✳️ Good morning ✳️ "ഏലീയാവിൻ്റെ യാഗപീഠം" ഇസ്രായേൽ ജനം ഭയപ്പെട്ടു ആഹാബ് രാജാവിൻ്റെ ബാൽ വിഗ്രഹത്തെ വണങ്ങി വന്നു.ഏലീയാവു അവരോടു ചോദിച്ചു. "നിങ്ങൾ എത്രത്തോളം രണ്ടു തോണിയിൽ കാൽവയ്ക്കും? കർത്താവായ ദൈവം എങ്കിൽ അവനെ അനുഗമിപ്പിൻ; ബാൽ എങ്കിലോ അവനെ അനുഗമിപ്പിൻ എന്നു പറഞ്ഞു; എന്നാൽ ജനം അവനോടു ഉത്തരം ഒന്നും പറഞ്ഞില്ല. 1രാജാക്കന്മാർ 18:21 ഏലീയാവു പ്രവാചകൻ യാഗപീഠം പണിതു. ആ യാഗപീഠത്തിനു മുൻപിൽ നിന്നും പ്രവാചകൻ ഇങ്ങനെ പ്രാർത്ഥിച്ചു. " അബ്രാഹാമിന്റെയും യിസ്ഹാക്കിന്റെയും യിസ്രായേലിന്റെയും ദൈവമായ യഹോവേ, യിസ്രയേലിൽ നീ ദൈവമെന്നും ഞാൻ നിന്റെ ദാസൻ എന്നും ഈ കാര്യങ്ങളൊക്കെയും ഞാൻ നിന്റെ കല്പനപ്രകാരം ചെയ്തു എന്നും ഇന്നു വെളിപ്പെട്ടുവരട്ടെ. യഹോവേ, എനിക്കു ഉത്തരമരുളേണമേ; നീ ദൈവം തന്നേ യഹോവേ; നീ തങ്ങളുടെ ഹൃദയം വീണ്ടും തിരിച്ചു എന്നു ഈ ജനം അറിയേണ്ടതിന്നു എനിക്കു ഉത്തരമരുളേണമേ എന്നു പറഞ്ഞു.ഉടനെ യഹോവയുടെ തീ ഇറങ്ങി ഹോമയാഗവും വിറകും മണ്ണും ദഹിപ്പിച്ചു തോട്ടിലെ വെള്ളവും വറ്റിച്ചുകളഞ്ഞു. 1രാജാ 18:36,37,38 എന്തുകൊണ്ടാണു ഏലീയാവിൻ്റെ യാഗപീഠത്തിൽ തീ ഇറങ്ങിയതു? 1) ഏലീയാവു കഷ്ടതയിൽ ദൈവത്തോടു ച്ചേർന്നു നിന്നു യാഗപീഠം പണിതു. ജീവിതത്തിൽ വളരെയധികം കഷ്ടപ്പാടുകളും പ്രയാസങ്ങളും ഉണ്ടായി എന്നു വരാം. എന്നാൽ കർത്താവിന്റെ കാൽവരിയാഗപീഠത്തോടു ച്ചേർന്നു നിന്നാൽ ഉയരങ്ങളിൽ നിന്നും ശക്തി ഇറങ്ങും.ബാലിൻ്റെ പ്രവാചകന്മാർ 150 പേർ ഉണ്ടായിരുന്നു. ഏലീയാവിൻ്റെ ഭാഗത്തു എലീയാവു മാത്രമേ പ്രവാചകനായി ഉണ്ടായിരുന്നുള്ളു. ബാലിനെ ഭയം കൊണ്ടു സേവിക്കുന്ന അനവധി യിസ്രായേൽ മക്കൾ. തികച്ചും കഷ്ടതയുടെ സമയം. ആ സമയം ഏലീയാവു ദൈവത്തോടു ചേർന്നു നിന്നു യാഗപീഠം പണിതു. ആ യാഗപീഠത്തിൽ ദൈവം സ്വർഗ്ഗത്തിൽ നിന്നും തീ ഇറക്കി. 2) ഹ്യദയം നുറുങ്ങി ഏലീയാവു പ്രാർത്ഥിച്ചു. നമ്മുടെ പ്രാർത്ഥനകൾ ഹ്യദയം നുറുങ്ങിയതാണോ? പലപ്പോഴും നമ്മുടെ പ്രാർത്ഥനകൾ ഭൗതീകമായ കാര്യങ്ങൾക്കു മാത്രമായി തീരാറില്ലേ? ഭൗതീകമായ കാര്യങ്ങൾക്കു മാത്രം പ്രാർത്ഥിച്ചാൽ സാത്താൻ്റെ ശക്തികളെ തോല്പിക്കുവാൻ കഴികയില്ല. ഹ്യദയം നുറുങ്ങുന്നവർക്കാണു യഹോവ സമീപസ്ഥൻ. ഏലീയാവു ഹ്യദയം നുറുങ്ങി പ്രാർത്ഥിച്ചു. സ്വർഗ്ഗത്തിൽ നിന്നും തീ ഇറങ്ങി യാഗം സ്വീകരിക്കുകയും ചെയ്തു. 