#📰ଦେଶ-ବିଦେଶ ଅପଡେଟ ତେହରାନ: ଇସ୍ରାଏଲ୍ ଓ ଆମେରିକା ବିରୋଧରେ ଯୁଦ୍ଧ ଚଳାଇଥିବା ଇରାନର ରାଜନୈତିକ କ୍ଷେତ୍ରରେ ବ୍ୟାପକ ପରିବର୍ତ୍ତନ ହୋଇଛି। ଦେଶରେ ଏବେ ନେତୃତ୍ବର ଅଭାବ ଦେଖାଯାଇଛି। ଯୁଦ୍ଧରେ ପ୍ରଥମ ଦିନରେ ଇରାନ ଏହାର ସର୍ବୋଚ୍ଚ ନେତା ଆୟାତୋଲ୍ଲା ଅଲୀ ଖାମେନେଇଙ୍କୁ ହରାଇବା ପରେ ପରବର୍ତ୍ତୀ ସମୟରେ ଅନ୍ୟ ବରିଷ୍ଠ ନେତାଙ୍କୁ ହରାଇ ଚାଲିଛି। ଆୟାତୋଲ୍ଲା ଖାମେନେଇଙ୍କ ମୃତ୍ୟୁ ପରେ ତାଙ୍କ ପୁଅ ମୋଜତାବା ଖାମେନେଇଙ୍କୁ ସର୍ବୋଚ୍ଚ ନେତା ମନୋନୟନ କରାଯାଇଥିଲା। ମାତ୍ର ମୋଜତାବା ଖାମେନେଇ ଯୁଦ୍ଧରେ ଆହତ ହୋଇ ଏବେ କୋମାରେ ରହିଛନ୍ତି। ସେ ସର୍ବସାଧାରଣରେ ଦେଖାଯାଉ ନାହାନ୍ତି। ଏପରିସ୍ଥିତିରେ ରାଷ୍ଟ୍ରପତି ମାସୁଦ ପେଜେସ୍କିଆନ ଦେଶର ଶାସନ ଦାୟିତ୍ବ ନିର୍ବାହ କରିବାର ନିୟମ ରହିଛି। ମାତ୍ର ଇରାନର ସେନା ଇସଲାମିକ ରିଭୋଲ୍ୟୁସନାରୀ ଗାର୍ଡ କର୍ପସ୍ (ଆଇଆରଜିସି) ରାଷ୍ଟ୍ରପତି ପେଜେସ୍କିଆନଙ୍କୁ ଉପେକ୍ଷା କରି ଦେଶର ଶାସନ କାର୍ଯ୍ୟକୁ ନିଜ ନିୟନ୍ତ୍ରଣକୁ ନେଇଛି। କଠୋରପନ୍ଥୀ ଭାବେ ପରିଚିତ ଆଇଆରଜିସି ଏବେ ଇରାନର ସାମରିକ ବାହିନୀ ସହିତ ଦେଶର ନୀତି ନିର୍ଦ୍ଧାରକ ସାଜିଛି। ଏପରି କ୍ଷେତ୍ରରେ ଶାନ୍ତି କଥାବାର୍ତ୍ତା ପାଇଁଇରାନ ପକ୍ଷରୁ ପ୍ରତିନିଧିତ୍ବ କରିବାକୁ କେହି ଉପଲବ୍ଧ ହୋଇପାରୁ ନାହାନ୍ତି। ଗୋଟିଏ ପଟେ ଆମେରିକା କହୁଛି ଯେ ଇରାନ ସହିତ ଶାନ୍ତି କଥାବାର୍ତ୍ତା ସକାରାତ୍ମକ ଦିଗରେ ଆଗେଇ ଚାଲିଛି। ମାତ୍ର ଇରାନ ଏହି କଥାବାର୍ତ୍ତାକୁ ଅସ୍ବୀକାର କରି ଚାଲିଛି।
ନିକଟରେ ଆମେରିକା ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥ କହିଥିଲେ ଯେ ମୋଜତାବା ଖାମେନେଇ କୋମା ଅବସ୍ଥାରେ ଅଛନ୍ତି। ଏପରି କି ତାଙ୍କ ଶରୀରର କିଛି ଅଙ୍ଗପ୍ରତ୍ୟଙ୍ଗ ନଷ୍ଟ ହୋଇଯାଇଛି। ଆଇଆରଜିସି ବରିଷ୍ଠ ଅଧିକାରୀମାନେ ଏବେ ମୋଜତାବାଙ୍କୁ ସୁରକ୍ଷା ବଳୟ ମଧ୍ୟରେ ରଖିଛନ୍ତି। ତାଙ୍କ ପାଖକୁ ସରକାରୀ ଅଧିକାରୀଙ୍କ ଆଗମନକୁ ମଧ୍ୟ ସୀମିତ କରାଯାଇଛି। ଏପରି କି ରାଷ୍ଟ୍ରପତି ପେଜେସ୍କିଆନ ଅନେକ ଥର ମୋଜତାବାଙ୍କୁ ସାକ୍ଷାତ କରିବାକୁ ଯାଇଥିବାବେଳେ ଆଇଆରଜିସିର ଅଧିକାରୀମାନେ ତାଙ୍କୁ ଏଥିପାଇଁ ଅନୁମତି ଦେଉନାହାନ୍ତି। ହୋସେ ଦେହଘାନଙ୍କୁ ଗୁଇନ୍ଦା ବିଭାଗ ମନ୍ତ୍ରୀ ଭାବେ ନିଯୁକ୍ତି ଦେବାକୁ ରାଷ୍ଟ୍ରପତି ପେଜେସ୍କିଆନ ଉଦ୍ୟମ କରିଥିବାବେଳେ ଆଇଆରଜିସିର ମୁଖ୍ୟ କମାଣ୍ଡର ଏହାକୁ ଅନୁମୋଦନ କରିବାକୁ ମନା କରିଛନ୍ତି।
#🗞ଓଡ଼ିଶା ଅପଡେଟ📺 ବୈଶିଙ୍ଗା: ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅନ୍ତର୍ଗତ ମଛପଦା ନିକଟରେ ବୁଧବାର ରାତିରେ ଏକ ମର୍ମନ୍ତୁଦ ରେଳ ଦୁର୍ଘଟଣା ଘଟିଯାଇଛି। ବାଙ୍ଗିରିପୋଷି-ରୁପ୍ସା ଡିଏମୟୁ (DMU) ଟ୍ରେନ ଧକ୍କାରେ ଜଣେ ବୃଦ୍ଧଙ୍କର ମୁଣ୍ଡ ଗଣ୍ଡି ଅଲଗା ହୋଇଯାଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ବୈଶିଙ୍ଗା ଥାନା ମଲକଡି ଗ୍ରାମର ନିନା ସିଂହଙ୍କ ପୁଅ ରବି ସିଂହ (୬୦) l
ବୁଧବାର ରାତି ପ୍ରାୟ ୮:୩୦ ସମୟରେ କୌଣସି କାରଣବଶତଃ ରେଳ ଲାଇନ ପାର ହେଉଥିଲେ। ସେହି ସମୟରେ ଟ୍ରେନ ଆସୁଥିବା ଜାଣି ନ ପାରିବାରୁ ବାଙ୍ଗିରିପୋଷି-ରୁପ୍ସା ଡିଏମୟୁ ଟ୍ରେନ ତାଙ୍କୁ ଜୋରରେ ଧକ୍କା ଦେଇଥିଲା। ଧକ୍କା ଏତେ ଭୟଙ୍କର ଥିଲା ଯେ ଘଟଣାସ୍ଥଳରେ ହିଁ ତାଙ୍କର ମୁଣ୍ଡ ଶରୀରରୁ ଅଲଗା ହୋଇଯାଇଥିଲା।
ଦୁର୍ଘଟଣା ପରେ ଟ୍ରେନ ଚାଳକ ତୁରନ୍ତ ଟ୍ରେନ ଅଟକାଇ ସ୍ଥାନୀୟ ଲୋକଙ୍କୁ ଏ ବିଷୟରେ ଅବଗତ କରାଇଥିଲେ। ଏହା ସହିତ ରେଳବାଇ ପୋଲିସ (GRP) କୁ ମଧ୍ୟ ଖବର ଦିଆଯାଇଥିଲା। ଖବର ପାଇ ମୃତ ରବିଙ୍କ ପରିବାର ବର୍ଗ ଓ ଗ୍ରାମବାସୀମାନେ ଘଟଣାସ୍ଥଳରେ ପହଞ୍ଚିଥିଲେ।
ବାଲେଶ୍ୱର ଜିଆରପି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା। ପରେ ମୃତଦେହ ବ୍ୟବଚ୍ଛେଦ ପାଇଁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ପଠାଯାଇଛି। ଜଣେ ବୟସ୍କ ବ୍ୟକ୍ତିଙ୍କର ଏଭଳି ଅକାଳ ବିୟୋଗ ପରେ ସ୍ଥାନୀୟ ଅଞ୍ଚଳରେ ଏବଂ ତାଙ୍କ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
#🗞ଓଡ଼ିଶା ଅପଡେଟ📺 ମୋହନା : ରାଜ୍ୟ ସରକାରଙ୍କ ଗଞ୍ଜେଇ ମୁକ୍ତ ଓଡ଼ିଶା ଅଭିଯାନ ମଧ୍ୟରେ ଗଜପତି ପୋଲିସକୁ ଏକ ବଡ଼ ସଫଳତା ମିଳିଛି। ଜିଲାର ଆର୍. ଉଦୟଗିରି ଥାନା ଅନ୍ତର୍ଗତ ନୂଆଗଡ଼ ବ୍ଲକର ବୁରିପଦର ଗାଁରେ ଚଢ଼ାଉ କରି ପୋଲିସ ବିପୁଳ ପରିମାଣର ଗଞ୍ଜେଇ ଜବତ କରିଛି।
ସୂଚନା ଅନୁଯାୟୀ, ବୁରିପଦର ଗାଁର କିଛି ଘର ଓ ନିକଟସ୍ଥ ଜଙ୍ଗଲରେ ଗଞ୍ଜେଇ ମହଜୁଦ ଥିବା ନେଇ ପୋଲିସ ଖବର ପାଇଥିଲା। ଏସ୍ଡିପିଓ(ଆଇପିଏସ୍) ରାକେଶ କୁମାର ସାହୁଙ୍କ ନିର୍ଦ୍ଦେଶରେ ମୋହନା ଏବଂ ଆର୍. ଉଦୟଗିରି ଥାନା ପୋଲିସକୁ ନେଇ ଏକ ସୱତନ୍ତ୍ର ଟିମ ଗଠନ କରାଯାଇଥିଲା। ଏହି ଟିମ ଏକ୍ଜ୍ୟୁଟିଭ ମାଜିଷ୍ଟ୍ରେଟ ଏବଂ ସାକ୍ଷୀଙ୍କ ଉପସ୍ଥିତିରେ ଚଢ଼ାଉ କରି ୧୮ କୁଇଣ୍ଟାଲ ୩୦ କିଲୋ ଗଞ୍ଜେଇ ଜବତ କରିଛି।
ପୋଲିସ ଆସିବାର ଖବର ପାଇ ତିନି ଜଣ ଗଞ୍ଜେଇ ମାଫିଆ ଘଟଣାସ୍ଥଳରୁ ଜଙ୍ଗଲକୁ ଚମ୍ପଟ ମାରିଛନ୍ତି। ଏହି ଘଟଣାରେ ପୋଲିସ ୪୯/୨୬ରେ ଏକ ମାମଲା ରୁଜୁ କରିବା ସହ ତିନିଜଣ ଅଭିଯୁକ୍ତଙ୍କ ନାମରେ କେସ ଦାୟର କରିଛି। ସେମାନଙ୍କୁ ଧରିବା ପାଇଁ ପୋଲିସ ତନାଘନା ଜାରି ରଖିଛି।
ଜବତ ହୋଇଥିବା ଗଞ୍ଜେଇର ଆନୁମାନିକ ବଜାର ଦର ପ୍ରାୟ ୧ କୋଟି ୮୦ ଲକ୍ଷ ଟଙ୍କା ହେବ ବୋଲି ଏସଡିପିଓ ରାକେଶ ସାହୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଗଜପତି ଜିଲ୍ଲାରେ ଗଞ୍ଜେଇ ଚୋରା ଚାଲାଣକୁ ସମ୍ପୂର୍ଣ୍ଣ ରୂପେ ବନ୍ଦ କରିବା ପାଇଁ ପୋଲିସ ଏଭଳି କଡ଼ା ପଦକ୍ଷେପ ଜାରି ରଖିବ ବୋଲି ସେ କହିଛନ୍ତି।
