@kl71
@kl71

нαяιz вιи αℓι.. иα🕵🕵

ഇന്നത്തെ അസ്തമയത്തിൽ എനിക്ക് നിരാശയില്ല ...നാളെത്തെ പുലരിയിലാണെൻ പ്രതീക്ഷ ... CHE✊✊

#

📔 കഥ

"അമ്മേ ഞാൻ ഇനി കോളേജിലേക്ക് പോകുന്നില്ലമ്മേ " രാത്രി അമ്മയുടെ മടിയിൽ കിടന്നു ചെറിയ കുട്ടികളെ പോലെ ഞാൻ അത്‌ പറയുമ്പോൾ അമ്മ അത്ഭുതപുതപ്പെട്ടു.. " എന്താടാ മോനെ നീ കോളേജ് നിർത്താൻ മാത്രം വലിയ പ്രശ്നം " "ഒന്നുമില്ല അമ്മേ ആ അശ്വതി എന്നെ തേച്ചു.. " എന്റെ മറുപടി കേട്ടതും അമ്മ പൊട്ടിച്ചിരിക്കുന്നു... മനുഷ്യൻ ഇവിടെ സങ്കടത്തിൽ ഇരിക്കുമ്പോൾ ആണ് അമ്മയുടെ കൊല ചിരി... അമ്മയുടെ ചിരി എനിക്ക് തീരെ ദഹിക്കാത്തതു കൊണ്ട് അമ്മയുടെ മടിയിൽ നിന്നും എഴുനേൽറ്റ് ഞാൻ അമ്മയെ രൂക്ഷമായൊന്നു നോക്കി... " നീ എന്നെ നോക്കി പേടിപ്പിക്കുകയൊന്നും വേണ്ടാ.. നിന്റെ അച്ഛൻ വിചാരിച്ചിട്ട് അത്‌ നടന്നിട്ടില്ല പിന്നെയാ നീ.. പോടാ ചെള്ള് ചെക്കാ... " അമ്മയുടെ ആ സംസാരം കേട്ടപ്പോൾ അറിയാതെ എന്റെ ചുണ്ടിൽ പുഞ്ചിരിച്ചു വന്നു..... " എടാ മനു നീ എന്തിനാടാ അവൾ തേച്ചെന്നും പറഞ്ഞു കോളേജ് നിർത്തുന്നെ " " കോളേജിലെ എല്ലാർക്കും അറിയാം ഞങ്ങൾ ഇഷ്ടത്തിലായിരുനെന്നു ഇനി ഞാൻ എങ്ങനെ അവരുടെയൊക്കെ മുഖത്തു നോക്കും.. " എന്റെ ഈ ഡയലോഗ് അമ്മക്ക് സങ്കടമായിട്ടുണ്ട്... പക്ഷെ എന്റെ അമ്മ ആയതു കൊണ്ട് പറയുകയല്ല എന്തു തന്നെ സംഭവിച്ചാലും എന്റെ അമ്മ ആരുടെ മുമ്പിലും തോറ്റു കൊടുക്കുന്നത് ഞാൻ ഇത് വരെ കണ്ടിട്ടില്ല.. " ടാ മോനേ പഠന കാലത്ത് ഒരു പ്രണയമൊക്കെ ഉണ്ടാകണം എന്നിട്ട് അവൾ നല്ല എട്ടിന്റെ തേപ്പും തേച്ചു പോകുകയും വേണം.. എന്നാലേ നമുക്ക് ഒരു വാശിയൊക്കെ ഉണ്ടാകൂ.. നീ പേടിക്കാതിരിക്കടാ നീ നല്ല അന്തസായി തന്നെ കോളേജിൽ പോകണം അവൾ പോയാൽ അവളുടെ അനിയത്തിയെന്നും പറഞ്ഞു അവളുടെ മുന്നിൽ തന്നെ നീ പഠിച്ചു കാണിച്ച് കൊടുക്കണം.. " എന്തൊക്കെയോ പറഞ്ഞു അമ്മ എന്നെ ഉപദേശിക്കുന്നുണ്ട് എല്ലാം മനസ്സിൽ കയറിയില്ലെങ്കിലും കുറച്ചൊക്കെ കയറിയിട്ടുണ്ട്.. അങ്ങനെ അമ്മയുടെ ഉപദേശം പോലെ തന്നെ അവളുടെ കൂടെ പഠിച്ചു തന്നെ നല്ല മാർക്കോടെ ഡിഗ്രിയും പാസായി.. പക്ഷെ അതിലൊന്നും ഞാൻ നിന്നില്ല പിജിയും എടുത്ത് എക്സമെല്ലാം എഴുതി ഒരു കോളേജ് അധ്യാപകൻ ആയിട്ടേ ഞാൻ എന്റെ പഠിത്തം നിർത്തിയൊള്ളു... ഇന്ന് ഞാൻ ഒരു കോളേജ് അധ്യാപകൻ ആണ്. അന്ന് അമ്മ പറഞ്ഞ ഒരു വാക്ക് ആയിരുന്നു അവളുടെ കൂടെ തന്നെ പഠിക്കണം എന്നത് അത്‌ ഞാൻ നിറവേറ്റി.. ഇനി നാളെ അമ്മ പറഞ്ഞ മറ്റൊന്ന് കൂടി നിറവേറ്റാൻ ഞാൻ പോകുകയാണ്.. കുളിച്ചു സുന്ദരൻ ആയി നല്ല ഡ്രെസ്സും ധരിച്ചു അമ്മയുടെ കൂടെ ഇറങ്ങുമ്പോൾ അന്ന് അമ്മ പറഞ്ഞിരുന്ന ആ വാക്കാണ് മനസ്സിൽ വന്നത് " അവൾ പോയാൽ അവളുടെ അനിയത്തി "" അന്ന് അമ്മ അത്‌ പറഞ്ഞപ്പോൾ ഞാൻ ചിന്തിച്ചത് അവളുടെ അനിയത്തിയെ കുറിച്ചായിരുന്നു.. അങ്ങനെ അധ്യാപകൻ ആയി അവളുടെ അനിയത്തിയുടെ കോളേജിലേക്ക് പോകുമ്പോഴും മനസ്സിൽ ഉണ്ടായിരുന്നത് അമ്മയുടെ വാക്കുകൾ ആണ്.. അവളുടെ അനിയത്തിയേയും പെണ്ണ് കാണാൻ ചെല്ലുമ്പോൾ മുന്നിൽ തന്നെ അവൾ ഉണ്ടായിരുന്നു.. കല്യാണ ചെക്കൻ ഞാൻ ആണെന്ന് കണ്ടപ്പോൾ അവളുടെ മുഖത്തു കണ്ട ആ ഒരു സങ്കടം അത്‌ മതിയായിരുന്നു എനിക്ക് ഇനിയുള്ള കാലം സന്ദോഷമായി ജീവിക്കാൻ.. അവളുടെ അനിയത്തിയുടെ കഴുത്തിൽ താലി കെട്ടി അവളുടെ മുഖത്തേക്ക് ഞാൻ പുഞ്ചിരിച്ചോന്നു നോക്കി... അവൾ പോലും അറിയാതെ അവളിൽ നിന്നും കണ്ണുനീർ വന്നിരുന്നു.. ചെയ്തു പോയ തെറ്റുകൾ അവൾ മനസിലാക്കിയെങ്കിലും ഇവിടെ ഇപ്പൊ എന്താ നടക്കുന്നെന്നു അറിയാതെ എന്റെ സ്വന്തം ഭാര്യ എന്നെയും അവളെയും മാറി മാറി നോക്കുന്നുണ്ടായിരുന്നു.. ആദ്യ രാത്രി തന്നെ കഥയെല്ലാം എന്റെ പെണ്ണുംപിള്ളയോട് പറയുമ്പോൾ അവളുടെ കണ്ണിൽ സന്തോഷമായിരുന്നു സങ്കടമായിരുന്നോണ് എനിക്ക് ഇത് വരെ മനസ്സിലായിട്ടില്ല.... എന്തു തോൽവി വന്നാലും കൂടെ നിൽക്കാൻ നമ്മുടെ അമ്മ കൂടെ ഉണ്ടാകുമ്പോൾ തോൽപ്പിക്കാൻ കഴിയില്ല ആർകും കടപ്പാട്
791 views
1 days ago
#

