#📰ଦେଶ-ବିଦେଶ ଅପଡେଟ ଜାତୀୟ ଲୋକସେବା ଆୟୋଗ (UPSC) ଶୁକ୍ରବାର ସିଭିଲ୍ ସର୍ଭିସେସ୍ ପରୀକ୍ଷା (CSE) ୨୦୨୫ ପାଇଁ ଚୂଡ଼ାନ୍ତ ଫଳାଫଳ ଆନୁଷ୍ଠାନିକ ଭାବରେ ଘୋଷଣା କରିଛି।
ଆୟୋଗ ଦ୍ୱାରା ପ୍ରକାଶିତ ମେଧା ତାଲିକା ଅନୁସାରେ, ଅନୁଜ ଅଗ୍ନିହୋତ୍ରୀ ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ହାସଲ କରି ସଫଳତା ପାଇଛନ୍ତି। ଏହି ଘୋଷଣା ନଅ ମାସ ପୂର୍ବରୁ ଆରମ୍ଭ ହୋଇଥିବା ଏକ ଲମ୍ବା ଏବଂ କଠୋର ଚୟନ ପ୍ରକ୍ରିୟାର ଅନ୍ତ ଘଟାଇଛି।
ପରୀକ୍ଷାରେ ଅଂଶଗ୍ରହଣ କରିଥିବା ପ୍ରାର୍ଥୀମାନେ ଏବେ ସରକାରୀ UPSC ପୋର୍ଟାଲରେ ସେମାନଙ୍କର ଫଳାଫଳ ଦେଖିପାରିବେ। ଚୂଡ଼ାନ୍ତ ମେଧା ତାଲିକାର ବିସ୍ତୃତ PDF ସରକାରୀ ୱେବସାଇଟ୍: upsc.gov.in ଏବଂ upsconline.nic.in ରେ ଉପଲବ୍ଧ। ଫଳାଫଳ ଯାଞ୍ଚ କରିବା ପାଇଁ, ପ୍ରାର୍ଥୀମାନଙ୍କୁ ହୋମପେଜରେ ଥିବା ଅପ୍ସନ ‘what’s new’ ବିଭାଗରୁ ଚୂଡ଼ାନ୍ତ ତାଲିକା ଡାଉନଲୋଡ୍ କରିବାକୁ ଏବଂ ସେମାନଙ୍କର ରୋଲ ନମ୍ବର ଖୋଜିବାକୁ ପରାମର୍ଶ ଦିଆଯାଇଛି।
୨୦୨୫ ମେ ୨୫ରେ ସିଭିଲ୍ ସର୍ଭିସେସ୍ ପ୍ରାଥମିକ ପରୀକ୍ଷା(Preliminary) ଅନୁଷ୍ଠିତ ହୋଇଥିଲା। ଯାହା ପ୍ରାର୍ଥୀଙ୍କ ପାଇଁ ପ୍ରଥମ ସୋପାନ ଥିଲା। ଯେଉଁମାନେ ଯୋଗ୍ୟତା ହାସଲ କରିଥିଲେ ସେମାନେ ୨୨ ଅଗଷ୍ଟରୁ ୩୧ ଅଗଷ୍ଟ, ୨୦୨୫ ପର୍ଯ୍ୟନ୍ତ ଅନୁଷ୍ଠିତ ମୁଖ୍ୟ ପରୀକ୍ଷାରେ ଯୋଗ ଦେଇଥିଲେ। ଶେଷ ପ୍ରତିବନ୍ଧକ ଥିଲା ବ୍ୟକ୍ତିତ୍ୱ ପରୀକ୍ଷା ବା ସାକ୍ଷାତକାର ଯାହା ଗତ ଫେବୃଆରୀ ୨୭ରେ ସମାପ୍ତ ହୋଇଥିଲା। ଏହି ବର୍ଷ, ସାକ୍ଷାତକାର ସମାପ୍ତି ପରେ UPSC ଦ୍ୱାରା ଏକ ସପ୍ତାହ ବିଳମ୍ବରେ ଫଳାଫଳ ଘୋଷଣା କରାଯାଇଛି।
ଫଳାଫଳ ଅନୁସାରେ ଆଇଏଏସ୍, ଆଇପିଏସ, ଆଇଏଫଏସ ଏବଂ କେନ୍ଦ୍ରୀୟ ସେବା ସମେତ ବିଭିନ୍ନ ପ୍ରତିଷ୍ଠିତ ସେବାରେ ନିଯୁକ୍ତି ପାଇଁ କମିଶନ ଦ୍ୱାରା ମୋଟ ୯୫୮ ପ୍ରାର୍ଥୀଙ୍କୁ ସୁପାରିଶ କରାଯାଇଛି।
#📰ଦେଶ-ବିଦେଶ ଅପଡେଟ ବତକ ମାଂସ ଖାଇବା ପାଇଁ ଚାହୁଁଥିବା ଜଣେ ସାଧାରଣ ବ୍ୟକ୍ତି ବନି ଯାଇଛନ୍ତି ଲକ୍ଷପତି। ସେ ଗୋଟିଏ ବତକୁ ହାଣି ମାଂସ ବାହାର କରୁଥିବା ବେଳେ ତା’ ପେଟରୁ ପାଇଛନ୍ତି ସୁନା ଖଣ୍ଡ। ଏହାକୁ ଦେଖି ଗ୍ରାମବାସୀ ଜଣଙ୍କ ବେଶ ଖୁସି ହୋଇ ଯାଇଛନ୍ତି। ବତକ ପେଟରୁ ସୁନା ବାହାରିବା ଘଟଣା ପୂରା ଚର୍ଚ୍ଚାର ବିଷୟ ପାଲଟିଛି।
କେନ୍ଦ୍ରୀୟ ଚାଇନା ରୁ ଏପରି ଖବର ସାମ୍ନାକୁ ଆସିଛି। ଚଳିତ ବର୍ଷ ଫେବୃଆରୀ ମାସରେ ଏପରି ଘଟଣା ଘଟିଥିଲା। ବତକ ପେଟରୁ ସୁନା ପାଇଥିବା ଗ୍ରାମବାସୀଙ୍କୁ ଲିଉ ଭାବେ ଚିହ୍ନଟ କରାଯାଇଛି। ସେ ବତକଟିକୁ କାଟିବା ସମୟରେ ତା’ ପେଟରୁ କିଛି ସୁନା ଖଣ୍ଡ ପାଇଥିଲେ।
ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ, ଲିଉ ଚକଚକ କରୁଥିବା ଜିନିଷକୁ ବତକ ପେଟରୁ ପାଇବା ପରେ ଚିକିତ ହୋଇ ଯାଇଥିଲେ। ପ୍ରାରମ୍ଭିକ ପର୍ଯ୍ୟାୟରେ ଏହା ସୁନା ଖଣ୍ଡ ବୋଲି ତାଙ୍କୁ ଜଣାନଥିଲା। କିନ୍ତୁ ପବର୍ତ୍ତୀ ଅବସ୍ଥାରେ ଏହାକୁ ପରୀକ୍ଷା କରାଯିବା ପରେ ବତକ ପେଟରୁ ମିଳିଥିବା ଚକଚକ ଜିନିଷ ସୁନା ବୋଲି ସ୍ପଷ୍ଟ ହୋଇଥିଲା।
