ಸ್ಟೈಲಿಶ್‌ ಲುಕ್‌ ಇರುವ Motorola Edge 60 Fusion 5G ಈಗ ಆಫರ್‌ನಲ್ಲಿ ಲಭ್ಯ! ಪ್ರಸ್ತುತ ಫ್ಲಿಪ್‌ಕಾರ್ಟ್‌ ಆಯೋಜಿಸಿರುವ ಸಮ್ಮರ್ ಸೇಲ್‌ನಲ್ಲಿ ಆಯ್ದ ಮೊಬೈಲ್‌ಗಳು ಆಕರ್ಷಕ ರಿಯಾಯಿತಿ ಪಡೆದಿವೆ. ಆ ಪೈಕಿ ಮೊಟೊರೊಲಾ ಕಂಪನಿಯ Motorola Edge 60 Fusion 5G ಮೊಬೈಲ್‌ ಸಹ ಆಕರ್ಷಕ ಬೆಲೆ ಇಳಿಕೆಯಲ್ಲಿ ಖರೀದಿಗೆ ಲಭ್ಯವಿದೆ. ಇನ್ನು ಖರೀದಿದಾರರು ಲಭ್ಯವಿರುವ ಆಯ್ದ ಬ್ಯಾಂಕ್‌ಗಳ ಕೊಡುಗೆಗಳ ಹಾಗೂ ಎಕ್ಸ್‌ಚೇಂಜ್ ಕೊಡುಗೆ ಮೂಲಕ ಖರೀದಿಸಿದರೆ ಹೆಚ್ಚುವರಿ ರಿಯಾಯಿತಿ ಸಹ ಪಡೆಯಲು ಅವಕಾಶ ಇದೆ. ಸಂಸ್ಥೆಯ ಈ ಮೊಬೈಲ್‌ Mediatek Dimensity 7400 ಚಿಪ್‌ಸೆಟ್ ಪ್ರೊಸೆಸರ್‌ ಸಾಮರ್ಥ್ಯ ಪಡೆದಿರುವ ಜೊತೆಗೆ ಮೂರು ಬಣ್ಣಗಳ ಆಯ್ಕೆಯಲ್ಲಿ ಲಭ್ಯ. ಹಾಗಾದರೆ ಅಮೆಜಾನ್‌ ಇ ಕಾಮರ್ಸ್‌ ವೆಬ್‌ಸೈಟ್‌ನಲ್ಲಿ ಮೊಟೊರೊಲಾ ಎಡ್ಜ್‌ 60 ಫ್ಯೂಜನ್ 5G ಸ್ಮಾರ್ಟ್‌ಫೋನಿಗೆ ಲಭ್ಯವಿರುವ ಕೊಡುಗೆ ಬಗ್ಗೆ ಇನ್ನಷ್ಟು ಮಾಹಿತಿ ಮುಂದೆ ತಿಳಿಯೋಣ. Motorola Edge 60 Fusion 5G ಬೆಲೆಯಲ್ಲಿ ಇಳಿಕೆ! ಮೊಟೊರೊಲಾ ಎಡ್ಜ್‌ 60 ಫ್ಯೂಜನ್ 5G ಮೊಬೈಲ್‌ ಅಗ್ಗದ ದರದಲ್ಲಿ ಹಾಗೂ ಆಕರ್ಷಕ ಫೀಚರ್ಸ್‌ ಮೂಲಕ ಗಮನ ಸೆಳೆದಿದೆ. ಸದ್ಯ ಅಮೆಜಾನ್‌ ಇ ಕಾಮರ್ಸ್‌ ಪ್ಲಾಟ್‌ಫಾರ್ಮ್‌ನಲ್ಲಿ ಬೊಂಬಾಟ್‌ ರಿಯಾಯಿತಿ ಪಡೆದಿದೆ. ಈ ಮೊಬೈಲ್‌ 8GB RAM + 128GB ಸ್ಟೋರೇಜ್ ವೇರಿಯಂಟ್‌ ಬೆಲೆ 24,999 ರೂ.ಗಳು ಆಗಿದ್ದು ಆದರೆ ಆಫರ್‌ನಲ್ಲಿ ಸದ್ಯ ಈ ಮೊಬೈಲ್‌ 20,999 ರೂ.ಗಳ ಬೆಲೆಯಲ್ಲಿ ಕಾಣಿಸಿಕೊಂಡಿದೆ. ಅಂದಹಾಗೆ ಈ ಫೋನ್‌ PANTONE Mykonos Blue, PANTONE Slipstream, PANTONE Zephyr ಹಾಗೂ PANTONE Amazonite ಕಲರ್‌ ಆಯ್ಕೆಗಳಲ್ಲಿ ಖರೀದಿಗೆ ಲಭ್ಯ. ಇನ್ನು ಆಸಕ್ತ ಗ್ರಾಹಕರು ಫ್ಲಿಪ್‌ಕಾರ್ಟ್‌ ಇ ಕಾಮರ್ಸ್‌ ಪ್ಲಾಟ್‌ಫಾರ್ಮ್‌ ಮೂಲಕ ಖರೀದಿಸಬಹುದಾಗಿದೆ. ಮೊಟೊರೊಲಾ ಎಡ್ಜ್‌ 60 ಫ್ಯೂಜನ್ 5G ಫೀಚರ್ಸ್‌! ಮೊಟೊರೊಲಾ ಎಡ್ಜ್‌ 60 ಫ್ಯೂಜನ್ 5G ಸ್ಮಾರ್ಟ್‌ಫೋನ್‌ 120 Hz ರಿಫ್ರೆಶ್ ರೇಟ್‌ ಸೌಲಭ್ಯದ ಜೊತೆಗೆ 6.7 ಇಂಚಿನ ಕ್ವಾಡ್‌ ಕರ್ವ್ಡ ಡಿಸ್‌ಪ್ಲೇ ಅನ್ನು ಹೊಂದಿದೆ. ಇದರ ಸ್ಕ್ರೀನ್‌ 4500 nits HDR ಪೀಕ್ ಬ್ರೈಟ್‌ನೆಸ್ ಸಪೋರ್ಟ್‌ ಅನ್ನು ಪಡೆದುಕೊಂಡಿದೆ. ಈ ಮೊಬೈಲ್‌ Mediatek Dimensity 7400 ಚಿಪ್‌ಸೆಟ್‌ ಪ್ರೊಸೆಸರ್‌ ಸಾಮರ್ಥ್ಯದಲ್ಲಿ ಕಾರ್ಯ ನಿರ್ವಹಿಸಲಿದೆ. ಇದಕ್ಕೆ ಅನುಗುಣವಾಗಿ Android 15 ಸಪೋರ್ಟ್‌ ಒಳಗೊಂಡಿದೆ. ಅಲ್ಲದೇ ಇದು 8GB + 256GB ಹಾಗೂ 12GB + 256GB ಸ್ಟೋರೇಜ್‌ ಆಯ್ಕೆಯನ್ನು ಒಳಗೊಂಡಿದೆ. ಇನ್ನು ಮೊಟೊರೊಲಾ ಎಡ್ಜ್‌ 60 ಫ್ಯೂಜನ್ 5G ಮೊಬೈಲ್‌ ಅತ್ಯುತ್ತಮ ಕ್ಯಾಮೆರಾ ಸೆಟ್‌ಅಪ್‌ ಪಡೆದುಕೊಂಡಿದೆ. ಈ ಫೋನ್ 50MP ಪ್ರಾಥಮಿಕ ಕ್ಯಾಮೆರಾ ಹೊಂದಿರುವ ಜೊತೆಗೆ 13MP ಅಲ್ಟ್ರಾ ವೈಡ್‌ ಸೆನ್ಸಾರ್‌ ಸೆಕೆಂಡರಿ ಕ್ಯಾಮೆರಾ ಪಡೆದಿದೆ. ಇನ್ನು ಮುಂಭಾಗದಲ್ಲಿ ಸೆಲ್ಫಿ ಹಾಗೂ ವಿಡಿಯೋ ಕರೆಗಾಗಿ ಈ ಫೋನ್‌ 32MP ಕ್ಯಾಮೆರಾವನ್ನು ಒಳಗೊಂಡಿದ್ದು 4K ಗುಣಮಟ್ಟದ ಸೆಲ್ಫಿ ಫೋಟೋಗಳನ್ನು ಸೆರೆಹಿಡಿಯಬಹುದು. ಹಾಗೆಯೇ ಈ ಫೋನ್‌ 5,500mAh ಬ್ಯಾಟರಿ ಬ್ಯಾಕ್‌ಅಪ್‌ ಜೊತೆಗೆ 68W ಟರ್ಬೋಪವರ್‌ ಫಾಸ್ಟ್‌ ಚಾರ್ಜಿಂಗ್‌ ಸೌಲಭ್ಯ ಪಡೆದಿದೆ. #LATEST #TECHNOLOGY #MOBILEGADGETS #REVIEWS #ECOMPLATFORM

ಜಗತ್ತಿನ ದುಬಾರಿ ಮಿಯಾ ಜಾಕಿ ಮಾವು ಬೆಳೆದ ಕೊಪ್ಪಳದ ರೈತನಿಗೆ ಸಿಕ್ಕಿದ್ದು ಕೇವಲ 3 ಸಾವಿರ ರೂ! ಕೊಪ್ಪಳದ ರೈತರೊಬ್ಬರು ವಿಶ್ವದ ಅತ್ಯಂತ ದುಬಾರಿ ಮಿಯಾ ಜಾಕಿ ಮಾವನ್ನು ಬೆಳೆದಿದ್ದಾರೆ. ಆದರೆ, ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಲಕ್ಷಾಂತರ ರೂಪಾಯಿ ಬೆಲೆಬಾಳುವ ಈ ಮಾವಿಗೆ ಸ್ಥಳೀಯವಾಗಿ ಕೇವಲ 3 ಸಾವಿರ ರೂಪಾಯಿ ಬೆಲೆ ಸಿಕ್ಕಿದ್ದು, ಮಾರುಕಟ್ಟೆಯ ಸವಾಲು ಎದುರಿಸುತ್ತಿದ್ದಾರೆ. ವಿಶ್ವದ ದುಬಾರಿ ಮಾವಿಗೆ ಕರ್ನಾಟಕದಲ್ಲಿ ಕೇವಲ 3 ಸಾವಿರ ರೂ! ಜಗತ್ತಿನ ದುಬಾರಿ ಮಾವು ಎಂದೇ ಪ್ರಸಿದ್ಧಿಯಾಗಿರುವ ಜಪಾನ್ ಮೂಲದ ಮಿಯಾ ಜಾಕಿ ಮಾವು ಕೊಪ್ಪಳದ ರೈತನೋರ್ವ ಬೆಳೆದಿದ್ದು, ಅದು ಈಗ ಬಂಪರ್ ಬೆಳೆ ಬಂದಿದೆ. ಆದರೆ ವಿಶ್ವದ ದುಬಾರಿ ಮಾವಿಗೆ ಈಗ ದರದ ಸಮಸ್ಯೆ ಎದುರಾಗಿದೆ. 