📔 കഥ

<മാലാഖ> ബസിലെ തോട്ടു മുന്നിലെ സീറ്റിൽ ഇരുന്നു മയങ്ങുന്ന പെൺകുട്ടിയുടെ കഴുത്തിലെ മാല അവളറിയാതെ പൊട്ടിച്ചെടുക്കുമ്പോൾ അവന്റെ കൈ നന്നായി വിറക്കുന്നുണ്ടായിരുന്നു. ജീവിതത്തിൽ ആരുടെയും ഒരു മൊട്ടുസൂചി പോലും മോഷ്ടിക്കാത്ത അവനാണിപ്പൊ.... അവന്റെ മനസ്സിൽ ഇപ്പൊ ഒന്നേയുള്ളൂ അമ്മയും പെങ്ങളും....മരിക്കുന്നതിനു മുൻപ് അച്ഛനുണ്ടാക്കി വച്ച ബാധ്യതകൾ ഇന്നു ഞങ്ങളെ കിടപ്പാടം പോകുമെന്ന അവസ്ഥയിൽ എത്തിച്ചിരിക്കുന്നു.വീടും സ്ഥലവും പണയപ്പെടുത്തി അച്ഛൻ വാങ്ങിയ വായ്പയ്ക്ക് കടക്കാർ തന്ന അവസാന അവധിയും കഴിഞ്ഞിരിക്കുന്നു. പ്രായമായ അമ്മയേയും പെങ്ങളേയും കൊണ്ട് തെരുവിലിറങ്ങുന്നത് അവന് ചിന്തിക്കാവുന്നതിലുമപ്പുറമായിരുന്നു. കെട്ടുപ്രായമായ പെങ്ങൾക്കു വരെ കടക്കാർ വില പറഞ്ഞപ്പോൾ മറ്റൊരു വഴിയും അവൻ കണ്ടില്ല. അവൾ നല്ല മയക്കത്തിലായിരുന്നതുകൊണ്ടാവണം വലിയ ബുദ്ധിമുട്ടില്ലാതെ അവളറിയാതെ മാല അവൻ പൊട്ടിച്ചെടുത്തു.മാല അത്യാവശ്യം വലുതായിരുന്നു. കാഴ്ചയിൽ പുതിയതും. ഏതോ കാശുള്ള വീട്ടിലെ പെണ്ണായിരിക്കും, ഈ മാല പോയാലും അവർക്ക് വലിയ കുഴപ്പമൊന്നുമുണ്ടാകില്ല... അവൻ സ്വയം സമാധാനിക്കാൻ ശ്രമിച്ചു. രണ്ടുമൂന്നു ദിവസം ചെയ്തതിലുള്ള കുറ്റബോധം അവനെ വേട്ടയാടിയെങ്കിലും അമ്മയേയും പെങ്ങളേയും തെരുവിലറക്കാതെ കഴിച്ചു കൂടിയതിൽ അവൻ ആശ്വസിച്ചു. മാസങ്ങൾ കഴിഞ്ഞൊരു ദിവസം പെട്ടെന്നാണ് മുറ്റമടിച്ചു കൊണ്ടിരുന്ന അമ്മ പെട്ടെന്ന് തലചുറ്റി വീണത്. വീഴ്ചയിൽ അമ്മയുടെ തല ഒരു കല്ലിലടിച്ചു. ചോര വാർന്നു കിടന്ന അമ്മയേയും കൊണ്ട് അടുത്തുള്ള ഗവർൺമെന്റ് ആശുപത്രിയിലേക്കോടിയെങ്കിലും മുറിവ് ആഴലുള്ളതായതിനാൽ പട്ടത്തിലെ വലിയ സ്വകാര്യ ആശുപത്രിയിലേക്ക് മാറ്റേണ്ടി വന്നു. ആമ്പുലൻസിൽ അമ്മയെ പട്ടണത്തിലെ ആശുപത്രിയിലേക്ക് മാറ്റി. സ്കാനിങ്ങും മറ്റു ചികിത്സകളും കഴിഞ്ഞ് രണ്ടു ദിവസത്തിനു ശേഷം അമ്മയെ മുറിയിലേക്ക് മാറ്റി. അടുത്ത ദിവസം രാവിലെ അമ്മയ്ക്കുള്ള കഞ്ഞിയും വാങ്ങി മുറിയിലെത്തിയപ്പോഴാണ് അവനവളെ കണ്ടത്.അന്ന് ബസിൽ വച്ച് അവൻ മല പൊട്ടിച്ചെടുത്ത ആ പെൺകുട്ടിയെ. പെട്ടെന്നൊരു നിമിഷം അവൻ സ്തംഭിച്ചു നിന്നു പോയി. അവളവിടുത്തെ നഴ്സ് ആയിരുന്നു.അമ്മയുടെ കാര്യങ്ങളെല്ലാം നോക്കേണ്ട ഡ്യൂട്ടി അവൾക്കായിരുന്നു. നടക്കാനാവാത്ത അമ്മയുടെ എല്ലാ കാര്യങ്ങളും സ്വന്തം മകളെപ്പോലെ അവൾ നോക്കുമ്പോൾ അവനിലെ കുറ്റബോധം തലപൊക്കിക്കൊണ്ടിരുന്നു. ഉറങ്ങാതെ അമ്മക്ക് കാവലിരിന്നും സമയാസമയങ്ങളിൽ മരുന്നു നല്കിയും അവൾ അമ്മയ്ക്കൊരു മകൾ കണക്കായി. വളരെ പെട്ടെന്നു തന്നെ അമ്മയുമായി അവൾ നല്ല അടുപ്പത്തിലായി. ഒരു നഴ്സിന്റെ കഷ്ടപ്പാടുകൾ അവൻ നേരിട്ടറിഞ്ഞ ദിവസങ്ങളായിരുന്നു അത്.ഭക്ഷണം കഴിക്കാൻ പോലും സമയമില്ലാതെ രാപ്പകൽ രോഗികൾക്കായി ഓടി നടക്കുന്ന അവളെ കണ്ടപ്പോ സഹതാപം തോന്നി. ഉള്ളതിനും ഇല്ലാത്തതിനും ഡോക്ടറിന്റെയും രോഗികളുടെയും ചീത്ത കേട്ടും ആരോടും പരാതി പറയാതെ മറ്റുള്ളവർക്കായി ഉറങ്ങാതിരിക്കുന്ന അവൾ ഒരു സ്ഥിരം കാഴ്ചയായിരുന്നു. "മോളുടെ കല്യാണം കഴിഞ്ഞതാണോ "- കുത്തിവയ്പ് എടുക്കുന്നതിനിടയിൽ അവളോടൊരിക്കൽ അമ്മ ചോദിച്ചു. പെട്ടെന്നവളുടെ മുഖം വാടിയെങ്കിലും വിഷമം കലർന്ന ഒരു പുഞ്ചിരിയോടെ അവൾ പറഞ്ഞു - " പറഞ്ഞുറപ്പിച്ച സ്വർണം സ്ത്രീധനമായി കൊടുക്കാൻ കഴിയാതെ വന്നതുകൊണ്ട് ഉറപ്പിച്ച കല്യാണം മാറിപ്പോയി. " "അതെന്തു പറ്റി..." - അമ്മ മൂക്കത്തു വിരൽ വച്ചു. "അവർക്കാകെ നിർബന്ധമുണ്ടായിരുന്നത് ഇരുപത് പവൻ സ്വർണമായിരുന്നു... അത് കടം വാങ്ങീം കുറി കൂടിം വയ്യാത്ത അച്ഛൻ എങ്ങനെയോ തട്ടിക്കൂട്ടി. അങ്ങനെ കല്യാണം ഉറച്ചു. കല്യാണമുറച്ച പെണ്ണു കാലിയായ കഴുത്തുമായി നടക്കണ്ടെന്നു അച്ഛൻ നിർബന്ധിച്ചിട്ടാ കല്യാണത്തിനു വാങ്ങി വച്ചിരുന്ന ഒരു മാല ഞാനെടുത്തിട്ടത്." " എന്നിട്ട്.... " - അമ്മ വിഷമത്തോടെ ചോദിച്ചു. "അടുപ്പിച്ചുള്ള നൈറ്റ് ഡ്യൂട്ടി കാരണം ഒട്ടും ഉറങ്ങിയിരുന്നില്ല. അതിന്റെ ക്ഷീണംകൊണ്ട് വീട്ടിലേക്കുള്ള ബസിൽ കയറിയപ്പോൾ തന്നെ ഞാനുറങ്ങിപ്പോയി. പിന്നെ ബസിൽ നിന്നറങ്ങിയപ്പോഴാ കഴുത്തിൽ മാലയില്ലായെന്നറിഞ്ഞത്... അവരു പറഞ്ഞ ഇരുപതു പവൻ തികച്ചു കൊടുക്കാൻ കഴിയാതെ വന്നപ്പോ...." - അവൾക്കതു മുഴുവിപ്പിക്കാൻ കഴിഞ്ഞില്ല. കരയാതിരിക്കാൻ അവൾ പാടുപെട്ടു. "വേറെ നോക്കീലേ മോളേ?" - അമ്മ വിഷമത്തോടെ വീണ്ടും ചോദിച്ചു. " നഴ്സിങ് പഠിച്ചതിന്റെ കടവും രണ്ടനിയത്തിമാരും അവരുടെ പഠനവും വയ്യാത്ത അച്ഛന്റെ ചികിത്സയും ഒക്കെയുള്ള എന്റെ പ്രാരാബ്ദം ആരെറ്റെടുക്കാനാ അമ്മേ...സ്ത്രീധനം കൊടുക്കാനും കാര്യായ് ട്ടൊന്നുല്ല" - ഒരു തമാശ പോലെ അവൾ പറഞ്ഞവസാനിപ്പിച്ചെങ്കിലും അവളുടെ കണ്ണുകൾ നിറഞ്ഞിരുന്നു. "മോളു വിഷമിക്കണ്ട.... മോളുടെ വിഷമം ഒക്കെ മനസ്സിലാക്കുന്ന ഒരാളു വരും." - അമ്മയുടെ കണ്ണുകളും നിറഞ്ഞിരുന്നു. "എനിക്കതല്ല വിഷമം... അച്ഛന്റെ വിഷമം കാണുമ്പോഴാ.... അച്ഛൻ ഒരുപാടു കഷ്ടപ്പെട്ടിട്ടാ ആ കല്യാണം ഉറപ്പിച്ചത്.. പക്ഷേ... " - അവൾ കരഞ്ഞു പോയി. അവളുടെ കഥ കേട്ടിരുന്ന അവൻ പോയി. അവൻ കാരണം ആ പെൺകുട്ടിക്ക് ഒരു ജീവിതം നഷ്ടപ്പെടുമെന്നവൻ ഒരിക്കലും കരുതിയിരുന്നില്ല. രണ്ടു ദിവസങ്ങൾക്കപ്പുറം അമ്മയെ ഡിസ്ചാർജ് ചെയ്ത ദിവസം ബില്ലടയ്ക്കാൻ പണത്തിനായി നെട്ടോട്ടമോടിയ അവന്റെ കയ്യിലേയ്ക്ക് അന്നു കിട്ടിയ തന്റെ ശമ്പളത്തിന്റെ പകുതി തുക നല്കുമ്പോൾ അവന്റെ കണ്ണുകൾ നിറഞ്ഞൊഴുകുകയായിരുന്നു. കുറച്ചു കാലങ്ങൾക്കപ്പുറം തരക്കേടില്ലാത്തൊരു ജോലി കിട്ടിയ സമയം അമ്മയോടൊപ്പം അവളെ പെണ്ണു ചോദിക്കാൻ പോയ അവനൊരു നിർബന്ധമേ ഉണ്ടായിരുന്നുള്ളൂ ... പൊന്നും വേണ്ട പണവും വേണ്ട വേണ്ടത് അവനൊരു കൂട്ടും, അമ്മയ്ക്ക് സ്നേഹനിധിയായ മരുമകളും... അല്ല മകളും... P.Sudhi
978 views
2 days ago
#

