#😲 ബിരിയാണിയും തണ്ണിമത്തനും കഴിച്ച കുടുംബത്തിലെ 4 പേർക്ക് ദാരുണാന്ത്യം ബിരിയാണിയും തണ്ണിമത്തനും കഴിച്ചതിന് പിന്നാലെ മുംബൈയിൽ ഒരു കുടുംബത്തിലെ നാല് പേർ മരിച്ചു. ഭക്ഷ്യവിഷബാധയാണ് മരണകാരണമെന്ന് സംശയിക്കുന്നതായി പോലീസ് അറിയിച്ചു. ദക്ഷിണ മുംബൈയിലെ ഭിണ്ടി ബസാർ പൈധുനി മേഖലയിൽ താമസിക്കുന്ന അബ്ദുല്ല ഡൊക്കാഡിയ (44), ഭാര്യ നസ്‌റീൻ (35), മക്കളായ ആയിഷ (16), സൈനബ് (12) എന്നിവരാണ് മരിച്ചത്. ശനിയാഴ്ച രാത്രി നടന്ന വിരുന്നിന് ശേഷമാണ് സംഭവം. ബന്ധുക്കൾക്കൊപ്പമാണ് ഇവർ ശനിയാഴ്ച രാത്രി പത്തരയോടെ ബിരിയാണി കഴിച്ചത്. ഇതിനുശേഷം വിരുന്നിനെത്തിയ ബന്ധുക്കൾ അവരുടെ വീടുകളിലേക്ക് മടങ്ങി. പിന്നീട് പുലർച്ചെ ഒരു മണിയോടെ ഈ കുടുംബം തണ്ണിമത്തൻ കഴിക്കുകയായിരുന്നു. എന്നാൽ ഞായറാഴ്ച പുലർച്ചെ അഞ്ചരയോടെ നാല് പേർക്കും കടുത്ത ഛർദ്ദിയും വയറിളക്കവും ക്ഷീണവും അനുഭവപ്പെട്ടു തുടങ്ങി. അവശനിലയിലായ ഇവരെ ആദ്യം പ്രദേശത്തെ ഒരു ക്ലിനിക്കിലും പിന്നീട് വിദഗ്ധ ചികിത്സയ്ക്കായി ജെ.ജെ. ആശുപത്രിയിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഞായറാഴ്ച രാവിലെയോടെ ഇളയ കുട്ടിയും പിന്നീട് വ്യത്യസ്ത സമയങ്ങളിലായി മറ്റ് മൂന്ന് പേരും ചികിത്സയിലിരിക്കെ മരണത്തിന് കീഴടങ്ങുകയായിരുന്നു. കൂടെ ബിരിയാണി കഴിച്ച മറ്റ് ബന്ധുക്കൾക്ക് യാതൊരുവിധ ആരോഗ്യപ്രശ്നങ്ങളും ഇതുവരെ റിപ്പോർട്ട് ചെയ്തിട്ടില്ലാത്തതിനാൽ തണ്ണിമത്തനിൽ നിന്നാകാം വിഷബാധയേറ്റതെന്നാണ് പോലീസിന്റെയും ഡോക്ടർമാരുടെയും പ്രാഥമിക നിഗമനം. പഴക്കം ചെന്ന തണ്ണിമത്തനാണോ അതോ മറ്റെന്തെങ്കിലും രാസവസ്തുക്കളുടെ സാന്നിധ്യമാണോ ഈ ദുരന്ത കാരണമായതെന്ന് അന്വേഷിച്ച് വരികയാണ്. സംഭവത്തിൽ ജെ.ജെ. മാർഗ് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. മരിച്ചവരുടെ മൃതദേഹങ്ങൾ പോസ്റ്റ്‌മോർട്ടം നടപടികൾക്ക് വിധേയമാക്കിയിട്ടുണ്ട്. മരണത്തിന്റെ യഥാർത്ഥ കാരണം ശാസ്ത്രീയമായി കണ്ടെത്താനായി ആന്തരികാവയവങ്ങളുടെയും വീട്ടിൽ ബാക്കിയുണ്ടായിരുന്ന ഭക്ഷണത്തിന്റെയും സാമ്പിളുകൾ ഫോറൻസിക് പരിശോധനയ്ക്കായി അയച്ചിട്ടുണ്ടെന്നും ഇതിന്റെ ഫലം വന്നതിന് ശേഷം മാത്രമേ കൂടുതൽ കാര്യങ്ങൾ വ്യക്തമാകൂ എന്നും പോലീസ് ഉദ്യോഗസ്ഥർ അറിയിച്ചു. ഉന്നതവിജയം പ്രതീക്ഷിച്ച് പത്താം ക്ലാസ് പരീക്ഷാഫലം കാത്തിരിക്കുകയായിരുന്ന ആയിഷയും ഒമ്പതാം ക്ലാസിലേക്ക് കടക്കാനിരുന്ന സൈനബും ഉൾപ്പെടെ ഒരു കുടുംബം ഒന്നാകെ നഷ്ടപ്പെട്ടതിന്റെ ഞെട്ടലിലാണ് ഇപ്പോൾ പ്രദേശവാസികൾ.