ്സര്‍ലന്‍ഡ് ചോക്കലേറ്റ് കഴിക്കണോ?!" ഉം..ഉം.. വീണ്ടും അവള്‍ തലയാട്ടി. "പിന്നെന്താ?! ജങ്ക്ഫ്രോച്ചില്‍ നിന്നെ കൊണ്ടു പോകണോ?!" പിന്നെയും നിഷേധാര്‍ത്ഥത്തില്‍ തലയാട്ടലായിരുന്നു മറുപടി. "ശരി., ഞാന്‍ തോറ്റിരിക്കുന്നു. നീ തന്നെ നിന്‍റെ ആഗ്രഹം പറയൂ. എന്താണേലും എന്‍റെ പത്നിക്കു മുന്നില്‍ ഞാന്‍ തയ്യാര്‍.!" കരണ്‍ ഉത്സാഹത്തോടെ പറഞ്ഞു. അശ്വിനി തെല്ലൊരു നാണത്തോടെ അവന്‍റെ കൈ പിടിച്ച് തന്റെ ഉദരത്തില്‍ വെച്ചു. ആ മുഖം സന്തോഷത്താലും നാണത്താലും ചുവന്നു തുടുക്കുന്നത് കണ്ട കരണിന്‍റെ കണ്ണുകള്‍ രണ്ടും വികസിച്ചു. "സത്യം.?!" അവന്‍ സന്തോഷം താങ്ങാന്‍ കഴിയാതെ ചോദിച്ചു. അതെയെന്നര്‍ത്ഥത്തില്‍ അശ്വിനി തലയാട്ടി. നല്ലൊരു ചുംബനം അവളുടെ നെറ്റിയില്‍ അമര്‍ത്തി കൊടുത്തു കരണ്‍. അവന്‍റെ സന്തോഷത്തിനതിരില്ലായിരുന്നു. താനിതാ ഒരച്ഛനാകാന്‍ പോകുന്നു. ഇതുവരെ ഏറ്റെടുത്തതൊന്നുമല്ല., ഒരു പുരുഷനെ സംബന്ധിച്ച് ഏറ്റവും വലിയ മിഷന്‍ ഒരച്ഛനാവുക എന്നതാണ്. ആ മിഷന്‍ ജയം കണ്ടെത്തുന്നതില്‍ പരം സന്തോഷവും ആനന്ദവും വേറെയൊരു മിഷനില്‍ നിന്നു പോലും കിട്ടില്ല. അമിതാഹ്ലാദത്തില്‍ കുട്ടികളെ പോലെ കരണ്‍ തുള്ളിച്ചാടി. തന്‍റെ പ്രിയ പത്നിയെ കോരിയെടുത്ത് വട്ടം കറക്കി. ××××××××××××××××××× ലേബര്‍ റൂമില്‍ അശ്വിനിയെ കയറ്റിയപ്പോള്‍ മുതല്‍ കനത്ത ടെന്‍ഷനിലാണ് കരണ്‍. ഇതുവരെ ഏറ്റെടുത്ത മിഷനുകളില്‍ നേരിടേണ്ടി വന്ന ടെന്‍ഷനുകളേക്കാള്‍ നൂറ് മടങ്ങ് ഭാരമുള്ള ടെന്‍ഷന്‍. അറിയാവുന്നതും അറിയാത്തതുമായ സകല ദൈവങ്ങളേയും ഒരുപോലെ വിളിച്ച് പ്രാര്‍ത്ഥിക്കുകപോലും ചെയ്തു. ഏറെ നേരത്തെ കാത്തിരിപ്പിനു ശേഷം സന്തോഷകരമായ ആ വാര്‍ത്ത തലയില്‍ തൊപ്പി ധരിച്ച മാലാഖ വന്നറിയിച്ചു : "അശ്വിനി പ്രസവിച്ചു. പെൺകുഞ്ഞാണ്." കരണ്‍ സകല ദൈവങ്ങളേയും വിളിച്ച് സ്തുതി പാടി. അറിയിപ്പുമായെത്തിയ മാലാഖയെ പരിസരം പോലും നോക്കാതെ കോരിയെടുത്തു കറക്കി. "ഛീ വിടടോ.. എന്നെ താഴെ ഇറക്കടോ" എന്നൊക്ക ആ മാലാഖ കയര്‍ക്കുന്നതൊന്നും അവനില്‍ ഏഷിയില്ല. തിരികെ വര്‍ത്തമാനാകലത്തേക്ക് ബോധം വരുന്നതുവരെ ആ മാലാഖയെ അവന്‍ കറക്കിക്കൊണ്ടേയിരുന്നു. *********************************************************************************************************************** തങ്ങളുടെ ജീവിതത്തിലേക്ക് കടന്നുവന്ന സൂര്യ തേജ്ജസുള്ള രാജകുമാരിയെ ശിവാനിയെന്ന് അശ്വിനി വിളിച്ചു. പൂര്‍ണ്ണ സംതൃപ്തിയോടെ ആ പേരിന് കരണ്‍ അനുകൂലമായി തലയാട്ടി. അശ്വിനിക്ക് ഏറ്റവും പ്രിയപ്പെട്ടതായ പാര്‍വ്വതീ ദേവിയുടെ നാമം. ശിവ ഭഗവാന്‍റെ കുസൃതിയും കോപവും കരുണയുമാണ് തനിക്കെന്ന് അശ്വിനി പലപ്പോഴും പറയാറുണ്ട്. പാര്‍വ്വതീ ദേവിയുടേതുപോലെ കരുതലും തേജസ്സും കാരുണ്യവും സര്‍വ്വോപരി ഭര്‍ത്താവിനെ ജീവനേറെ സ്നേഹിക്കുന്നവളുമാണ് അശ്വിനിയെന്ന് പലപ്പോഴും തനിക്കും തോന്നിയിട്ടുണ്ട്. താനും അശ്വിനിയും ശിവപാര്‍വ്വതി തന്നെ. തങ്ങള്‍ക്ക് ജനിച്ച ഈ തേജസ്സ് തീര്‍ച്ചയായും ശിവാനി തന്നെ.! *********************************************************************************************************************** കുഞ്ഞു ശിവാനിയുടെ ഓരോ ചലനങ്ങളും മാറ്റങ്ങളും വല്ലാത്ത അത്ഭുതത്തോടെയും കരുതലോടെയും കരണ്‍ കണ്ട് രസിച്ചു. നല്ലൊരു അച്ഛനാവാന്‍ അവന്‍ ശ്രമിച്ചുകൊണ്ടേയിരുന്നു. അവള്‍ കമഴ്ന്നപ്പോള്‍ ആഘോഷിച്ചു. നീന്തി തുടങ്ങിയപ്പോള്‍ ആഘോഷിച്ചു. നടന്നു തുടങ്ങിയപ്പോഴും ആദ്യത്തെ പാല്‍പ്പല്ല് പൊട്ടി മുളച്ചപ്പോഴും ആഘോഷിച്ചു. അങ്ങനെ എല്ലാമെല്ലാം തന്‍റെ പ്രിയ പുത്രിയില്‍ നിന്നും കരണ്‍ ഒപ്പിയെടുത്തു. ഇരുവരും മത്സരത്തോടെ ശിവാനിയെ സ്നേഹിച്ചു. എന്നാല്‍ അശ്വിനി ചിലപ്പോഴൊക്കെ കൈ വിട്ടു കളിക്കുന്നതും കരണ്‍ ശ്രദ്ധിക്കുകയുണ്ടായി. ശിവാനിയില്‍ അരുതാത്തതൊന്നും സംഭവിക്കാന്‍ ഒരു തരത്തിലും അവള്‍ സമ്മതിക്കില്ല. എന്തെങ്കിലും അപകടം മകള്‍ക്ക് പിണയുന്നു എന്ന് ബോധ്യമായാല്‍ കടുവയെ പോലെ അശ്വിനി ഗര്‍ജ്ജിക്കും. മുന്നില്‍ നില്‍ക്കുന്നയാളോട് ചീറുകയും കയര്‍ക്കുകയും ചെയ്യും. ഷോപ്പിംഗ് മാളില്‍ വെച്ച് ശിവാനിയെ അറിയാതെ തട്ടിയ യുവാവ്, തിയറ്ററില്‍ വെച്ച് ശിവാനിയുടെ ദേഹത്ത് കുപ്പി വെള്ളം അറിയാതെ വീഴ്ത്തിയ യുവതി. ഇങ്ങനെ പോകുന്നു അശ്വിനി കയര്‍ത്തവരുടെ പട്ടിക. അപ്പോഴെല്ലാം അവളെ നിയന്ത്രിച്ചു നിര്‍ത്തിയത് കരണ്‍ മാത്രമാണ്. കരണിന്‍റെ ശാസനയില്‍ കടുവയായി മാറിയ അശ്വിനി പൂച്ചയെ പോലെ പതുങ്ങും. ശബ്ദമില്ലാതെ മോങ്ങും. മകളെ ഒക്കത്തിരുത്തി കരണിന്‍റെ നെഞ്ചില്‍ തല ചായ്ക്കും. "നീയെന്തേ ഇങ്ങനെ?! ഇത് എന്‍റെ അശ്വിനി തന്നെയാണോ?! എനിക്ക് വിശ്വസിക്കാന്‍ കഴിയുന്നില്ല! ഞാനറിയുന്ന അശ്വിനിയില്‍ കോപത്തിന്‍റെ നേര്‍ത്ത നിഴല്‍ പോലുമില്ല. എന്തിനോടും എല്ലാത്തിനോടും സഹതാപമാണവള്‍ക്ക്. സ്നേഹമാണവൾക്ക്. ഇപ്പോഴെന്തേ നിയിങ്ങനെ?!" അശ്വിനിയുടെ വിതുമ്പല്‍ കരണിന്‍റെ ഹൃദയ താളം പോലും തെറ്റിച്ചു. "എനിക്ക് ഭയമാണ് കരണ്‍.! എന്തിനെന്നില്ലാത്ത ഭയം. ചുറ്റും ശത്രുക്കളാണെന്ന തോന്നല്‍. അത് ചിലപ്പോള്‍ എന്‍റെ തോന്നല്‍ മാത്രമാവാം. കരണ്‍ ജീവനോടെയുള്ളത്രയും കാലം വരെ എനിക്കോ നമ്മുടെ മകള്‍ക്കോ ഒന്നും സംഭവിക്കില്ലെന്നറിയാം. എങ്കിലും ഞാന്‍ പതറുന്നു. എന്‍റെ ചിന്തകള്‍ ഇടറുന്നു. പിടിച്ചു കെട്ടാനാവാത്ത വിധം എന്‍റെ നിയന്ത്രണം പൊട്ടി പോകുന്നു." അശ്വിനിയുടെ ഭയം ഏത് സഞ്ചാരപാതത്തിലാണെന്ന് ഊഹിക്കാന്‍ റോ രീതിയില്‍ തന്നെ കരണിന് ചിന്തിക്കേണ്ടി വന്നു. തന്‍റെ സര്‍വ്വീസിനെയാണ് അവള്‍ ഭയപ്പെടുന്നത്. ഇക്കാലയളവിനുള്ളില്‍ ഒരുപാട് ശത്രുക്കളെ താന്‍ നേടിയെടുത്തു. വിദേശിയും സ്വദേശിയും ഒരുപോലെ നീളുന്ന പട്ടിക. എവിടെ നിന്നൊക്കെയും ആക്രമണം പ്രതീക്ഷിക്കാം. ഇന്നലെ വരെ അശ്വിനി തനിക്ക് കാമുകിയും ഭാര്യയുമൊക്കെയായിരുന്നു. അവള്‍ക്ക് അവളെ കുറിച്ചും തന്നെ കുറിച്ചും മാത്രം നോക്കിയാല്‍ മതി. എന്നാല്‍ ഇന്ന് അങ്ങനെയല്ല. അവളൊരു അമ്മയും കൂടിയാണ്. തന്‍റെ കുഞ്ഞിനെ സ്വന്തം ഉദരത്തില്‍ ചുമന്ന് നൊന്തു പെറ്റ അമ്മ. പവിത്രമായ ആ ബന്ധം മറ്റെന്തിനേക്കാളും ശക്തമാണ്. അവിടെ മറ്റൊന്നിനും സ്ഥാനമില്ല. തന്‍റെ ഡിപ്പാര്‍ട്ടുമെന്‍റിനെ ഇന്ന് അശ്വിനി നല്ലപോലെ ഭയപ്പെടുന്നു. ശത്രുക്കള്‍ ആരെങ്കിലും ശിവാനിയെ ഉപദ്രവിക്കുമോയെന്ന ഭയം.! ഇലയ്ക്കും മുള്ളിനും കേടുപാടുകള്‍ സംഭവിക്കാതെ മികച്ച രീതിയില്‍ അശ്വിനി തന്നോട് അത് അവതരിപ്പിച്ച ആ ശൈലിയെ മനസ്സ് കൊണ്ട് കരണ്‍ പ്രശംസിച്ചു. അവളോട് കൂടുതല്‍ വാത്സല്ല്യം തോന്നുന്നു. അവളുടെ മുടിയിഴകളില്‍ മെല്ലെ വിരലോടിക്കുമ്പോഴും ചില തീരുമാനങ്ങളില്‍ കരണ്‍ എത്തി നിന്നു. തന്‍റെ ഔദ്യോഗിക പദവി ഇനിയില്ല. അശ്വിനിക്കും മകള്‍ ശിവാനിക്കും വേണ്ടി അത് ഉപേക്ഷിക്കുക. ആര്‍ക്കും എത്തിപ്പിടിക്കാന്‍ കഴിയാത്തത്ര ദൂരത്തേക്ക് പറക്കുക. ഇനിയുള്ള ജീവിതം മറ്റൊരു വ്യാജ ഐഡന്‍റിയില്‍ ഒളിച്ചു കഴിയുക. അധികം താമസിയാതെ റോ ഡിപ്പാര്‍ട്ടുമെന്‍റില്‍ തന്‍റെ രാജി സബ്മിറ്റ് ചെയ്ത് പുതിയൊരു ജീവിതത്തിലെ വെളിച്ചം തേടി കുടുംബവുമായി കരണ്‍ പറന്നു. പുതിയൊരു അദ്ധ്യായം തുടങ്ങാന്‍ തികഞ്ഞ തൃപ്തിയോടെ കരണ്‍ തിരഞ്ഞെടുത്ത രാജ്യം വലിയൊരു വാരിക്കുഴിയിലേക്കാണ് നയിക്കുന്നതെന്ന് സത്യമായും അവനറിഞ്ഞില്ല. ആ രാജ്യത്തിന് "മെക്സിക്കോ" എന്ന നാമമായിരുന്നു..!! ഭയന്നു മാറിയവനെ തേടി വീണ്ടും ഭയം ചാടി വീഴുന്ന സന്ദര്‍ഭങ്ങള്‍ ഇനിയുമേറെ.! ((തുടരും)) രചന : കണ്ണൂർകാരൻ 🌹🌹🌹🌹 #🧟 പ്രേതകഥകൾ! #🕵️‍♀️ കുറ്റാന്വേഷണ കഥകൾ #📔 കഥ #✍ തുടർക്കഥ #📙 നോവൽ