3) ഏലീയാവു വിശുദ്ധിയോടെ യാഗപീഠം പണിതു. നമ്മുടെ ശരീരം ദൈവം വസിക്കുന്ന ആലയമാണു. ആ മന്ദിരം വിശുദ്ധിയോടെ കാത്തു പരിപാലിച്ചു വേണം യാഗപീഠത്തിനരികെ വരേണ്ടതു. നമ്മുടെ സകല ബന്ധങ്ങളിലും ഈ വിശുദ്ധി കാത്തു സൂക്ഷിക്കണം. അപ്പനേയും അമ്മയേയും സ്നേഹിക്കാതെ വിശുദ്ധി കാത്തുസൂക്ഷിക്കാൻ സാദ്ധ്യമല്ല. സഹോദരീസഹോദരന്മാരെ സ്നേഹിക്കാതെ വിശുദ്ധി പരിപാലിക്കാൻ സാദ്ധ്യമല്ല. "ആകയാൽ നിന്റെ വഴിപാടു യാഗപീഠത്തിങ്കൽ കൊണ്ടുവരുമ്പോൾ സഹോദരന്നു നിന്റെ നേരെ വല്ലതും ഉണ്ടെന്നു അവിടെവെച്ചു ഓർമ്മവന്നാൽ നിന്റെ വഴിപാടു അവിടെ യാഗപീഠത്തിന്റെ മുമ്പിൽ വെച്ചേച്ചു, ഒന്നാമതു ചെന്നു സഹോദരനോടു നിരന്നുകൊൾക; പിന്നെ വന്നു നിന്റെ വഴിപാടു കഴിക്ക. മത്തായി 5:23,24 അൻപതു ദിവസം നോമ്പ് നോറ്റു അൻപത്തിയൊന്നാം ദിവസം മദ്യം വിളമ്പി ലോകസുഖങ്ങളിൽ മുഴുകി ജീവിച്ചാൽ വിശുദ്ധി കാത്തു സൂക്ഷിക്കാൻ കഴികയില്ല. മദ്യപാനി സ്വർഗ്ഗത്തിലേക്കു കടക്കയില്ല. ആരാധനകളും, പ്രാർത്ഥനകളും വിശുദ്ധിയോടെ അല്ലെങ്കിൽ ദൈവം പ്രസാദിക്കയില്ല. യഹോവ പറയുന്നു. "നിങ്ങൾ കൈമലർത്തുമ്പോൾ ഞാൻ എന്റെ കണ്ണു മറെച്ചുകളയും; നിങ്ങൾ എത്ര തന്നേ പ്രാർത്ഥനകഴിച്ചാലും ഞാൻ കേൾക്കയില്ല; നിങ്ങളുടെ കൈ രക്തംകൊണ്ടു നിറഞ്ഞിരിക്കുന്നു.നിങ്ങളെ കഴുകി വെടിപ്പാക്കുവിൻ; നിങ്ങളുടെ പ്രവൃത്തികളുടെ ദോഷത്തെ എന്റെ കണ്ണിന്മുമ്പിൽനിന്നു നീക്കിക്കളവിൻ; തിന്മ ചെയ്യുന്നതു മതിയാക്കുവിൻ. യെശയ്യാവു 1:15,16 ഏലീയാവു വിശുദ്ധിയോടെ യാഗപീഠം പണിതു. സ്വർഗ്ഗത്തിൽ നിന്നും തീ ഇറങ്ങി യാഗം ദഹിപ്പിച്ചു. 4) ഏലീയാവിൻ്റെ യാഗപീഠം രക്ഷയുടെ യാഗപീഠം. ഏലീയാവിൻ്റെ യാഗപീഠത്തിൽ സ്വർഗ്ഗത്തിൽ നിന്നും അഗ്നി ഇറങ്ങിയില്ല എങ്കിൽ ബാലിനെ സേവിച്ചുവന്ന യിസ്രായേലിനും മറ്റുജനത്തിനും ഒരു രക്ഷയുടെ അനുഭവം ഉണ്ടാകയില്ലായിരുന്നു. സ്വർഗ്ഗത്തിൽ നിന്നും തീ ഇറങ്ങിയപ്പോൾ ജനം ദൈവശക്തി തിരിച്ചറിഞ്ഞു. " ജനം എല്ലാം അതു കണ്ടു കവിണ്ണുവീണു: യഹോവ തന്നേ ദൈവം, യഹോവ തന്നേ ദൈവം എന്നു പറഞ്ഞു" 1രാജാ 18:39 പുതിയനിയമത്തിൽ സകല ജനങ്ങൾക്കും രക്ഷനേടാനായി ഒരു യാഗപീഠം ഉണ്ടു. ആ യാഗപീഠത്തിന്മേൽ അറുക്കപ്പെട്ട കുഞ്ഞാടായ യേശു കിടക്കുന്നു. ജീവിതത്തിലെ സകല പ്രതിസന്ധികളിലും ആ യാഗപീഠത്തോടു ചേർന്നിരിക്കാം. നുറുങ്ങിയ ഹ്യദയത്തോടെ കാൽവരി യാഗപീഠത്തിലേക്കു വരാം. വിശുദ്ധിയോടെ ദൈവമന്ദിരമാകുന്ന ഈ ശരീരത്തെ യാഗവസ്തുവായി സമർപ്പിച്ചു നിത്യമായ രക്ഷയെ സ്വന്തമാക്കാം. Have a blessed and joyful day #🙏 കർത്താവിൻറെ കരം #🏰 ക്രിസ്ത്യൻ സ്റ്റാറ്റസ് #✝ ബൈബിൾ വചനം #✝️ ക്രിസ്തീയ പ്രാർത്ഥനകൾ #🙏 പരിശുദ്ധ കന്യാമറിയം

Good morning "ദൈവത്തിന്റെ അനാദികാലനിർണ്ണയം" യഹോവ, നമ്മുടെ കിടപ്പും നടപ്പും ശോധന ചെയ്യുന്നു; നമ്മുടെ വഴികളൊക്കെയും ദൈവം മനസ്സിലാക്കുന്നു. നാം ജനിക്കുന്നതിനു മുൻപേ നാം ആരാകണമെന്നു ദൈവം നിശ്ചയിക്കുന്നു.ദൈവത്തിനു നമ്മെ കുറിച്ചു ഒരു നിർണ്ണയമുണ്ടു. "എന്നാൽ ദൈവത്തെ സ്നേഹിക്കുന്നവർക്കു, നിർണ്ണയപ്രകാരം വിളിക്കപ്പെട്ടവർക്കു തന്നേ, സകലവും നന്മെക്കായി കൂടി വ്യാപരിക്കുന്നു എന്നു നാം അറിയുന്നു.അവൻ മുന്നറിഞ്ഞവരെ തന്റെ പുത്രൻ അനേകം സഹോദരന്മാരിൽ ആദ്യജാതൻ ആകേണ്ടതിന്നു അവന്റെ സ്വരൂപത്തോടു അനുരൂപരാകുവാൻ മുന്നിയമിച്ചുമിരിക്കുന്നു. മുന്നിയമിച്ചവരെ വിളിച്ചും വിളിച്ചവരെ നീതീകരിച്ചും നീതീകരിച്ചവരെ തേജസ്കരിച്ചുമിരിക്കുന്നു. റോമർ 8:28-30 പ്രതിസന്ധികൾ വരുമ്പോൾ ദൈവത്തിൻ്റെ നിർണ്ണയങ്ങളിൽ നിന്നും നാം ഓടി ഒളിക്കരുതു. ദൈവത്തിന്റെ പദ്ധതിക്കായി ദൈവം നമ്മെ കഷ്ടതകളിലൂടെ കടത്തിവിടാം. ദൈവം നീതികരിക്കയും തേജസ്കരിക്കയും ചെയ്യും. നാം ഇന്നലെ മുളച്ചു ഇന്നു വാടുന്ന ഇളം തളിരല്ല. ദൈവം തടമെടുത്തു നട്ടു വെള്ളമൊഴിച്ചു വളർത്തിയതാണു. ഏതെല്ലാം വഴികളിൽ കൂടി കടന്നാലാണു ദൈവം നിർണ്ണയിച്ച പ്രകാരം ആകുന്നതെന്നു ദൈവത്തിനറിയാം. ശോധനകളുടെ പുറകെ ചലിക്കുന്ന അതിശക്തമായ ദൈവകരമുണ്ടു. യിസഹാക് അന്ധനായിരുന്നില്ലെങ്കിൽ ദൈവം യാക്കോബിനു കൊടുത്ത വാഗ്ദത്തം നിറവേറുകയില്ലായിരുന്നു. എസ്ഥേർ അനാഥയായിരുന്നില്ലെങ്കിൽ മൊർദ്ദേഖായിയുടെ വളർത്തുമകളോ,അഹശ്വേരോശ് രാജാവിന്റെ രാജ്ഞിയോ, ആകുമായിരുന്നില്ല. ഹാമാൻ തൂക്കിയ കഴുമരത്തിൽ അവനെ തന്നെ തൂക്കിലേറ്റി ഒരു വലിയ ജനതയെ രക്ഷിപ്പാൻ കഴിയുമായിരുന്നില്ല.