📔 കഥ

പെണ്ണു കാണാൻ വന്നപ്പൊഴും ഞാനയാൾക്ക് മുഖം കൊടുത്തിരുന്നില്ല.. അതു കൊണ്ടാകണം എന്തൊ ചോദിക്കാനൊരുങ്ങിയ അയാൾ എന്റെ മൌനത്തിനു മുന്നിൽ വാക്കുകൾ വിഴുങ്ങിയതും.. അയാൾക്കെന്നെ ഒരിക്കലും ഇഷ്ടമാകില്ല എന്നും,വീട്ടുകാരുടെ നിർബന്ധത്തിനു വഴങ്ങിയ ഈ കല്ല്യാണം മുടങ്ങിപ്പോകുമെന്നും ഞാൻ കണക്കു കൂട്ടി.. പക്ഷെ! എന്റെ കണക്കുകൾ അപ്പാടെ പിഴച്ചു.. സമ്മതം അറിയിച്ച അയാളുമായി ഇഷ്ടമല്ലാഞ്ഞിട്ടും എന്റെ കല്ല്യാണം നടന്നു.. അങ്ങനെ ഒരു താലിച്ചരടിന്റെ ബന്ധനത്താൽ മറ്റൊരു വീട്ടിലേയ്ക്ക്,എന്നെ അറിയാത്ത എനിക്കറിയാത്ത മറ്റു പല മുഖങ്ങളിലേയ്ക്കും വിധി എന്നെ പറിച്ചു നട്ടു.. അമ്മയും,അച്ഛനും ഒരു പെങ്ങളും അടങ്ങിയ ഒരു സന്തുഷ്ട കുടുംബം..അതായിരുന്നു അയാളുടെ വീട്.. അവരെയൊക്കെ കണ്ടപ്പൊഴും,എന്നോടുള്ള പെരുമാറ്റത്തിലും മനസ്സിൽ ഒരുപാട് നന്മകളുള്ള ആളുകളാണെന്ന് എനിക്ക് മനസ്സിലായിരുന്നു.. പക്ഷെ,തിരിച്ച് അവരാഗ്രഹിക്കുന്ന മരുമകളായൊ,ഒരു നല്ല ഭാര്യയായൊ മാറാൻ എന്തു കൊണ്ടൊ എന്റെ മനസ്സ് കൂട്ടാക്കിയില്ല.. പ്രതീക്ഷകളോടെ മുല്ലപ്പൂ മൊട്ടുകൾ വിതറിയ മണിയറയിൽ അയാളെനിക്കു വേണ്ടി കാത്തിരുന്നപ്പോൾ അലസതയോടെ ദൂരേയ്ക്ക് മാറി നിന്നാണു ഞാനെന്റെ പ്രതിഷേധമറിയിച്ചത്.. അയാളെന്തൊക്കെയോ എന്നോട് സംസാരിക്കുന്നുണ്ടായിരുന്നു.. പക്ഷെ,അതൊന്നും എന്റെ കാതുകളിൽ പതിഞ്ഞിരുന്നില്ല.. എനിക്കു തീരെ വയ്യെന്നും,ഉറങ്ങണമെന്നും പറഞ്ഞ് അന്നാ സംഭാഷണങ്ങൾ ഞാൻ മനപ്പൂർവ്വം മുറിച്ചു.. കട്ടിലിലേയ്ക്ക് ഓരം ചേർന്ന് അയാളെന്നെ ക്ഷണിച്ചപ്പൊ ഒരു ബെഡ് ഷീറ്റ് വിരിച്ച് നിലത്ത് കിടന്നു ഞാൻ.. വിവാഹം കഴിഞ്ഞ് ഒരാഴ്ചക്കാലമായിട്ടും ഇതേ ആവർത്തനമായിരുന്നു.. മണിയറയിലാകെ എന്നും ശ്മശാന മൂകത മാത്രം.. "അപർണ്ണ.." അന്നും പതിവു പോലെ കിടക്കാനൊരുങ്ങുമ്പൊഴാണു അയാളെന്നെ പിടിച്ചു നിർത്തിയത്.. ഒരുപക്ഷെ അയാളെന്റെ പേർ ആദ്യമായ് വിളിക്കുന്നതും അപ്പൊഴായിരിക്കാം.. "മറ്റൊന്നും ഞാൻ ചോദിക്കുന്നില്ല.. നിനക്കെന്നെ ഇഷ്ടമല്ലാത്തതാണൊ നിന്റെ പ്രശ്നം..?" അത്രയേറെ ശാന്തമായിരുന്നു അയാളുടെ ചോദ്യം.. ഒരുനിമിഷം എനിക്ക് മറുപടിയില്ലായിരുന്നു.. എന്തൊക്കെയോ എനിക്കയാളോട് വിളിച്ചു പറയണമെന്നുണ്ടായിരുന്നു..പക്ഷെ എത്ര തന്നെ ശ്രമിച്ചിട്ടും എനിക്കതിനു പറ്റണില്ല.. എന്റെ മൌനം മടുപ്പിച്ചപ്പോൾ അയാൾ തുടർന്നു.. "അപർണ്ണ..ഒരു ഭർത്താവെന്ന നിലയിൽ നിനക്കെന്നെ ഉൾക്കൊള്ളാൻ പറ്റാത്തതാണു പ്രശ്നമെങ്കിൽ നീ പറ..ഞാനെന്താ ചെയ്യേണ്ടത്.. അമ്മയൊക്കെ ചോദിച്ചു തുടങ്ങുന്നുണ്ട് തനിക്കെന്തെങ്കിലും സങ്കടമുണ്ടോന്ന്.. ഞാൻ ഒരിക്കലും നിന്നെ കുറ്റപ്പെടുത്തില്ല..നിന്റെ ഇഷ്ടങ്ങൾക്കും സ്വാതന്ത്ര്യങ്ങൾക്കും എതിരു നിൽക്കുകയും ഇല്ല.. പക്ഷെ,എനിക്കറിയണമെന്നുണ്ട് നിന്റെ പ്രോബ്ലംസ്..പരിഹരിക്കാൻ പറ്റുന്നതാണെങ്കിൽ നമുക്കതൊക്കെ പരിഹരിച്ച് മുന്നോട്ട് പോയ്ക്കൂടെ.. ഒരു കാര്യം ഞാൻ പറയാം..നിന്റെ പൂർണ്ണമായ സമ്മതത്തോടെ അല്ലാതെ ഞാൻ നിന്റെ ദേഹത്ത് സ്പർശിക്കില്ല.. പക്ഷെ! ഒരപേക്ഷയുണ്ട്.. മറ്റുള്ളവർക്ക് മുന്നിലെങ്കിലും നീയെന്റെ ഭാര്യയായി അഭിനയിച്ചു കാട്ടണം..അവരുടെ സന്തോഷത്തിനു വേണ്ടിയെങ്കിലും..പ്ലീസ്.." അയാളത് പറഞ്ഞു നിർത്തുമ്പൊ നെഞ്ച് പൊട്ടുകയായിരുന്നു.. തനിക്ക് കിട്ടിയ ഭർത്താവിൽ ഏതൊരു പെണ്ണിനും അഭിമാനം തോന്നുന്ന നിമിഷം.. കെട്ടു കഴിഞ്ഞ് ദിവസങ്ങളായിട്ടും അയാളോടൊന്ന് മിണ്ടിയിട്ടില്ല ഞാൻ..ഒരു പുഞ്ചിരി പോലും നൽകിയിട്ടില്ല.. ഒരു ഭാര്യയിൽ നിന്നും ഒരാൾ എന്തൊക്കെ പ്രതീക്ഷിക്കുന്നൊ അതൊന്നും നാളിതു വരെ ഞാൻ നൽകിയിട്ടില്ല..ഒരു സ്പർശനം പോലും.. എന്നിട്ടും അയാളെത്ര ശാന്തമായിട്ടാണു എന്നോട് സംസാരിക്കുന്നത്..പരാതിയൊ പരിഭവമൊ ഇല്ലാതെ.. ഈശ്വരാാ..