സ്നേഹിക്കപ്പെടുന്ന ഒരുവളുടെ കണ്ണുകളിലേക്ക് ആഴ്ന്നിറങ്ങിയിട്ടുണ്ടോ.? അവിടെ നിങ്ങൾക്കൊരു മഹാസമുദ്രം കാണാം.. അഗാധങ്ങളിൽ നിഗൂഢമായി മുത്തും പവിഴവും ഒളിച്ചുവച്ചിരിക്കുന്നൊരു മഹാസമുദ്രം.. സ്നേഹിക്കപ്പെടുന്ന ഒരുവളുടെ ചിരികളുടെ പൂത്തിരികൾ കണ്ടിട്ടുണ്ടോ.? അതിൽ നിങ്ങൾക്കൊരു നക്ഷത്രത്തെ കണ്ടെടുക്കാം.. ഏതിരുട്ടിലും വഴികാട്ടിയാവുന്നൊരു വെള്ളിനക്ഷത്രം.. സ്നേഹിക്കപ്പെടുന്ന ഒരുവളുടെ വാക്കിന്റെ വീര്യമറിഞ്ഞിട്ടുണ്ടോ.? അവയിൽ നിങ്ങൾക്കൊരു ഉന്മാദലോകം കണ്ടെടുക്കാം.. സിരകളെ മത്തുപിടിപ്പിക്കുന്ന വീര്യമേറിയ വീഞ്ഞിനു പോലും നൽകാൻ കഴിയാത്തൊരു ലോകം.. സ്നേഹിക്കപ്പെടുന്ന ഒരുവളുടെ ചിന്തകളുടെ ചന്തം കണ്ടിട്ടുണ്ടോ.? അവ നിങ്ങളെ മോഹിപ്പിച്ചെന്നിരിക്കും.. ഇനിയൊരു മോചനമില്ലാത്ത വിധം അവ നിങ്ങളെ വരിഞ്ഞുമുറുക്കും.. സ്നേഹിക്കപ്പെടുന്ന ഒരുവളുടെ മൗനത്തിന്റെ മൂർച്ചയറിഞ്ഞിട്ടുണ്ടോ.? അതിൽ നിങ്ങളൊരായിരം കൂരമ്പുകൾ കണ്ടെത്തിയേക്കാം.. നിങ്ങളുടെ ആത്മാവിനൊരു ശരശയ്യ തീർക്കാൻ പോന്ന കൂരമ്പുകൾ.. സ്നേഹിക്കപ്പെടുന്ന ഒരുവളുടെ കണ്ണീരിന്റെ കണ്ണാടിത്തുണ്ട് കണ്ടിട്ടുണ്ടോ.? അകവും പുറവും ഒരുപോലെ പ്രതിഫലിപ്പിക്കുന്നൊരു കണ്ണാടിത്തുണ്ട്.. ശരികളിലെ തെറ്റുകളെയും തെറ്റുകളിലെ ശരികളെയും വായിച്ചെടുക്കാനായൊരു കണ്ണാടിത്തുണ്ട്..🅂💛🄵... #💞 നിനക്കായ്