#📰ଦେଶ-ବିଦେଶ ଅପଡେଟ ରାଜ୍ୟରେ ଜାତୀୟ ଜନଗଣନା ପ୍ରକ୍ରିୟା ହୋଇଛି। ବୁଧବାର ରାଜ୍ୟପାଳ ଡକ୍ଟର ହରିବାବୁ କମ୍ଭମପାଟି ରାଜ୍ୟର ପ୍ରଥମ ନାଗରିକ ଭାବେ ନିଜର ଡିଜିଟାଲ ତଥ୍ୟ ପ୍ରଦାନ କରି ଏହି ଅଭିଯାନର ଶୁଭାରମ୍ଭ କରିଛନ୍ତି। ମୁଖ୍ୟ ସଚିବ ଅନୁ ଗର୍ଗ ଓ ଭୁବନେଶ୍ୱର ମେୟର ସୁଲୋଚନା ଦାସ ମଧ୍ୟ ନିଜ ନିଜର ସେଲଫ ଏନ୍ୟୁମେରେସନ୍ ବା ସ୍ୱୟଂଗଣନା ପ୍ରକ୍ରିୟା ଶେଷ କରିଛନ୍ତି।
ବୁଧବାର ଲୋକଭବନଠାରେ ରାଜ୍ୟର ପ୍ରଥମ ନାଗରିକ ଭାବେ ରାଜ୍ୟପାଳ ଡକ୍ଟର କମ୍ଭମପାଟି ପ୍ରଥମେ ନିଜର ବ୍ୟକ୍ତିଗତ ତଥ୍ୟ ପ୍ରଦାନ କରି ସ୍ୱୟଂ-ଗଣନା ପ୍ରକ୍ରିୟାର ଶୁଭାରମ୍ଭ କରିଥିଲେ। ଏହି ଅବସରରେ ରାଜ୍ୟପାଳ ସମସ୍ତ ରାଜ୍ୟବାସୀଙ୍କୁ ଏହି ଜାତୀୟ କାର୍ଯ୍ୟକ୍ରମରେ ସକ୍ରିୟ ଭାବେ ସାମିଲ ହେବାକୁ ଆହ୍ୱାନ ଦେଇ କହିଛନ୍ତି ଯେ, ସଠିକ୍ ତଥ୍ୟ ସଂଗ୍ରହ ହେଲେ ହିଁ ସରକାରୀ ଯୋଜନାଗୁଡ଼ିକର ସୁଫଳ ସମାଜର ଶେଷ ଧାଡ଼ିରେ ଥିବା ବ୍ୟକ୍ତିଙ୍କ ପାଖରେ ପହଂଚିପାରିବ। ଲୋକଭବନରେ ଏହି ସ୍ୱୟଂ-ଗଣନା ପ୍ରକ୍ରିୟାର ଶୁଭାରମ୍ଭବେଳେ ଓଡ଼ିଶା ଜନଗଣନା ନିର୍ଦ୍ଦେଶକ ନିଖିଳ ପବନ କଲ୍ୟାଣ ଓ ବିଏମସି କମିଶନର ଚଞ୍ଚଳ ରଣାଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଚଳିତ ଜନଗଣନାକୁ ସଠିକ୍ ଓ ପାରଦର୍ଶୀ କରିବା ନିମନ୍ତେ ମୋଟ ୩୩ଟି ପ୍ରଶ୍ନ ସମ୍ବଳିତ ଏକ ପ୍ରଶ୍ନୋତ୍ତର ପ୍ରସ୍ତୁତ ହୋଇଛି। ଏହି ପ୍ରଶ୍ନଗୁଡ଼ିକ ମଧ୍ୟରେ ବାସଗୃହର ନମ୍ବର, କାନ୍ଥ ଓ ଛାତରେ ବ୍ୟବହୃତ ସାମଗ୍ରୀ, ପରିବାରର ମୁଖ୍ୟଙ୍କ ନାମ ଓ ଲିଙ୍ଗ, ପାନୀୟ ଜଳର ଉତ୍ସ, ଶୌଚାଳୟ, ରୋଷେଇ ଘରେ ଏଲପିଜି ସଂଯୋଗ ଭଳି ମୌଳିକ ସୂଚନା ସାମିଲ ରହିଛି।
ଏହାସହିତ ପରିବାରରେ ରେଡିଓ, ଟେଲିଭିଜନ, ଇଣ୍ଟରନେଟ୍ ସୁବିଧା, ଲ୍ୟାପଟପ୍, ମୋବାଇଲ୍ ଫୋନ୍, ଦୁଇଚକିଆ କିମ୍ବା ଚାରିଚକିଆ ଯାନ ଓ ମୁଖ୍ୟ ଖାଦ୍ୟଶସ୍ୟ ସମ୍ପର୍କରେ ମଧ୍ୟ ତଥ୍ୟ ଦେବାକୁ ପଡ଼ିବ। ଆରମ୍ଭ ହୋଇଥିବା ଏହି ଅନଲାଇନ୍ ସ୍ୱୟଂ-ଗଣନା ପ୍ରକ୍ରିୟା ଏପ୍ରିଲ ୧୫ ତାରିଖ ମଧ୍ୟରାତ୍ରି ପର୍ଯ୍ୟନ୍ତ ଜାରି ରହିବ।
ସ୍ୱୟଂ-ଗଣନା ପ୍ରକ୍ରିୟା ଶେଷହେବା ପରେ ଦ୍ୱିତୀୟ ପର୍ଯ୍ୟାୟରେ ଏପ୍ରିଲ ୧୬ରୁ ମେ ୧୫ତାରିଖ ପର୍ଯ୍ୟନ୍ତ ଘରକୁ ଘର ବୁଲି ତଥ୍ୟ ସଂଗ୍ରହ ଓ ଯାଂଚ କାର୍ଯ୍ୟ ଆରମ୍ଭ ହେବା ପାଇଁ ନିଷ୍ପତ୍ତି ନିଆଯାଇଛି। ଏହି ବୃହତ୍ ଅଭିଯାନ ପାଇଁ ରାଜ୍ୟରେ ଏକ ଲକ୍ଷରୁ ଅଧିକ ଗଣନାକାରୀ ଓ ୧୭ ହଜାରରୁ ଅଧିକ ସୁପରଭାଇଜରଙ୍କୁ ନିୟୋଜିତ କରାଯାଇଛି। ସହରାଂଚଳରୁ ଆରମ୍ଭ କରି ଦୁର୍ଗମ ଗ୍ରାମାଞ୍ଚଳ ପର୍ଯ୍ୟନ୍ତ ସବୁଠି ମୋବାଇଲ୍ ଆପ୍ଲିକେସନ୍ ଜରିଆରେ ତଥ୍ୟ ସଂଗ୍ରହ କରାଯିବ।
ରାଜ୍ୟ ସରକାରଙ୍କ ବିପର୍ଯ୍ୟୟ ପରିଚାଳନା ବିଭାଗ ଓ ଜନଗଣନା ନିର୍ଦ୍ଦେଶାଳୟର ମିଳିତ ସମନ୍ୱୟରେ ପରିଚାଳିତ ଏହି ଜନଗଣନା(Census 2026 Odisha) କାର୍ଯ୍ୟକ୍ରମରେ କୌଣସି ପରିବାର ଯେପରି ବାଦ୍ ନପଡ଼ନ୍ତି, ସେଥିପାଇଁ ଜିଲ୍ଲାପାଳ ଓ ପୌର କମିଶନରମାନଙ୍କୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି। ଶିକ୍ଷକମାନଙ୍କୁ ସ୍ୱତନ୍ତ୍ର ଭାବେ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟରେ ନିୟୋଜିତ କରାଯାଇଛି।