ഞാനെന്ത് പാപിയാണു.. സ്വയം വെറുത്തു പോകുന്ന ഭൂത കാലത്തിന്റെ ഓർമ്മകൾ.. മറക്കാൻ ആഗ്രഹിച്ചിട്ടും പിന്നെയും പിന്നെയും തികട്ടി വരുന്ന പ്രണയത്തിന്റെ നോവുകൾ.. പകയാണെനിക്ക്..അടങ്ങാത്ത രോഷവും..വേദനയും.. എല്ലാം തുറന്ന് പറയണമെന്ന് മനസ്സ് പറയുന്നു.. ഒരുപക്ഷെ,എന്നെങ്കിലും അയാളത് അറിയും..അന്നത് ഒരിക്കലും മായ്ക്കാൻ പറ്റാത്ത കുറ്റമായ് എന്നെ വേട്ടയാടും.. പറയണം..എല്ലാം തുറന്ന് പറയണം..ഞാനുറച്ചു.. "അത്..ഞാൻ.." പറഞ്ഞു തുടങ്ങുകയായിരുന്ന എന്നെ അയാൾ തടഞ്ഞു.. "വേണ്ട..ഒന്നും പറയേണ്ട.. അവനെ ഞാൻ കണ്ടിരുന്നു,,സംസാരിച്ചിരുന്നു.. പ്രായത്തിന്റെ പ്രസരിപ്പിൽ പ്രണയാന്ധത മൂത്ത് പറ്റിപ്പോയൊരു അബദ്ധം..അതങ്ങനെ കരുതിയാൽ മതി.. പക്ഷെ,ഇന്ന് നീയെന്റെ ഭാര്യയായ് എന്റെ ജീവിതത്തിലേയ്ക്ക് വന്നവളാണു.. ഒരിക്കലും നമ്മുടെ ലൈഫിൽ അതൊന്നും ഒരു പ്രശ്നമായ് കാണാൻ ഞാൻ ആഗ്രഹിക്കുന്നില്ല.." എനിക്ക് മനസ്സിലാകുന്നില്ലായിരുന്നു അയാളെ.. എല്ലാം അയാൾ അറിഞ്ഞിരിക്കുന്നു.. എന്നിട്ടും അയാൾക്കെന്നോട് യാതൊരു ദേഷ്യമോ,പ്രതിഷേധമോ ഇല്ല.. അന്നെനിക്ക് എന്നെ തന്നെ നഷ്ടമായ നിമിഷങ്ങളെ ഞാനോർക്കുകയായിരുന്നു.. ആത്മാർത്ഥമായിട്ടായിരുന്നു ഞാനവനെ പ്രണയിച്ചത്..പക്ഷെ അവനെന്റെ ഭ്രാന്തമായ പ്രണയത്തെ പ്രലോഭനങ്ങളാൾ മുതലെടുത്തു.. അന്നവന്റെ കൈകളിൽ ഞെരിഞ്ഞമരുമ്പോൾ അരുതെന്നു പറയാൻ തോന്നിയില്ല.. ഒരു നിമിഷത്തെ ചിന്തയാൽ പ്രണയം കാമത്തിലേയ്ക്ക് വഴിമാറി.. പിന്നീടുള്ള അവന്റെ പെരുമാറ്റത്തിൽ നിന്ന് എനിക്ക് മനസ്സിലായി അവൻ പ്രണയിച്ചത് എന്റെ ശരീരത്തെയായിരുന്നു എന്ന്.. ഒരു പെണ്ണിനു വിലപ്പെട്ടതൊക്കെ നഷ്ടമാകുമ്പോൾ,സ്വയം വഞ്ചിക്കപ്പെട്ടു എന്ന് തോന്നുമ്പോൾ ഉണ്ടാകുന്ന രോഷം,വേദന.. അതൊക്കെയാണു ഞാൻ മറ്റുള്ളവരിലേയ്ക്ക് കാട്ടിയത്.. എല്ലാം കൂടി ഓർത്തപ്പോൾ എനിക്ക് കരച്ചിൽ വന്നു.. ഞാനയാൾക്ക് മുന്നിൽ പൊട്ടിക്കരഞ്ഞു.. "ഹെയ്..അപർണ്ണ..എന്തായിത്,കൊച്ചു കുട്ടികളുടെ പോലെ..ഒന്നുമോർക്കണ്ട..ഒന്നുമെനിക്ക് അറിയുകേം വേണ്ട.. എന്നെ ഇഷ്ടമാണെന്നൊരു വാക്ക്..അത് മാത്രം മതിയെനിക്ക്..ഇത്രയും ദിവസം ഞാനാഗ്രഹിച്ചതും അത് മാത്രമായിരുന്നു.." അയാളുടെ മാറിലേയ്ക്ക് ചാഞ്ഞു കൊണ്ടാണു അതിനുള്ള ഉത്തരം ഞാൻ നൽകിയത്.. "അരുണേട്ടാ..ക്ഷമിക്ക്..ഈ പാപിയോട് ക്ഷമിക്ക്.. ഇത്രയും ദിവസം വേദനിപ്പിച്ചു,വല്ലാതെ..എനിക്കിഷ്ടമാണു നിങ്ങളെ...നിങ്ങളിലെ നല്ല മനുഷ്യനെ മനസ്സിലാക്കാൻ വൈകിപ്പോയീ ഞാൻ..എന്നോട് ക്ഷമിക്കൂൂ.." കരഞ്ഞു കൊണ്ട് ആ മാറിലേയ്ക്ക് ചായുമ്പോൾ ഭൂതകാലത്തിന്റെ നോവോർമ്മകൾ മറക്കുകയായിരുന്നു ഞാൻ.. പകരം വർത്തമാന കാലത്തിന്റെ യാഥാർത്യങ്ങളും,ഭാവിയുടെ സ്വപ്നങ്ങളും നിറയുകയായിരുന്നു ഉള്ളിൽ.. കാലമേറെ കഴിഞ്ഞ് അന്നു ഞാൻ അരുണേട്ടനോട് ചോദിച്ചു.. "അരുണേട്ടാ..ഞാനൊരു കന്യകയല്ലാന്നറിഞ്ഞിട്ടും നിങ്ങളെന്നെ എന്തിനു സ്വീകരിച്ചു..?" "പെണ്ണെ..തെറ്റുകൾ മനുഷ്യ സഹജമാണു..അറിയാതെ പറ്റിപ്പോകുന്ന ഒരു തെറ്റിനെ തിരുത്താൻ ആഗ്രഹിക്കുന്നവരെ നാം കൂടെ കൂട്ടണം..എന്തിനാണെന്നോ ,, ഇനിയൊരിക്കലും അവർ മറ്റൊരു തെറ്റിലേയ്ക്ക് വീണൂ പോകാതിരിക്കാൻ.. ഒരുപക്ഷെ ഞാനങ്ങനെ ചെയ്തില്ലായിരുന്നുവെങ്കിൽ ചിലപ്പോൾ നീയിന്ന് ഈ ഭൂമിയിൽ ഉണ്ടായേക്കുമായിരുന്നില്ല.." ഞാനപ്പോൾ ഓർക്കുകയായിരുന്നു..അന്ന് മരണത്തിലേയ്ക്ക് ചിന്തിച്ചിരുന്ന എന്നെ തന്നെ.. ( പലപ്പൊഴും പ്രശ്നങ്ങൾ നാം നമ്മിൽ തന്നെ കുഴിച്ചു മൂടാൻ ശ്രമിക്കുമ്പോൾ മാനസീക പിരിമുറുക്കങ്ങളും,അതുവഴി വേണ്ടാത്ത ചിന്തകളും ഉടലെടുക്കുന്നു.. അതൊക്കെയും ചിലപ്പോൾ ചില തുറന്നു പറച്ചിലുകൾ കൊണ്ട് പരിഹരിക്കാൻ പറ്റുന്നതാവാം.. ജീവിതമാണു..അതിങ്ങനൊക്കെയാണു..) *ശുഭം* *സോളോ-മാൻ*
2.2k views
2 days ago
#