ഭർത്താവായ എലീമേലെക് മരിച്ചതിനാൽ വൈധവ്യത്വവും, മക്കളായ മഹ്ളോനും, കില്യോനും മരിച്ചപ്പോൾ അനാഥത്വവും നവോമി അനുഭവിച്ചില്ലായിരുന്നുവെങ്കിൽ രൂത്തിൻ്റെ വംശപരമ്പരയിൽ രക്ഷകൻ പിറക്കുകയില്ലായിയുന്നു. യേശുവിന്റെ ക്രൂശുമരണം ഇല്ലായിരുന്നു എങ്കിൽ മാനവജാതി രക്ഷപ്പെടുമായിരുന്നില്ല. ദൈവത്തിനു നമ്മെ കുറിച്ചു അനാദികാലനിർണ്ണയം ഉണ്ടെങ്കിലും പ്രതിസന്ധികളിലൂടെ നാം കടക്കേണ്ടി വരാം. ആ സമയം നാം വാടിപോകരുതു. പല ഭക്തന്മാരും, അഭിഷേകം ഉള്ളവരും ഇങ്ങനെ വാടിപോയവരാണു. മോശയും, യിരെമ്യാവും, ഏലീയാവും, ദാവീദുമൊക്കെ അവരിൽ ചിലർ മാത്രം. എന്നാൽ ദൈവം നിർണ്ണയപ്രകാരം വിളിച്ചവരിൽ ദൈവീക പദ്ധതി പൂർത്തീകരിക്കപ്പെടുക തന്നെ ചെയ്യും. ദാവീദു ഈ ദൈവകരുതൽ അനുഭവിച്ചപ്പോൾ പറഞ്ഞു. "നിൻ്റെവഴി യഹോവയെ ഭരമേല്പിക്ക; അവനിൽ തന്നേ ആശ്രയിക്ക; അവൻ അതു നിർവ്വഹിക്കും. 37-ാം സങ്കീ 5-ാം വാക്യം അനുഭവത്തിലൂടെ പൗലൊസ് ശ്ളീഹായും പറഞ്ഞു. " ഇതു സംബന്ധിച്ചു നാം എന്തു പറയേണ്ടു? ദൈവം നമുക്കു അനുകൂലം എങ്കിൽ നമുക്കു പ്രതികൂലം ആർ? റോമർ 8:31 അനേകായിരങ്ങൾ ലോകത്തിൽ നിന്നും മടക്കയാത്ര നടത്തിയപ്പോൾ നമ്മെ ഈ ഭൂമിയിൽ ശേഷിപ്പിച്ചിരിക്കുന്നതു നമ്മുടെ ശക്തികൊണ്ടല്ല. ദൈവത്തിനു നമ്മെ കുറിച്ചുള്ള അനാദിനിർണ്ണയമാണു. ദൈവത്തിന്റെ കരങ്ങളിൽ ഒരു കലണ്ടർ ഉണ്ടു. അതിൽ ഒരു തക്കസമയം ദൈവം എല്ലാവർക്കും കരുതിയിട്ടുണ്ടു. ദൈവത്തിന്റെ വാഗ്ദത്തം നടപ്പിലാകും. ദൈവം നമ്മെ നീതീകരിക്കയും തേജസ്കരിക്കയും ചെയ്യും. ഈ ഭൂമിയിലെ പ്രതിസന്ധികളും, ഒറ്റപ്പെടലുകളും, വേദനകളും ഈ തേജസ്കരണത്തിനുവേണ്ടി ദൈവം ഒരുക്കുന്ന പദ്ധതികൾ മാത്രം. അതിനാൽ പ്രത്യാശയോടെ പറയാം "എന്നാൽ ദൈവത്തെ സ്നേഹിക്കുന്നവർക്കു, നിർണ്ണയപ്രകാരം വിളിക്കപ്പെട്ടവർക്കു തന്നേ, സകലവും നന്മെക്കായി കൂടി വ്യാപരിക്കുന്നു എന്നു നാം അറിയുന്നു" റോമർ 8:28 Have a blessed and joyful day #🏰 ക്രിസ്ത്യൻ സ്റ്റാറ്റസ് #🙏 കർത്താവിൻറെ കരം #✝️ ക്രിസ്തീയ പ്രാർത്ഥനകൾ #🙏 പരിശുദ്ധ കന്യാമറിയം #✝ ബൈബിൾ വചനം