2.50 ಲಕ್ಷ ಇದ್ದ ಮಿಯಾ ಜಾಕಿ ಕೊಪ್ಪಳದ ಮಾವು ಮೇಳದಲ್ಲಿ ಪ್ರತಿ ಕೆಜಿಗೆ ಕೇವಲ 3 ಸಾವಿರ ರೂಪಾಯಿ ಮಾರಾಟವಾಗಿದೆ. 2 ಎಕರೆ ಪ್ರದೇಶದಲ್ಲಿ ಮಿಯಾ ಜಾಕಿ ಬೆಳೆದ ರೈತ: ಈ ಹಿಂದೆ ಕೊಪ್ಪಳ ತೋಟಗಾರಿಕಾ ಇಲಾಖೆ ಹಣ್ಣು ಮಾರಾಟ ಮೇಳದಲ್ಲಿ ಮೂರು ವರ್ಷಗಳ ಹಿಂದೆ ಪ್ರದರ್ಶನಕ್ಕೆ ಇಟ್ಟಿದ್ದ ಮಿಯಾಜಾಕಿ ಮಾವು ನೋಡಿ ಅದರಿಂದ ಪ್ರೇರಣೆಗೊಂಡ ರೈತ ನಾಗಪ್ಪ ಬಗನಾಳ ತಾಲೂಕಿನ ಕಲ್‌ ತಾವರಗೇರಾ ಗ್ರಾಮದಲ್ಲಿರುವ ತಮ್ಮ 2 ಎಕರೆ ಪ್ರದೇಶದಲ್ಲಿ ಮಿಯಾ ಜಾಕಿ ಬೆಳೆದಿದ್ದರು. ಆದರೆ ಸದ್ಯ ನಾಗಪ್ಪ ಬೆಳೆದ ಮಿಯಾ ಜಾಕಿ ಮಾವಿನ ಹಣ್ಣಿಗೆ ಉತ್ತಮ ಬೆಲೆ ಸಿಕ್ಕಿಲ್ಲ. ಕೆಜಿ ಗೆ 2.50 ಲಕ್ಷ ಮೌಲ್ಯದ ಮಾವು ಈಗ ಬರೇ 3 ಸಾವಿರ ರೂಗೆ ಮಾರಾಟವಾಗಿದೆ. ಹೀಗಾಗಿ ಮಿಯಾ ಜಾಕಿಗೆ ಉತ್ತಮ ಬೆಲೆ ಕೊಡಿಸುವಂತೆ ರೈತ ನಾಗಪ್ಪ ಅಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ. ಪ್ರತಿ ಸಸಿಗೆ ₹1300 ಕೊಟ್ಟು ಖರೀದಿ ಮಾಡಿದ ರೈತ: ಮೂರು ವರ್ಷಗಳ ಹಿಂದೆ ದೆಹಲಿಯಿಂದ ರೈಲು ಮೂಲಕ 200 ಮಿಯಾಜಾಕಿ ಮಾವು ಸಸಿಯನ್ನು ನಾಗಪ್ಪ ಬಗನಾಳ ತರಿಸಿದ್ದರು. ಪ್ರತಿ ಸಸಿಗೆ ₹1300 ಕೊಟ್ಟಿದ್ದಾರೆ. ನಾಟಿ ಮಾಡಿದ ಬಳಿಕ 20 ಸಸಿಗಳು ಸತ್ತಿವೆ. 180 ಮಿಯಾಜಾಕಿ ಮಾವಿನ ಗಿಡಗಳು ಭರ್ಜರಿಯಾಗಿ ಬೆಳೆದು ನಿಂತು, ಈ ಪೈಕಿ ಈ ವರ್ಷ ಒಂದಷ್ಟು ಗಿಡಗಳು ನಿರೀಕ್ಷೆಗೂ ಮೀರಿ ಫಸಲು ನೀಡಿವೆ. ಮಾರುಕಟ್ಟೆ ಸವಾಲು: ಪ್ರತ್ಯೇಕ ಉಪಚಾರವೇನೂ ಇಲ್ಲದೆ ಎಲ್ಲಾ ಮಾವು ಬೆಳೆದಂತೆ ಬೆಳೆದ ಮಿಯಾಜಾಕಿ ಮಾವಿಗೆ ಮಾರುಕಟ್ಟೆಯದ್ದೆ ದೊಡ್ಡ ಸವಾಲು ಆಗಿದೆ. ಈ ವರ್ಷವಷ್ಟೇ ಬೆಳೆದಿರುವ ಮಿಯಾಜಾಕಿ ಮಾವಿಗೆ ಸ್ಥಳೀಯವಾಗಿ ಮಾರುಕಟ್ಟೆ ಇಲ್ಲ. ಹೀಗಾಗಿ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿಯೇ ಇದನ್ನು ಮಾರಾಟ ಮಾಡಬೇಕಾಗಿದೆ. ರಫ್ತು ಮಾಡುವುದು ಕೂಡ ಸವಾಲಿನ ಕೆಲಸವಾಗಿದೆ. ಏನಿದು ಮಿಯಾ ಜಾಕಿ ಮಾವು? ಜಪಾನ್ ದೇಶದ ಕ್ಯುಶು ಪ್ರಾಂತದ ಮಿಯಾಜಾಕಿ ನಗರದಲ್ಲಿ ಇದನ್ನು ಹೆಚ್ಚಾಗಿ ಬೆಳೆಯುವುದರಿಂದ ಇದಕ್ಕೆ ಮಿಯಾ ಜಾಕಿ ಮಾವು ಎಂದು ಹೆಸರು ಬಂದಿದೆ. ಸಾಮಾನ್ಯವಾಗಿ ಜಪಾನ್ ಸುತ್ತಮುತ್ತಲ ಪ್ರದೇಶದಲ್ಲಿಯೇ ಬೆಳೆಯುವ ಈ ಮಾವು ಜಗತ್ತಿನ ದುಬಾರಿ ಮಾವು ಎಂದೇ ಪ್ರಸಿದ್ಧಿಯಾಗಿದೆ. ಪ್ರತಿ ಕೆಜಿಗೆ ₹2.5 ಲಕ್ಷದಿಂದ ₹3 ಲಕ್ಷಕ್ಕೆ ಇದು ಮಾರಾಟವಾಗುತ್ತದೆ. ದುಬಾರಿ ಮಾವು ಎನ್ನುವ ಕಾರಣಕ್ಕಾಗಿ ಕಷ್ಟಪಟ್ಟು ಬೆಳೆದಿದ್ದೇವೆ. ನಿರೀಕ್ಷೆಗೂ ಮೀರಿ ಉತ್ತಮ ಫಸಲು ಬಂದಿದೆ. ಈಗ ಅದನ್ನು ಮಾರಾಟ ಮಾಡುವುದೇ ದೊಡ್ಡ ಸವಾಲು ಎಂದು ರೈತ ನಾಗಪ್ಪ ಬಗನಾಳ ತಿಳಿಸಿದ್ದಾರೆ. #LATEST #BENGALURU #BUSINESS #AGRICULTURE #PRICES

BSNL ಗ್ರಾಹಕರಿಗೆ ಗುಡ್ ನ್ಯೂಸ್: ಕೇವಲ 1 ರೂ.ಗೆ 2GB ದೈನಂದಿನ ಡೇಟಾ, ಅನಿಯಮಿತ ಧ್ವನಿ ಕರೆ ಸೇರಿ ಹಲವು ಸೌಲಭ್ಯ! ಸರ್ಕಾರಿ ಟೆಲಿಕಾಂ ಆಪರೇಟರ್ ಆಗಿರುವ ಭಾರತ್ ಸಂಚಾರ್ ನಿಗಮ್ ಲಿಮಿಟೆಡ್ (BSNL) ಗ್ರಾಹಕರಿಗೆ ರೂ. 1 ಯೋಜನೆಯನ್ನು ಹೊಂದಿದ್ದು, ಇದು ಕಂಪನಿಯಿಂದ ಆಸಕ್ತಿದಾಯಕ ಕೊಡುಗೆಯಾಗಿದೆ. ಮೂಲತಃ, ಇದು ಕಂಪನಿಗೆ ಸಿಮ್ ಮಾರಾಟ ಮತ್ತು ಗ್ರಾಹಕರ ಸೇರ್ಪಡೆಯನ್ನು ಹೆಚ್ಚಿಸಲು ಮೊದಲೇ ಘೋಷಿಸಲಾದ ಕೊಡುಗೆಯಾಗಿದೆ. BSNL ಬಹಳ ಸಮಯದಿಂದ ಈ ಯೋಜನೆ ಯೊಂದಿಗೆ ಹೊಸ ಸಿಮ್ ಕಾರ್ಡ್ ಅನ್ನು ನೀಡುತ್ತಿದೆ. ಈ ಕೊಡುಗೆಯ ಪ್ರಚಾರವನ್ನು ಇತ್ತೀಚೆಗೆ ನಿಲ್ಲಿಸಲಾಗಿದೆ, ಆದರೆ ಈ ಯೋಜನೆಯು ಹೊಸ ಬಳಕೆದಾರರಿಗೆ ಲಭ್ಯವಿರುತ್ತದೆ. ಇದು BSNL ನಿಂದ ಮೊದಲ ರೀಚಾರ್ಜ್ ಕೂಪನ್ (FRC) ಆಗಿದ್ದು, ಟೆಲ್ಕೊದ ಅಸ್ತಿತ್ವದಲ್ಲಿರುವ ಗ್ರಾಹಕರಿಗೆ ಲಭ್ಯವಿರುವುದಿಲ್ಲ ಎಂಬುದನ್ನು ಗಮನಿಸಿ. ಈ ಯೋಜನೆಗೆ ನೀವು ಹೊಸ ಸಿಮ್ ಪಡೆಯಬಹುದು. ಈ ಹಿಂದೆ ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳದ ಗ್ರಾಹಕರು ಹೊಸ ಸಿಮ್ ಖರೀದಿಸುವಾಗ ಯೋಜನೆಯನ್ನು ಪಡೆಯಬಹುದು. ಈ ಯೋಜನೆಯನ್ನು ಒಮ್ಮೆ ಮಾತ್ರ ಖರೀದಿಸಬಹುದು. BSNL ರೂ. 1 ಯೋಜನೆಯ ಪ್ರಯೋಜನಗಳು! BSNL ದೇಶದಲ್ಲಿ 1 ರೂ. ಪ್ರಿಪೇಯ್ಡ್ ಯೋಜನೆಯನ್ನು ನೀಡುವ ಏಕೈಕ ಟೆಲಿಕಾಂ ಆಪರೇಟರ್ ಆಗಿದೆ, ಅದು FRC ಆಗಿದ್ದರೂ ಸಹ, ಸೇವಾ ಮಾನ್ಯತೆಯೊಂದಿಗೆ ರೂ. 