📔 കഥ

തനിച്ചൊന്നു സംസാരിക്കണം എന്നു പെണ്ണുകാണൽ ചടങ്ങിനിടെ ഇങ്ങോട്ട് പറഞ്ഞ പെണ്കുട്ടി എന്ന നിലയിൽ അവളെനിക്കൊരു കൗതുകമായിരുന്നു .. "പുരുഷവിദ്വേഷിയാണല്ലേ..??" 'ഞാനൊരു പുരോഗമന വാദിയാണ് ...സ്ത്രീഭാഷയോടുപമിച്ചാൽ ഒരു കറ തീർന്ന ഫെമിനിസ്റ്റ് ... " ശാലീന സൗന്ദര്യവും കരിങ്കൂവള മിഴികളും മുട്ടൊപ്പം താഴ്ന്ന മുടിക്കെട്ടും സ്വപ്നം കണ്ടു ആദ്യമായി നടന്ന പെണ്ണുകാണലിൽ അവളതു പറഞ്ഞപ്പോൾ എന്റെ പ്രതീക്ഷകളുടെ വെണ്ണക്കൽ കോട്ടകളെല്ലാം ഉടഞ്ഞു മണ്ണിൽ പതിച്ചിരുന്നു..... "ചില കാര്യങ്ങളിൽ നിങ്ങളിൽ തെറ്റിദ്ധാരണ ജനിപ്പിയ്ക്കാൻ ഇവിടെ പല നാടകങ്ങളും നടന്നിട്ടുണ്ട് അതിനെ കുറിച്ചു സംസാരിക്കണം എന്നെനിക്കു തോന്നി... " വാക്കുകളെക്കാൾ ഉറപ്പ് അവളുടെ മിഴികൾക്കാണെന്നു തോന്നിപ്പോയി... "വെറും സാധാരണമായ കാര്യങ്ങളിൽ നിന്നു തന്നെ തുടങ്ങാം ..." നിതംബം കഴിയുമാറ് പിന്നിക്കെട്ടിയൊതുക്കിയിരുന്ന അവളുടെ മുടിക്കെട്ടുകൾ അഴിച്ചു മാറ്റിയപ്പോഴായിരുന്നു കൗതുകം ഒരു ഞെട്ടലായി മാറിയത് .. "വെയ്പ്പ് മുടിയാണ് ....അമ്മയുടെ നിർബന്ധം ...ആദ്യ കാഴ്ചയിൽ തന്നെ നിങ്ങൾക്ക് ഇഷ്ടമാകണമെന്നു പറഞ്ഞിരുന്നു ..." തോളൊപ്പം ഭംഗിയായി വെട്ടിയിട്ടിരുന്ന മുടി അവൾ രണ്ടു വശത്തേയ്ക്കുമായി മുൻപിലേയ്ക്കിട്ടു.. ശേഷം അവൾ തിരിഞ്ഞത് വാഷ്‌ ബേസിന് നേർക്കായിരുന്നു ...ഇരുകൈകൾ കൊണ്ടും വെള്ളം വാരി മുഖത്തേയ്ക്ക് ഒരു ദാക്ഷിണ്യവുമില്ലാതെ എറിയുന്നുണ്ടായിരുന്നു .... എന്റെ കയ്യിൽ നിന്ന് തന്നെ കർച്ചീഫ് മേടിച്ചുകൊണ്ടു അവൾ മുഖം അമർത്തിതുടച്ചു .... ശാപമോക്ഷം കിട്ടിയതു കണക്കെ ഫൗണ്ടേഷൻ ക്രീമുകൾ മുഖത്തുകൂടി ഒലിച്ചിറങ്ങി.. ആദ്യം കണ്ട നിറം അപ്രത്യക്ഷമായിരിക്കുന്നു ആൾ കുറച്ചുകൂടി ഇരുണ്ടിട്ടാണ്... " നിറം ഇതാണ്... അഞ്ചു നിമിഷം മുന്നേ നിങ്ങൾ കണ്ടത് പ്രശസ്‌തമായ ഒരു മേക്കപ്പ് കമ്പനിയുടെ ബ്രാൻഡ് അമ്പാസിഡറിനെയാണ് എന്നു വിശ്വസിക്കുക... " അവളുടെ വാക്കുകൾ എന്നിലും ചെറിയ ചിരിയുണർത്തുന്നുണ്ടായിരുന്നു... മേശവലിപ്പിൽ നിന്നും വലിയൊരു വട്ടക്കണ്ണട പുറത്തെടുത്തു കൊണ്ടു അവൾ മുഖത്തേയ്ക്ക് വച്ചു .. "എന്റെ കണ്ണിനു പവർ കുറവാണ് ...നിങ്ങൾ ശ്രദ്ധിച്ചിരുന്നില്ലേ നിങ്ങൾ എന്നു തെറ്റിദ്ധരിച്ചുകൊണ്ട് സുഹൃത്തിനായിരുന്നു ആദ്യമേ ചായ നൽകിയത്... " തുടക്കത്തിലുണ്ടായിരുന്ന ഉന്മേഷം പതിയെ കെട്ടടങ്ങുന്നുണ്ടായിരുന്നു ... "ഒരു നിമിഷം ഒന്നു പുറത്തേയ്ക്ക് നിൽക്കാമോ ..??" എന്തെങ്കിലും പറയുന്നതിന് മുൻപേ എന്നെ വെളിയിലാക്കി അവൾ വാതിൽ ബോൾട്ടിട്ടിരുന്നു.... അധിക സമയത്തിനു മുൻപേ അവൾ വാതിൽ തുറന്നു ... ഒരു നിമിഷം അവിശ്വസനീയമായ എന്തോ കണ്ടത് പോലെ ഞാൻ കണ്ണുകൾ അടച്ചുതുറന്നു ... പട്ടുസാരി ഇറക്കം കൂടിയ സ്ലീവ്ലെസ് ടോപ്പും ജീൻസുമായി പരിണമിച്ചിരിക്കുന്നു ... "എന്റെ ബാഹ്യരൂപം ഇതാണ് ... ഇതിൽ ഞാൻ സ്വസ്ഥയാണ്... സാരി വെറും പുറം മോടിയായി അമ്മ നിര്ബന്ധിച്ചുടുപ്പിച്ചതാണ്... " നന്നായിട്ട് ദാഹം തോന്നുന്നുണ്ടായിരുന്നു..ഉമിനീര് വറ്റിയപ്പോൾ അടുത്തു കണ്ട കസേരയിലേക്ക് ഞാൻ ചാഞ്ഞു ... "ഒന്നു കൂടി.... പുറത്തു മറ്റുള്ളവർ പറഞ്ഞതു പോലെ നളപാചകത്തിൽ വിരുതയൊന്നുമല്ല ഞാൻ അത്യാവശ്യം മോശമില്ലാതെ വച്ചുണ്ടാക്കും അത്ര തന്നെയെയുള്ളൂ .....' അവൾ പുഞ്ചിരിച്ചുകൊണ്ട് അടുത്തേയ്ക്ക് വന്നു "ആൾക്ക് ദാഹിക്കുന്നുണ്ടല്ലോ ...ഞാൻ കുടിയ്ക്കാൻ എന്തെങ്കിലും എടുക്കാം .... " അവൾ പതിയെ എന്നെ മറികടന്നുകൊണ്ടു പുറത്തേയ്ക്ക് പോയപ്പോഴും ഒരു അന്ധാളിപ്പിൽ തന്നെയായിരുന്നു ഞാൻ ... ആലോചന കൊണ്ടു വന്നയാളുടെ പിതാമഹനെ മനസ്സാൽ സ്മരിച്ചുകൊണ്ടു ഞാനും മുറിവിട്ടിറങ്ങാൻ തുടങ്ങവെയായിരുന്നു കൈതട്ടി മേശപ്പുറത്തെ ഒരു വശത്ത് അടുക്കിവച്ചിരുന്ന പുസ്തകങ്ങൾ തട്ടി നിലത്തേക്ക് വീണത് ... ധൃതിയിൽ അതു തിരികെ അടുക്കി വയ്ക്കുമ്പോൾ ഏതോ ഒരു പുസ്തകത്തിന്റെ താളിൽ നിന്ന് ഒരു പെണ്കുട്ടി ഇളകി വീണു ... ഇളംനിറത്തിൽ പാവാടയും ഉടുപ്പുമിട്ട ഒരു പെണ്കുട്ടി തിരിഞ്ഞു നോക്കുന്ന ചിത്രം എവിടെയോ കണ്ടിട്ടുണ്ടെന്നതോർത്തെടുക്കാൻ ശ്രമിക്കവേ ആണ് മനസ്സിലായത് ... കുറച്ചു മുൻപ് തന്നെ അതിശയിപ്പിച്ച ഫെമിനിസ്റ്റ് തന്നെയാണ് ആ പെണ്കുട്ടി എന്ന്... വശ്യതയാർന്ന അവളുടെ മറ്റൊരു മുഖം ...!! ഇപ്പോഴത്തെതുപോലെ കണ്ണിൽ കരിമഷി എഴുതാതിരുന്നിട്ടില്ല ... ഇമകളിൽ പടർന്ന കണ്മഷി സൗന്ദര്യത്തിനു മാറ്റു കൂട്ടുന്നുണ്ട് നീണ്ട് ഇടതൂർന്ന മുടി വിടർത്തിയിട്ടിരിക്കുന്നു.... ഇപ്പോഴത്തെ അവളുടെ ഭാവം രൗദ്രമെങ്കിൽ ഇവിടെ നിഷ്കളങ്കമാണ് ... ഇതെന്തൊരു പരിണാമമാണ് ... അന്തിച്ചുനിൽക്കെ കയ്യിൽ അടുത്തതായി കിട്ടിയത് ഒരു സര്ടിഫിക്കേറ് ആണ്.... അപ്രിസിയേഷൻ പോലെ ഒരു കടലാസ് .. കാൻസർ രോഗികൾക്കായി മുടി മുറിച്ചു നല്കിയതിനുള്ള അംഗീകാരപത്രം ... !! ഇതുവരെ നോക്കാൻ മനസ്സു വരാതിരുന്ന അവളുടെ മുറിയ്ക്കുള്ളിൽ ഞാൻ കണ്ണുകളോടിച്ചു ... ട്രോഫികളും മെഡലുകളും ഷെൽഫിൽ ഇടമില്ലാതെ ശ്വാസം മുട്ടുന്നുണ്ട്... പുഷ്‌കിന്റെ കവിതകൾ മലർക്കെ തുറന്നു കൊണ്ട് മേശമേൽ വിശ്രമിക്കുന്നു ... പിറകിലൊരു മുരടനക്കം കെട്ടുകൊണ്ടാണ് തിരിഞ്ഞത് ... കയ്യിലൊരു ഗ്ലാസ്സ് ജീരകവെള്ളമുണ്ട്... ഒന്നും പറയാതെ ഞാൻ അതു വാങ്ങി കുടിച്ചു... "വെള്ളം ഞാൻ ചൂടാക്കിയതാണ്..." നിഷകളങ്കമായി അവളതു പറഞ്ഞപ്പോൾ എന്തെന്നില്ലാത്ത വാത്സല്യമാണ് തോന്നിയത് .... "അതെയോ... നേരത്തെ തന്ന ചായയെക്കാൾ മധുരമുണ്ട് .." ആസ്വദിച്ചു കുടിക്കുന്ന രീതിയിൽ ഞാൻ ഊറിച്ചിരിച്ചു... കളിയാക്കിയതെന്നു അവൾക്ക് തോന്നിയിരിക്കണം ...ചെറിയൊരു പരിഭവത്തോടെ അവൾ നോക്കി ... "പതിനെട്ടു വയസ്സു വരെഎങ്കിലും ഏകദേശം നാടൻ വേഷങ്ങളെ ഇഷ്ടപ്പെട്ടിരുന്ന നീ ഇത്രയും മാറാൻ കാരണം എന്താണ് ...??" അവൾ മൗനമായി നിശ്വസിച്ചു... എങ്ങനെയറിഞ്ഞുവെന്ന സംശയ ദൃഷ്ടിയോടെ നോക്കിയെങ്കിലും അതു ചോദിക്കാതെ അവൾ എന്റെ ചോദ്യത്തിനുള്ള മറുപടി തേടി... "എത്ര മറയ്ക്കപ്പെട്ടാലും കഴുകന്മാർ ശരീരം കൊത്തിവലിയ്ക്കുക തന്നെ ചെയ്യും... ശരിയല്ലേ ..??" വല്ലാത്തൊരു ഭാവത്തോടെ അവൾ എന്നെ നോക്കി ... "ദേഹത്തിന്റെ ചെറു ഭാഗമെങ്കിലും വെളിയിൽ കാണുമോ എന്നു പേടിച്ചു നടന്ന ആരുടെയും മുഖത്തേയ്ക്ക് ധൈര്യപൂർവ്വം നോക്കാനാകാത്ത ... നിങ്ങൾ സ്വപ്നം കണ്ടിരുന്ന ശാലീനതയുടെ ഒരു എക്‌സ്ട്രീം വേർഷൻ... അതായിരുന്നു ഞാനും ... ആ ശാലീനതയ്ക്കൊന്നും രക്ഷപെടുത്താനാകാത്തതാണ് ഒരു പെണ്ണിന്റെ മാനം എന്നത് ഞാനറിഞ്ഞത് കോളേജിൽ നിന്നും വൈകിയിറങ്ങിയ ഒരു ദിവസം ഒരുകൂട്ടം നിഷ്ട്ടൂരമായ കണ്ണുകൾക്കിടയിൽ എന്റെ ശാലീനത ഉടഞ്ഞു വീണപ്പോഴായിരുന്നു....... ഒരു നിമിഷം കൊണ്ട് ഞാൻ അപ്പോൾ ആർജ്ജിച്ചെടുത്ത എന്റെ ധൈര്യം.... അതിലാണ് എന്റെ അഭിമാനം സംരക്ഷിയ്ക്കപ്പെട്ടത് ...!!" ആ സംഭവം വീണ്ടും കണ്മുന്പിൽ കണ്ട വിധം അവൾ ആയ്ക്കുന്നുണ്ടായിരുന്നു.... അതിനു ശേഷം ഞാൻ മനസ്സിലാക്കി ഒരു പെണ്ണിന് വേണ്ടത് അണിഞ്ഞൊരുങ്ങാനുള്ള കഴിവും വച്ചുവിളമ്പാനുള്ള നൈപുണ്യവും മാത്രമല്ല എന്നു അതിനേക്കാൾ പ്രതികരിയ്ക്കാനുള്ള ശേഷി ആണെന്ന്... ഈ വേഷത്തിൽ നിങ്ങൾ കാണുന്ന വൃത്തികേടുകൾ എന്തെന്ന് എനിയ്ക്കറിവില്ല ....പക്ഷെ എന്നെപ്പോലുള്ള പെണ്കുട്ടികൾക്ക് ഇതൊരു ധൈര്യമാണ്... എത്രയേറെ ധൈര്യമുള്ളവളെന്നു പറഞ്ഞാലും വീറുള്ള ഒരു പുരുഷനോളം വരുക എന്നത് അസാധാരണം ... അതുകൊണ്ടു പുരുഷ വേഷമെങ്കിലും എനിയ്ക്കൽപ്പം ധൈര്യം തരട്ടെ..... ഇതെന്റെ നയമാണ്..... ധൈര്യമുള്ള പെണ്കുട്ടികളും ഉണ്ട് കേട്ടോ..." അവൾ ഉറക്കെ പൊട്ടിച്ചിരിച്ചു.... "ഒരർഥത്തിൽ നേരാം വിധം ധരിയ്ക്കാൻ അറിയില്ലെങ്കിൽ ഏതു വേഷവും വിരസ്സമാണ് ....അതിലേറ്റവും വിരസ്സമാക്കാൻ സാധിയ്ക്കുന്നത് താങ്കൾ ഈ പറയുന്ന ശാലീനതയുടെ വേഷം തന്നെയാണ്..." അവൾ പതിയെ കണ്ണട മുഖത്തു നിന്നടർത്തി... ഞാൻ കണ്ണിമയ്ക്കാതെ അവളെ നോക്കിയിരുന്നു ... "പിന്നീടായിരുന്നു പാഠപുസ്തകങ്ങളിൽ നിന്നും വിട്ട് സമൂഹപുസ്തകങ്ങളെ പാഠമാക്കാൻ തുടങ്ങിയത്... എന്റെ ശരീരത്തിൽ നിന്നും ജീവിച്ചിരിക്കെ എനിയ്ക്ക് നൽകാൻ കഴിയുന്നത് എന്റെ മുടിയായിരുന്നു... ഒരർഥത്തിൽ എന്റെ ജീവൻ പോയത് പോലെ തന്നെയായിരുന്നു പക്ഷെ തല മുണ്ഡനം ചെയ്ത കണക്കെയുള്ള... കീമോയുടെ വേദന തിന്നുകൊണ്ടിരുന്ന.. ഒരു അർബുദ രോഗിയ്ക്ക് ഞാൻ ജീവൻ ദാനം ചെയ്യുകയായിരുന്നു എന്നത് അവളുടെ പുഞ്ചിരിയിൽ നിന്നാണ് ഞാൻ അറിഞ്ഞത് ...ഇതു കണ്ടില്ലേ ... ??" അവൾ ജീൻസിന്റെ അടിവശം മുകളിലേയ്ക്ക് ചുരുട്ടി വച്ചു ... കാലുകളിൽ തിണർത്ത ചില കറുത്ത പാടുകൾ... "ഹെയർ ഡോണഷൻ കഴിഞ്ഞു വീട്ടിലേയ്ക്ക് വന്നപ്പോൾ അമ്മ സമ്മാനിച്ചതാണ് ... കാരണം അറിഞ്ഞപ്പോഴേയ്ക്കും അടിയുടെ പാടുകളും തണുത്തു തുടങ്ങിയിരുന്നു...." അവൾ മന്ദഹസിച്ചു... "നിങ്ങൾ വിചാരിയ്ക്കുന്നുണ്ടാകും... ഞാൻ എല്ലാ പുരുഷഭാഗത്തിന്റെയും വിരോധിയാണെന്നു..... ഒരിയ്ക്കലുമല്ല... ഫെമിനിസ്റ്റ് എന്നാൽ പുരുഷ വിരോധി എന്നല്ല അർത്ഥം... സ്ത്രീ സ്വാതന്ത്ര്യത്തെ കുറിച്ചു ചിന്തിയ്ക്കുന്ന അതിനു വേണ്ടി പോരാടുന്നവൾ എന്നാണ്... കറുത്ത വട്ടക്കണ്ണടയും മുകളിലേയ്ക്ക് കെട്ടിപ്പൊക്കിയ ജട തൂങ്ങിയ മുടിക്കെട്ടും പതിനാലു സെക്കന്റ് ഒരു പുരുഷൻ തുടർച്ചയായി നോക്കിയാൽ പീഡനം എന്നു മുദ്രകുത്തുന്ന ഫെമിനിസം എനിയ്ക്ക് വശമില്ല... ഒരുവളുടെ സ്വതന്ത്ര ചിന്ത അതു മാത്രമാണ് എന്റെ ഫെമിനിസം..." അക്ഷരങ്ങളെ ശരവേഗത്തിലാണ് അവൾ നിരത്തുന്നത്... 'എന്നുകരുതി ഒന്നു പ്രസവിച്ചാൽ ഉടനെ എന്റെ ശരീരം ഉടഞ്ഞേക്കാമെന്നു ആധി പിടിയ്ക്കാനും എന്റെ രക്തത്തിനു അമ്മിഞ്ഞ നല്കാതിരിക്കാനും മാത്രം അധഃപതിച്ചവളുമല്ല ..." അതു പറയുമ്പോൾ അവൾ എനിയ്ക്ക് നേരെ തിരിഞ്ഞിരുന്നു... "ഇതെന്റെ മൂന്നാമത്തെ പെണ്ണുകാണലാണ്..താങ്കളുടേത് അദ്ദ്യത്തേതാണെന്നു അറിഞ്ഞിരുന്നു... എനിയ്ക്കു വലിയ പ്രതീക്ഷയും ഇല്ല .... " അതു പറയുമ്പോഴും അവളുടെ മിഴികളിൽ ഒരു നിരാശ ബാധിച്ചിരുന്നുവോ... ഒന്നും മിണ്ടാതെ ഞാൻ മുറിയിൽ നിന്നിറങ്ങവെ അവൾ പിറകിൽ നിന്നു പറയുന്നുണ്ടായിരുന്നു.... " ഇഷ്ടമായിട്ടില്ല എന്നു എന്റെ അച്ഛനോട് പറയരുത്... അദ്ദേഹത്തിന് വിഷമമാകും... ഞാൻ പതിയെ പറഞ്ഞു മനസ്സിലാക്കിക്കോളം..." അവൾ നോട്ടം ജനലിനു പുറത്തേയ്ക്ക് പായിച്ചു .... "സ്വതവേ ഞാൻ അൽപ്പം ധൈര്യം കുറവുള്ള കൂട്ടത്തിലാടോ... എന്റെ കുട്ടികൾക്കെങ്കിലും കുറച്ചു ധൈര്യം കിട്ടണം എന്നുണ്ടെങ്കില് എനിയ്ക്ക് ഇങ്ങനെ ഒരു ഫെമിനിസ്റ്റിനെ തന്നെ കൂടെ കൂട്ടിയല്ലേ കഴിയൂ..." അവിശ്വസനീയതയോടെ അവൾ എന്റെ നേരെ മുഖമുയർത്തിയപ്പോൾ ഞാൻ നേർത്ത മന്ദഹാസത്തോടെ കൂട്ടിച്ചേർത്തു ... " എന്നും രാവിലെ ചായ കുടിച്ചു ഞാനും മടുത്തേടോ... ജീരകവെള്ളം എങ്ങനെയുണ്ടാകും...??" എന്റെ ചോദ്യം മുഴുമിപ്പിക്കയ്ക്കുന്നതിനു മുൻപേ അവളുടെ ചുണ്ടിൽ നാണം പുരണ്ടിരുന്നു..... (എന്റെ വ്യക്തിപരമായ ആശയങ്ങളെ കുറിച്ചാണ് ഇവിടെ ഒരു പെണ്കുട്ടി പറയുന്നുവെന്ന രീതിയിൽ പറഞ്ഞത്..ഫെമിനിസം എന്റെ അറിവിൽ ഇങ്ങനെയാണ്... ഒരു പെണ്കുട്ടി എങ്ങനെയാകണം എന്നു ഇവിടെ പറഞ്ഞിരിക്കുന്നതും എന്റെ ഒരു കാഴ്ചപ്പാടാണ്...അഭിപ്രായങ്ങൾ സദയം തുറന്നു പറയുക ഞാൻ അതിനെ വിലമതിയ്ക്കുന്നു... 😊) രചന : ലച്ചൂട്ടി ലച്ചു
4.6k views
3 days ago
#

