اڑیسہ میں دل دہلا دینے والا واقعہ: بہن کے پیسے نکالنے کے لیے بھائی نے قبر کھود ڈالی اڑیسہ کے ضلع کیونجھر سے ایک انتہائی افسوسناک اور چونکا دینے والا واقعہ سامنے آیا ہے، جہاں غربت اور پیچیدہ نظام نے ایک غریب مزدور کو ایسا قدم اٹھانے پر مجبور کر دیا جس نے سب کو ہلا کر رکھ دیا۔ 50 سالہ مزدور جیتو منڈا کی بہن کالرا منڈا کا چند ماہ قبل انتقال ہو گیا تھا۔ اپنی موت سے پہلے اس نے بھائی کو بتایا تھا کہ اس کے بینک اکاؤنٹ میں تقریباً 19,300 روپے موجود ہیں، جو وہ نکال لے۔ جب جیتو رقم نکالنے کے لیے اڑیسہ گرامین بینک کی مالپوسی برانچ پہنچا تو بینک حکام نے اس سے اکاؤنٹ ہولڈر کی موجودگی یا پھر ڈیتھ سرٹیفکیٹ اور قانونی وارث ہونے کا ثبوت طلب کیا۔ غربت اور کاغذی کارروائی کے بوجھ تلے دبے جیتو کے لیے یہ شرائط پوری کرنا ممکن نہ تھا۔ بالآخر اس نے ایک ایسا قدم اٹھایا جس نے انسانیت کو جھنجھوڑ دیا۔ جیتو نے اپنی بہن کی قبر کھود کر اس کا کنگال ایک بوری میں رکھا اور اسے کندھے پر اٹھا کر تقریباً 3 سے 5 کلومیٹر کا فاصلہ طے کرتے ہوئے بینک پہنچ گیا۔ راستے میں یہ منظر دیکھنے والے افراد سکتے میں آ گئے۔ واقعہ منظر عام پر آنے کے بعد بینک حکام بھی حیران رہ گئے اور بعد ازاں جیتو منڈا کو اس کی بہن کے اکاؤنٹ کی رقم بطور واحد دعویدار ادا کرنے کا فیصلہ کیا گیا۔ یہ واقعہ نہ صرف غربت کی سنگینی کو ظاہر کرتا ہے بلکہ ہمارے نظام کی پیچیدگیوں اور کمزور طبقات کے لیے پیدا ہونے والی مشکلات کو بھی بے نقاب کرتا ہے۔ یہ سوال اپنی جگہ موجود ہے کہ کیا ایک غریب انسان کے لیے اپنے ہی پیسے حاصل کرنا بھی اتنا مشکل ہونا چاہیے؟ #💖मोहब्बत दिल से🤗