#📙 നോവൽ #📔 കഥ #💞 പ്രണയകഥകൾ MY DOCTOR❤️ 14            "നമ്മുടെ നാട്ടിൽ കിട്ടുന്നത് പോലെ ഉള്ള ടേസ്റ്റ് അല്ലല്ലേ ........" ദോശ ആസ്വദിച് കഴിച്ചു കൊണ്ട് അഞ്ചു പറഞ്ഞു . " ഈ ദോശ സാമ്പാർ ചമ്മന്തി ഒക്കെ തമിഴ് ഫുഡ് ആണ് അതറിയാമോ ? നമ്മൾ മലയാളികൾ ഇത് ഇവിടുന്ന് കോപ്പി അടിച്ചതാണ് ."  " ഓഹോ ........" അഞ്ജുവിന് അത്ഭുതം . " കേരളം വിട്ട് എവിടെയും പോയിട്ടില്ലേ ? " അവളിലെ രീതികളിലെ കൗതുകങ്ങൾ കണ്ട് സിറി ചോദിച്ചു. "ഇല്ല....." അഞ്ചു അൽപ്പം ചമ്മലോടെ പറഞ്ഞു . " ഇതുപോലെ ഇടക്ക് ഞാൻ എവിടേലും ഒക്കെ കൊണ്ട് പോകാം , വിളിക്കുമ്പോ വന്നാൽ മതി ."  "അയ്യടാ..... ഇനി മതിൽ ചാടാൻ ആണെങ്കിൽ എന്നെ നോക്കണ്ട പൊന്ന് മോനെ . ഇത് ആരെങ്കിലും അറിഞ്ഞാലുള്ള അവസ്ഥ ഒന്ന് ആലോചിച്ചു നോക്കിയേ ..... " അഞ്ചു കഴിക്കുന്നത് നിർത്തി അവനെ നോക്കി. "അറിഞ്ഞാലെന്താ.... എന്റെ പെണ്ണാണെന്ന് പറഞ്ഞോളാം .... " സിറി ഒറ്റകണ്ണിറുക്കി  "മൊട്ടേന്ന് പൊട്ടീട്ടില്ല ചെക്കൻ ... അവന്റെ പെണ്ണ് .... മിണ്ടാതെ കഴിച്ചു എണീക്കേടാ ...."  അഞ്ചു ശാസനയോടെ പറഞ്ഞു ബാക്കി കൂടി കഴിച്ചു എണീറ്റു. രണ്ടുപേരും കഴിച്ചു, ബിൽ പേ ചെയ്ത് ബൈക്കിനടുത്തേക്ക് നടന്നു. അഞ്ചു ഹൂഡി എടുത്ത് ധരിച്ചു .  "നമുക്കിനി പത്മനാഭപുരം കൊട്ടാരത്തിൽ പോവാം ?" ഹെൽമെറ്റ് എടുത്ത് വച്ച് കൊണ്ട് സിറി ചോദിച്ചു  "ഒരുപാട് നേരം എടുക്കില്ലേ ? " അഞ്ജുവിന് വല്ലാത്ത ആകുലത തോന്നി. സിറിക്ക് പക്ഷെ ഈ ദിവസം മുഴുവനും അവൾക്കൊപ്പം ചിലവഴിക്കാൻ കഴിഞ്ഞിരുന്നെങ്കിൽ എന്ന് മാത്രം ഉണ്ടായിരുന്നുള്ളു. "വാടോ ...... ഇരുട്ടുന്നതിനു മുന്നേ ഹോസ്റ്റലിൽ എത്തിച്ചാൽ പോരെ "  അവന്റെ നിർബന്ധത്തിൽ വഴങ്ങി അഞ്ചു ബൈക്കിൽ കയറി. കൊട്ടാരത്തിന്റെ ഉൾകാഴ്ചകളും പുറം കാഴ്ചകളും എല്ലാം ആസ്വദിച്ചു കണ്ടു. അഞ്ചു അവിടമെല്ലാം ആദ്യമായി കാണുകയായിരുന്നു . കാണാത്ത ലോകങ്ങളും അറിയാത്ത സന്തോഷങ്ങളും തന്നിലൂടെ അവൾ ആസ്വദിക്കുന്നത് വല്ലാത്തൊരു ലഹരി പോലെ സിറിക്ക് തോന്നി . ഉച്ചക്ക് ഭക്ഷണവും കഴിച്ചു . ഒന്നുരണ്ട് സ്ഥലത്തു കൂടെ കറങ്ങി ഇരുവരും തിരിച്ചു ഹോസ്റ്റലിലേക്ക് വച്ച് പിടിച്ചു. പുറകിലേക്ക് മറയുന്ന കാഴ്ചകളെ സന്തോഷത്തോടെ അഞ്ചു നോക്കി ഇരുന്നു . ജീവിതത്തതിൽ ഇങ്ങനൊരു ദിവസം സംഭവിക്കുമെന്ന് ഒരിക്കൽ പോലും അവൾ ചിന്തിച്ചിരുന്നില്ല. ഇവനെ പോലൊരു സുഹൃത്തിനെ താൻ അർഹിക്കുന്നുണ്ടെന്ന് അവൾക്ക് തോന്നി. ഹെൽമെറ്റിന് പുറത്തേക്കു വീണു കിടക്കുന്ന സിറിയുടെ മുടി പിടിച്ചു അഞ്ചു വെറുതെ വലിച്ചു. സിറി തിരിഞ്ഞവളെ നോക്കി . ബൈക്ക് മരത്തണലിലേക്ക് ഒതുക്കി നിർത്തി. ഹെൽമെറ്റ് ഊരി . " എന്തേ?.............."  "ഒന്നുല്ല ... നല്ല മുടി. കണ്ടപ്പോൾ വലിക്കാൻ തോന്നി വലിച്ചു ."  അഞ്ചു നിസ്സാരമായി പറഞ്ഞു . " ആയിക്കോട്ടെ.....വലിച്ചോളു ...." സിറി മുടി കെട്ടിവച്ച ബാൻഡ് അഴിച്ചു. അഞ്ചു ബാൻഡ് അവന്റെ കയ്യിൽ നിന്നും വാങ്ങി . മുന്നിൽ മിന്നും മുടി മുകളിലേക്ക് വിരൽ കൊണ്ട് കോതി എടുത്ത് പഴയതിനേക്കാൾ ഭംഗിയിൽ കെട്ടി വച്ച് കൊടുത്തു.  സിറിയുടെ കണ്ണുകൾ നിറഞ്ഞു വന്നു. അവനത് വിധക്തമായി അഞ്ജുവിൽ നിന്നും മറച്ചു . അഞ്ജുവപ്പോഴും അവന്റെ മുടിയിൽ കാര്യമായി എന്തൊക്കെയോ  നോക്കികൊണ്ടിരിക്കുകയായിരുന്നു.  "പിന്നേയ് ഹോസ്റ്റൽ എത്താറായി  , ഞാൻ ഒരു കാര്യം ചോദിക്കട്ടെ ."    മുഖവുരയോടെ സംസാരിക്കുന്നവനെ അഞ്ചു നെറ്റിചുളിച്ചു നോക്കി.  ഈ നേരം കൊണ്ടത്രയും  ഇത്ര കാലം ഇല്ലാത്തൊരു അടുപ്പം അവൾക്കവനോട് തോന്നി തുടങ്ങിയിരുന്നു. ഫ്രണ്ട് എന്ന വാക്ക് വളരെ സൂക്ഷിച്ചു മാത്രം ഉപയോഗിക്കുന്നൊരാളായിരുന്നു അഞ്ചു . പെട്ടന്നൊരാളെയും അഞ്ജുവിന്റെ ഫ്രണ്ട് എന്ന സ്ഥാനത്തേക്ക്  കടക്കാനവൾ അനുവദിക്കാറില്ല . സിറിയോട് ഒരുപാട് സംസാരിക്കുമായിരുന്നെങ്കിലും,ഇടപഴകുമായിരുന്നെങ്കിലും , അത് ഒരു പരിചയക്കാരൻ അല്ലെങ്കിൽ ജൂനിയർ എന്ന മനോഭാവത്തോടെ ആയിരുന്നു. ഐഷുവല്ലാതെ മറ്റൊരു നല്ല സൗഹൃദം അഞ്ജുവിനില്ല  . ചെറുപ്പം മുതൽ അവളുടെ സുഹൃത്തായുണ്ടായിരുന്ന ദേവിക , ആദർശിന്റെ മരണശേഷം ഇന്നോളം അഞ്ജുവിനോട് മിണ്ടിയിട്ടില്ല . അതിന്റെ കാരണമറിയാൻ അവളെത്ര പിന്നാലെ നടന്നതാണ് .  അതിൽ പിന്നെ ഇന്നാണ് , സിറി ... അവനെ അഞ്ജു ഫ്രണ്ട് ആയി കണ്ടു തുടങ്ങുന്നത്.  അത് കൊണ്ട് തന്നെ തന്നോടെന്തും ചോദിക്കാനുള്ള സ്പേസ് അവനുണ്ടെന്നു അവളോർത്തു . " ചോദിക്ക് ...."  "ഫ്രഷേഴ്‌സ് ഡേയ്ക്ക് എന്റെ കൂടെ ഡാൻസ് കളിക്കാമോ ? " അൽപ്പം പരുങ്ങലോടെ സിറി ചോദിച്ചു . "എന്ത് ... ഡാൻസ് ... ഞാൻ ..... എനിക്ക് കളിക്കാനൊന്നനും അറിഞ്ഞൂടാ "  വിക്കി വിക്കി അഞ്ചു പറഞ്ഞു കൊണ്ടിരിന്നു. "താനിങ്ങനെ ടെൻഷൻ ആവെല്ലെടോ " അവളുടെ ടെൻഷൻ കണ്ട് സിറി അഞ്ജുവിന്റെ കയ്യിൽ പിടിച്ചു പറഞ്ഞു.  "സത്യമായിട്ടും ജീവിതത്തിൽ ഇന്നുവരെ ഞാൻ ഡാൻസ് കളിച്ചിട്ടില്ല. ഞാൻ ഇല്ല , നീ.... നീ.... വേറെ ആരെയെങ്കിലും നോക്ക് " " ഈ സിറിയസ് ഡാൻസ് കളിക്കുണ്ടെങ്കിൽ അത് ഈ അഞ്ജനക്കൊപ്പം ആയിരിക്കും. സമ്മതിക്കെന്നെ ..... ഞാൻ പഠിപ്പിച്ചു തരാം ."  "നീ എന്ത് കണ്ടിട്ടാ എന്നോട് ഡാൻസ് കളിക്കാൻ പറയുന്നേ ...." അഞ്ജുവിന് വല്ലാത്ത പരിഭ്രമം തോന്നി. " നടക്കുമ്പോൾ ഈ ബാക്ക് കുലുങ്ങുന്നത് കണ്ടാൽ അറിഞ്ഞൂടേ ഇയാൾ ഡാൻസ് കളിക്കുമെന്ന് .."  " അയ്യേ...........idiot " അവന്റെ തോളിലടിച്ചു അഞ്ചു മുഖം ചുളുക്കി . " സോറി , ഞാൻ ഒന്നും ഉദ്ദേശിച്ചു പറഞ്ഞതല്ല .... you look like a dancer " സിറി പറഞ്ഞുപോയ അബദ്ധം മറക്കാൻ എന്തൊക്കെയോ പറഞ്ഞു കൊണ്ടിരുന്നു. അഞ്ചു അവനെ കൂർപ്പിച്ചു നോക്കി തന്നെ ഇരിക്കുകയായിരുന്നു . ഒടുവിൽ ഒരുവിധം പറഞ്ഞു പറഞ്ഞു സിറി അഞ്ജുവിന്റെ പിണക്കം മാറ്റി