📔 കഥ

" അമ്മു കണ്ണനുള്ളതാണ്"... സ്വന്തം പേര് മനസ്സിൽ ഉറയ്ക്കാറായ കാലം തൊട്ടേ ഉള്ളിൽ പതിഞ്ഞതാണീ വാക്കുകൾ. അമ്മു, കണ്ണേട്ടന്റെ അമ്മൂട്ടീ. അച്ഛന്റെ ഉറ്റ സുഹൃത്തിന്റെ മോളാണ്. അറ്റു പോകാത്തൊരു സൗഹൃദത്തിന് വേണ്ടി കാലങ്ങൾക്ക് മുന്നേ ഊട്ടിയുറപ്പിച്ചൊരു ബന്ധം. എന്നേക്കാൾ ഒരു വയസ്സ്മാത്രമിളയവൾ. പ്രണയമെന്ന വികാരമെന്തെന്നു അറിയുന്നതിന് മുന്നേ പ്രണയിച്ചു തുടങ്ങിയവരാണ് ഞങ്ങൾ. എന്റെ, എന്റെ, എന്റേതെന്നു ഒരായിരം വട്ടം മനസ്സിൽ ആഞ്ഞു പതിപ്പിച്ചത് കൊണ്ടാവാം ഒരു നിഴല് പോലെ അവളുടെ ഒപ്പമുണ്ടായിരുന്നു ഞാൻ എപ്പോഴും. ഭഗോതി കാവിലെ മഞ്ചാടി മരത്തിലെ കാ പെറുക്കാനും, അപ്പൂപ്പൻ താടി മരത്തിന്റെ ചില്ലയുലയ്ക്കാനും, അമ്പലക്കുളത്തിൽ ആമ്പൽ മൊട്ടു പറിക്കാനും ഞാനായിരുന്നു അവളുടെ പങ്കാളി. അവളുടെ കണ്ണൊന്നു ഈറൻ കൊണ്ടാൽ തകരുന്നതെന്റെ ഹൃദയമായിരുന്നു. ആദ്യമായ് അവളിത്തിരി പൊന്നണിഞ്ഞ നാളിൽ കാറി കരഞ്ഞത് നാലു മിഴികളായിരുന്നു. കളിക്കളത്തിലെ അക്കു കൊണ്ടവളുടെ ഉള്ളം കാലിലൊരിത്തിരി ചോര പൊടിഞ്ഞപ്പോൾ ഉള്ളു നീറിയതെന്റെയായിരുന്നു. വീട്ടിലും നാട്ടിലും എന്റെ വലം കയ്യിൽ ഇടം കൈ ചേർക്കാതെ അവളെ കാണാൻ പറ്റില്ലെന്നായി. സ്കൂളിൽ പോക്കു കൂടി തുടങ്ങിയതോടെ ഞങ്ങളുടെ ലോകം കുറേ കൂടി വിശാലമായി. മാനം കാണാത്ത മയിൽപ്പീലി തുണ്ടും, മണക്കുന്ന മായ്ക്കു റബ്ബറും ഒക്കെ ഞങ്ങളുടെ ഇടയിൽ സ്ഥാനം പിടിച്ചു. ഒപ്പം ചുറ്റും കുറേ കൂട്ടുകാരും. അവിടെയും എനിക്ക് പുതുമ അമ്മൂട്ടിയുടെ നീട്ടി വളർത്തിയ മുടിയും പാൽ പല്ല് പോയ മോണ കാട്ടിയുള്ള ചിരിയും കൊഞ്ചല് നിറഞ്ഞു നിൽക്കുന്ന കണ്ണേട്ടാ എന്നുള്ള വിളിയുമായിരുന്നു.. തെല്ലു നേരത്തെ ഇടവേളകളിൽ പോലും ഞങ്ങൾ കളിക്കൂട്ടുകാർ ഓടിയിരുന്നത് തൊട്ടടുത്തുള്ള ഭഗോതി കാവിലേക്കാണ്. നിറയെ പടികളുള്ള അമ്പല കുളവും ഇലഞ്ഞിയും മന്ദാരവും പൂത്തു നിൽക്കുന്ന കാവും അതിന്റെ പരിസരങ്ങളുമായിരുന്നു ഞങ്ങളുടെ കളിത്തട്ടു. വർഷങ്ങൾ നിമിഷങ്ങളായ് പറന്നു പോയ കാലം, ജീവിതം ബാല്യത്തിന്റെ അവസാന പടിയിലേയ്ക്ക് എത്തി നോക്കുകയാണ്. അമ്മൂന്റെ ഇളയ ആളുടെ ഒന്നാം പിറന്നാളായിരുന്നു അന്ന്. രണ്ടു തറവാട്ടിലെയും ചെറുതല്ലാതൊരാഘോഷം. കുട്ടികളുടെ കുസൃതിയേറുന്നത് കണ്ടാണ്‌ ചെറിയമ്മാമ പറഞ്ഞതു പുറത്തേയ്ക്കു പോയി കളിക്കാൻ. തുലാമഴ പെയ്തൊഴിഞ്ഞൊരു വൈകുന്നേരമായിരുന്നു അതു. അമ്പല കുളത്തിലെ നീർക്കോലികൂട്ടങ്ങളെ കല്ലെറിഞ്ഞിരുന്ന നേരത്താണ് കണ്ണു പൊത്തി കളിക്കാമെന്നു അമ്മൂട്ടീ കൊതി പറഞ്ഞത്. എണ്ണിത്തിരിച്ചപ്പോൾ ആദ്യമൂഴവുമായി കുളത്തിന്റെ പൊതിഞ്ഞ മതിലിന്റെ അപ്പുറം മുഖം ചേർത്തുവച്ചു ഞാൻ ഉറക്കെ ചൊല്ലി തുടങ്ങി. ഒന്നേ.. രണ്ടേ.. മൂന്നേ ... ഒരു കുഞ്ഞി പദസരത്തിന്റെ കിലുക്കമെന്റെ കാതിൽ നിന്നും അകന്നു പോകുന്നത് ഞാനറിയുന്നുണ്ടായിരുന്നു.. അൻപതെണ്ണി കഴിഞ്ഞിട്ടും, കൂടെയുള്ള എല്ലാവരെയും സാറ്റടിച്ചിട്ടും. ആ കിലുക്കക്കാരിയെ മാത്രം കണ്ടെത്താനായില്ല. വിളികൾ ഏറ്റു വിളികളായി, നിലവിളികളായി. ഒരു നാടുമൊത്തമതിന്റെ അലകളുയർന്നു. സമയം പൊയ്ക്കൊണ്ടേയിരുന്നു.. ഒരു പകലുറങ്ങിയെഴുന്നേറ്റു . കുളത്തിലെ നീർക്കോലിക്കൂട്ടങ്ങൾക്കിടയിൽ നിന്നും ഒരു കുഞ്ഞുടുപ്പു പൊങ്ങി വരുന്നത് കണ്ടത് ഞാൻ തന്നെയായിരുന്നു. ആരൊക്കെയോ ചേർന്നത് കോരിയെടുക്കുമ്പോൾ എന്റെ അമ്മൂന്റെ കുഞ്ഞു ദേഹമതിൽ വെളുത്തു വിളറിയിരുന്നു. കണ്ണുകൾ രണ്ടും മിഴിച്ചിരുന്നു. തൊണ്ടക്കുഴിയിൽ എന്തോ കുടുങ്ങിയ പോലെ, ഒരു പക്ഷേ കണ്ണേട്ടാ എന്നൊരു വിളിയായിരുന്നുവോ അത്‌. ? കണ്ണടച്ചു നിന്ന നേരം ആ ഉയർന്ന മതിലിനപ്പുറം എന്റെ പ്രാണൻ പിടിയുന്നുണ്ടായിരുന്ന ചിന്തയിൽ ആ കൗമാരക്കാരൻ, ഈ ജന്മമവളുപേക്ഷിച്ചു പോയ പാദസര മണികളിൽ താളമടിച്ചു ഉറക്കെയുറക്കെ ചൊല്ലി കൊണ്ടിരുന്നു. ഒന്നേ.. രണ്ടേ... മൂന്നേ.. പിന്നെ തെല്ലൊന്നു കാതോര്ക്കും ഒരു നിലവിളി ശബ്ദം കേൾക്കുന്നുണ്ടോയെന്ന്. അതേ, . ചിലതാളത്തിനൊത്തു എന്റെ മനസ്സിന്റെ താളവും തെറ്റുകയായിരുന്നു... എന്റെ ഓർമ്മകളുടെ ഭാണ്ഡങ്ങളെല്ലാം പൂട്ടി കെട്ടി എന്റെ വീട്ടുകാർ നാടുപേക്ഷിച്ചു. പക്ഷേ, രാത്രികാലങ്ങളിൽ എന്റെ സ്വപ്നങ്ങളിൽ പലവുരു ഒരു നിശ്വാസം കടന്നു വന്നെന്നെ വീർപ്പുമുട്ടിച്ചുകൊണ്ടേയിരുന്നു.. ദൂരമേറെ സഞ്ചരിച്ചിട്ടും കാതിലലയ്ക്കുന്ന ആ കുഞ്ഞു നിലവിളിയുടെ ഉത്തരം തേടിയാണ് കാലത്തിനിപ്പുറം ഞാനേ കുളപ്പടവിലിരിക്കുന്നതു. ഏറെമാറ്റങ്ങളൊന്നുമില്ലാത്തൊരു ഭഗോതിക്കാവിനു പക്ഷേ, ഒരു കുറവ് പോലെ. മഞ്ചാടി മരത്തിന്റെ കായ്കൾക്ക് ഭംഗി കുറഞ്ഞിട്ടുണ്ട്. അപ്പുപ്പൻ താടി മരത്തിനുമുണ്ടൊരു വാട്ടം. അടയാളം കൊണ്ട് മാത്രമവളുടെ എന്നടയാളപ്പെടുത്തിയ അസ്ഥി തറയിൽ അന്നാ സന്ധ്യയിൽ എന്റെ വലം കൈയാലൊരു വിളക്ക് തെളിഞ്ഞപ്പോൾ ഞാൻകണ്ടു ഭഗോതി കാവിലൂടെയൊരു കാറ്റുവന്നെന്നെ തഴുകുന്നത്. അതിന്റെ സ്വരമപ്പോൾ ഏങ്ങലടിയായിരുന്നില്ല. മറിച്ച്, ഒരു ജന്മനിർവൃതിയുടെ നിശ്വാസമായിരുന്നു. കാത്തിരുന്നതെന്തോ കൈ വന്ന പോലെ. അസ്ഥിതറയിലെ നാളത്തിനപ്പോൾ ശോഭയേറെയായിരുന്നു. അനു അഞ്ചാനീ..
1k views
3 days ago
#