ବତକ ପେଟରୁ ମିଳିଥିବା ସୁନାର ଓଜନ ପ୍ରାୟ ୧୦ ଗ୍ରାମ। ଏହାର ଦାମ ୧୨ ହଜାର ୟୁଆନ ବା ୧,୬୫,୮୨୧ ଟଙ୍କା। ଲିଉଙ୍କ ବାପା ଏପରି ସୁନା ଠାବକୁ ଅଲୌକିକ ମୁହୂର୍ତ୍ତର ସଙ୍କେତ ବୋଲି କହିଛନ୍ତି। ବର୍ଷର ଆଗାମୀ ଦିନଗୁଡ଼ିକ ତାଙ୍କ ପରିବାର ପାଇଁ ଶୁଭ ହେବ ବୋଲି ସେ ଆଶାବାଦୀ ରହିଛନ୍ତି।
ଲିଉଙ୍କ କହିବା କଥା ଯେ ଗାଁର ଲୋକମାନେ ବତକ ମାନଙ୍କୁ ବାହାରେ ଲାଳନପାଳନ କରନ୍ତି। ବତକଗୁଡ଼ିକ ସାଧାରଣତଃ ସ୍ଥାନୀୟ ଅଞ୍ଚଳରେ ଥିବା ଗୋଟିଏ ନଦୀ ନିକଟରେ ବୁଲନ୍ତି। ପୂର୍ବରୁ ଉକ୍ତ ନଦୀ ପଠାରେ ସୁନା ଖଣି ଥିବା ବିଶ୍ୱାସ କରାଯାଏ। ଏହିକ୍ରମରେ ବତକଟି ସେଠାରେ ବୁଲିବା ସମୟରେ କିଛି ମାଟି ଗିଳି ଦେଇଥିଲା। ସମ୍ଭବତଃ ଏତିକି ବେଳେ ତା’ ପେଟକୁ ଛୋଟ ସୁନା ଖଣ୍ଡ ଚାଲି ଯାଇଥିଲା। ଏବେ ବତକକୁ ମାଂସ ପାଇଁ କାଟିବା ପରେ ତା’ ପେଟରୁ ସୁନା ମିଳିଛି।
ବିଶେଷଜ୍ଞଙ୍କ କହିବା କଥା ମଣିଷ କିମ୍ବା ପଶୁ-ପକ୍ଷୀ ସୁନାକୁ ହଜମ କରିପାରନ୍ତି ନାହିଁ। ସୁନା ଖଣ୍ଡ ସାଧାରଣତଃ ହଜମ ନଳୀ ଦେଇ ଚାଲି ଯାଏ। କିନ୍ତୁ ସୁନା ଖଣ୍ଡ ଯଦି ବଡ଼ କିମ୍ବା ମୋଟା ହୋଇଥିବ, ତା’ହେଲେ ଏହା ବ୍ଲକେଜ କିମ୍ବା ବିଷକ୍ରିୟା ସୃଷ୍ଟି କରିପାରେ।
ଲିଉ କହିଛନ୍ତି ଯେ ତାଙ୍କ ପୂର୍ବରୁ ମଧ୍ୟ ଗାଁର ଅନେକ ଲୋକ ବତକ ପେଟରୁ ଏମିତି ସୁନା ଖଣ୍ଡ ପାଇଥିଲେ। ହେଲେ ତାଙ୍କ ଭଳି କେହି ବି ୧୦ ଗ୍ରାମର ସୁନା କେବେ ହେଲେ ଠାବ କରିପାରି ନଥିଲେ।
#📰ଦେଶ-ବିଦେଶ ଅପଡେଟ ନେପାଳ ଜେନ ଜେଡ ଝଡ଼ର ଚେହେରା ବାଲେନ ଶାହଙ୍କ ଯାଦୁ। ହିଂସାମତ୍କ ଜେନ ଜେଡ ଆନ୍ଦୋଳନ ପରେ ନିଜର ଦଳ ଗଠନ କରିଥିବା ବାଲେନ ଶାହ ଏବେ ନେପାଳର କ୍ଷମତା ଦଖଲ କରିବା ଦିଗରେ ଆଗେଇ ଚାଲିଛନ୍ତି।
ନେପାଳ ସଂସଦୀୟ ନିର୍ବାଚନରେ ବାଲେନ ଶାହଙ୍କ ରାଷ୍ଟ୍ରୀୟ ସ୍ୱତନ୍ତ୍ର ପାର୍ଟି(ଆରଏସ୍ପି)ର ଏକତରଫା ପ୍ରଦର୍ଶନ। ନେପାଳର ୨୭୫ ଲୋକସଭା ଆସନରୁ ଭୋଟିଂ ହେଉଥିବା ୧୬୫ ଆସନରେ ବାଲେନଙ୍କ ଦଳ ବଡ଼ ବିଜୟ ଦିଗରେ ଆଗେଇ ଚାଲିଛି।
ନେପାଳରେ ୧୬୫ଟି ଆସନ ପାଇଁ ସିଧାସଳଖ ଭୋଟିଂ ହୋଇଥାଏ। ବାକି ୧୧୦ ଆସନ ଅନୁପାତିକ ପ୍ରତିନିଧିତ୍ୱ ବ୍ୟବସ୍ଥା ଦ୍ୱାରା ହୋଇଥାଏ। ଅର୍ଥାତ ଯେଉଁ ଦଳକୁ ଯେତେ ପ୍ରତିଶତ ଭୋଟ ମିଳିବ, ସେହି ଅନୁସାରେ ୧୧୦ ଆସନରୁ ସେମାନଙ୍କୁ ସାଂସଦ ଚୟନ ପାଇଁ ଅନୁମତି ମିଳିବ। ଗୁରୁବାର ନେପାଳରେ ୧୬୫ଟି ଆସନ ପାଇଁ ସିଧାଳସଖ ଭୋଟ ହୋଇଥିବା ବେଳେ ଆଜି ଗଣତି ଚାଲିଛି।
ବର୍ତ୍ତମାନ ସୁଦ୍ଧା ହୋଇଥିବା ଗଣତି ଅନୁସାରେ ବାଲେନ ଶାହଙ୍କ ଆରଏସପି ୧୦୨ଟି ଆସନରେ ଲିଡ କରୁଛି। ପୂର୍ବତନ ପ୍ରଧାନମନ୍ତ୍ରୀ ତଥା CPN (UML) କେପି ଶର୍ମା ଓଲି ୧୧ଟି ଆସନରେ ଆଗରେ ରହିଛନ୍ତି। ସେହିପରି ଗଗନ ଥାପ୍ପାଙ୍କ ନେପାଳୀ କଂଗ୍ରେସ ମଧ୍ୟ ୧୧ଟି ଆସନରେ ଜିତିବାର ସମ୍ଭାବନା ସୃଷ୍ଟି କରିଛି।
ଝାପା-୫ ଆସନରେ ସିଧାସଳଖ ବାଲେନ ଶାହ ଓ କେପି ଓଲି ଶର୍ମାଙ୍କ ମଧ୍ୟରେ ଟକ୍କର ହେଉଛି। କିନ୍ତୁ ଏଠାରେ ବାଲେନ ଶାହ ଲିଡ କରୁଛନ୍ତି। ବର୍ତ୍ତମାନ ସୁଦ୍ଧ ବାଲେନଙ୍କୁ ୭ ହଜାର ଭୋଟ ମିଳିଥିବା ବେଳେ ଓଲି ଶର୍ମା ୧୪ ଶହ ଭୋଟ ପାଇଛନ୍ତି। ସେହିପରି ଆଉ କିଛି ସ୍ଥାନରେ ଆରଏସ୍ପି ପ୍ରାର୍ଥୀମାନେ ବିଜୟୀ ହୋଇ ସାରିଲେଣି। ଯଦି ଏହି ଟ୍ରେଣ୍ଡ ଜାରି ରହିବ, ତା’ହେଲେ ରେକର୍ଡ ବିଜୟ ସହ ବାଲେନ ଶାହ ନେପାଳର ପ୍ରଧାନମନ୍ତ୍ରୀ ହୋଇ ପାରନ୍ତି।
ପ୍ରଧାନମନ୍ତ୍ରୀ ହେବା ପାଇଁ ନେପାଳ ସଂସଦରେ ୧୩୮ ଜଣ ସାଂସଦଙ୍କ ସମର୍ଥନ ଆବଶ୍ୟକ। ଏଥିପାଇଁ ସିଧାସଳଖ ଭୋଟିଂ ହେଉଥିବା ଆସନଗୁଡ଼ିକ ଜିତିବା ସହ ନିଜର ଭୋଟ ଭାଗ ମଧ୍ୟ ବୃଦ୍ଧି କରିବାକୁ ପଡ଼ିବ। ଏବେ ବାଲେନ ଶାହଙ୍କ ଦଳ ଭୋଟିଂ ହୋଇଥିବା ୨/୩ ଆସନରେ ଲିଡ କରୁଛି। ହେଲେ ଦଳର ଭୋଟ ଶେୟାର କେତେ ରହିଛି, ସେକଥା ଜଣାପଡ଼ିନି।
ବାଲେନ ଶାହ ଏକଦା କାଠମାଣ୍ଡୁ ମହାନଗର ପାଳିକାର ମେୟର ଭାବେ କାମ କରୁଥିଲେ। କିନ୍ତୁ ଖୁବଶୀଘ୍ର ସେ ନେପାଳର ପ୍ରଧାନମନ୍ତ୍ରୀ ଭାବେ ଦାୟିତ୍ୱ ମଧ୍ୟ ନେଇ ପାରନ୍ତି। ଯୁବଗୋଷ୍ଠୀଙ୍କୁ ନିର୍ବାଚନ ଜରିଆରେ ସେ ପରିବର୍ତ୍ତନର ଆହ୍ୱାନ ଦେଇଥିଲେ। ଏବେ ଏହା ସତ ହେବାର ଯଥେଷ୍ଟ ସମ୍ଭାବନା ରହିଛି।
୨୦୨୫ରେ ଓଲି ସରକାର ବିରୋଧରେ ନେପାଳର ଯୁବଗୋଷ୍ଠୀ ଯୁଦ୍ଧଂଦେହୀ ଡାକରା ଦେବାରୁ ନେପାଳ ସ୍ଥିତି ବେକାବୁ ହୋଇଥିଲା। ଓଲି ସରକାର ଦୁର୍ନୀତି ଗ୍ରସ୍ତ ବୋଲି ଯେଉଁ ନାରା ଦିଆଯାଇଥିଲା, ତାହା ବିସ୍ଫୋରକ ରୂପ ନେଇଥିଲା। ପୋଡ଼ାଜଳା ଓ ଭଙ୍ଗାରୁଜା ତଥା ଜେନ ଜେଡ ବିକ୍ଷୋଭକାରୀଙ୍କ ଚାପ ଯୋଗୁ ନେପାଳର ପ୍ରଧାନମନ୍ତ୍ରୀ ପଦରୁ କେପି ଶର୍ମା ଓଲି ଇସ୍ତଫା ଦେଇଥିଲେ।
ଏହାପରେ ନେପାଳରେ ଏବେ ନିର୍ବାଚନ ହୋଇଛି। ନିର୍ବାଚନରେ ନେପାଳର ପ୍ରାୟ ସବୁ ବର୍ଗର ଲୋକ ବାଲେନ ଶାହଙ୍କୁ ସମର୍ଥନ କରୁଛନ୍ତି। ସେ ଚିରାଚରିତ ଢଙ୍ଗ ବଦଳରେ ବେଶ ନାଟକୀୟ ଭାବେ ରାଜନୀତିରେ ପ୍ରବେଶ କରିଥିବାରୁ ସମସ୍ତଙ୍କ ଧ୍ୟାନ ମଧ୍ୟ ଆକର୍ଷଣ କରିପାରିଛନ୍ତି।
#📰ଦେଶ-ବିଦେଶ ଅପଡେଟ ବେଙ୍ଗାଲୁରୁ : କର୍ଣ୍ଣାଟକରେ ପିଲାମାନଙ୍କ ପାଇଁ ସୋସିଆଲ ମିଡିଆ ଉପରେ ପ୍ରତିବନ୍ଧକ ଲଗାଯାଇଛି । ବଜେଟ ଅଧିବେଶନ ସମୟରେ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ବିଧାନସଭାରେ ସୋସିଆଲ ମିଡିଆ ଉପରେ ପ୍ରତିବନ୍ଧକ ନେଇ ଘୋଷଣା କରିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ ୧୬ ବର୍ଷରୁ କମ୍ ବୟସର ପିଲାମାନେ ସୋସିଆଲ ମିଡିଆ ବ୍ୟବହାର କରିପାରିବେ ନାହିଁ । ପିଲାମାନଙ୍କ ଉପରେ ମୋବାଇଲ ଫୋନ୍ ବ୍ୟବହାରର ନକାରାତ୍ମକ ପ୍ରଭାବ ଯୋଗୁଁ ୧୬ ବର୍ଷରୁ କମ୍ ବୟସର ପିଲାମାନଙ୍କ ଉପରେ ଏହି ପ୍ରତିବନ୍ଧକ ଲଗାଯାଇଛି ।
ଶିଶୁମାନଙ୍କ ପାଇଁ ସୋସିଆଲ ମିଡିଆ ବ୍ୟବହାରକୁ ନିଷେଧ କରିବାରେ କର୍ଣ୍ଣାଟକ ଦେଶର ପ୍ରଥମ ରାଜ୍ୟ ହୋଇଛି। ତଥାପି, ଗୋଆ, ମହାରାଷ୍ଟ୍ର ଏବଂ ବିହାରରେ ମଧ୍ୟ ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟବହାରକୁ ନିଷେଧ କରିବା ସମ୍ପର୍କରେ ଅଂଶୀଦାରମାନଙ୍କ ସହିତ ପରାମର୍ଶ କରାଯାଉଛି । ପିଲାମାନଙ୍କ ପାଇଁ ସୋସିଆଲ ମିଡିଆ ପ୍ରତିବନ୍ଧକ ଲାଗୁ କରିବା ପାଇଁ ଏହି ରାଜ୍ୟଗୁଡ଼ିକରେ ସରକାରଙ୍କ ଦ୍ୱାରା ଟାସ୍କ ଫୋର୍ସ ଗଠନ କରାଯାଇଛି।