#📰ଦେଶ-ବିଦେଶ ଅପଡେଟ ପ୍ରବାଦପୁରୁଷ ବିଜୁ ପଟ୍ଟନାୟକଙ୍କ ସମ୍ପର୍କରେ ବିଜେପି ସାଂସଦ ନିଶିକାନ୍ତ ଦୁବେଙ୍କ ବିବାଦୀୟ ମନ୍ତବ୍ୟକୁ ନେଇ ରାଜ୍ୟ ରାଜନୀତି ସରଗରମ ରହିଛି। ବିଭିନ୍ନ ଆଡ଼ୁ ଚାପ ପଡ଼ିବା ପରେ ସାଂସଦ ଶ୍ରୀ ଦୁବେ ନିଜର ଭୁଲ୍ ସ୍ୱୀକାର କରି ସୋସିଆଲ ମିଡିଆରେ ନିଃସର୍ତ୍ତ କ୍ଷମା ମାଗିଥିବାବେଳେ ବିଜେଡି ଏହାକୁ ଗ୍ରହଣ କରିନି। ବିଜୁବାବୁଙ୍କ ପ୍ରତି ଅପମାନ କେବଳ ବ୍ୟକ୍ତିଗତ ନୁହେଁ ବରଂ ଓଡ଼ିଶାର ସ୍ୱାଭିମାନ ଉପରେ ଆଘାତ ଦର୍ଶାଇ ନିଶିକାନ୍ତଙ୍କ ଗିରଫ ଦାବି କରିଛି ବିଜେଡି। ଏପଟେ ଉତ୍କଳ ଦିବସ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୪ ପୃଷ୍ଠାର ଚିଠି ଲେଖି ବିଜୁବାବୁଙ୍କ ଗୁଣଗାନ ମଧ୍ୟ କରିଛନ୍ତି।
ବିଜୁବାବୁଙ୍କ ପ୍ରତି ବିଜେପି ସାଂସଦ ନିଶିକାନ୍ତ ଦୁବେଙ୍କ ଅପମାନଜନକ ମନ୍ତବ୍ୟକୁ ନେଇ ଓଡ଼ିଶାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ଜାତୀୟସ୍ତରରେ ମଧ୍ୟ ବିଭିନ୍ନ ଦଳର ନେତାମାନେ କଡ଼ା ଭାଷାରେ ନିନ୍ଦା କରିଥିଲେ। ଏହାପରେ ଆଜି ନିଜର ‘ଏକ୍ସ’ ହ୍ୟାଣ୍ଡଲରେ ନିଶିକାନ୍ତ ଏକ ପୋଷ୍ଟ କରି ସ୍ପଷ୍ଟୀକରଣ ରଖିବା ସହ ନିଃସର୍ତ୍ତ କ୍ଷମା ପ୍ରାର୍ଥନା କରିଛନ୍ତି। ସେ ଲେଖିଛନ୍ତି ଯେ, “ଗତସପ୍ତାହରେ ଗଣମାଧ୍ୟମ ସହ ଆଲୋଚନାବେଳେ ନେହେରୁ-ଗାନ୍ଧୀ ପରିବାରର କାରନାମା ବିଷୟରେ ସେ କହିଥିଲେ କିନ୍ତୁ ପୂର୍ବତନ ମୁଖ୍ୟମନ୍ତ୍ରୀ ତଥା ଭାରତର ଅଗ୍ରଣୀ ନେତା ଆଦରଣୀୟ ବିଜୁ ପଟ୍ଟନାୟକଙ୍କ ସମ୍ପର୍କରେ ତାଙ୍କ କଥାକୁ ଭୁଲ୍ ଅର୍ଥରେ ନିଆଯାଇଛି। ପ୍ରଥମତଃ ଏହି ବକ୍ତବ୍ୟଟି ମୋର ନିଜସ୍ୱ ମତ। ନେହରୁଜୀଙ୍କ ସମ୍ପର୍କରେ ମୋର ଭାବନାକୁ ବିଜୁବାବୁଙ୍କ ବିଷୟରେ ବୁଝାଯାଇଛି। ବିଜୁବାବୁ ଆମ ପାଇଁ ସର୍ବଦା ଜଣେ ଉଚ୍ଚକୋଟିର ଷ୍ଟେଟସମ୍ୟାନ୍ ଥିଲେ ଓ ରହିବେ। ମୋର ବକ୍ତବ୍ୟରେ ଯଦି ଭାବନାକୁ ଆଘାତ ହୋଇଛି ସେଥିପାଇଁ ନିଃସର୍ତ୍ତ କ୍ଷମା ପ୍ରାର୍ଥନା କରୁଛି।”
ତେବେ ନିଶିକାନ୍ତଙ୍କ ଏହି କ୍ଷମା ପ୍ରାର୍ଥନାକୁ ବିଜେଡିକୁ ଗ୍ରହଣୀୟ ହୋଇନାହିଁ। ଦଳ ଏକ ସାମ୍ବାଦିକ ସମ୍ମିଳନୀ କରି ‘ଗୋଇଠା ମାରି ବିଷ୍ଣୁ ହେବା’ ସଦୃଶ ଆଚରଣ ନିଶିକାନ୍ତ କରୁଥିବା କହିଛି। ନିଶିକାନ୍ତ ସିଧାସଳଖ ଭୁଲ୍ ନମାଗି କଥାକୁ ବୁଲେଇବଙ୍କେଇ ପୁଣି ନେହେରୁଙ୍କ ପ୍ରସଙ୍ଗ ଉଠାଇଛନ୍ତି। ବିଜୁବାବୁଙ୍କ ଅସମ୍ମାନ କରି କେବଳ ଟ୍ୱିଟ୍ କରି କ୍ଷମା ମାଗିଦେଲେ ହେବ ନାହିଁ, ବରଂ ତାଙ୍କୁ ତୁରନ୍ତ ଗିରଫ କରାଯାଉ ବୋଲି ଦଳ ଦାବି କରିଛି। ଦଳର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ, ଦେବୀପ୍ରସାଦ ମିଶ୍ର ଓ ଅତନୁ ସବ୍ୟସାଚୀ ନାୟକ ମିଳିତ ସାମ୍ବାଦିକ ସମ୍ମିଳନୀ କରି ନିଶିକାନ୍ତଙ୍କ ଉପରେ ବର୍ଷିଛନ୍ତି।