📔 കഥ

#പവിത്രം ഹേയ് മിസ്റ്റർ ഇനീം എന്നെ വായിൽനോക്കി വെള്ളമിറക്കിയാൽ ഞാനെന്റെ ഭർത്താവിനോട് പറഞ്ഞ് കൊടുക്കും, തനിക്ക് നാണമില്ലേടോ മറ്റൊരുത്തന്റെ ഭാര്യയെ വായിൽ നോക്കി നിൽക്കാൻ അത്ര മുട്ടുന്നുണ്ടേൽ ഒന്നൂടെ പോയി പെണ്ണ് കെട്ടിക്കൂടെ ? ങെ ! ശബ്ദം കേട്ട് ഞാനൊന്നു ഞെട്ടി നാലുപാടും നോക്കിയ ശേഷം , ഇതെവിടുന്ന് വന്ന് ആകാശത്തൂന്നോ ' എന്ന ഭാവത്തിൽ തല ചൊറിഞ്ഞ് കണ്ണുകൾ ഒരു കിലോമീറ്റർ പുറത്തേക്കിട്ട് അവളെ അടിമുടി ഒന്ന് നോക്കി , ശരീരത്തിൽ ഒരു ജ്വല്ലറിയിലുള്ള സ്വർണ്ണം മുഴുവൻ ഇട്ടോണ്ട് എന്റെ വീടിന്റെ ബാൽക്കണിയിൽ ഇടുപ്പിൽ ' കൈവെച്ച് ഒരു പെണ്ണ് നിൽക്കുന്നു, റബ്ബേ ! ഈ ജെന്തു ഏതേലും കല്യാണ വീട്ടീന്ന് ഒളിച്ചോടിയതാവോ.? എഫ്ബി യിൽ ലൈനടിച്ച സകല പെണ്ണുങ്ങളുടെയും മുഖം മനസ്സിൽ മിന്നിമറിഞ്ഞു വരുന്നുണ്ട് പക്ഷേ ഈ മുഖം മാത്രം മോണിറ്ററിൽ ലിങ്ക് ആവുന്നില്ലന്ന് കണ്ടപ്പോൾ ആരാ എവിടുന്നാ എന്ന ആക്ഷൻസ് കയ്യിൽ കാണിച്ചു തിരിച്ച് ഞാൻ ഒരു ചോദ്യം അങ്ങോട്ടും പാസാക്കി ! എന്തൂട്ട് ? (പുട്ടിന് പീര ചേർക്കുന്ന പോലെ അവൾ മറുപടി തുടർന്നു ) താനെന്താടോ പൊട്ടനാണോ മലയാളം പറഞ്ഞാൽ മനസ്സിലാവില്ലേ ? ഇനി എന്നെ വായിൽ നോക്കിയാൽ എന്റെ ഭർത്താവിനോട് പറഞ്ഞു കൊടുക്കുമെന്ന്! അയ്ന് ഇങ്ങളേതാ പെണ്ണും പിള്ളേ.? ഞാനിത് വരെ കണ്ടിട്ടില്ലല്ലോ! അയ്യട!! നമ്പർ വേണ്ട മോനെ സാഹിർക്കാ ഇങ്ങൾ ഈ ബാൽക്കണിയിൽ ഇരുന്ന് ലൈനടിക്കുവാണന്ന് എനിക്കറിയാം അങ്ങോട്ട് നോക്കി ഇവിടെ കസേരയിൽ ഇരിക്കുന്നത് ഞാൻ എന്നും കാണാറുണ്ട് , ഞാനേയ് അപ്പുറത്തെ വീട്ടിലെ നിസാമിന്റെ ഭാര്യ' ഫഹദ , പിന്നെ നിങ്ങളുടെ അനിയത്തി മിനിഞ്ഞാന്നു അവിടെ എന്നെ പരിജയപ്പെടാൻ വന്നിരുന്നു, താൻ ആള് ശെരിയല്ല ബാൽക്കണിയിൽ വരുന്നത് എന്നെ ലൈനാക്കാനാണ് എന്നൊക്കെ അവൾ പറഞ്ഞു തന്നു.! അടിപ്പാവി ! ആ എട്ടാം ക്ലാസിൽ പഠിക്കുന്ന കുരിപ്പ് പറഞ്ഞതും വിശ്വസിച്ച് ചോദിക്കാൻ വന്നതാണോ , അവൾ' വെറുതെ പറയുന്നതാ, ഈ നാട്ടിലെ സകല പെണ്ണുങ്ങളോടും ഇത് പോലെ എന്റെ കുറ്റം പറഞ്ഞ് കൊടുത്ത് ശത്രുവാക്കിയതാ , ബാക്കി അവൾ സ്കൂൾ വിട്ട് വരട്ടെ കൊടുത്തോളാം എന്ന് പറയുമ്പോഴാണ് എന്റെ ഉമ്മിയും അവളുടെ അമ്മായിയമ്മ സഫിയാത്തയും മുകളിലേക്ക് കയറി വന്നത് .! ( രണ്ടാഴ്ചമുൻപ് അയൽവീട്ടിലേക്ക് കല്യാണം കഴിച്ച് കൊണ്ടുവന്ന മരുമകളാണ് ഫഹദ , എന്റെ വീട്ടിൽ ഉമ്മീനേം മറ്റും പരിജയപ്പെടുത്താനും വീട് ചുറ്റി കാണാനും അയൽവാസിയും ഫഹദയുടെ അമ്മായിയമ്മയുമായ സഫിയ ഇത്ത കൊണ്ടുവന്നപ്പോൾ വീട് കാണാനെന്ന വ്യാജേന ബാൽക്കണിയിൽ ഇരുന്ന് ഉമ്മി കാണാതെ സിഗറേറ്റ് വലിക്കുന്ന എന്റെ അടുത്ത് വന്നതായിരുന്നു അവൾ ! ഞങ്ങളുടെ നാട്ടിൽ ഒരു ചടങ്ങുണ്ട്, ഇനി അത് എല്ലാ നാട്ടിലും ഉണ്ടോ എന്നറിയില്ലപ്പാ , മറ്റൊരു ദേശത്ത് നിന്നും കല്യാണം കഴിഞ്ഞ് ഞങ്ങളുടെ നാട്ടിലെത്തുന്ന വധു വരന്മാരെ അയൽ വീടുകളിൽ പരിജയപ്പെടുത്താൻ കൊണ്ടു പോകുന്ന ചടങ്ങ്, സഫിയാത്ത ഉമ്മീന്റെ മുന്നിൽ പത്രാസ് കാണിക്കാൻ കിട്ടിയ അവസരം മുതലെടുത്ത് ഉള്ള സ്വർണ്ണം മുഴുവനും ഇടീച്ച് തൃശ്ശൂർ പൂരത്തിന് ആനയെ എഴുന്നള്ളിക്കുന്ന പോലെയാ ആ പാവത്തിനെ പരിജയപ്പെടുത്താൻ കൊണ്ടുവന്നത് ) സ്റ്റപ്പ് കയറി വരുന്ന ഉമ്മിയേ കണ്ടപ്പോൾ ഡോ ടീച്ചറുമ്യേ ! ