#🗞ଓଡ଼ିଶା ଅପଡେଟ📺 ମୟୂରଭଞ୍ଜ ଜିଲ୍ଲା ବେତନଟୀ ସ୍ଥିତ ୟୁକୋ ବ୍ୟାଙ୍କ ଶାଖାରେ ହୋଇଛି ବଡ଼ ଧରଣର ଠକେଇ। ବିଡିଓଙ୍କ ଜାଲ୍ ଦସ୍ତଖତରେ ବେତନଟୀ ବ୍ଲକର ଦୁଇଟି ସରକାରୀ ଏକାଉଣ୍ଟରୁ ୨ କୋଟି ୨୬ ଲକ୍ଷ ଟଙ୍କା ଚଳୁ କରି ଦେଇଛନ୍ତି ଜଣେ ଅଣ ଓଡ଼ିଆ ଦୁର୍ବୃତ୍ତ। ବେତନଟୀ ୟୁକୋ ବ୍ୟାଙ୍କ ଶାଖା ପ୍ରବନ୍ଧକ ଅର୍ପିତା ପାଲ ଏନେଇ ଥାନାରେ ଅଭିଯୋଗ କରିବା ପରେ ଆରମ୍ଭ ହୋଇଛି ତଦନ୍ତ। ଅଭିଯୋଗ ଅନୁଯାୟୀ, ମାର୍ଚ୍ଚ ୨୪ ତାରିଖ ଅପରାହ୍ନ ୧ଟା୧୫ମିନିଟ ପାଖାପାଖି ଜଣେ ଅଣ ଓଡ଼ିଆ ବ୍ୟକ୍ତି ବ୍ୟାଙ୍କକୁ ଆସିଥିଲେ। ସେ ନିଜକୁ ବେତନଟୀ ବିଡିଓଙ୍କ ପ୍ରତିନିଧ ବୋଲି ପରିଚୟ ଦେଇଥିଲେ। ବେତନଟୀ ବିଡିଓଙ୍କ ଦସ୍ତଖତ ଓ ସିଲ୍ ଥିବା ଏକ ଆବେଦନ ପତ୍ର ସେ ବ୍ୟାଙ୍କ କର୍ତ୍ତୃପକ୍ଷଙ୍କୁ ଦେଇଥିଲେ। ବେତନଟୀ ବ୍ଲକ କାର୍ଯ୍ୟାଳୟ ନାଁରେ ଥିତବା ୨ଟି ସରକାରୀ ଏକାଉଣ୍ଟର ମୋବାଇଲ୍‌ ଫୋନ୍ ନମ୍ବର ଓ ଇ-ମେଲ ଆଇଡି ଅପ୍‌ଡେଟ୍ କରିବା ସେଥିରେ ଆବେଦନ କରାଯାଇଥିଲା। ତାଙ୍କ ଆବେଦନ କାର୍ଯ୍ୟକାରୀ ହୋଇଥିଲା। ତା’ପର ଦିନ (ମାର୍ଚ୍ଚ ୨୫) ସେହି ବ୍ୟକ୍ତି ପୁଣି ଆସିଥିଲେ। ଏଥର ସେ ବିଡିଓଙ୍କ ସିଲ୍ ଓ ଦସ୍ତଖତ ଥିବା ଆଉ ଏକ ଆବେଦନପତ୍ର ଆଣିଥିଲେ। ସେଥିରେ ବେତନଟୀ ବ୍ଲକ କାର୍ଯ୍ୟାଳୟ ନାଁରେ ଥିବା ସେହି ଦୁଇଟି ସରକାରୀ ଏକାଉଣ୍ଟ ନାଁରେ ଇ-ବ୍ୟାଙ୍କିଂ ୟୁଜର ଆଇଡି ଓ ପାସ୍‌ୱାର୍ଡ ପାଇଁ ଆବେଦନ କରାଯାଇଥିଲା। ବ୍ୟାଙ୍କ କର୍ତ୍ତୃପକ୍ଷ ସେହି କାର୍ଯ୍ୟ ମଧ୍ୟ କରି ଦେଇଥିଲେ। ଚଳିତ ମାସ ବେତନଟୀ ବ୍ଳକ କର୍ତ୍ତୃପକ୍ଷ କୌଣସି କାମରେ ବ୍ୟାଙ୍କକୁ ଯାଇଥିଲେ। ସେଠାରେ ଆଲୋଚନା ବେଳେ ବିଡିଓଙ୍କ ପ୍ରତିନିଧି ଆସିଥିବା କଥା କହିଥିଲେ ବ୍ୟାଙ୍କ କର୍ତ୍ତୃପକ୍ଷ। ଏହା ଶୁଣି ବ୍ଲକ କର୍ତ୍ତୃପକ୍ଷ କହିଥିଲେ ଯେ ବିଡିଓଙ୍କର କେହି ପ୍ରତିନିଧି ନାହାନ୍ତି କି କାହାକୁ ବ୍ୟାଙ୍କକୁ ପଠାଯାଇନାହିଁ। ଏହା ସହିତ ବିଡିଓଙ୍କ ଦସ୍ତଖତକୁ ନକଲ କରାଯାଇଥିବା ଜଣାପଡ଼ିଥିଲା। ଏହା ପରେ ବେତନଟୀ ବ୍ଲକ କାର୍ଯ୍ୟାଳୟର ଦୁଇଟି ଯାକ ସରକାରୀ ଏକାଉଣ୍ଟକୁ ଯାଞ୍ଚ କରାଯାଇଥିଲା। ଯାଞ୍ଚ ବେଳେ ଜଣାପଡ଼ିଥିଲା ଯେ ଉକ୍ତ ଦୁଇ ଏକାଉଣ୍ଟରୁ ଭିନ୍ନ ଭିନ୍ନ ତାରିଖରେ ୨୮ଟି ଏକାଉଣ୍ଟକୁ ୨ କୋଟି ୨୬ ଲକ୍ଷ ଟଙ୍କା ପଠଯାଇଛି। ଆବେଦନପତ୍ରରେ ଥିବା ସିଲ୍ ଏବଂ ଦସ୍ତଖତ ଅବିକଳ ବିଡିଓଙ୍କର ବୋଲି ଜଣାପଡ଼ୁଥିବା ନେଇ ବ୍ୟାଙ୍କ ପକ୍ଷରୁ କୁହାଯାଇଛି। ଗୁରୁବାର ବେତନଟୀ ବ୍ଳକରେ ପହଞ୍ଚି ବିଡିଓଙ୍କ ସହିତ ଆଲୋଚନା କରିଥିଲେ ୟୁକୋ ବ୍ୟାଙ୍କର ସମ୍ବଲପୁରସ୍ଥିତ କାର୍ଯ୍ୟାଳୟର ଅଧିକାରୀଙ୍କ ସମେତ ଅନ୍ୟାନ୍ୟ ବ୍ୟାଙ୍କ ଅଧିକାରୀ ଓ ବେତନଟୀ ପୁଲିସ। ବ୍ୟାଙ୍କର ଅଭିଯୋଗ କ୍ରମେ ବିଭିନ୍ନ ଦଫା ଲଗାଇ ମାମଲାର ତଦନ୍ତ କରୁଛି ପୁଲିସ।