ଏପଟେ ବିଜେପି ବିଧାୟକ ଅଶୋକ ମହାନ୍ତି ଓ ପଦ୍ମଲୋଚନ ପଣ୍ଡା ଗଣମାଧ୍ୟମରେ ପ୍ରତିକ୍ରିୟା ଦେଇ କହିଛନ୍ତି ଯେ, ବିଜୁବାବୁଙ୍କର ଓଡ଼ିଶା ପ୍ରତି ବହୁ ଅବଦାନ ରହିଛି। ବିଜୁବାବୁଙ୍କୁ କେହି ଅସମ୍ମାନ କଲେ ତାକୁ ଓଡ଼ିଶାବାସୀ କଦାପି ସହିବେ ନାହିଁ କିମ୍ବା ସହିବା ଉଚିତ୍ ମଧ୍ୟ ନୁହେଁ। ମାତ୍ର ଯେହେତୁ ସେ ନିଜର ଭୁଲ୍ ବୁଝି କ୍ଷମା ମାଗି ସାରିଛନ୍ତି ତେଣୁ ଏହି ବିବାଦରେ ପୂର୍ଣ୍ଣଚ୍ଛେଦ ପଡ଼ିବା ଉଚିତ୍। କ୍ଷମାଠାରୁ ବଡ଼ ଆଉ କିଛି ନାହିଁ ବୋଲି ବିଜେପିର ବିଧାୟକ କହିଛନ୍ତି।
ଅନ୍ୟପକ୍ଷରେ ପବିତ୍ର ଉତ୍କଳ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ବିଜୁବାବୁଙ୍କ ସ୍ମୃତିଗାନ କରିଛନ୍ତି। ମୁଖ୍ୟମନ୍ତ୍ରୀ ଶ୍ରୀ ମାଝୀଙ୍କୁ ୪ ପୃଷ୍ଠାର ଚିଠି ଲେଖି ପ୍ରଧାନମନ୍ତ୍ରୀ ଶ୍ରୀ ମୋଦି ଉଲ୍ଲେଖ କରିଛନ୍ତି ଯେ, ଓଡ଼ିଶା ରେ ବିଜୁ ପଟ୍ଟନାୟକଙ୍କ ଭଳି ମହାନ୍ ବ୍ୟକ୍ତିତ୍ୱ ଜନ୍ମ ନେଇଥିଲେ। ତାଙ୍କର ଜୀବନ ଅସାଧାରଣ ଶକ୍ତି, ସାହସ ଏବଂ ଦେଶ ଗଠନ ପାଇଁ ଅତୁଟ ସମର୍ପଣର ଏକ ବଡ଼ ପ୍ରତୀକ । ବିଜୁ ବାବୁଙ୍କ ବହୁମୁଖୀ ବ୍ୟକ୍ତିତ୍ୱ ଆମ ସମସ୍ତଙ୍କୁ ଅନୁପ୍ରାଣିତ କରିଥାଏ ବୋଲି ପ୍ରଧାନମନ୍ତ୍ରୀ ଶ୍ରୀ ମୋଦି ତାଙ୍କ ଚିଠିରେ ଉଲ୍ଲେଖ କରିଛନ୍ତି।
ତେବେ ପ୍ରଧାନମନ୍ତ୍ରୀଙ୍କ ପ୍ରଶଂସା ଓ ନିଶିକାନ୍ତଙ୍କ କ୍ଷମା ପ୍ରାର୍ଥନା ପରେ ବିଜେଡି ନିଜର ଆଭିମୁଖ୍ୟରେ ପରିବର୍ତ୍ତନ କରିବ ନା ବିବାଦ ଆଗକୁ ନୂଆମୋଡ଼ ନେବ ତାହା ଉପରେ ସମସ୍ତଙ୍କ ନଜର।
#📰ଦେଶ-ବିଦେଶ ଅପଡେଟ ଚଣ୍ଡିଗଡ଼ ସେକ୍ଟର ୩୭ରେ ଥିବା ପଞ୍ଜାବ ବିଜେପିର ଅଫିସ ବାହାରେ ହୋଇଛି ବଡ଼ ବିସ୍ଫୋରଣ। ବୋମା ମାଡ଼ ଯୋଗୁ ଅଫିସ କମ୍ପାଉଣ୍ଡରେ ବିସ୍ଫୋରଣ ହୋଇଥିବା କୁହାଯାଉଛି। ତଥାପି ଏହାର କାରଣ ସ୍ପଷ୍ଟ ହୋଇଛି।
ଚଣ୍ଡିଗଡ଼ ପୁଲିସ୍ ସୂତ୍ରରୁ ମିଳିଥିବା ଖବର ଅନୁସାରେ ବିସ୍ଫୋରଣ ଅପରାହ୍ନ ପ୍ରାୟ ୫ଟା ସମୟରେ ହୋଇଛି। ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ଯେ ୨ ଜଣ ବ୍ୟକ୍ତି ଗୋଟିଏ ବାଇକରେ ବିଜେପି ଅଫିସ ପରିସରରେ ପହଞ୍ଚିଥିଲେ। ଏହାପରେ ସେମାନେ ଗୋଟିଏ ହାତ ତିଆରି ବୋମା ମାଡ଼ କରିଥିଲେ। ବୋମା ମାଡ଼ କରିବା ପରେ ସେମାନେ ଘଟଣା ସ୍ଥଳରୁ ଚମ୍ପଟ ମାରିଛନ୍ତି। ଏବେ ପୁଲିସ୍ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜରୁ ସନ୍ଦିଗ୍ଧମାନଙ୍କୁ ଚିହ୍ନଟ କରିବାକୁ ଚେଷ୍ଟା କରୁଛି।
ବିସ୍ଫୋରଣ ଖବର ପାଇବା ମାତ୍ରେ ପୁଲିସ ଟିମ ତୁରନ୍ତ ଘଟଣା ସ୍ଥଳରେ ପହଞ୍ଚି ପୂରା ଅଞ୍ଚଳକୁ କର୍ଡନ କରିଥିଲା। ଘଟଣା ସ୍ଥଳରୁ କିଛି ଧାରୁଣା ଲୁହା ଖଣ୍ଡ ମିଳିଛି। ଏବେ ସେଗୁଡ଼ିକର ଫରେନ୍ସ ଯାଞ୍ଚ କରାଯିବ। ବିସ୍ଫୋରଣ ଯୋଗୁ ଗୋଟିଏ କାରର କାଚ ଭାଙ୍ଗି ଥିବା ବେଳେ ବିଜେପି ଅଫିସ ପରିସରରେ ଥିବା ୨ଟି ସ୍କୁଟି ମଧ୍ୟ କ୍ଷତିଗ୍ରସ୍ତ ହୋଇଛି। ପୁଲିସ୍ର କହିବା କଥା ଯେ ବିଜେପି ଅଫିସକୁ ବିପଦ ଥିବା କୌଣସି ଆଗୁଆ ସୂଚନା ମିଳି ନଥିଲା। ସେହିପରି ବିସ୍ଫୋରଣ ପାଇଁ କୌଣସି ଗ୍ରେନେଡ ନୁହେଁ, ବରଂ ଗୋଟିଏ ହାତ ତିଆରି ବୋମାର ବ୍ୟବହାର ହୋଇଛି।