1 ಪ್ರಿಪೇಯ್ಡ್ ಯೋಜನೆಯನ್ನು ನೀಡುತ್ತದೆ. ರೂ. 1 ರೀಚಾರ್ಜ್ ಅನಿಯಮಿತ ಧ್ವನಿ ಕರೆ ಮತ್ತು 2GB ದೈನಂದಿನ ಡೇಟಾ ಜೊತೆಗೆ 100 SMS/ದಿನಕ್ಕೆ ಬರುತ್ತದೆ. ಈ ಯೋಜನೆಯೊಂದಿಗೆ ನೀಡಲಾಗುವ ಸೇವಾ ಮಾನ್ಯತೆಯು 30 ದಿನಗಳು. ನೀವು ಹೊಸ ಸಿಮ್ ಅನ್ನು ಪಡೆದುಕೊಂಡು ಈ ಯೋಜನೆಯೊಂದಿಗೆ ಒಮ್ಮೆ ರೀಚಾರ್ಜ್ ಮಾಡಿದರೆ, ನೀವು ಅದನ್ನು ಮತ್ತೆ ರೀಚಾರ್ಜ್ ಮಾಡಲು ಸಾಧ್ಯವಾಗುವುದಿಲ್ಲ ಎಂಬುದನ್ನು ಗಮನಿಸಿ. ಅಲ್ಲದೆ, ನೀವು ಹೊಸ ಸಿಮ್ ಪಡೆದುಕೊಂಡು ಬೇರೆ ಯೋಜನೆಯನ್ನು ಆರಿಸಿಕೊಂಡರೆ ಮತ್ತು ಮೊದಲ ಯೋಜನೆಯ ಅವಧಿ ಮುಗಿದ ನಂತರ ಈ ಯೋಜನೆಯೊಂದಿಗೆ ರೀಚಾರ್ಜ್ ಮಾಡಲು ಪ್ರಯತ್ನಿಸಿದರೆ, ಅದು ನಿಮಗೆ ಕೆಲಸ ಮಾಡುವುದಿಲ್ಲ. ಇದು ಸಂಪೂರ್ಣವಾಗಿ ಸರ್ಕಾರಿ ಸ್ವಾಮ್ಯದ ಟೆಲಿಕಾಂ ಆಪರೇಟರ್‌ನಿಂದ ಪ್ರಚಾರದ ಕೊಡುಗೆಯಾಗಿದ್ದು, ಇದು ಮೂಲತಃ ಬಳಕೆದಾರರಿಗೆ BSNL ಸಿಮ್ ಕಾರ್ಡ್ ಪಡೆಯಲು ಮತ್ತು ಅದರ ಸೇವೆಗಳನ್ನು ಪರೀಕ್ಷಿಸಲು ಪ್ರೋತ್ಸಾಹಿಸುತ್ತದೆ. BSNL ಈಗಾಗಲೇ ದೇಶದ ಹಲವು ಭಾಗಗಳಲ್ಲಿ 4G ಅನ್ನು ಬಿಡುಗಡೆ ಮಾಡಿದೆ ಮತ್ತು ಸರ್ಕಾರದ ಅನುಮೋದನೆಯ ನಂತರ ಹೆಚ್ಚಿನ ಸೈಟ್‌ಗಳನ್ನು ಸೇರಿಸಲು ಯೋಜಿಸುತ್ತಿದೆ. ಇದು ಸರ್ಕಾರಿ ಸ್ವಾಮ್ಯದ ಟೆಲ್ಕೊದ ಮೊಬೈಲ್ ನೆಟ್‌ವರ್ಕ್‌ನ ವ್ಯಾಪ್ತಿಯನ್ನು ಹೆಚ್ಚಿಸುತ್ತದೆ ಮತ್ತು ಬಳಕೆದಾರರಿಗೆ ನೆಟ್‌ವರ್ಕ್ ಅನುಭವವನ್ನು ಹೆಚ್ಚಿಸುತ್ತದೆ. ಹೊಸ ಸಿಮ್ ಪಡೆಯಲು, ಕಂಪನಿಯ ಹತ್ತಿರದ BSNL ಕಚೇರಿ ಅಥವಾ ಸಿಮ್ ವಿತರಕರನ್ನು ಭೇಟಿ ಮಾಡಿ. #LATEST #DOT #TRAI #BSNL4G #1RSPLAN #TELCO

ಐಸ್‌ಕ್ರೀಂ ಲೋಕಕ್ಕೆ ಅಂಬಾನಿ ಲಗ್ಗೆ : ವಂತಾರಾ ಬ್ರ್ಯಾಂಡ್ ಅಡಿಯಲ್ಲಿ 17 ವಿಭಿನ್ನ ದೇಶಿ ಫ್ಲೇವರ್‌ಗಳ ಎಂಟ್ರಿ! ವನ್ಯಜೀವಿ ಸಂರಕ್ಷಣೆಯಲ್ಲಿ ಜಾಗತಿಕ ಮಟ್ಟದ ಸದ್ದು ಮಾಡಿದ್ದ ಅನಂತ್ ಅಂಬಾನಿ ಅವರ ವಂತಾರಾ ಈಗ ಐಸ್‌ಕ್ರೀಂ ಮಾರುಕಟ್ಟೆಗೂ ಲಗ್ಗೆ ಇಟ್ಟಿದೆ. ಮುಂಬೈನಲ್ಲಿ ವಂತಾರಾ ಕ್ರೀಮರಿ (Vantara Creamery) ಎಂಬ ಪ್ರೀಮಿಯಂ ಆರ್ಟಿಸಾನಲ್ ಐಸ್‌ಕ್ರೀಂ ಬ್ರ್ಯಾಂಡ್ ಅನ್ನು ಲಾಂಚ್ ಮಾಡಲಾಗಿದೆ. ದೇಶಿ ಫ್ಲೇವರ್‌ಗಳ ಸಂಗಮ.ಕೇವಲ ಚಾಕೊಲೇಟ್ ಅಥವಾ ವೆನಿಲ್ಲಾಕ್ಕೆ ಸೀಮಿತವಾಗದ ಈ ಬ್ರ್ಯಾಂಡ್, ಭಾರತೀಯ ಸಾಂಪ್ರದಾಯಿಕ ರುಚಿಗಳಿಗೆ ಹೆಚ್ಚಿನ ಒತ್ತು ನೀಡಿದೆ. ಪ್ರಮುಖ ಫ್ಲೇವರ್‌ಗಳು: ಮೆನು ಒಟ್ಟು 17 ವಿವಿಧ ರುಚಿಗಳನ್ನು ಒಳಗೊಂಡಿದ್ದು, ಇದರಲ್ಲಿ ಗುವಾ ಚಿಲ್ಲಿ (ಸೀಬೆಹಣ್ಣು ಮತ್ತು ಖಾರ), ಕೇಸರಿ ಪೇಡಾ, ಫಿಲ್ಟರ್ ಕಾಫಿ, ಮಲೈ ಕುಲ್ಫಿ ಮತ್ತು ಲೆಮನ್ ಸೋರ್ಬೆಟ್ ಹೆಚ್ಚು ಗಮನ ಸೆಳೆಯುತ್ತಿವೆ. ಪ್ರೀಮಿಯಂ ಗುಣಮಟ್ಟ: ಈ ಐಸ್‌ಕ್ರೀಂಗಳನ್ನು ತಯಾರಿಸಲು ಅತ್ಯಂತ ಉತ್ಕೃಷ್ಟವಾದ A2 ಗಿರ್ ಹಸುವಿನ ಹಾಲನ್ನು ಬಳಸಲಾಗುತ್ತಿದೆ. ಇದು ಐಸ್‌ಕ್ರೀಂಗೆ ಹೆಚ್ಚಿನ ಕ್ರೀಮಿ ವಿನ್ಯಾಸ ನೀಡುತ್ತದೆ ಎಂದು ವರದಿಯಾಗಿದೆ. ರಿಟ್ರೋ ಸ್ಟೈಲ್ ಐಸ್‌ಕ್ರೀಂ ಟ್ರಕ್! ಈ ಹೊಸ ಬ್ರ್ಯಾಂಡ್ ಮುಂಬೈನ ಜಿಯೋ ವರ್ಲ್ಡ್ ಡ್ರೈವ್ ನಲ್ಲಿ ಅಧಿಕೃತವಾಗಿ ಪಾದಾರ್ಪಣೆ ಮಾಡಿದೆ.ವಿಶೇಷವಾಗಿ ವಿನ್ಯಾಸಗೊಳಿಸಲಾದ ರೆಟ್ರೋ ಶೈಲಿಯ ಐಸ್‌ಕ್ರೀಂ ಟ್ರಕ್ ಮೂಲಕ ಗ್ರಾಹಕರಿಗೆ ಈ ಸ್ಕೂಪ್‌ಗಳನ್ನು ವಿತರಿಸಲಾಗುತ್ತಿದೆ.ಮೇ 9 ಮತ್ತು 10 ರಂದು ಈಗಾಗಲೇ ಈ ಟ್ರಕ್ ಗ್ರಾಹಕರನ್ನು ಸೆಳೆದಿದ್ದು, ಈ ಟ್ರಕ್ ಈಗಾಗಲೇ ಮೇ 9 ಮತ್ತು 10 ರಂದು ಕಾರ್ಯನಿರ್ವಹಿಸಿದ್ದು, ಮತ್ತೆ ಮೇ 16 ಮತ್ತು 17, 2026 ರಂದು ಗ್ರಾಹಕರಿಗೆ ರುಚಿಕರ ಐಸ್‌ಕ್ರೀಂ ನೀಡಲು ಸಜ್ಜಾಗಿದೆ ವನ್ಯಜೀವಿ ಸಂರಕ್ಷಣೆಯಿಂದ ಲೈಫ್‌ಸ್ಟೈಲ್‌ವರೆಗೆ! ಅನಂತ್ ಅಂಬಾನಿ ನೇತೃತ್ವದ ವಂತಾರಾ ಎಂಬುದು ಮೂಲತಃ ವನ್ಯಜೀವಿಗಳ ರಕ್ಷಣೆ ಮತ್ತು ಪುನರ್ವಸತಿಗಾಗಿ ಆರಂಭವಾದ ಅಭಿಯಾನ. ಈಗ ಅದೇ ಬ್ರ್ಯಾಂಡ್ ಅಡಿಯಲ್ಲಿ ಐಸ್‌ಕ್ರೀಂ ಉದ್ಯಮವನ್ನು ಆರಂಭಿಸುವುದು ಸಂಸ್ಥೆಯ ವಿಶಾಲ ದೃಷ್ಟಿಕೋನವನ್ನು ತೋರಿಸುತ್ತಿದೆ. ಸಣ್ಣ ಬ್ಯಾಚ್‌ಗಳಲ್ಲಿ ಕೈಯಿಂದ ತಯಾರಿಸಲಾಗುವ, ಈ ಪ್ರೀಮಿಯಂ ಐಸ್‌ಕ್ರೀಂಗಳು ಈ ಬೇಸಿಗೆಯಲ್ಲಿ ಮುಂಬೈ ಜನರ ನೆಚ್ಚಿನ ಆಯ್ಕೆಯಾಗುವುದರಲ್ಲಿ ಅನುಮಾನವಿಲ್ಲ. #VIRAL #BUSINESS #VANTARABRAND #JIO #WORLDDRIVE