ଗତ ମାସରେ, ରାଜ୍ୟ ଉଚ୍ଚଶିକ୍ଷା ପରିଷଦର ଭାଇସ୍ ଚାନ୍ସେଲରଙ୍କ ସହ କଥାବାର୍ତ୍ତା ସମୟରେ, କର୍ଣ୍ଣାଟକର ମୁଖ୍ୟମନ୍ତ୍ରୀ ଅଷ୍ଟ୍ରେଲିଆର ଉଦାହରଣ ଦେଇ ବୟସ-ଉପଯୁକ୍ତ ସୋସିଆଲ ମିଡିଆ ପ୍ରତିବନ୍ଧକ ବିଷୟରେ ଆଲୋଚନା କରିଥିଲେ। ଏହି ସମୟ ମଧ୍ୟରେ, ସରକାର ସୋସିଆଲ ମିଡିଆ ପ୍ରତିବନ୍ଧକ ପାଇଁ ଆନ୍ତର୍ଜାତୀୟ ମଡେଲଗୁଡ଼ିକର ଅଧ୍ୟୟନ କରିବାକୁ ନିଷ୍ପତ୍ତି ନେଇଥିଲେ।
ତାଙ୍କ ବଜେଟ୍ ଭାଷଣ ସମୟରେ, କର୍ଣ୍ଣାଟକ ମୁଖ୍ୟମନ୍ତ୍ରୀ ଘୋଷଣା କରିଥିଲେ ଯେ ISRO ଏବଂ Keonics ସହଯୋଗରେ IISC ଅଧୀନରେ ବେଙ୍ଗାଲୁରୁ ରୋବୋଟିକ୍ସ ଏବଂ AI ଇନୋଭେସନ୍ ଜୋନ୍ ନାମକ ଏକ ରୋବୋଟିକ୍ସ ଏବଂ AI କ୍ୟାମ୍ପସ୍ ପ୍ରତିଷ୍ଠିତ ହେବ। ସେ ବ୍ୟାଖ୍ୟା କରିଥିଲେ ଯେ ସୋସିଆଲ ମିଡିଆର ନକାରାତ୍ମକ ପ୍ରଭାବ ଏବଂ ୧୬ବର୍ଷରୁ କମ୍ ବୟସର ପିଲାମାନଙ୍କ ଉପରେ ମୋବାଇଲ୍ ଫୋନ୍ ବ୍ୟବହାର ବୃଦ୍ଧି ପାଉଥିବାରୁ ଏହି କଠୋର ନିଷ୍ପତ୍ତି ନିଆଯାଇଛି।
#🗞ଓଡ଼ିଶା ଅପଡେଟ📺 ଭୁବନେଶ୍ୱର : ଭୁବନେଶ୍ୱର ବିମାନବନ୍ଦରରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଶୁକ୍ରବାର ଆସି ପହଞ୍ଚିଛନ୍ତି। ଶାହା ବାୟୁସେନାର ଏକ ସ୍ବତନ୍ତ୍ର ବିମାନରେ ଆସି ଭୁବନେଶ୍ୱର ବିମାନବନ୍ଦରରେ ପହଞ୍ଚିଥିଲେ। ଏଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ସ୍ବାଗତ କରିଥିଲେ। ରାଜ୍ୟ ଭାଜପା ସଭାପତି ମନମୋହନ ସାମଲ ମଧ୍ୟ ବିମାନବନ୍ଦରରେ ଉପସ୍ଥିତ ରହି ଶାହାଙ୍କୁ ସ୍ବାଗତ କରିଛନ୍ତି। ଆଜି କଟକ, ଭୁବନେଶ୍ୱର, ପାରାଦୀପରେ ସ୍ବତନ୍ତ୍ର କାର୍ଯ୍ୟକ୍ରମ ରହିଛି। ଏଥିସହିତ ମୁଣ୍ଡଳିରେ ସିଆଇଏସ୍ଏଫ୍ର ୫୭ତମ ପ୍ରତିଷ୍ଠା ଉତ୍ସବରେ ଶାହା ମଧ୍ୟ ଯୋଗ ଦେବାକୁ ଓଡ଼ିଶା ଆସିଛନ୍ତି।
ଗୁରୁବାର ଗୃହ ବିଭାଗ ଅତିରିକ୍ତ ସଚିବ ଭବେଶ କୁମାର ନାୟକ ଏ ସଂକ୍ରାନ୍ତରେ ରାଜ୍ୟ ଉନ୍ନୟନ ଆୟୁକ୍ତ, ପୋଲିସ ମହାନିର୍ଦେଶକଙ୍କ ସମେତ ସଂପୃକ୍ତ ବିଭାଗୀୟ ମୁଖ୍ୟଙ୍କୁ ଅବଗତ କରାଇଥିଲେ। ବିଭାଗ ପକ୍ଷରୁ ଜାରି ସଂଶୋଧିତ ସୂଚୀ ଅନୁଯାୟୀ, ସ୍ବରାଷ୍ଟ୍ର ମନ୍ତ୍ରୀ ଶାହା ବିଏସ୍ଏଫ୍ ହେଲିକପ୍ଟରରେ ଭୁବନେଶ୍ୱର ବିମାନବନ୍ଦରଠାରୁ କଟକ ମୁଣ୍ଡୁଳି ଅଭିମୁଖେ ଯିବେ। ସେଠାରେ ୧୦ଟା ୫୫ ମିନିଟରେ ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟ୍ ଫୋର୍ସର ରାଇଜିଂ ଡେ’ ତଥା ସ୍ଥାପନ ଦିବସରେ ଯୋଗଦେବେ। ଏହାପରେ ଅପରାହ୍ନ ୧ଟା ୩୫ମିନିଟରେ ମୁଣ୍ଡୁଳିରୁ ପ୍ରତ୍ୟାବର୍ତ୍ତନ କରି ପାରାଦୀପ ଇଫ୍କୋ ୟୁନିଟ୍କୁ ଗସ୍ତ କରିବେ। ସେଠାରେ ସଲ୍ଫ୍ୟୁରିକ୍ ଏସିଡ ପ୍ଲାଣ୍ଟର ଲୋକାର୍ପଣ କରିବେ। ଏହାପରେ ଭୁବନେଶ୍ୱର ପ୍ରତ୍ୟାବର୍ତ୍ତନ କରି ଅପରାହ୍ନ ୩ଟା ୫୫ମିନିଟରେ ଏନ୍ଏଫ୍ଏସ୍ୟୁର ସ୍ଥାୟୀ ଏବଂ ପରେ ସିଏଫ୍ଏସଏଲ ଭବନର ଶିଳାନ୍ୟାସ କରିବେ। ଏହି ଅବସରରେ ଇଡ଼କୋ ପ୍ରଦର୍ଶନୀ ପଡ଼ିଆରେ ୩ଟି ନୂତନ ଆଇନ ଉପରେ ରାଜ୍ୟସ୍ତରୀୟ ପ୍ରଦର୍ଶନ କାର୍ଯ୍ୟକ୍ରମରେ ଯୋଗଦେବାର ରହିଛି। ସନ୍ଧ୍ୟା ୭ଟା ୩୦ମିନିଟରେ ଦିଲ୍ଲୀ ଅଭିମୁଖେ ସ୍ବରାଷ୍ଟ୍ରମନ୍ତ୍ରୀ ଶାହା ପ୍ରତ୍ୟାବର୍ତ୍ତନ କରିବେ ବୋଲି ଗୃହ ବିଭାଗ ପକ୍ଷରୁ କୁହାଯାଇଛି।