ଘଟଣା ସ୍ଥଳରୁ କେନ୍ଦ୍ରୀୟ ଫରେନ୍ସିକ ସାଇନ୍ସ ଲ୍ୟାବର ଅଧିକାରୀମାନେ ବିଭିନ୍ନ ନମୁନା ସଂଗ୍ରହ କରିଛନ୍ତି। ଏଥିସହ ପୂରା ଅଞ୍ଚଳର ସ୍ଥିତି ପରଖିଛନ୍ତି। ସ୍ଥାନୀୟ ଅଞ୍ଚଳରେ ସିଆରପିଏଫ ଯବାନଙ୍କୁ ମୁତୟନ କରାଯାଇଛି। ପୁଲିସ୍ ପୂରା ସ୍ଥିତି ଉପରେ ନଜର ରଖିଛି।
ରାଜ୍ୟ ବିଜେପି ମୁଖ୍ୟ ବିନୀତ ଯୋଶୀ କହିଛନ୍ତି ଯେ ବିସ୍ଫୋରଣର ଶବ୍ଦ ଅପରାହ୍ନ ପ୍ରାୟ ୫ଟା ବେଳେ ଶୁଣିବାକୁ ମିଳିଥିଲା। ବିସ୍ଫୋରଣ ପରେ ପୂରା ଅଞ୍ଚଳ ଧୂଆଁମୟ ହୋଇ ଯାଇଥିଲା।
ପୂରା ଅଞ୍ଚଳରେ ଆତଙ୍କ ଖେଳି ଯାଇଥିବା ବେଳେ ଗୋଟିଏ କାର ଓ ୨ଟି ସ୍କୁଟି କ୍ଷତିଗ୍ରସ୍ତ ହୋଇଛି। ଦଳୀୟ କାର୍ଯ୍ୟାଳୟ ନିକଟରେ ବିସ୍ଫୋରଣ ହେବା ଚିନ୍ତାର ବିଷୟ। ୪ ଦିନ ହେଲା ରାଜ୍ୟ ବିଜେପିର କାର୍ଯ୍ୟକାରୀ ସଭାପତି ଏଠାରେ ରହୁଛନ୍ତି। ସେ ରହିବା ସମୟରେ ବିସ୍ଫୋରଣ ନିଶ୍ଚିତ ସମସ୍ତଙ୍କୁ ଭୟଭୀତ କରିଛି ବୋଲି ସେ କହିଛନ୍ତି।
#📰ଦେଶ-ବିଦେଶ ଅପଡେଟ ନୂଆଦିଲ୍ଲୀ: ବାଂଲାଦେଶରେ ଚଳିତ ଆଇପିଏଲ୍ର ଟିଭି ପ୍ରସାରଣ ହେବନାହିଁ। ବାଂଲାଦେଶରେ ଟିସ୍ପୋର୍ଟସ ଚ୍ୟାନେଲ ଆଇପିଏଲ୍ ମ୍ୟାଚ୍ର ପ୍ରସାରଣ କରିବାର ଥିଲା। ହେଲେ ବକେୟା ଅର୍ଥ ଦେଇ ନଥିବାରୁ ଟିସ୍ପୋର୍ଟସ ସହ ଆଇପିଏଲ୍ର ପ୍ରସାରଣ ଅଧିକାର ପାଇଥିବା ଜିଓଷ୍ଟାର୍ ଚୁକ୍ତି ବାତିଲ କରିଦେଇଛି। ବାଂଲାଦେଶର ମୁସ୍ତାଫିଜୁର ରେହମାନଙ୍କୁ ଆଇପିଏଲରୁ ବାଦ୍ଦେବା ପାଇଁ କେକେଆର୍କୁ ବିସିସିଆଇ ନିର୍ଦେଶ ଦେବା ପରେ ଉଭୟ ଦେଶଙ୍କ ମଧ୍ୟରେ ତିକ୍ତତା ଆରମ୍ଭ ହୋଇଥିଲା। ପରେ ଟ୍ବେଣ୍ଟି୨୦ ବିଶ୍ବକପ୍ ଖେଳିବାକୁ ଭାରତ ନ ଆସିବା ଜିଦ୍ରେ ବାଂଲାଦେଶ ବିଶ୍ବକପ୍ରୁ ଓହରି ଯାଇଥିଲା। ପରେ ବାଂଲାଦେଶରେ ଆଇପିଏଲ୍ର ପ୍ରସାରଣ ହେବ ନାହିଁ ବୋଲି ସେଠାକାର ସରକାର ଘୋଷଣା କରିଥିଲେ। ହେଲେ ନିକଟରେ ଆଇପିଏଲ୍ ପ୍ରସାରଣ ଉପରୁ କଟକଣା ଉଠାଇବା ପାଇଁ ବାଂଲାଦେଶ ସରକାର ବିଚାର କରୁଥିଲେ। ଏହା ପୂର୍ବରୁ ଟିସ୍ପୋର୍ଟସ ସହ ଜିଓଷ୍ଟାର୍ ଚୁକ୍ତି ବାତିଲ କରିଦେଇଛି। ଆଇପିଏଲ୍ ପ୍ରସାରଣ ବନ୍ଦ ଯୋଗୁଁ ବାଂଲାଦେଶର କ୍ରିକେଟ୍ପ୍ରେମୀ ବିଶ୍ବର ଏହି ସର୍ବବୃହତ୍, ଲୋକପ୍ରିୟ ଲିଗ୍ ଦେଖିବାରୁ ବଞ୍ଚିତ ହେବେ।
#📰ଦେଶ-ବିଦେଶ ଅପଡେଟ ତେହରାନ : ଇରାନ ସହିତ ସଂଘର୍ଷ ପରିପ୍ରେକ୍ଷୀରେ, ଯାହା ଡରାଉ ଥିଲା ତାହା ହିଁ ଘଟିଛି। ଇରାନର ସଂସଦ ହର୍ମୁଜ ପ୍ରଣାଳୀ ଦେଇ ଯାତାୟାତ ଉପରେ ଟୋଲ ଲାଗୁ କରିବା ପାଇଁ ଏକ ‘ଆଇନ’କୁ ଅନୁମୋଦନ କରିଛି। ପ୍ରକୃତରେ, ଇରାନ ସଂସଦର ସୁରକ୍ଷା କମିଟି ହର୍ମୁଜ ପ୍ରଣାଳୀ ପାଇଁ ଏକ ନୂତନ ପରିଚାଳନା ଯୋଜନାକୁ ମଞ୍ଜୁର କରିଛି। ଏହି ଯୋଜନାରେ ଜାହାଜ ଉପରେ ଟୋଲ ଆଦାୟ ଏବଂ କିଛି ରାଷ୍ଟ୍ର ଉପରେ କଟକଣା ଲାଗୁ କରିବାର ପ୍ରସ୍ତାବ ଦିଆଯାଇଛି। ଏହି ଅନୁମୋଦନ ପରେ, ଏବେ ହର୍ମୁଜ ପ୍ରଣାଳୀ ଦେଇ ଆମେରିକୀୟ ଏବଂ ଇସ୍ରାଏଲୀ ଜାହାଜଗୁଡ଼ିକର ଯାତାୟାତ ଉପରେ ପ୍ରତିବନ୍ଧକ ଲଗାଯାଇଛି। ଏହିପରି, ଇରାନ ଏହି – ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ମାର୍ଗ – ହର୍ମୁଜ ପ୍ରଣାଳୀ ଉପରେ ନିଜର ନିୟନ୍ତ୍ରଣକୁ ଆହୁରି ସୁଦୃଢ଼ କରିବାକୁ ନିଷ୍ପତ୍ତି ନେଇଛି। ଏହି ସୂଚନା ଇରାନର ସରକାରୀ ଗଣମାଧ୍ୟମ ଦ୍ୱାରା ରିପୋର୍ଟ କରାଯାଇଛି।
ଇସଲାମିକ ରିପବ୍ଲିକ ଅଫ ଇରାନ ବ୍ରଡକାଷ୍ଟିଂ (IRIB) ଅନୁଯାୟୀ, ଏହି ନୂତନ ଯୋଜନା ଏହି ରଣନୈତିକ ଜଳପଥ – ହର୍ମୁଜ ପ୍ରଣାଳୀ ଦେଇ ଯାତାୟାତ କରୁଥିବା ଜାହାଜଗୁଡ଼ିକ ପାଇଁ ଏକ ରିଆଲ-ସମ୍ଭାବିତ ଟୋଲ ବ୍ୟବସ୍ଥା କାର୍ଯ୍ୟକାରୀ କରେ। ଏହି ଯୋଜନାରେ ସାମୁଦ୍ରିକ ସୁରକ୍ଷା, ଜାହାଜ ସୁରକ୍ଷା, ପରିବେଶ ସୁରକ୍ଷା ଏବଂ ପ୍ରଣାଳୀ ଦେଇ ପରିବହନ ନିୟନ୍ତ୍ରଣ କରୁଥିବା ଆର୍ଥିକ ନିୟମାବଳୀ ସହିତ ଜଡିତ ବ୍ୟବସ୍ଥା ଅନ୍ତର୍ଭୁକ୍ତ।
IRIB ଅନୁଯାୟୀ, ଏହି ପଦକ୍ଷେପ ଆମେରିକୀୟ ଏବଂ ଇସ୍ରାଏଲୀ ଜାହାଜଗୁଡ଼ିକର ଚଳାଚଳକୁ ନିଷେଧ କରେ ଏବଂ ଇରାନ ବିରୁଦ୍ଧରେ ଏକପାଖିଆ କଟକଣା ଲାଗୁ କରିଥିବା ଦେଶଗୁଡ଼ିକ ଉପରେ କଟକଣା ଜାରି କରେ। ଏହା ବ୍ୟତୀତ, ଇରାନ ହର୍ମୁଜ ପ୍ରଣାଳୀ ଉପରେ ନିଜର ସାର୍ବଭୌମତ୍ୱ ପୁନଃନିର୍ମାଣ କରିଛି ଏବଂ ଓମାନ ସହିତ ସହଯୋଗରେ ଏହାର ମିଳିତ ପରିଚାଳନା ପାଇଁ ଏକ ଆଇନଗତ ଢାଞ୍ଚା ପ୍ରତିଷ୍ଠା କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଛି।
ଇରାନର ଏହି ପଦକ୍ଷେପ ବିଶ୍ୱବ୍ୟାପୀ ଆଘାତ ପଠାଇବାକୁ ପ୍ରସ୍ତୁତ। ଏହା ଇରାନ ଏବଂ ଆମେରିକା-ଇସ୍ରାଏଲୀ ମେଣ୍ଟ ମଧ୍ୟରେ ପଶ୍ଚିମ ଏସିଆରେ ଚାଲିଥିବା ସଂଘର୍ଷ ମଧ୍ୟରେ ଆସିଛି – ଏକ ସଂଘର୍ଷ ଏବେ ଦ୍ୱିତୀୟ ମାସରେ ପ୍ରବେଶ କରୁଛି। ଏହି କାର୍ଯ୍ୟ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତୈଳ ପରିବହନ ମାର୍ଗ ମଧ୍ୟରୁ ଗୋଟିଏ: ହର୍ମୁଜ ପ୍ରଣାଳୀ ଉପରେ ନିଜର କବଜାକୁ କଡ଼ାକଡ଼ି କରିବା ପାଇଁ ତେହେରାନର ସମନ୍ବିିତ ପ୍ରୟାସକୁ ସୂଚିତ କରେ। ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି, ଏହା ସ୍ପଷ୍ଟ ଯେ ଇରାନ ଏବେ ହର୍ମୁଜ ପ୍ରଣାଳୀ ଉପରେ ସମ୍ପୂର୍ଣ୍ଣ ଆଧିପତ୍ୟ ବ୍ୟବହାର କରୁଛି।
ଏହି ସମୟରେ, ଆମେରିକା ଏପର୍ଯ୍ୟନ୍ତ ହର୍ମୁଜ ପ୍ରଣାଳୀକୁ ପୁନଃ ଖୋଲିବାରେ ବିଫଳ ହୋଇଛି। ଟ୍ରେଜେରୀ ସଚିବ ସ୍କଟ ବେସେଣ୍ଟ କହିଛନ୍ତି ଯେ ୱାଶିଂଟନ ସାମୁଦ୍ରିକ ଯାତାୟାତର ଅବାଧ ଗତିବିଧି ସୁନିଶ୍ଚିତ କରିବା ପାଇଁ ହର୍ମୁଜ ପ୍ରଣାଳୀ ଉପରେ ପୁନଃ ନିୟନ୍ତ୍ରଣ ସ୍ଥାପନ କରିବାକୁ ଚାହୁଁଛି। ସେ ଫକ୍ସ ନ୍ୟୁଜକୁ କହିଥିଲେ, ‘ବଜାରରେ ପ୍ରଚୁର ଯୋଗାଣ ଅଛି, ଏବଂ ଆମେ ଦେଖୁଛୁ ଯେ ପ୍ରତିଦିନ ଅଧିକରୁ ଅଧିକ ଜାହାଜ ଯାତାୟାତ କରୁଛି, କାରଣ ବିଭିନ୍ନ ଦେଶ ବର୍ତ୍ତମାନ ଇରାନ ଶାସନ ସହିତ ଚୁକ୍ତିନାମା କରୁଛନ୍ତି। ସମୟ ସହିତ, ଆମେରିକା ପ୍ରଣାଳୀର ନିୟନ୍ତ୍ରଣ ଫେରି ପାଇବ, ଏବଂ ସେଠାରେ ଜାହାଜର ଗତିବିଧି ମୁକ୍ତ ହେବ – ତାହା ଆମେରିକାର ଏସ୍କର୍ଟ ମାଧ୍ୟମରେ ହେଉ କିମ୍ବା ବହୁରାଷ୍ଟ୍ରୀୟ ଏସ୍କର୍ଟ ମାଧ୍ୟମରେ।’