ഡാൻസ് കളിയ്ക്കാൻ സമ്മതിപ്പിച്ചെടുത്തു. അഞ്ജുവിനെപ്പോഴും ഒരു തരി ആത്മവിശ്വാസം ഉണ്ടായിരുന്നില്ല . ഇത്രയും താഴ്ന്നു പറയുന്നവനെ എങ്ങനെ നിരാശ പെടുത്താനാണ്. "ഞാൻ വീട്ടിൽ എത്തിയിട്ട് വീഡിയോ അയച്ചു തരാം . ഈവനിംഗ് അഞ്ജുവിന് വർക്ക് ഉള്ളത് കൊണ്ട് പ്രാക്ടീസ് പറ്റില്ലല്ലോ . രാവിലെ കോളേജിലേക്ക് നേരത്തെ വന്നു പ്രാക്റ്റീസ് ചെയ്യാം . " അത്രയും ഉത്സാഹം അവന്റെ വാക്കുകളിൽ ഉണ്ടായിരുന്നു.  "മ്മ് .........." അഞ്ചു തണുപ്പൻ മട്ടിൽ സമ്മതം മൂളി . **************************** റാണിയും കുടുംബവും നാട്ടിൽ നിന്നും എങ്ങോട്ടോ.. എന്നന്നേക്കുമായി പോയെന്നു അറിഞ്ഞതും മഹേഷും , അഭിലാഷും ബാംഗ്ളൂരിൽ നിന്നും നാട്ടിലേക്കു തിരിച്ചു വരുകയായിരുന്നു. ഇനി ഒരു ഒളിച്ചുകളിയുടെ ആവശ്യം ഇല്ലല്ലോ. തിരിച്ചു പോരുമ്പോൾ മഹേഷിന്റെ ഉള്ളിലത്രയും അഞ്ജുവിന്റെ അടുത്തെത്താനുള്ള വെമ്പൽ ആയിരുന്നു. അതുകൊണ്ടു തന്നെ നേരെ തിരുവന്തപുരത്തേക്കാണവർ വന്നത് .  14 മണിക്കൂറിന് മുകളിൽ നൈറ്റ് ഡ്രൈവ് ചെയ്ത്  രാവിലെ 11 മണി ആയപ്പോഴാണവർ തിരുവന്തപുരത്തെത്തുന്നത് . നന്നേ ക്ഷീണിച്ചവർ റൂം എടുത്ത് ഫ്രഷ് ആയി ഒരുറക്കവും കഴിഞ്ഞു അഞ്ജുവിന്റെ ഹോസ്റ്റലിലേക്ക് പോകാനായി ഇറങ്ങി.  അഭിലാഷ് കാർ ഡ്രൈവ് ചെയ്യുന്ന മഹേഷിനെ നോക്കി. " എന്റെ മഹേഷേ ... നാട്ടിൽ പോയി രണ്ടു ദിവസം നിന്ന് ഈ ക്ഷീണം ഒക്കെ മാറ്റിയിട്ട് പോന്നാൽ പോരായിരുന്നോ ഇങ്ങോട്ട് "  " അതിനൊന്നുമുള്ള ക്ഷമയില്ലെടാ എനിക്ക് . അവളുടെ ലൈസൻസ് ഇല്ലാത്ത നാവ് ആരെ കണ്ടിട്ടാണ് പൊങ്ങുന്നതെന്ന് നേരിട്ടൊന്ന് പോയി ചോദിക്കാതെ ശരിയാവില്ല . " മഹേഷ് പുച്ഛത്തോടെ പറഞ്ഞു. "നിനക്കറിയോ , അവളുടെ കണ്ണുകളിൽ എന്നെ കാണുമ്പോൾ തെളിയുന്നൊരു ഭയമുണ്ട് , ആ ഭയം അതിന്റെ ഒരു ലഹരി... ഏത് പെണ്ണിൽ നിന്നും എനിക്ക് കിട്ടാത്തൊരു ലഹരി....." മഹേഷ് കീഴ്ച്ചുണ്ട് കടിച്ചു പിടിച്ചു. "പാവം ... ഈ ഭ്രാന്തനിൽ നിന്നും ആ പെണ്ണിനൊരു മോചനം ഉണ്ടാവുമെന്ന് തോന്നുന്നില്ല" അഭിലാഷ് മനസ്സിലോർത്തു. സൂര്യനസ്തമിച്ചു ഇരുട്ട് വീണ് തുടങ്ങിയിരുന്നു. നഗരത്തിന്റെ എല്ലാ വിധ തിരക്കുകളോടും കൂടിയ റോഡ് സൈഡിലായുള്ള ആ ബഹുനില കെട്ടിടത്തിന്റെ മതിലിനകത്തേക്ക് മഹേഷിന്റെ കാർ ചെന്ന് നിന്നു . അഭിലാഷും മഹേഷും കാറിൽ നിന്നും പുറത്തിറങ്ങി.  മഹേഷ് മുന്നിലായി നടന്നു. വാർഡൻ എന്നെഴുതിയ റൂമിന്റെ കാളിങ് ബെൽ അടിച്ചവൻ കാത്തു നിന്നു. 5 മിനിറ്റു കഴിഞ്ഞതും വാതിൽ തുറന്ന് വാർഡൻ പുറത്തു വന്നു.  " ആരാ..... എന്ത് വേണം ?" പരിചമില്ലാത്തവരെ കണ്ട് പുരികം ചുളിച്ചവർ ചോദിച്ചു. " മാം ... ഞാൻ അഞ്ജനയുടെ ഫിയൻസി ആണ് . അഞ്ജനയെ ഒന്ന് കാണാൻ " മഹേഷ്  വിനയത്തോടവരോട് ചോദിച്ചു.  അവന്റെ വിനയം കണ്ടു ഞെട്ടലോടെ അഭിലാഷ് അവനെ നോക്കി നിന്നു .  " ഏത്... ആ msc maths പഠിക്കുന്ന അഞ്ജനയാണോ ?" "അതേ ............" " ആ കൊച്ചു എവിടയാണെന്ന് എനിക്കറിയില്ല ..... ഞാൻ നേരത്തെ ചെന്ന് നോക്കിയപ്പോൾ റൂം ലോക്ക് ആയിരുന്നു . എന്നോട് പറഞ്ഞിട്ടില്ല എങ്ങോട്ടാണ് പോയതെന്ന് ." അവർ അൽപ്പം ദേഷ്യത്തോടെ പറഞ്ഞു . അവർ പറയുന്നത് കേട്ടതും മഹേഷിന്റെ പുരികം ചുളിഞ്ഞു . നുരഞ്ഞു പൊങ്ങുന്ന ദേഷ്യം അവൻ കൈമുഷ്ടി ചുരുട്ടി പിടിച്ചു കൺട്രോൾ ചെയ്‌തു . " നിങ്ങൾ എന്തായാലും ഇവിടെവിടെലും വെയിറ്റ് ചെയ്യ് .... ഞാൻ ഒന്ന് വിളിച്ചു നോക്കട്ടെ " ഇതും പറഞ്ഞവർ റൂമിലേക്ക് കയറി പോയി .  മഹേഷും അഭിലാഷും ഇന്റർലോക്ക് ചെയ്ത മുറ്റത്തേക്കിറങ്ങി .  നിർത്തിയിട്ട കാറിൽ ചാരി നിന്ന് മഹേഷ് ഒരു സിഗരറ്റിനു തീ കൊളുത്തി ചുണ്ടിനിടയിൽ വച്ചു. അഭിലാഷ് ഒന്നും മിണ്ടാതെ അവന്റെ അടുത്ത് പോയി നിന്നു. ഇപ്പോൾ എന്ത് ചോദിച്ചാലും അവന്റെ വായിൽ നിന്ന് നല്ല തെറി കേൾക്കേണ്ടി വരുമെന്നവന് അറിയാമായിരുന്നു.  