#📰ଦେଶ-ବିଦେଶ ଅପଡେଟ ନୂଆଦିଲ୍ଲୀ: ସୁଖୋଇ-୩୦ ବିମାନ ଦୁର୍ଘଟଣାରେ ସ୍କ୍ୱାଡ୍ରନ୍ ଲିଡର ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁ ହୋଇଛି । ଭାରତୀୟ ବାୟୁସେନା ସ୍କ୍ୱାଡ୍ରନ୍ ଲିଡର ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୂର୍ବେଶ ଦୁରାଗକରଙ୍କ ମୃତ୍ୟୁରେ ଗଭୀର ଶୋକ ପ୍ରକାଶ କରିଛି। ସେନା ପକ୍ଷରୁ ସୋସିଆଲ ମିଡିଆରେ ପୋଷ୍ଟ କରି କୁହାଯାଇଛି, “ସମସ୍ତ ଭାରତୀୟ ବାୟୁସେନା କର୍ମଚାରୀ ଶୋକସନ୍ତପ୍ତ ପରିବାର ପ୍ରତି ସମବେଦନା ପ୍ରକାଶ କରୁଛନ୍ତି ଏବଂ ଏହି ଦୁଃଖର ମୁହୂର୍ତ୍ତରେ ସେମାନଙ୍କ ସହିତ ଦୃଢ଼ ଭାବରେ ଠିଆ ହୋଇଛନ୍ତି ।”
ଗୁରୁବାର, ଏକ ଭାରତୀୟ ବାୟୁସେନା (IAF) ସୁଖୋଇ Su-୩୦MKI ଲଢ଼ୁଆ ବିମାନ ନିଖୋଜ ହୋଇଗଲା। ଆସାମର କାର୍ବି ଆଙ୍ଗଲଙ୍ଗ ଜିଲା ଉପରେ ଉଡ଼ୁଥିବା ସମୟରେ ବିମାନଟି ରାଡାର ଯୋଗାଯୋଗ ହରାଇଥିଲା। ପ୍ରତିରକ୍ଷା ଜନସମ୍ପର୍କ ଅଧିକାରୀ (PRO)ଙ୍କ ଅନୁଯାୟୀ, ରୁଟିନ ମିଶନ ସମୟରେ ଲଢ଼ୁଆ ବିମାନଟି ରାଡାରରୁ ଅଦୃଶ୍ୟ ହୋଇଯାଇଥିଲା। ବିମାନ ନିଖୋଜ ହେବା ପରେ ବିମାନକୁ ଠାବ କରିବା ଏବଂ ଘଟଣାର ସଠିକ୍ ପରିସ୍ଥିତି ଯାଞ୍ଚ କରିବା ପାଇଁ ସ୍ଥାନୀୟ ପ୍ରଶାସନ ଏବଂ ଅନ୍ୟାନ୍ୟ ସୁରକ୍ଷା ଏଜେନ୍ସିଗୁଡ଼ିକର କର୍ମଚାରୀଙ୍କ ସହିତ ବାୟୁସେନା ସନ୍ଧାନ ଏବଂ ଉଦ୍ଧାର ଦଳଗୁଡ଼ିକୁ ନିୟୋଜିତ କରାଯାଇଥିଲା। ପ୍ରତିରକ୍ଷା ପ୍ରତିଷ୍ଠାନର ସୂତ୍ର ଅନୁଯାୟୀ, ଯେଉଁ ଅଞ୍ଚଳରେ ରାଡାର ଯୋଗାଯୋଗ ବିଚ୍ଛିନ୍ନ ହୋଇଛି ତାହା ପ୍ରାୟତଃ ଘନ ଜଙ୍ଗଲ ଏବଂ ପାହାଡ଼ିଆ ଅଞ୍ଚଳ ଥିଲା।
ସୁଖୋଇ-୩୦ଏମକେଆଇ ଭାରତୀୟ ବାୟୁସେନାର ଏକ ଆଗଧାଡ଼ିର ବହୁ-ଭୂମିକା ଲଢ଼ୁଆ ବିମାନ ଏବଂ ଏହା ଭାରତର ସାମଗ୍ରିକ ବାୟୁ ପ୍ରତିରକ୍ଷା କ୍ଷମତାର ଏକ ଗୁରୁତ୍ୱପୂର୍ଣ୍ଣ ଅଂଶ । ସୁଖୋଇ-୩୦ଏମକେଆଇ ବିମାନ ସହିତ ଜଡିତ ଘଟଣା ପୂର୍ବରୁ ମଧ୍ୟ ଘଟିଛି। ଅଗଷ୍ଟ ୨୦୧୯ରେ, ଏକ ଆଇଏଏଫ୍ ସୁଖୋଇ-୩୦ଏମକେଆଇ ଏକ ନିୟମିତ ତାଲିମ ମିଶନ ସମୟରେ ଆସାମର ତେଜପୁର ନିକଟରେ ଏକ ଧାନ କ୍ଷେତରେ ଦୁର୍ଘଟଣାଗ୍ରସ୍ତ ହୋଇଥିଲା। ଉଭୟ ପାଇଲଟ୍ ସୁରକ୍ଷିତ ଭାବରେ ଖସିପଡ଼ିଥିଲେ ଏବଂ ପରେ ସେମାନଙ୍କୁ ଉଦ୍ଧାର କରାଯାଇଥିଲା। ପୂର୍ବରୁ, ମେ ୨୦୧୫ରେ, ଆଉ ଏକ ସୁଖୋଇ-୩୦ଏମକେଆଇ ବିମାନ ଉଡ଼ାଣ ଆରମ୍ଭ ହେବାର କିଛି ସମୟ ପରେ ତେଜପୁର ବାୟୁସେନା ଘାଟିରୁ ପ୍ରାୟ ୩୬ କିଲୋମିଟର ଦକ୍ଷିଣରେ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ଉଭୟ ପାଇଲଟ୍ ସୁରକ୍ଷିତ ଭାବରେ ବାହାରି ଆସିଥିଲେ ।
#🗞ଓଡ଼ିଶା ଅପଡେଟ📺 ଭଞ୍ଜନଗର : ଗୁରୁବାର ଅପରାହ୍ନ ପ୍ରାୟ ୧:୩୦ରେ ଭଞ୍ଜନଗର ଅଦାଲତ ସମ୍ମୁଖରେ ଘଟିଛି ନୃଶଂସ ହତ୍ୟାକାଣ୍ଡ। ହତ୍ୟାକାଣ୍ଡର ଶିକାର ହୋଇଛନ୍ତି ବୁଦୁଲି ଗ୍ରାମର ଅଶୋକ ସ୍ବାଇଁ ନାମକ ୪୨ ବର୍ଷର ଯୁବକ।
ଘଟଣା ଅନୁସାରେ ଅଶୋକ ନିଜର ପୂର୍ବ ମାମଲାରେ କୋର୍ଟକୁ ଆସିଥିଲା। ସେ କୋର୍ଟରୁ ଫେରି ଅନ୍ୟ ଏକ ସହଯୋଗୀର ବାଇକ୍ ପଛରେ ବସିବା କ୍ଷଣି ପୂର୍ବରୁ ପ୍ରସ୍ତୁତ ହୋଇ ରହିଥିବା ପଢ଼ାଳ ଗ୍ରାମର ଜୈନିକ ଯୁବକ ଟାଙ୍ଗିଆରେ ଅଶୋକର ପଛପଟୁ ହାଣି ଚାଲିଥିଲା। ଏହି ଯୁବକଟିରେ ନାମ ଦିଲ୍ଲୀପ ଜେନା ବୋଲି ଥାନା ଅଧିକାରୀ ଜୀବନାନନ୍ଦ ଜେନା ପ୍ରକାଶ କରିଛନ୍ତି। ଦିଲ୍ଲୀପ ଅଶୋକର ମୁଣ୍ଡ, ଦୁଇ ଗୋଡ଼ ଓ ଦୁଇ ହାତକୁ ଟାଙ୍ଗିଆରେ ଚୋଟ ପରେ ଚୋଟ ମାରି ଧରାଶାୟୀ କରିପକାଇଥିଲା। ଅଶୋକ ପ୍ରବଳ କ୍ଷତାକ୍ତ ହୋଇ ରକ୍ତରେ ବୁଡିଯାଇଥିଲା। ଦିଲ୍ଲୀପର ଭୟଙ୍କର ଆକ୍ରମଣରେ ଅଶୋକ ରକ୍ତରେ ଜୁଡୁବୁଡୁ ହୋଇ କାରୁଣ୍ୟ ଚିତ୍କାର ଛାଡିଥିଲା। ଏହି ସମୟରେ ରାଜରାସ୍ତାରେ ଯାଉଥିବା ଓ କୋର୍ଟ କାମକୁ ଆସିଥିବା ଶହ ଶହ ଲୋକ ଏହି ଅଭାବନୀୟ ଦୃଶ୍ୟ ଦେଖିଥିଲେ। ପରେ କିଛି ସ୍ଥାନୀୟ ଲୋକେ ଅଶୋକକୁ ସଙ୍କଟଜନକ ଅବସ୍ଥାରେ ଭଞ୍ଜନଗର ମେଡିକାଲରେ ଭର୍ତ୍ତି କରିଥିଲେ। ଡାକ୍ଟର ଅଶୋକଙ୍କୁ ମୃତ ଘୋଷଣା କରିଥିଲେ। ପୁଲିସ ଦିଲ୍ଲୀପକୁ ଧରି ନେଇ ଥାନାରେ ଅଟକ ରଖିଥିବା ବେଳେ ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆକୁ ଜବତ କରିଛି। ମୃତ ଅଶୋକଙ୍କ ପରିବାର ଲୋକଙ୍କ କାନ୍ଦକଟାରେ ମେଡିକାଲ ଫାଟି ପଡ଼ିଥିଲା। ଭଞ୍ଜନଗର ଥାନା ପୁଲିସ କେସ ନଂ ୭୭୦/୨୦୨୪ ମାମଲାକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟିଥିବା କଥା ପୋଲିସ ସୂତ୍ରରୁ ଜଣାପଡିଛି।
ସୂଚନା ଅନୁସାରେ ମୃତକ ଦିଲ୍ଲୀପ ସୁରତରେ ରହି ସୁତାକଳରେ କାମ କରୁଥିଲେ। ଦିଲ୍ଲୀପଙ୍କ ପତ୍ନୀ ଠାରୁ ହତ୍ୟାକାରୀ ଅଶୋକ ଲକ୍ଷ ଲକ୍ଷ ଟଙ୍କା ଓ ସୁନା ଅଳଙ୍କାର ନେଇଥିଲେ। ଦିଲ୍ଲୀପ ଗାଁକୁ ଫେରି ଘରକୁ ପଠାଇ ଥିବା ଟଙ୍କା ଓ ସୁନା ଅଳଙ୍କାର ବିଷୟରେ ପତ୍ନୀକୁ ପଚରିଥିଲେ। ଦିଲ୍ଲୀପର ପତ୍ନୀ ଗାୟତ୍ରୀ ନିଜ ସ୍ବାମୀ ସମ୍ମୁଖରେ ସମସ୍ତ ସତ୍ୟ ଘଟଣା ପ୍ରକାଶ କରିଥିଲେ। ଫଳରେ ଅଶୋକକୁ ନିଜ ପତ୍ନୀଠାରୁ ନେଇଥିବା ଟଙ୍କା ଓ ସୁନା ମାଗିଥିଲେ। କିନ୍ତୁ, ଅଶୋକ ଦିଲ୍ଲୀପକୁ ଟଙ୍କା ସୁନା ନ ଫେରେଇବାରୁ ଗାୟତ୍ରୀ ବାଧ୍ୟ ହୋଇ ଅଶୋକ ବିରୋଧର ଭଞ୍ଜନଗର ଥାନାରେ ଏତଲା ଦେଇଥିଲେ। ପୋଲିସ ଗାୟତ୍ରୀର ଏତଲା ଉପରେ ମାମଲା ରୁଜୁ କରି ଅଶୋକକୁ ଗିରଫ କରି କୋର୍ଟ ଚାଲାଣ କରିଥିଲା। ଅଶୋକ ୬ ମାସ ଜେଲରେ ବିଚାରଧୀନ ବନ୍ଦୀ ଭାବେ ରହି ଜାମିନରେ ଆସିଥିଲା। ଆଜି ତା’ର ପୁରୁଣା ମାମଲାରେ ତାରିଖ ଥିବାରୁ କୋର୍ଟକୁ ଆସିଥିଲା।
ଇତିମଧ୍ୟରେ ଦିଲୀପ ଘୋର ଆର୍ଥିକ ଅଭାବ ଅନାଟନରେ ସନ୍ତୁଳିତ ହୋଇ ସର୍ବସ୍ବାନ୍ତ ହୋଇ ଥିଲା। ଏପରି ଯେ ନିଜର ଝିଅ ବାହାଘର ପାଇଁ ମଧ୍ୟ ଅର୍ଥ ଯୋଗାଡ଼ କରିବା କଷ୍ଟସାଧ୍ୟ ହୋଇ ପଡ଼ିଥିଲା। ତେବେ, ଆଜି ଅଶୋକ କୋର୍ଟ କାମରେ ଆସିଥିବାର ଜାଣି ଦିଲ୍ଲୀପ ପୂର୍ବ ପ୍ରସ୍ତୁତି ଅନୁଯାୟୀ କୋର୍ଟ ସମ୍ମୁଖରେ ଏକ ଟାଙ୍ଗିଆ ଧରି ଜଗି ରହିଥିଲା। ଅଶୋକ କୋର୍ଟରୁ ବାହାରି ଅନ୍ୟ ଏକ ସାଙ୍ଗର ବାଇକରେ ବସି ଯିବା କ୍ଷଣି ଦିଲ୍ଲୀପ ହାଣି ଚାଲିଥିଲା। ଏହି ଘଟଣାଟି ଏବେ ଭଞ୍ଜନଗର ଅଞ୍ଚଳରେ ଆତଙ୍କ ଖେଳାଇ ଦେଇଛି।
