#🙏 प्रेरणादायक बॅनर ....... माझे कोकण....... “अख्खं कोकणच फार सुंदर आहे. तो भौगोलिक प्रदेशच असा आहे की, ज्याच्याबद्दल प्रेम उत्पन्न होतं. काय सुंदर आहे, असं वाटतं. पण हाच प्रश्न तिथे वर्षानुवर्ष राहणाऱ्या माणसांना विचारला, तर कदाचित ते म्हणतील की, तुम्हाला वाटतं तेवढं ते सोपं नाहीये. चार दिवसांसाठी येऊन वर्णन करायचं आणि मस्त मासे खायचे अन् फिरायचं, तर ते छान वाटतं. इथे वर्षानुवर्षं राहणाऱ्या माणसाचं काहीतरी वेगळं दुःख असू शकतं.” “गणपतीमध्ये फुलं येतात. तांदळाचा दाणा धरायला लागलेला असतो आणि त्या लोंब्या थोड्या पिवळसर जेव्हा व्हायला लागतात. त्या वेळची फुलं आणि सुकत जाणारं गवत, त्याचा वास कधी जर घेतला, तर कळेल की तो काय कोकणातला वास असतो. कधी रानातून चालत गेलं तर कुडाच्या फुलांचा वास आणि करवंदीच्या फुलांचा वास हा फार सुंदर वास असतो. आंब्याचा मोहोर लगडलेल्या झाडाखालून, काजूच्या झाडांमधून गेलीस, तर तो एक वास तयार होतो. बकुळीच्या झाडाखालून गेलं, तर तो एक वेगळा येणारा वास. कुठून तरी गोठ्याच्या कडेने जाता जाता त्या शेणाचा आणि त्या गोमूत्राचा येणारा वास आणि ते सगळं संमिश्र व व्यामिश्र आहे. ते कुठून तरी संध्याकाळी जाताना जो चुलीच्या धुराचा आणि त्यात भाजल्या जाणाऱ्या भाकरीचा जो वास येतो, तो काय सुंदर वास असतो”....