സിഗരറ്റ് വേഗത്തിൽ വലിച്ചു തീർത്തു , ഒരു center fresh പൊട്ടിച്ചു വായിലിട്ടവൻ മൊബൈൽ എടുത്ത് അതിൽ ഓരോന്ന് നോക്കി നിന്നു .  വാർഡൻ മുരടനക്കി പുറത്തു വരുന്നത് കണ്ടതും മഹേഷ് മൊബൈൽ എടുത്ത് പോക്കറ്റിലേക്കിട്ടു.  വായിൽ ഉള്ളത് തുപ്പി കളഞ്ഞു അവൻ നേരെ നിന്നു . "ആ കുട്ടി ഫോൺ എടുക്കുന്നില്ല . വെയിറ്റ് ചെയ്യണമെങ്കിൽ ചെയ്യാം ഇല്ലെങ്കിൽ നിങ്ങൾക്ക് പോവാം . 7 മണി വരെ ആണുങ്ങൾക്കിവിടെ നില്ക്കാൻ പാടുള്ളു ." ഇത്രയും പറഞ്ഞു വാർഡൻ ഉള്ളിലേക്ക് കയറി പോയി. " എന്താ ചെയ്യുന്നേ... നിൽക്കണോ അതോ പോണോ? " അഭിലാഷ് മഹേഷിനെ നോക്കി. " കുറച്ചു നേരം നോക്കാം , വന്നില്ലെങ്കിൽ കണ്ടു പിടിക്കാം " വല്ലാത്തൊരു ചിരിയോടെ മഹേഷ് പറഞ്ഞു . അഭിലാഷ് നെടുവീർപ്പോടെ കാർ തുറന്ന് സീറ്റിൽ കയറി ഇരുന്നു. കുറച്ചു സമയത്തിന് ശേഷം ഒരു ബൈക്ക് ഗേറ്റ് കടന്നു വരുന്ന ശബ്ദം കേട്ട് മഹേഷ് തലയുയർത്തി നോക്കി. ബുള്ളറ്റിൽ ഹൂഡി ധരിച്ചു ഹെൽമെറ്റ് വച്ച രണ്ടുപേർ. പുറകിലുള്ള ആൾ ഇറങ്ങി തലയിലുള്ള ഹെൽമെറ്റ് ഊരി .  "അഞ്ജന ...." മഹേഷിന്റെ ചുണ്ടുകൾ യാന്ത്രികമായി ഉച്ചരിച്ചു.   ഹെൽമെറ്റ് ഊരി സിറിക്ക് കൊടുത്തു അഞ്ചു പുഞ്ചിരിച്ചു. സിറിയും ഹെൽമെറ്റ് ഊരി ബൈക്കിൽ വച്ചു.   " പോട്ടെ....." അഞ്ചു ചോദിച്ചു . " പോണോ .?" "പോണം ."  സിരി അവളുടെ പിന്നിയിട്ട നീണ്ട മുടി അവന്റെ കയ്യിൽ ചുറ്റി. അവൾ തലയിൽ പിടിച്ചു പുറകിലേക്ക് വളഞ്ഞു . പെട്ടന്നവന്റെ മുടി പിടിച്ചു വലിച്ചു . "ആ........." പതുക്കെ ഒച്ചവെച്ചവൻ അവളുടെ മുടി വിട്ടു . അഞ്ചു ചിരിയോടെ അവനെ നോക്കി. ''ഡീ....................." അന്തരീക്ഷം മുഴങ്ങുമാർ മഹേഷ് അലറി . അഞ്ചു ശബ്ദം കേട്ടിടത്തേക്ക് തിരിഞ്ഞു നോക്കി . ചുകന്ന കണ്ണുകളോടെ വിറയ്ക്കുന്ന ചുണ്ടുകളോടെ അവളെ ദഹിപ്പിക്കാനെന്ന പോലെ മഹേഷ്......... തുടരും..........................