#📰ଦେଶ-ବିଦେଶ ଅପଡେଟ ଇରାନର ସୁପ୍ରିମ ଲିଡର ଭାବେ ନିଯୁକ୍ତି ପାଇଛନ୍ତି ମୋଜତାବା ଖାମେନେଇ। ଶନିବାର ଇସ୍ରାଏଲ ଓ ଆମେରିକାର ଏୟାର ଷ୍ଟ୍ରାଇକରେ ଇରାନର ସୁପ୍ରିମ ଲିଡର ଆୟୋତୁଲ୍ଲା ଅଲୀ ଖାମେନେଇ ପ୍ରାଣ ହରାଇଥିଲା। ଏହାପରେ ଦେଶର ଶକ୍ତିଶାଳୀ ଆସେମ୍ବ୍ଲି ଅଫ ଏକ୍ସପର୍ଟ ଅଲୀ ଖାମେନେଇ ପୁଅ ମୋଜତାବାଙ୍କୁ ଦେଶର ସୁପ୍ରିମ ଲିଡର ଭାବେ ଚୟନ କରିଛନ୍ତି।
ମୋଜତାବା ଇରାନର ସୁପ୍ରିମ ଲିଡର ହେବା କ୍ଷଣୀ ଇସ୍ରାଏଲ ପକ୍ଷରୁ ତାଙ୍କୁ ଖୋଲା ଧମକ ଦିଆଯାଇଛି। ଇରାନର ପରବର୍ତ୍ତୀ ସୁପ୍ରିମ ଲିଡରଙ୍କୁ ନିପାତ କରିବା ପାଇଁ ଟାର୍ଗେଟ କରାଯିବ ବୋଲି ଇସ୍ରାଏଲ ପ୍ରତିରକ୍ଷା ମନ୍ତ୍ରୀ କହିଛନ୍ତି।
ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ କହିଛନ୍ତି ଯେ ଇରାନ ଯାହାକୁ ବି ଦେଶର ପରବର୍ତ୍ତୀ ସୁପ୍ରିମ ଲିଡର ଭାବେ ବାଛିବ, ତାଙ୍କୁ ନିପାତ କରିବା ପାଇଁ ଟାର୍ଗେଟ କରାଯିବ। ସେ କହିଛନ୍ତି, “ଇସ୍ରାଏଲକୁ ଧ୍ୱଂସ କରିବା, ଆମେରିକା, ବିଶ୍ୱର ମୁକ୍ତ ଦେଶ ଓ ଉକ୍ତ ଅଞ୍ଚଳରେ ଥିବା ଦେଶଗୁଡ଼ିକ ଧମକାଇବା ପାଇଁ ଇରାନୀ ଆତଙ୍କୀ ଶାସନ ଦ୍ୱାରା ନିଯୁକ୍ତ ହେଉଥିବା ପ୍ରତିଟି ନେତା ଓ ନେତୃତ୍ୱଙ୍କୁ ନିପାତ କରାଯିବ। କାହାକୁ ବି ଛଡ଼ା ଯିବ ନାହିଁ।”
ମୋଜତାବା ଇରାନର ନୂଆ ସୁପ୍ରିମ ଲିଡର ଭାବେ ନିଯୁକ୍ତି ପାଇବା ଖବର ସାମ୍ନାକୁ ଆସିବା ପରେ ଇସ୍ରାଲଏ ପକ୍ଷରୁ ଏପରି ଧମକ ଦିଆଯାଇଛି। ଅଲୀ ଖାମେନେଇଙ୍କ ଭଳି ଆଇଆରଜିସିରେ ମୋଜତାବାଙ୍କ ବେଶ ଦବଦବା ରହିଛି। ମୋଜତାବାଙ୍କୁ ସୁପ୍ରିମ ଲିଡର କରିବାକୁ ଆଇଆରଜିସି ମଧ୍ୟ ପ୍ରସ୍ତାବ ଦେଇଥିଲା।
୧୯୬୯ରେ ମାଶହାଦରେ ଜନ୍ମ ଗ୍ରହଣ କରିଥିବା ମୋଜତାବା ଖାମେନେଇ ହେଉଛନ୍ତି ଅଲୀ ଖାମେନେଇଙ୍କ ଦ୍ୱିତୀୟ ପୁଅ। ସେ ଶାହ ମହମ୍ମଦ ରେଜା ପହଲଭୀଙ୍କ ଶାସନ ସମୟରେ ବଡ଼ ହୋଇଥିଲେ। ତାଙ୍କ ବାପା ଅଲୀ ଖାମେନେଇ ରାଜତନ୍ତ୍ରର ତୀବ୍ର ସମାଲୋଚକ ଥିଲେ। ସେ ରାଜତନ୍ତ୍ର ବିରୋଧରେ ରୁହୋଲ୍ଲା ଖୋମେନିଙ୍କ ସହ ହାତ ମିଳାଇଥିଲେ। ୧୯୭୯ ଇରାନ ବିପ୍ଳବର ରାଜତନ୍ତ୍ରର ଲୋପ ହୋଇଥିଲା ଓ ଦେଶରେ ଧାର୍ମିକ ଗଣତନ୍ତ୍ର ଶାସନ ଆରମ୍ଭ ହୋଇଥିଲା। ରୁହୋଲ୍ଲା ଖୋମେନି ଇରାନର ପ୍ରଥମ ସୁପ୍ରିମ ଲିଡର ହୋଇଥିଲେ। ପରବର୍ତ୍ତୀ ସମୟରେ ଖାମେନେଇ ପରିବାର ନୂଆ ଶକ୍ତି କେନ୍ଦ୍ରର ମୂଳକୁ ଦଖଲ କରିଥିଲେ।
୧୯୮୯ରେ ଅଲି ଖାମେନେଇ ଇରାନର ସୁପ୍ରିମ ଲିଡର ହେବା ପରେ ମୋଜତାବା ଇରାନର ଧାର୍ମିକ ଓ ରାଜନୀତିକ କେନ୍ଦ୍ରକୁ ଆସିଥିଲେ। ଅଧିକାଂଶ ରାଜନୀତିକ ପରିବାର ଭଳି କିନ୍ତୁ ୫୬ ବର୍ଷୀୟ ମୋଜତାବା ସର୍ବସମ୍ମୁଖକୁ ଆସୁ ନଥିଲେ। ସେ ସବୁବେଳେ କ୍ୟାମେରା ଆଢ଼ୁଆଳରେ ରହୁଥିଲେ।
ସେ ପରାଦ ପଛରେ ରହି ସବୁ କିଛି କରୁଥିଲେ। ସୁପ୍ରିମ ଲିଡରଙ୍କ ଅଫିସରେ ତାଙ୍କ ନିର୍ଦ୍ଦେଶରେ କାର୍ଯ୍ୟ ହେଉଥିଲା। ଫେବୃଆରୀ ୨୮ରେ ବାପା ଖାମେନେଇଙ୍କ ମୃତ୍ୟୁ ପରେ ଏବେ ମୋଜତାବା ସୁପ୍ରିମ ଲିଡର ହୋଇଛନ୍ତି।