ಆರೋಗ್ಯ ಸಲಹೆ ಪಡೆಯಲು AI ಮೊರೆ ಹೋಗುತ್ತಿದ್ದಾರೆಯೇ ಜನ? ಅಧ್ಯಯನದಲ್ಲಿ ಬಯಲಾದ ಆಘಾತಕಾರಿ ಅಂಶಗಳು! ನವದೆಹಲಿ : ಇಂದಿನ ಡಿಜಿಟಲ್ (Digital) ಕ್ರಾಂತಿಯ ಯುಗದಲ್ಲಿ ಕೃತಕ ಬುದ್ಧಿಮತ್ತೆ ಅಥವಾ ಎಐ (AI) ಬಳಕೆ ಮನುಷ್ಯನ ಜೀವನದ ಅವಿಭಾಜ್ಯ ಅಂಗವಾಗುತ್ತಿದೆ. ಕೇವಲ ಕೆಲಸ ಅಥವಾ ಶಿಕ್ಷಣಕ್ಕೆ ಮಾತ್ರವಲ್ಲದೆ, ಈಗ ಜನರು ತಮ್ಮ ಆರೋಗ್ಯಕ್ಕೆ (Health) ಸಂಬಂಧಿಸಿದ ಮಾಹಿತಿಯನ್ನು ಪಡೆಯಲು ಕೂಡ ಎಐ ಸಾಧನಗಳನ್ನು ಅತಿಯಾಗಿ ಬಳಸುತ್ತಿರುವುದು ಇತ್ತೀಚಿನ ಸಂಶೋಧನೆಯಿಂದ ತಿಳಿದುಬಂದಿದೆ. ಹೆಮಟಾಲಜಿ ಅಡ್ವೈಸರ್ ಎಂಬ ನಿಯತಕಾಲಿಕೆಯಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ಜಗತ್ತಿನಾದ್ಯಂತ ಪ್ರತಿ ನಾಲ್ಕು ಜನರಲ್ಲಿ ಒಬ್ಬರು ತಮ್ಮ ಆರೋಗ್ಯ ಸಮಸ್ಯೆಗಳ ಪರಿಹಾರಕ್ಕಾಗಿ ಎಐ ತಂತ್ರಜ್ಞಾನದ ಮೇಲೆ ಅವಲಂಬಿತರಾಗಿದ್ದಾರೆ. ವಿಶೇಷವಾಗಿ ಇಂದಿನ ಯುವ ಪೀಳಿಗೆಯು ಯಾವುದೇ ಸಣ್ಣ ದೈಹಿಕ ಬದಲಾವಣೆ ಅಥವಾ ಆರೋಗ್ಯದ ಪ್ರಶ್ನೆ ಎದುರಾದರೂ ತಕ್ಷಣ ವೈದ್ಯರ ಬಳಿ ಹೋಗುವ ಬದಲು ಎಐ ಟೂಲ್‌ಗಳ ಮೊರೆ ಹೋಗುತ್ತಿದೆ. ಎಐ ಮೇಲೆ ಹೆಚ್ಚು ಆಕರ್ಷಣೆ: ಅನಾರೋಗ್ಯದ ಲಕ್ಷಣಗಳನ್ನು ಪತ್ತೆಹಚ್ಚುವುದು, ಸರಿಯಾದ ಆಹಾರ ಕ್ರಮದ ಮಾಹಿತಿ, ವಿವಿಧ ಔಷಧಿಗಳ ಕಾರ್ಯವೈಖರಿ, ತೂಕ ಇಳಿಸುವ ಸುಲಭ ಹಾದಿಗಳು ಹಾಗೂ ಮಾನಸಿಕ ಆರೋಗ್ಯದ ಕುರಿತಾದ ಸಂದೇಹಗಳಿಗೆ ಉತ್ತರ ಪಡೆಯಲು ಜನರು ಇವುಗಳನ್ನು ಬಳಸುತ್ತಿದ್ದಾರೆ. ಕೇಳಿದ ತಕ್ಷಣ ಸುಲಭವಾದ ಭಾಷೆಯಲ್ಲಿ ಹಾಗೂ ಕ್ಷಣಾರ್ಧದಲ್ಲಿ ಮಾಹಿತಿ ಸಿಗುತ್ತಿರುವುದು ಜನರು ಎಐ ಮೇಲೆ ಹೆಚ್ಚು ಆಕರ್ಷಿತರಾಗಲು ಪ್ರಮುಖ ಕಾರಣವಾಗಿದೆ. ಆದರೆ, ಈ ಪ್ರವೃತ್ತಿಯು ಅಪಾಯಕಾರಿಯಾಗಬಲ್ಲದು ಎಂದು ವೈದ್ಯಕೀಯ ತಜ್ಞರು ಗಂಭೀರ ಎಚ್ಚರಿಕೆ ನೀಡಿದ್ದಾರೆ. ಎಐ ನೀಡುವ ಮಾಹಿತಿಯು ಕೇವಲ ಇಂಟರ್ನೆಟ್‌ನಲ್ಲಿರುವ ದತ್ತಾಂಶಗಳನ್ನು ಆಧರಿಸಿರುತ್ತದೆಯೇ ಹೊರತು, ಅದು ಪ್ರತಿಯೊಬ್ಬ ವ್ಯಕ್ತಿಯ ದೇಹಸ್ಥಿತಿ ಮತ್ತು ವೈದ್ಯಕೀಯ ಇತಿಹಾಸವನ್ನು ಗಮನದಲ್ಲಿಟ್ಟುಕೊಂಡು ನೀಡಿರುವ ಮಾಹಿತಿಯಾಗಿರುವುದಿಲ್ಲ. ಅಪೂರ್ಣ ಮಾಹಿತಿ ನೀಡುವ ಸಾಧ್ಯತೆ ವೈದ್ಯಕೀಯ ತಜ್ಞರ ಪ್ರಕಾರ, ಎಐ ಕೆಲವೊಮ್ಮೆ ತಪ್ಪು ಅಥವಾ ಅಪೂರ್ಣ ಮಾಹಿತಿಯನ್ನು ನೀಡುವ ಸಾಧ್ಯತೆಗಳಿರುತ್ತವೆ. ಇದನ್ನು ನಂಬಿ ಜನರು ತಾವೇ ಸ್ವಯಂ ಔಷಧಿ ಸೇವನೆ (Self-medication) ಮಾಡಿದರೆ ಅದು ಪ್ರಾಣಕ್ಕೆ ಕುತ್ತು ತರುವ ಅಪಾಯವಿರುತ್ತದೆ. ಜ್ವರ, ಉಸಿರಾಟದ ತೊಂದರೆ, ತೀವ್ರವಾದ ನೋವು ಅಥವಾ ದೀರ್ಘಕಾಲದ ಕಾಯಿಲೆಗಳಂತಹ ಗಂಭೀರ ಸಂದರ್ಭಗಳಲ್ಲಿ ವೈದ್ಯರನ್ನು ಖುದ್ದಾಗಿ ಭೇಟಿ ಮಾಡುವುದು ಅತ್ಯಗತ್ಯ. ತಂತ್ರಜ್ಞಾನವು ನಮಗೆ ಆರೋಗ್ಯದ ಬಗ್ಗೆ ಸಾಮಾನ್ಯ ಜಾಗೃತಿ ಮೂಡಿಸಲು ಸಹಾಯ ಮಾಡಬಹುದೇ ಹೊರತು, ಅದು ಎಂದಿಗೂ ಒಬ್ಬ ಅನುಭವಿ ವೈದ್ಯರಿಗೆ ಪರ್ಯಾಯವಾಗಲು ಸಾಧ್ಯವಿಲ್ಲ. ಹೀಗಾಗಿ ಎಐ ಮಾಹಿತಿಯನ್ನು ಕೇವಲ ಪ್ರಾಥಮಿಕ ಮಾರ್ಗದರ್ಶನವಾಗಿ ಮಾತ್ರ ನೋಡಿ, ಯಾವುದೇ ನಿರ್ಧಾರ ತೆಗೆದುಕೊಳ್ಳುವ ಮೊದಲು ತಜ್ಞರ ಸಲಹೆ ಪಡೆಯುವುದು ನಿಮ್ಮ ಆರೋಗ್ಯದ ದೃಷ್ಟಿಯಿಂದ ಉತ್ತಮ. #VIRAL #NEWDELHI #LIFESTYLE #OPENAI #DIGITALAGE

ಮರಿಗಳಿಗೆ ಜನ್ಮ ನೀಡುವ ಜಗತ್ತಿನ ಏಕೈಕ ಪುರುಷ ಪ್ರಾಣಿ! ಯಾವುದು ಗೊತ್ತಾ? ಸೃಷ್ಟಿಯ ನಿಯಮದಂತೆ ಸಾಮಾನ್ಯವಾಗಿ ಹೆಣ್ಣು ಜೀವಿಯಷ್ಟೇ ಮರಿಗಳಿಗೆ ಜನ್ಮ (Birth) ನೀಡುವುದು ಪ್ರಕೃತಿ (Nature) ಸಹಜ. ಆದರೆ, ಈ ವಿಶಾಲ ಸಾಗರದ ಆಳದಲ್ಲಿ ಸೃಷ್ಟಿಯ ಆ ಎಲ್ಲಾ ನಿಯಮಗಳನ್ನು ಮೀರಿಸುವಂತಹ ಒಂದು ಅಚ್ಚರಿಯ ಜೀವಿಯಿದೆ. ಅದರಂತೆ, 'ತಾಯ್ತನ' ಎಂಬುದು ಕೇವಲ ಹೆಣ್ಣಿಗೆ ಮಾತ್ರ ಸೀಮಿತವಲ್ಲ ಎಂದು ಸಾರುವ ಈ ಪ್ರಾಣಿಯೇ ಸಮುದ್ರ ಕುದುರೆ. ವಿಶಿಷ್ಟ ಸಂತಾನೋತ್ಪತ್ತಿ ಪ್ರಕ್ರಿಯೆ: ಸಮುದ್ರ ಕುದುರೆಗಳ ಪ್ರೇಮ ಜೀವನ ಮತ್ತು ಸಂತಾನೋತ್ಪತ್ತಿ ವಿಧಾನ ಬಹಳ ಕುತೂಹಲಕಾರಿಯಾಗಿದೆ. ಸಂತಾನೋತ್ಪತ್ತಿಯ ಸಮಯ ಬಂದಾಗ, ಹೆಣ್ಣು ಮತ್ತು ಗಂಡು ಸಮುದ್ರ ಕುದುರೆಗಳು ಗಂಟೆಗಟ್ಟಲೆ ಒಟ್ಟಿಗೆ ಈಜುತ್ತಾ ಒಂದು ರೀತಿಯ 'ಪ್ರೇಮ ನೃತ್ಯ'ವನ್ನು ಮಾಡುತ್ತವೆ. ಈ ಪ್ರಕ್ರಿಯೆಯ ಕೊನೆಯಲ್ಲಿ, ಹೆಣ್ಣು ಸಮುದ್ರ ಕುದುರೆಯು ತನ್ನ ಮೊಟ್ಟೆಗಳನ್ನು ಗಂಡಿನ ಹೊಟ್ಟೆಯ ಮುಂಭಾಗದಲ್ಲಿರುವ 'ಬ್ರೂಡ್ ಪೌಚ್' (Brood Pouch) ಎಂಬ ಚೀಲದಂತಹ ಭಾಗಕ್ಕೆ ವರ್ಗಾಯಿಸುತ್ತದೆ. ಹೀಗೆ, ಒಮ್ಮೆ ಮೊಟ್ಟೆಗಳು ಗಂಡಿನ ಚೀಲವನ್ನು ಸೇರಿದ ನಂತರ, ಗಂಡು ಸಮುದ್ರ ಕುದುರೆಯು ಅವುಗಳನ್ನು ಫಲೀಕರಣಗೊಳಿಸುತ್ತದೆ (Fertilization). ಅಲ್ಲಿಂದ ಮುಂದೆ ಗಂಡಿನ ನಿಜವಾದ 'ಗರ್ಭಾವಸ್ಥೆ' ಆರಂಭವಾಗುತ್ತದೆ. ಈ ಚೀಲವು ಕೇವಲ ಮೊಟ್ಟೆಗಳನ್ನು ಇಡುವ ಜಾಗವಲ್ಲ; ಬದಲಿಗೆ ಇದು ಸಸ್ತನಿಗಳ ಗರ್ಭಾಶಯದಂತೆ ಕಾರ್ಯನಿರ್ವಹಿಸುತ್ತದೆ. ಹಾಗಾಗಿಯೇ, ಇದು ಮೊಟ್ಟೆಗಳಿಗೆ ಅಗತ್ಯವಿರುವ ಆಮ್ಲಜನಕ, ಪೋಷಕಾಂಶಗಳು ಮತ್ತು ಸರಿಯಾದ ತಾಪಮಾನವನ್ನು ಒದಗಿಸುತ್ತದೆ. ತಂದೆಯ ಒಡಲಲ್ಲಿ ಮರಿಗಳ ಬೆಳವಣಿಗೆ: ಗರ್ಭಾವಸ್ಥೆಯ ಅವಧಿಯು ಸಮುದ್ರದ ಉಷ್ಣತೆ ಮತ್ತು ಪ್ರಭೇದಗಳ ಆಧಾರದ ಮೇಲೆ ಎರಡರಿಂದ ನಾಲ್ಕು ವಾರಗಳವರೆಗೆ ಇರುತ್ತದೆ. ಈ ಸಮಯದಲ್ಲಿ ಗಂಡು ಸಮುದ್ರ ಕುದುರೆಯ ಹೊಟ್ಟೆ ದೊಡ್ಡದಾಗುತ್ತಾ ಹೋಗುತ್ತದೆ. ಮರಿಗಳು ಪೂರ್ಣವಾಗಿ ಬೆಳೆದ ನಂತರ, ಗಂಡು ಸಮುದ್ರ ಕುದುರೆಯು ಸೆಳೆತದ ಮೂಲಕ ನೂರಾರು, ಕೆಲವೊಮ್ಮೆ ಸಾವಿರಾರು ಪುಟ್ಟ ಮರಿಗಳನ್ನು ನೀರಿಗೆ ಬಿಡುಗಡೆ ಮಾಡುತ್ತದೆ. ಅದರಂತೆ, ಈ ದೃಶ್ಯವು ಪ್ರಕೃತಿಯ ಅತ್ಯಂತ ಅಪರೂಪದ ಮತ್ತು ಚಂದದ ದೃಶ್ಯಗಳಲ್ಲಿ ಒಂದಾಗಿದೆ. ಏಕಪತ್ನಿತ್ವದ ಗುಣ: ಮುಂದುವರೆದು, ಸಮುದ್ರ ಕುದುರೆಗಳ ಮತ್ತೊಂದು ವಿಶೇಷವೆಂದರೆ ಅವುಗಳು 'ಏಕಪತ್ನಿತ್ವ'ವನ್ನು ಪಾಲಿಸುತ್ತವೆ. ಅಂದರೆ, ಇವುಗಳು ತಮ್ಮ ಜೀವಿತಾವಧಿಯ ಪೂರ್ತಿ ಒಂದೇ ಸಂಗಾತಿಯೊಂದಿಗೆ ಇರುತ್ತವೆ. ಗಂಡು ಮರಿಗಳನ್ನು ಹೆರುವ ಸಮಯದಲ್ಲಿಯೂ ಹೆಣ್ಣು ಸಮುದ್ರ ಕುದುರೆಯು ಪ್ರತಿದಿನ ಗಂಡನ್ನು ಭೇಟಿ ಮಾಡಿ 'ಕುಶಲೋಪರಿ' ವಿಚಾರಿಸುತ್ತದೆ. ಏತನ್ಮಧ್ಯೆ, ಇಂತಹ ವಿಸ್ಮಯಕಾರಿ ಜೀವಿಗಳು ಇಂದು ವಿನಾಶದ ಅಂಚಿನಲ್ಲಿವೆ. ಸಮುದ್ರ ಮಾಲಿನ್ಯ, ಹವಾಮಾನ ವೈಪರೀತ್ಯ ಮತ್ತು ಕಾನೂನುಬಾಹಿರ ಬೇಟೆಯಿಂದಾಗಿ ಇವುಗಳ ಸಂಖ್ಯೆ ಕ್ಷೀಣಿಸುತ್ತಿದೆ. ಸಾಂಪ್ರದಾಯಿಕ ಔಷಧಗಳ ತಯಾರಿಕೆಯಲ್ಲಿ ಇವುಗಳನ್ನು ಬಳಸಲಾಗುತ್ತಿರುವುದು ಆತಂಕಕಾರಿ ವಿಷಯ. ಸೃಷ್ಟಿಯ ಈ ಅಪರೂಪದ 'ಗಂಡು ತಾಯಿ'ಯನ್ನು ಉಳಿಸಿಕೊಳ್ಳುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ. ಒಟ್ಟಾರೆಯಾಗಿ, ವಿಜ್ಞಾನ ಮತ್ತು ಪ್ರಕೃತಿಯ ಜುಗಲ್‌ಬಂದಿಯಲ್ಲಿ ಸಮುದ್ರ ಕುದುರೆಗಳ ಈ ಪ್ರಕ್ರಿಯೆ ನಿಜಕ್ಕೂ ಬೆರಗು ಮೂಡಿಸುವಂಥದ್ದು. ಗಂಡು ಪ್ರಾಣಿಯೊಂದು ತಂದೆಯ ಜವಾಬ್ದಾರಿಯ ಜೊತೆಗೆ ತಾಯಿಯ ಮಮತೆಯನ್ನೂ ತೋರಿ ಮರಿಗಳನ್ನು ರಕ್ಷಿಸುವುದು ಜೀವವೈವಿಧ್ಯದ ಅನನ್ಯತೆಗೆ ಸಾಕ್ಷಿ. ಸಮುದ್ರದ ಒಳಗೆ ಅಡಗಿರುವ ಇಂತಹ ಕೋಟ್ಯಂತರ ರಹಸ್ಯಗಳಲ್ಲಿ ಈ 'ಗಂಡು ತಾಯಿ'ಯ ಕಥೆ ಪ್ರಕೃತಿಯ ಮೇಲಿನ ಗೌರವವನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಸೃಷ್ಟಿಯ ಈ ವಿಚಿತ್ರಗಳನ್ನು ಅರ್ಥೈಸಿಕೊಂಡಷ್ಟೂ, ಪರಿಸರವನ್ನು ಉಳಿಸುವ ಮತ್ತು ಪ್ರೀತಿಸುವ ಅನಿವಾರ್ಯತೆ ನಮಗೆ ಅರಿವಾಗುತ್ತದೆ. #VIRALINFO #BENGALURU #ANIMALWORLD #AMAZINGFACT #NATURE

ಹಳೆಯ ಸ್ಕ್ರೀನ್‌ಶಾಟ್‌ಗಳು ನಿಮ್ಮ ಖಾಸಗಿತನಕ್ಕೆ ಕುತ್ತು ತರಬಹುದು: ಎಚ್ಚರ ತಪ್ಪಿದರೆ ಸಂಕಷ್ಟ ತಪ್ಪಿದ್ದಲ್ಲ! ನವದೆಹಲಿ: ನಮಗೆ ಬೇಕಾದ ಮಾಹಿತಿ ಅಥವಾ ಸಂಭಾಷಣೆಗಳನ್ನು ನೆನಪಿಟ್ಟುಕೊಳ್ಳಲು ನಾವು ಸುಲಭವಾಗಿ ಸ್ಕ್ರೀನ್‌ಶಾಟ್ ತೆಗೆದುಕೊಳ್ಳುತ್ತೇವೆ. ಆದರೆ, ಫೋನ್ ಗ್ಯಾಲರಿಯಲ್ಲಿ ಅಥವಾ ಕ್ಲೌಡ್ ಸ್ಟೋರೇಜ್‌ನಲ್ಲಿ ದಶಕಗಳ ಕಾಲ ಉಳಿದುಹೋಗುವ ಈ ಚಿತ್ರಗಳು ಕಾಲಕ್ರಮೇಣ ಗಂಭೀರ ಭದ್ರತಾ ಬೆದರಿಕೆಯಾಗಿ (Privacy Risk) ಪರಿಣಮಿಸುತ್ತಿವೆ ಎಂದು ಸೈಬರ್ ತಜ್ಞರು ಎಚ್ಚರಿಸಿದ್ದಾರೆ. ಸೂಕ್ಷ್ಮ ಮಾಹಿತಿಯ ಶೇಖರಣೆ: ಅನೇಕರು ಬ್ಯಾಂಕ್ ಖಾತೆ ವಿವರ, ಪಾಸ್‌ವರ್ಡ್‌ಗಳು, ಆಧಾರ್ ಕಾರ್ಡ್ ಅಥವಾ ವೈಯಕ್ತಿಕ ಚಾಟ್‌ಗಳ ಸ್ಕ್ರೀನ್‌ಶಾಟ್ ತೆಗೆದಿರುತ್ತಾರೆ. ಫೋನ್ ಹ್ಯಾಕ್ ಆದಾಗ ಅಥವಾ ಅನಾಮಧೇಯ ಆಪ್‌ಗಳಿಗೆ ಗ್ಯಾಲರಿ ಪ್ರವೇಶ ನೀಡಿದಾಗ ಈ ಮಾಹಿತಿಗಳು ಸುಲಭವಾಗಿ ದುರುಳರ ಕೈ ಸೇರುತ್ತವೆ. ಮಾಲ್ವೇರ್ ದಾಳಿ (SparkKitty): ಇತ್ತೀಚಿನ ವರದಿಗಳ ಪ್ರಕಾರ, 'ಸ್ಪಾರ್ಕ್‌ಕಿಟ್ಟಿ' (SparkKitty) ಎಂಬ ಹೊಸ ಮಾಲ್ವೇರ್ ನಿಮ್ಮ ಫೋನ್‌ನಲ್ಲಿರುವ ಸ್ಕ್ರೀನ್‌ಶಾಟ್‌ಗಳನ್ನು ಸ್ಕ್ಯಾನ್ ಮಾಡಿ ಅದರಲ್ಲಿರುವ ಪಠ್ಯವನ್ನು (OCR ತಂತ್ರಜ್ಞಾನದ ಮೂಲಕ) ಓದಬಲ್ಲದು. ಇದು ಕ್ರಿಪ್ಟೋ ಕರೆನ್ಸಿ ಕೀಗಳು ಅಥವಾ ಲಾಗಿನ್ ವಿವರಗಳನ್ನು ಕದಿಯಲು ಬಳಕೆಯಾಗುತ್ತಿದೆ. ಲೊಕೇಶನ್ ಡೇಟಾ (Metadata): ಪ್ರತಿ ಸ್ಕ್ರೀನ್‌ಶಾಟ್ ತನ್ನೊಳಗೆ ಅದು ತೆಗೆದ ಸಮಯ ಮತ್ತು ಸ್ಥಳದ ಮಾಹಿತಿಯನ್ನು (Metadata) ಅಡಗಿಸಿಟ್ಟುಕೊಂಡಿರುತ್ತದೆ. ಇದು ನಿಮ್ಮ ದಿನಚರಿ ಮತ್ತು ವಾಸಸ್ಥಳದ ವಿವರಗಳನ್ನು ಅಪರಿಚಿತರಿಗೆ ಬಿಟ್ಟುಕೊಡಬಹುದು. ಕ್ಲೌಡ್ ಸಿಂಕ್ ಭೀತಿ: ಹಳೆಯ ಫೋನ್‌ನಲ್ಲಿದ್ದ ಸ್ಕ್ರೀನ್‌ಶಾಟ್‌ಗಳು ಗೂಗಲ್ ಫೋಟೋಸ್ ಅಥವಾ ಐಕ್ಲೌಡ್‌ನಲ್ಲಿ ಆಟೋ-ಸಿಂಕ್ ಆಗಿರುತ್ತವೆ. ನಿಮ್ಮ ಕ್ಲೌಡ್ ಅಕೌಂಟ್ ಹ್ಯಾಕ್ ಆದರೆ, ವರ್ಷಗಳ ಹಿಂದಿನ ನಿಮ್ಮ ಖಾಸಗಿ ಚಿತ್ರಗಳು ಬಯಲಾಗುವ ಅಪಾಯವಿರುತ್ತದೆ. ತಜ್ಞರು ನೀಡುವ ಮುನ್ನೆಚ್ಚರಿಕೆ ಕ್ರಮಗಳು: 1.ತಿಂಗಳಿಗೊಮ್ಮೆ ನಿಮ್ಮ ಗ್ಯಾಲರಿಯನ್ನು ಪರಿಶೀಲಿಸಿ. 2.ಅನಗತ್ಯವಾದ ಮತ್ತು ಹಳೆಯ ಸ್ಕ್ರೀನ್‌ಶಾಟ್‌ಗಳನ್ನು ಡಿಲೀಟ್ ಮಾಡಿ. 3.ಯಾವುದೇ ಹೊಸ ಆಪ್ ಇನ್‌ಸ್ಟಾಲ್ ಮಾಡುವಾಗ ಅದು ನಿಮ್ಮ 'ಫೋಟೋ ಮತ್ತು ಗ್ಯಾಲರಿ'ಗೆ ಪ್ರವೇಶ ಕೇಳಿದರೆ, ಅದರ ಅಗತ್ಯವಿದೆಯೇ ಎಂದು ಯೋಚಿಸಿ ಅನುಮತಿ ನೀಡಿ. 4.ನಿಮ್ಮ ಗೂಗಲ್ ಅಥವಾ ಆಪಲ್ ಐಡಿಗಳಿಗೆ ಕಡ್ಡಾಯವಾಗಿ ದ್ವಿಮುಖ ದೃಢೀಕರಣ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳಿ. #VIRAL #NEWDELHI #PRIVACYRISK #MALWARE #METADATA

Wi-Fi ರೂಟರ್ ಮೇಲೆ ಕಾಯಿನ್ ಇಟ್ಟರೆ ಇಂಟರ್ನೆಟ್ ಸ್ಪೀಡ್ ಹೆಚ್ಚಾಗುತ್ತಾ ? ತಜ್ಞರಿಂದ ಶಾಕಿಂಗ್ ಸತ್ಯ ರಿವೀಲ್? ಇಂದಿನ ಡಿಜಿಟಲ್ ಯುಗದಲ್ಲಿ ಇಂಟರ್ನೆಟ್ ವೇಗವು ಪ್ರಾಣವಾಯುವಿನಷ್ಟೇ ಮುಖ್ಯವಾಗಿದೆ. ಆದರೆ, ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿರುವ ಕೆಲವು 'ಟೆಕ್ ಹ್ಯಾಕ್ಸ್' (Tech Hacks) ಸಾಮಾನ್ಯ ಬಳಕೆದಾರರನ್ನು ಸಂಪೂರ್ಣವಾಗಿ ದಾರಿ ತಪ್ಪಿಸುತ್ತಿವೆ. ನಿಮ್ಮ ವೈಫೈ ರೂಟರ್ ಮೇಲೆ ನಾಣ್ಯಗಳನ್ನು (Coins) ಇಟ್ಟರೆ ಇಂಟರ್ನೆಟ್ ವೇಗ ಹೆಚ್ಚಾಗುತ್ತದೆ ಎಂಬ ಸುದ್ದಿ ಸೋಶಿಯಲ್ ಮೀಡಿಯಾದಲ್ಲಿ ತಳಮಳ ಎಬ್ಬಿಸಿದೆ. ಲಕ್ಷಾಂತರ ಜನರು ಈ ‘ಟೆಕ್ ಹ್ಯಾಕ್’ ಅನ್ನು ನಿಜವೆಂದು ನಂಬಿ ತಮ್ಮ ರೂಟರ್ ಮೇಲೆ ನಾಣ್ಯಗಳ ರಾಶಿ ಹಾಕುತ್ತಿದ್ದಾರೆ. ಆದರೆ, ಟೆಕ್ ತಜ್ಞರು ಈ ಕುರಿತು ಶಾಕಿಂಗ್ ಸತ್ಯವೊಂದನ್ನು ಬಹಿರಂಗಪಡಿಸಿದ್ದಾರೆ. ರೂಟರ್ ಮೇಲೆ ಲೋಹದ ನಾಣ್ಯಗಳನ್ನು ಇಡುವುದರಿಂದ ಇಂಟರ್ನೆಟ್ ಸ್ಪೀಡ್ ಹೆಚ್ಚಾಗುವ ಬದಲು, ಇರುವ ಸಿಗ್ನಲ್ ಕೂಡ ಕಡಿತಗೊಂಡು ಇಂಟರ್ನೆಟ್ ಸಂಪರ್ಕ ಕಡಿತಗೊಳ್ಳಬಹುದು. ಅಷ್ಟೇ ಅಲ್ಲದೆ, ಇದು ರೂಟರ್ ಅತಿಯಾಗಿ ಕಾಯುವಂತೆ (Overheating) ಮಾಡಿ ಅಗ್ನಿ ಅವಘಡಗಳಿಗೂ ಕಾರಣವಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ಮುಖ್ಯವಾಗಿ ವೈಫೈ ರೂಟರ್‌ಗಳ ಮೇಲೆ ನಾಣ್ಯಗಳನ್ನು (Coins) ಇಟ್ಟರೆ ಸಿಗ್ನಲ್ ಹೆಚ್ಚಾಗುತ್ತದೆ ಮತ್ತು ರೂಟರ್‌ನಿಂದ ಬರುವ ಶಾಖವನ್ನು ಅವು ಹೀರಿಕೊಳ್ಳುತ್ತವೆ ಎಂಬ ಪ್ರಚಾರ ಜೋರಾಗಿ ನಡೆಯುತ್ತಿದೆ. ಲಕ್ಷಾಂತರ ಜನರು ಈ ಟ್ರಿಕ್ ನಿಜವೆಂದು ನಂಬಿ ತಮ್ಮ ರೂಟರ್‌ಗಳ ಮೇಲೆ ನಾಣ್ಯಗಳನ್ನು ರಾಶಿ ಹಾಕುತ್ತಿದ್ದಾರೆ. ಆದರೆ, ಈ ಸಣ್ಣ ತಪ್ಪು ನಿಮ್ಮ ಇಂಟರ್ನೆಟ್ ವೇಗವನ್ನು ಕಡಿಮೆ ಮಾಡುವುದು ಮಾತ್ರವಲ್ಲದೆ, ನಿಮ್ಮ ಮನೆಯನ್ನು ಅಪಾಯಕ್ಕೆ ತಳ್ಳುವ ಸಾಧ್ಯತೆಯಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. ವಾಸ್ತವವೇನು.? ನಿಜ ಹೇಳಬೇಕೆಂದರೆ ವೈಫೈ ರೂಟರ್‌ಗಳು ರೇಡಿಯೋ ತರಂಗಗಳ (Radio Waves) ಮೂಲಕ ಕಾರ್ಯನಿರ್ವಹಿಸುತ್ತವೆ. ರೂಟರ್ ಮೇಲೆ ಲೋಹದ ನಾಣ್ಯಗಳನ್ನು ಇಡುವುದರಿಂದ ಆಂಟೆನಾದಿಂದ ಬರುವ ಸಿಗ್ನಲ್‌ಗಳು ಸುಧಾರಿಸುವುದಿಲ್ಲ, ಬದಲಾಗಿ ಇರುವ ಸಿಗ್ನಲ್ ಕೂಡ ವ್ಯತ್ಯಯಕ್ಕೆ (Distortion) ಒಳಗಾಗುತ್ತದೆ. ಲೋಹವು ಸಿಗ್ನಲ್‌ಗಳನ್ನು ತಡೆಯುತ್ತದೆ ಅಥವಾ ದಿಕ್ಕು ತಪ್ಪಿಸುತ್ತದೆ. ಇದರಿಂದ ಇಂಟರ್ನೆಟ್ ವೇಗ ಹೆಚ್ಚಾಗುವ ಬದಲು, ಕನೆಕ್ಷನ್ ಕಡಿತಗೊಳ್ಳುವುದು ಅಥವಾ ರೇಂಜ್ ಕಡಿಮೆಯಾಗುವಂತಹ ಸಮಸ್ಯೆಗಳು ಎದುರಾಗುತ್ತವೆ. ತಾಂತ್ರಿಕವಾಗಿ ಇದು ಯಾವುದೇ ಹೆಚ್ಚುವರಿ ಪ್ರಯೋಜನವನ್ನು ನೀಡುವುದಿಲ್ಲ, ಬದಲಾಗಿ ಕಾರ್ಯಕ್ಷಮತೆಯನ್ನು ಕುಂದಿಸುತ್ತದೆ. ಅಪಾಯದ ಮುನ್ಸೂಚನೆ : ಮತ್ತೊಂದೆಡೆ, ನಾಣ್ಯಗಳು ಶಾಖವನ್ನು ಹೀರಿಕೊಳ್ಳುತ್ತವೆ (Heat absorption) ಎಂದು ಭಾವಿಸುವುದು ಕೂಡ ದೊಡ್ಡ ತಪ್ಪು. ರೂಟರ್‌ನಿಂದ ಬರುವ ಶಾಖವನ್ನು ನಾಣ್ಯಗಳು ಹೊರಹಾಕುವುದಿಲ್ಲ. ಬದಲಾಗಿ ರೂಟರ್‌ನ ಹೊರಭಾಗದ ಶಾಖವು ಒಂದೇ ಕಡೆ ಸಂಗ್ರಹವಾಗುವಂತೆ (Trap heat) ಮಾಡುತ್ತವೆ. ಇದರಿಂದ ಒಳಗಿರುವ ಸರ್ಕ್ಯೂಟ್ ಬೋರ್ಡ್ ಓವರ್ ಹೀಟ್ ಆಗಿ, ಕಾಲಕ್ರಮೇಣ ರೂಟರ್ ಹಾಳಾಗುವ ಸಾಧ್ಯತೆಯಿದೆ. ಅತ್ಯಂತ ಅಪಾಯಕಾರಿ ವಿಷಯವೆಂದರೆ, ಹೀಗೆ ಉಷ್ಣಾಂಶ ಹೆಚ್ಚಾಗುವುದರಿಂದ ಕೆಲವು ಸಂದರ್ಭಗಳಲ್ಲಿ ಅಗ್ನಿ ಅವಘಡಗಳು (Fire hazard) ಸಂಭವಿಸುವ ಸಾಧ್ಯತೆಯೂ ಇದೆ. ಕೇವಲ Viewsಗಾಗಿ ಮಾಡುವ ಇಂತಹ ವಿಡಿಯೋಗಳನ್ನು ನೋಡಿ ಕುರುಡಾಗಿ ಅನುಸರಿಸುವುದರಿಂದ ದುಬಾರಿ ಎಲೆಕ್ಟ್ರಾನಿಕ್ ವಸ್ತುಗಳು ಹಾನಿಗೊಳಗಾಗುತ್ತಿವೆ. ತಾಂತ್ರಿಕ ವಿಷಯಗಳ ಬಗ್ಗೆ ಸರಿಯಾದ ತಿಳುವಳಿಕೆ ಇರುವುದು ಬಹಳ ಮುಖ್ಯ. ಏನಾದರೂ ತಾಂತ್ರಿಕ ಸಮಸ್ಯೆ ಇದ್ದರೆ ರೂಟರ್ ಸ್ಥಾನವನ್ನು ಬದಲಾಯಿಸುವುದು ಅಥವಾ ರೀಸೆಟ್ ಮಾಡುವಂತಹ ಅಧಿಕೃತ ವಿಧಾನಗಳನ್ನು ಅನುಸರಿಸುವುದು ಉತ್ತಮ. ನಿಮ್ಮ ವೈಫೈ ಸಿಗ್ನಲ್ ಹೆಚ್ಚಿಸಿಕೊಳ್ಳಲು ರೂಟರ್ ಅನ್ನು ಮನೆಯ ಮಧ್ಯಭಾಗದಲ್ಲಿ, ಎತ್ತರದ ಪ್ರದೇಶದಲ್ಲಿ ಇಡುವುದು ಒಳ್ಳೆಯದು. ಆದರೆ ಇಂತಹ ನಾಣ್ಯಗಳ ಪ್ರಯೋಗಗಳನ್ನು ಮಾತ್ರ ಅಪ್ಪಿತಪ್ಪಿಯೂ ಕೂಡ ಮಾಡಬೇಡಿ. #ALERT #TECHGADGETS #HACKS #RADIOWAVES #FIREHAZARD

Instagram ಖಾತೆ ಡಿಲೀಟ್ ಮಾಡ್ತಿದೆ ಮೆಟಾ: ಅಕೌಂಟ್ ಸೇಫ್ ಆಗಿರಲು ಕೂಡಲೇ ಹೀಗೆ ಮಾಡಿ, ಹಂತ ಹಂತದ ಮಾಹಿತಿ ಇಲ್ಲಿದೆ! ಇಂದು ಕೋಟ್ಯಾಂತರ ಮಂದಿ ಇನ್ಸ್ಟಾಗ್ರಾಮ್ ಖಾತೆಯನ್ನು ತೆರೆದಿದ್ದಾರೆ. ಅವರ ಪೈಕಿ ಕೆಲವರದ್ದು ಫೇಕ್ ಆಗಿದ್ದರೆ, ಮತ್ತೆ ಕೆಲವರು ಅಕೌಂಟ್ ಓಪನ್ ಮಾಡಿಕೊಂಡಿದ್ದರೂ ಅದು ಸಕ್ರಿಯವಾಗಿಲ್ಲ. ಮತ್ತೆ ಕೆಲವರು ಫೇಕ್ ನ್ಯೂಸ್ ಹರಡುವುದಕ್ಕಾಗಿ ನಕಲಿ ಅಕೌಂಟ್ ಮಾಡಿಕೊಂಡಿದ್ದಾರೆ. ಮತ್ತೆ ಕೆಲವರು ಪ್ರಮೋಷನ್ ಗಾಗಿ ಇದನ್ನು ಬಳಸಿಕೊಳ್ಳುತ್ತಿದ್ದಾರೆ. ಈ ಎಲ್ಲಾ ಹಿನ್ನೆಲೆಗಳಲ್ಲಿ ಇನ್ಸ್ಟಾಗ್ರಾಮ್ ಮಾಲೀಕ ಮೆಟಾ ಕೆಲವು ದಿನಗಳಿಂದ ಲಕ್ಷಾಂತರ ಇನ್ಸ್ಟಾಗ್ರಾಮ್ ಖಾತೆಗಳನ್ನು ಡಿಲೀಟ್ ಮಾಡಿದ್ದು, ಈ ಕಾರ್ಯ ಮುಂದುವರೆದಿದೆ. ಕ್ಲೀನಪ್ ಡ್ರೈವ್‌ನಲ್ಲಿ ಇನ್‌ಸ್ಟಾಗ್ರಾಮ್ ಲಕ್ಷಾಂತರ ಬಾಟ್ ಮತ್ತು ನಿಷ್ಕ್ರಿಯ ಖಾತೆಗಳನ್ನು ತೆಗೆದುಹಾಕಿದ್ದು, ಇನ್ನೂ ಅದು ಮುಂದುವರೆದಿದೆ. ಆದರೆ, ಶಾಕಿಂಗ್ ವಿಷ್ಯ ಏನೆಂದರೆ, ಈ ಡ್ರೈವ್ ನಲ್ಲಿ ಹಲವರು ತಮ್ಮ ಚಾಲ್ತಿಯಲ್ಲಿ ಇರುವ ಅಕೌಂಟ್ ಗಳನ್ನು ಕಳೆದುಕೊಂಡಿದ್ದಾರೆ. ಮಾತ್ರವಲ್ಲದೇ, ಸಾಮಾಜಿಕ ಮಾಧ್ಯಮದಾದ್ಯಂತ ಸೆಲೆಬ್ರಿಟಿಗಳು, ಪ್ರಭಾವಿಗಳು ಮತ್ತು ಬ್ರ್ಯಾಂಡ್‌ಗಳ ಅನುಯಾಯಿಗಳ ಸಂಖ್ಯೆಯಲ್ಲಿ ಕೂಡ ತೀವ್ರ ಕುಸಿತಕ್ಕೆ ಕಾರಣವಾಯಿತು. 14 ಮಿಲಿಯನ್ ಫಾಲೋವರ್ಸ್ ಗೋವಿಂದ! ಪಾಪ್‌ಬೇಸ್ ಪ್ರಸಾರ ಮಾಡಿದ ವರದಿಗಳ ಪ್ರಕಾರ, ಮೆಟಾದ ಈ ಕಾರ್ಯದಿಂದಾಗಿ ಹಲವಾರು ಉನ್ನತ ವ್ಯಕ್ತಿಗಳು ತಮ್ಮ ಅನುಯಾಯಿಗಳ ಸಂಖ್ಯೆಯಲ್ಲಿ ಹಠಾತ್ ಕುಸಿತವನ್ನು ಕಂಡಿದ್ದಾರೆ. 14 ಮಿಲಿಯನ್‌ಗಿಂತಲೂ ಹೆಚ್ಚು ಫಾಲೋವರ್ಸ್ಗಳನ್ನು ಜನರು ಕಳೆದುಕೊಂಡಿದ್ದಾರೆ. ಮೆಟಾ, ನಕಲಿ, ಸ್ವಯಂಚಾಲಿತ ಮತ್ತು ನಿಷ್ಕ್ರಿಯ ಪ್ರೊಫೈಲ್‌ಗಳನ್ನು ತೆಗೆದುಹಾಕಿದ್ದರಿಂದ ಹಲವಾರು ಕಂಟೆಂಟ್ ಕ್ರಿಯೇಟರ್ಸ್, ಪ್ರಭಾವಿಗಳು ಮತ್ತು ಸಾರ್ವಜನಿಕ ವ್ಯಕ್ತಿಗಳ ಮೇಲೂ ಭಾರಿ ಪರಿಣಾಮ ಬೀರಿದೆ. ಹಾಗಿದ್ದರೆ ನಿಮ್ಮ ಅಕೌಂಟ್ ಸೇಫ್ ಆಗಿರಲು ನೀವು ಏನು ಮಾಡಬೇಕು ಎನ್ನುವ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ: ನಿಮ್ಮ ಅಕೌಂಟ್ ನಕಲಿಯದ್ದಲ್ಲ, ನೀವು ಯಾವುದೇ ಸುಳ್ಳು ಸುದ್ದಿ ಹರಡುತ್ತಿಲ್ಲ, ಬೇರೆಯವರ ತೇಜೋವಧೆ ಮಾಡಲು ಅದನ್ನು ಬಳಸುತ್ತಿಲ್ಲ ಎನ್ನುವ ಹಾಗಿದ್ದರೆ, ನಿಮ್ಮ ಅಕೌಂಟ್ ಅನ್ನು ನೀವು ಸೇಫ್ ಆಗಿ ಇಟ್ಟುಕೊಳ್ಳಬಹುದು. ಅದಕ್ಕೆ ಏನು ಮಾಡಬೇಕು ಎನ್ನುವ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ. ನೀವೇನು ಮಾಡಬೇಕು? ನೀವು ರೋಬೋಟ್ ಅಥವಾ ನಕಲಿ ಅಲ್ಲ ಎನ್ನುವುದನ್ನು ತಿಳಿಸುವುದಕ್ಕಾಗಿ ಮೊದಲಿಗೆ ಫೇಸ್ ಐಡೆಂಟಿಟಿ ನೀಡಬೇಕಾಗುತ್ತದೆ. ಇದನ್ನು ಸಾಮಾನ್ಯವಾಗಿ ಇನ್‌ಸ್ಟಾಗ್ರಾಮ್‌ನಲ್ಲಿ ವೆರಿಫಿಕೇಶನ್ ಸೆಲ್ಫಿ ಎಂದು ಕರೆಯಲಾಗುತ್ತದೆ, ಇದು ಒಂದು ಭದ್ರತಾ ವೈಶಿಷ್ಟ್ಯವಾಗಿದ್ದು, ನಿಮ್ಮ ಗುರುತನ್ನು ದೃಢೀಕರಿಸಲು ನಿಮ್ಮ ಮುಖದ ಕಿರು ವೀಡಿಯೊವನ್ನು ಅಪ್‌ಲೋಡ್ ಮಾಡಬೇಕಾಗುತ್ತದೆ. ನೀವು ನಿಜವಾದ ವ್ಯಕ್ತಿ ಮತ್ತು ಖಾತೆಯ ನಿಜವಾದ ಮಾಲೀಕರು ಎಂದು ಇದು Instagram ಗೆ ಸಾಬೀತುಪಡಿಸುತ್ತದೆ. ಈ ವೈಶಿಷ್ಟ್ಯವು ನಿಮ್ಮ ಖಾತೆಗೆ ಬಲವಾದ ರಕ್ಷಣಾ ಕಾರ್ಯವಿಧಾನವಾಗಿ ಕಾರ್ಯನಿರ್ವಹಿಸುತ್ತದೆ. ಸ್ಟೆಪ್ ಬೈ ಸ್ಟೆಪ್ ಮಾಹಿತಿ! 