ईश त्वां स्तोतुमिच्छामि सर्वथा स्तोतुमक्षमम् । अक्षराक्षरबीजं च किं वा स्तौमि निरीहकम् ।। न योजनां कर्तुमीशो देवेशं स्तौमि मूढधीः। वेदा न शक्ता यं स्तोतुं कस्त्वां स्तोतुमिहेश्वरः ।। बुद्धेर्वाङ्‌मनसोः पारं सारात्सारं परात्परम्। ज्ञानबुद्धेरसाध्यं च सिद्धं सिद्धैर्निषेवितम् ।। यमाकाशमिवाद्यन्तमध्यहीनं तथाव्ययम् । विश्वतन्त्रमतन्त्रं च स्वतन्त्रं तन्त्रबीजकम् ।। ध्यानासाध्यं दुराराध्यमतिसाध्य कृपानिधिम्। त्राहि मां करुणासिन्धो दीनबन्धोऽतिदीनकम् ।। अद्य मे सफलं जन्म जीवितं च सुजीवितम्। स्वप्नादृष्टं च भक्तानां पश्यामि चक्षुषाधुना ।। शक्रादयः सुरगणाः कलया यस्य सम्भवाः। चराचराः कलांशेन तं नमामि महेश्वरम् ।। यं भास्करस्वरूपं च शशिरूपं हुताशनम्। जलरूपं वायुरूपं तं नमामि महेश्वरम् ।। स्त्रीरूपं क्लीबरूपं च पुंरूपं च बिभर्ति यः। सर्वाधारं सर्वरूपं तं नमामि महेश्वरम् ।। देव्या कठोरतपसा यो लब्धो गिरिकन्यया। दुर्लभस्तपसां यो हि तं नमामि महेश्वरम् ।। सर्वेषां कल्पवृक्षं च वाञ्छाधिकफलप्रदम् । आशुतोष भक्तबन्धुं तं नमामि महेश्वरम् ।। अनन्तविश्वसृष्टीनां संहर्तारं भंयकरम् । क्षणेन लीलामात्रेण तं नमामि महेश्वरम् ।। यः कालः कालकालञ्च कालबीजं च कालजः। अजः प्रजश्च यः सर्वस्तं नमामि महेश्वरम् ।। इत्येवमुक्त्वा स भृगुः पपात चरणाम्बुजे । आशिषं च ददौ तस्मै सुप्रसन्नो वभूव सः ।। जामदग्न्यकृत्तं स्तोत्रं यः पठेद् भक्तिसंयुतः। सर्वपापविनिर्मुक्तः शिवलोकं स गच्छति ।। #🕉 ओम नमः शिवाय 🔱 #🕉️सनातन धर्म🚩 #🙏🏻 मेरे भगवान 🙏🏻 #bhagwan parshuram