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଚେତାବନୀ ଦେଇଛନ୍ତି ଯେ ଯଦି ହର୍ମୁଜ ପ୍ରଣାଳୀ ପୁନଃ ଖୋଲା ନଯାଏ, ତେବେ ଇରାନର ବେସାମରିକ ଶକ୍ତି ଭିତ୍ତିଭୂମିକୁ ଟାର୍ଗେଟ କରାଯାଇପାରେ। ଟ୍ରମ୍ପ ଟ୍ରୁଥ ସୋସିଆଲରେ ଲେଖିଛନ୍ତି, ‘ବହୁତ ଅଗ୍ରଗତି ହୋଇଛି, କିନ୍ତୁ ଯଦି କୌଣସି କାରଣରୁ ଶୀଘ୍ର ଏକ ଚୁକ୍ତିନାମା ନ ହୁଏ – ଯାହା ସମ୍ଭବତଃ ହେବ – ଏବଂ ଯଦି ହର୍ମୁଜ ପ୍ରଣାଳୀ ତୁରନ୍ତ ‘ବ୍ୟବସାୟ ପାଇଁ ଖୋଲା’ ନଯାଏ, ତେବେ ଆମେ ଇରାନରେ ସେମାନଙ୍କର ସମସ୍ତ ଶକ୍ତି କେନ୍ଦ୍ର, ତୈଳ କୂପ ଏବଂ ଖାର୍ଗ ଦ୍ୱୀପକୁ ସମ୍ପୂର୍ଣ୍ଣ ନଷ୍ଟ କରି ଆମର ‘ସୁନ୍ଦର ଉପସ୍ଥିତି’କୁ ସମାପ୍ତ କରିଦେବୁ।’
#📰ଦେଶ-ବିଦେଶ ଅପଡେଟ ଜାକର୍ତ୍ତା : ଇଣ୍ଡୋନେସିଆର ଏକ ଦୁର୍ଗମ ଗ୍ରାମକୁ ଯାଉଥିବା ଏକ ଡଙ୍ଗା ଖରାପ ପାଗରେ ଫସିଯିବା ପରେ ବୁଡ଼ି ଯାଇଥିବା ଖବର ମିଳିଛିା। ଏହି ଘଟଣାରେ ୨୭ ଜଣ ଲୋକ ନିଖୋଜ ଅଛନ୍ତି, ଏବଂ ସେମାନଙ୍କୁ ଖୋଜିବା ପାଇଁ ଉଦ୍ଧାରକାରୀ ଦଳ ନିୟୋଜିତ ହୋଇଛନ୍ତି।
ସନ୍ଧାନ ଏବଂ ଉଦ୍ଧାର କାର୍ଯ୍ୟାଳୟର ମୁଖ୍ୟ ମହମ୍ମଦ ରିଜାଲ କହିଛନ୍ତି ଯେ ନାଜିଲା-୦୫ ନାମକ ଡଙ୍ଗାଟି ରବିବାର ଦିନ ଉତ୍ତର ମାଲୁକୁ ପ୍ରଦେଶର ତାଲିଆବୁ ଦ୍ୱୀପରୁ କେମା ନାମକ ଏକ ଉପକୂଳବର୍ତ୍ତୀ ଗ୍ରାମକୁ ଯାତ୍ରା କରିଥିଲା। ଏଥିରେ ୨୭ ଜଣ ଯାତ୍ରୀ ଏବଂ କର୍ମଚାରୀ ଥିଲେ।
ସୋମବାର ସକାଳେ ଡଙ୍ଗାର ମାଲିକ ରିଫାନି ସାମତିଆ ପ୍ରଥମେ ଏହି ଘଟଣା ବିଷୟରେ କର୍ତ୍ତୃପକ୍ଷଙ୍କୁ ଜଣାଇଥିଲେ, ଯେତେବେଳେ ଡଙ୍ଗାର କ୍ୟାପ୍ଟେନ ତାଙ୍କୁ ଯୋଗାଯୋଗ କରି ଜଣାଇଥିଲେ ଯେ ଖରାପ ପାଗରେ ଉଚ୍ଚ ଢେଉରେ ଆଘାତ ପାଇବା ପରେ ଜାହାଜର ଧନୁ ଭାଙ୍ଗି ଯାଇଛି। ପ୍ରାୟ ୩୦ ମିନିଟ ପରେ, କ୍ୟାପ୍ଟେନ ଡଙ୍ଗା ବୁଡ଼ି ଯାଇଥିବା ସୂଚନା ଦେଇଥିଲେ।
#📰ଦେଶ-ବିଦେଶ ଅପଡେଟ ନନ୍ଦନକାନନ: ନନ୍ଦନକାନନ ପ୍ରାଣୀ ଉଦ୍ୟାନ ଓ ରାଜ୍ୟ ଉଦ୍ଭିଦ ଉଦ୍ୟାନକୁ ରାଜ୍ୟ ତଥା ରାଜ୍ୟ ବାହାରୁ ବୁଲିବାକୁ ଆସୁଥିବା ପର୍ଯ୍ୟଟକଙ୍କ ପାଇଁ ସମୟ ନିର୍ଘଣ୍ଟ ବଦଳିବ ବୋଲି ଜଣାପଡିଛି। ପ୍ରତିବର୍ଷ ଭଳି ଗ୍ରୀଷ୍ମଋତୁ ସାଙ୍ଗକୁ ଦିନ ବଡ ଯୋଗୁଁ ନନ୍ଦନକାନନ ପ୍ରାଣୀଉଦ୍ୟାନ ଓ ରାଜ୍ୟ ଉଦ୍ଭିଦ ଉଦ୍ୟାନ ଆସନ୍ତା ଏପ୍ରିଲ ପହିଲାରୁ ସକାଳ ୭.୩୦ରେ ଖୋଲି ସନ୍ଧ୍ୟା ୫.୩୦ରେ ବନ୍ଦ ହେବ ବୋଲି ନନ୍ଦନକାନନ ଉପନିର୍ଦେଶକଙ୍କ କାର୍ଯ୍ୟାଳୟରୁ ସୂଚନା ମିଳିଛି। ଏହି ନିୟମ ୨୦୨୬ ସେପ୍ଟମ୍ବର ୩୦ ପର୍ଯ୍ୟନ୍ତ ଲାଗୁ ରହିବ। ସପ୍ତାହର ପ୍ରତି ସୋମବାର ଉଭୟ ଉଦ୍ୟାନ ବନ୍ଦ ରହିବ।