1.ಅದಕ್ಕೆ ನೀವು ಪ್ರೊಫೈಲ್ ಗೆ (Profile) ಹೋಗಿ. 2.ಸೆಟ್ಟಿಂಗ್‌ಗಳು ಮತ್ತು ಗೌಪ್ಯತೆ (Settings and privacy) ಮೇಲೆ ಕ್ಲಿಕ್ ಮಾಡಿ. 3.ಖಾತೆಗಳ ಕೇಂದ್ರ (Accounts Center) ಮೇಲೆ ಕ್ಲಿಕ್ ಮಾಡಿ. 4.ಪಾಸ್‌ವರ್ಡ್ ಮತ್ತು ಭದ್ರತೆ (Password and security)ಮೇಲೆ ಕ್ಲಿಕ್ ಮಾಡಿ. 5.ಪರಿಶೀಲನೆ ಸೆಲ್ಫಿಗೆ (Verification Selfie) ಹೋಗಿ. ಅಲ್ಲಿ ನಿಮ್ಮ ಮುಖವನ್ನು ರೆಕಾರ್ಡ್ ಮಾಡಲು ಪ್ರಾಂಪ್ಟ್‌ಗಳನ್ನು ಅನುಸರಿಸಿ. ನಿಮ್ಮ ತಲೆಯನ್ನು ವಿವಿಧ ದಿಕ್ಕುಗಳಲ್ಲಿ ತಿರುಗಿಸುವ ವೀಡಿಯೊ ಸೆಲ್ಫಿಯನ್ನು ರೆಕಾರ್ಡ್ ಮಾಡಲು ನಿಮ್ಮನ್ನು ಕೇಳಲಾಗುತ್ತದೆ. ನೀವು ಹಾಗೆಯೇ ಮಾಡಬೇಕಾಗುತ್ತದೆ. ಈ ಸಂದರ್ಭದಲ್ಲಿ ಉತ್ತಮ ಬೆಳಕು ಖಚಿತಪಡಿಸಿಕೊಳ್ಳಿ. ನಿಮ್ಮ ಮುಖವು ಚೆನ್ನಾಗಿ ಮತ್ತು ಸ್ಪಷ್ಟವಾಗಿ ಗೋಚರಿಸುತ್ತಿದೆ ಎಂದು ಖಚಿತಪಡಿಸಿಕೊಳ್ಳಿ. ಟೋಪಿಗಳು, ಮಾಸ್ಕ್ ಅಥವಾ ನಿಮ್ಮ ಮುಖದ ವೈಶಿಷ್ಟ್ಯಗಳನ್ನು ಅಸ್ಪಷ್ಟಗೊಳಿಸುವ ಯಾವುದನ್ನೆ ಧರಿಸಿದ್ದರೂ ಕೂಡಲೇ ತೆಗೆಯಿರಿ. #NEWUPDATE #TECHNOLOGY #META #INSTAGRAM #ACCOUNTSAFE

ಮೆದುಳಿನ 'ಸೂಪರ್ ಪವರ್'ಗೆ ಸಂಗೀತವೇ ಪ್ರೇರಣೆ : ಸಂಶೋಧನೆಯಲ್ಲಿ ಅಚ್ಚರಿಯ ಸತ್ಯ ಬಯಲು! ನೀವು ಕೆಲಸದ ಒತ್ತಡದಲ್ಲಿದ್ದೀರಾ? ಅಥವಾ ಓದಿದ್ದು ನೆನಪಿರುತ್ತಿಲ್ಲವೇ? ಹಾಗಾದರೆ ನಿಮಗೊಂದು ಸಿಹಿ ಸುದ್ದಿ! ಸಂಗೀತ ಕೇಳುವುದು ಕೇವಲ ಹವ್ಯಾಸವಲ್ಲ, ಅದು ಮೆದುಳನ್ನು ಚುರುಕುಗೊಳಿಸುವ ಅಪ್ರತಿಮ 'ಟಾನಿಕ್' ಎಂಬ ಅಚ್ಚರಿಯ ವಿಷಯ ಇತ್ತೀಚಿನ ವೈಜ್ಞಾನಿಕ ಸಂಶೋಧನೆಯಿಂದ ಹೊರಬಿದ್ದಿದೆ. ಮೆದುಳಿನ 'ಸೂಪರ್ ಪವರ್'ಗೆ ಸಂಗೀತವೇ ಪ್ರೇರಣೆ! ಸಂಶೋಧನೆಯ ವರದಿಗಳ ಪ್ರಕಾರ, ಪ್ರತಿನಿತ್ಯ ಸಂಗೀತ ಕೇಳುವ ಅಭ್ಯಾಸವು ಮೆದುಳಿನ ಜ್ಞಾಪಕ ಶಕ್ತಿಯನ್ನು ಗಣನೀಯವಾಗಿ ಹೆಚ್ಚಿಸುತ್ತದೆ. ಏಕಾಗ್ರತೆ (Focus) ಕಳೆದುಕೊಳ್ಳುವವರಿಗೆ ಸಂಗೀತವು ರಾಮಬಾಣವಾಗಿದ್ದು, ಓದುವಾಗ ಅಥವಾ ಕಚೇರಿ ಕೆಲಸದ ನಡುವೆ ಮೃದುವಾದ ಇಂಪಾದ ಗೀತೆಗಳನ್ನು ಆಲಿಸುವುದರಿಂದ ಮೆದುಳು 'ಸೂಪರ್ ಫಾಸ್ಟ್' ಆಗಿ ಕೆಲಸ ಮಾಡಲು ಆರಂಭಿಸುತ್ತದೆ ಎಂದು ವಿಜ್ಞಾನಿಗಳು ದೃಢಪಡಿಸಿದ್ದಾರೆ. ಸಂಗೀತದಿಂದ ಆರೋಗ್ಯಕ್ಕಾಗುವ ಪಂಚ ಲಾಭಗಳು: ಒತ್ತಡಕ್ಕೆ ಇತಿಶ್ರೀ: ನಾವು ಇಷ್ಟಪಡುವ ಹಾಡುಗಳನ್ನು ಕೇಳಿದಾಗ ಮೆದುಳಿನಲ್ಲಿ 'ಡೋಪಮೈನ್' ಎಂಬ ಹಾರ್ಮೋನ್ ಬಿಡುಗಡೆಯಾಗುತ್ತದೆ. ಇದು ದೇಹದಲ್ಲಿ ಆತಂಕ ಮೂಡಿಸುವ 'ಕಾರ್ಟಿಸೋಲ್' ಮಟ್ಟವನ್ನು ತಗ್ಗಿಸಿ, ಕ್ಷಣಾರ್ಧದಲ್ಲಿ ಮನಸ್ಸನ್ನು ಹಗುರಗೊಳಿಸುತ್ತದೆ. ಹೃದಯಕ್ಕೂ ಹಿತ: ಶಾಂತ ಸಂಗೀತವು ರಕ್ತದೊತ್ತಡವನ್ನು (BP) ನಿಯಂತ್ರಣದಲ್ಲಿಡಲು ನೆರವಾಗುತ್ತದೆ. ಇದರಿಂದ ಹೃದಯದ ಬಡಿತ ಸ್ಥಿರಗೊಂಡು, ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಕಡಿಮೆಯಾಗುತ್ತದೆ. ನಿದ್ರಾಹೀನತೆಗೆ ಗುಡ್ ಬೈ: ಸರಿಯಾಗಿ ನಿದ್ರೆ ಬಾರದವರು ಮಲಗುವ ಮುನ್ನ ಮೆಲೋಡಿ ಹಾಡುಗಳನ್ನು ಕೇಳಿದರೆ, ದೇಹದ ಸ್ನಾಯುಗಳು ಸಡಿಲಗೊಂಡು ಗಾಢವಾದ ಹಾಗೂ ಗುಣಮಟ್ಟದ ನಿದ್ರೆ ನಿಮ್ಮದಾಗುತ್ತದೆ. ಕ್ಷಣದಲ್ಲಿ ಬದಲಾಗುತ್ತೆ ಮೂಡ್: ಎಷ್ಟೇ ಬೇಸರ ಅಥವಾ ಹತಾಶೆ ಇದ್ದರೂ, ನೆಚ್ಚಿನ ಗೀತೆಗಳು ನಕಾರಾತ್ಮಕ ಆಲೋಚನೆಗಳನ್ನು ಓಡಿಸಿ ಸಕಾರಾತ್ಮಕ ಶಕ್ತಿಯನ್ನು ತುಂಬುತ್ತವೆ. ತಜ್ಞರು ಏನಂತಾರೆ..? ಮಾನಸಿಕ ಆರೋಗ್ಯ ತಜ್ಞರ ಪ್ರಕಾರ, "ದಿನಕ್ಕೆ ಕನಿಷ್ಠ 15 ರಿಂದ 20 ನಿಮಿಷಗಳ ಕಾಲ ಮೊಬೈಲ್ ಅಥವಾ ಇತರೆ ಗೊಂದಲಗಳಿಂದ ದೂರವಿದ್ದು ಸಂಗೀತಕ್ಕೆ ಕಿವಿಕೊಟ್ಟರೆ, ದೈಹಿಕ ಮತ್ತು ಮಾನಸಿಕ ಸದೃಢತೆ ಸಾಧ್ಯ." #LATEST #WORLD #LIFESTYLE #MENTALHEALTH #MUSICTHERAPY