ମୋଜତାବା ଖାମେନେଇ ୧୯୮୭ରେ ଇରାନର ଇସଲାମିକ ମିଲିଟାରୀ ଫୋର୍ସରେ ସାମିଲ ହୋଇଥିଲେ। ଇରାନ-ଇରାକ ଯୁଦ୍ଧର ଶେଷ ପର୍ଯ୍ୟାୟରେ ହିଁ ସେ ବନ୍ଧୁକ ଉଠାଇଥିଲେ। ଯୁଦ୍ଧ ସମୟରେ ସେ ହାବିବ ବାଟାଲିୟନ ପାଇଁ ଲଢ଼େଇ କରି ନିଜର ଦକ୍ଷତା ପ୍ରଦର୍ଶନ କରିଥିଲେ।
#🗞ଓଡ଼ିଶା ଅପଡେଟ📺 ଭୁବନେଶ୍ୱର,୪।୩: ରଙ୍ଗର ପର୍ବ ହୋଲିରେ ଭୁବନେଶ୍ୱରରେ ଚାଞ୍ଚଲ୍ୟ। ସ୍ତ୍ରୀଙ୍କ ରକ୍ତରେ ହୋଲି ଖେଳିଲେ ସ୍ବାମୀ। ହୋଲିରେ ସ୍ତ୍ରୀଙ୍କୁ ଛୁରି ଭୁସିି ହତ୍ୟା କଲେ ସ୍ବାମୀ। ଏଭଳି ଅଭାବନୀୟ ଘଟଣା ଘଟିଛି ଭରତପୁର ଥାନା ଅଧୀନ ଫୁଲେଶରି ବସ୍ତିରେ। ମହିଳାଙ୍କୁ ହତ୍ୟା କରାଯାଇଥିବା ସୂଚନା ମିଳିଛି । ସ୍ବାମୀଙ୍କ ଛୁରା ମାଡ଼ରେ ସ୍ତ୍ରୀଙ୍କ ମୃତ୍ୟୁ ଅଭିଯୋଗ ହୋଇଛି। ହତ୍ୟାର କାରଣ ଅସ୍ପଷ୍ଟ ଥିବା ବେଳେ ଭରତପୁର ପୋଲିସ ତଦନ୍ତ ଆରମ୍ଭ କରିଛି।
#📰ଦେଶ-ବିଦେଶ ଅପଡେଟ ତିନି ଦିନ ଧରି ବନ୍ଦ ହୋଇ ରହିଥିଲା ଦୋକାନ, ଫ୍ରିଜରରେ ଥିଲା ମୃତଦେହ
ଶରୀରରେ ନାହିଁ ଆଘାତ, ଫ୍ରିଜରରେ ପଶିଥିଲା କି ଜୀଅନ୍ତା ମଣିଷ?
ଗୋଟିଏ ଚପଲ ରାସ୍ତାରେ, ଅନ୍ୟଟି ଦୋକାନରେ
ମୋବାଇଲ୍ ଓ ଆଧାର କାର୍ଡ ଦେଲା ପରିଚୟ
ଭେଜ୍ ବିରିୟାନୀ ଦୋକାନ। ସେଠି ଆମିଷର ଗନ୍ଧ ନାହିଁ। କିନ୍ତୁ ଫ୍ରିଜର ଭିତରୁ ବାହାରିଲା ମଣିଷର ମୃତଦେହ। ଫ୍ରିଜର ଭିତରକୁ କେମିତି ଗଲା ମଣିଷର ମୃତଦେହ? କିଏ, କାହିଁକି ଓ କ’ଣ ପାଇଁ ମାରିଲା? ଏ ମୃତ୍ୟୁ ରହସ୍ୟ ଉପରୁ ଉଠୁନି ପରଦା। ମଦ ନିଶାରେ ବ୍ୟକ୍ତି ଜଣକ ଫ୍ରିଜରେ ପଡ଼ି ପ୍ରାଣ ହରାଇଛନ୍ତି ନା କିଏ ଜାଣି ଜାଣି ତାଙ୍କୁ ମାରି ଫ୍ରିଜ୍ ଭିତରେ ପୂରାଇଥିଲା, ତାହା ସ୍ପଷ୍ଟ ହୋଇପାରିନି।
ଏ ଜଘନ୍ୟ ଘଟଣାଟି ଘଟିଛି ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌର। ଗତ ଶନିବାର ଅପରାହ୍ଣରୁ ୩୮ ବର୍ଷୀୟ ବିଜୟ ପାଲ ନାମକ ଏହି ବ୍ୟକ୍ତି ନିଖୋଜ ହୋଇଯାଇଥିଲେ। ଆଉ ରବିବାର ସକାଳେ ଏକ ନିରାମିଷ ବିରିୟାନୀ ଦୋକାନର ଡିପ୍ ଫ୍ରିଜର ଭିତରୁ ତାଙ୍କ ମୃତଦେହ ମିଳିଥିଲା।
ପୁଲିସର ସୂଚନା ଆନୁଯାୟୀ, ଯେଉଁ ଦୋକାନରୁ ମୃତଦେହଟି ମିଳିଥିଲା, ତାହା ଟିଣକାନ୍ଥ ଘେରା ଏକ ଅସ୍ଥାୟୀ ଦୋକାନ। ଦୋକାନ ମାଲିକକୁ ପଚରାଉଚରା ପରେ ସେ ପୁଲିସକୁ କହିଛନ୍ତି ଯେ, ତିନି ଦିନ ଧରି ଦୋକାନ ବନ୍ଦ ଥିଲା। ଯେଉଁ ଫ୍ରିଜରରୁ ମୃତଦେହଟି ମିଳିଛି, ତାହା ମଧ୍ୟ ବହୁଦିନ ଧରି ଖରାପ ହୋଇ ପଡ଼ି ରହିଥିଲା।
ଘଟଣାସ୍ଥଳରୁ ମିଳିଥିବା ମୋବାଇଲ୍ ଫୋନ୍ ଓ ଆଧାର କାର୍ଡ ଆଧାରରେ ପୁଲିସ ଏହି ବ୍ୟକ୍ତିଙ୍କୁ ବିଜୟ ପାଲ୍ ବୋଲି ଚିହ୍ନଟ କରିଛି। ତାଙ୍କ ଶରୀରରେ କୌଣସି ଆଘାତ ଚିହ୍ନ ନାହିଁ। ମୃତ୍ୟୁର ସଠିକ୍ କାରଣ ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ଜଣାପଡ଼ିବ। ତେବେ ମୃତ ବିଜୟ ପାଲଙ୍କର ଗୋଟିଏ ଚପଲ ଦୋକାନ ବାହାରେ ପଡ଼ିଥିବା ବେଳେ ଆଉ ଗୋଟିଏ ପଡ଼ିଥିଲା ଦୋକାନ ଭିତରେ। ଏହାର ଉତ୍ତର ଖୋଜୁଛି ପୁଲିସ। ପୁଲିସ ଘଟଣାର ତଦନ୍ତ କରୁଛି।
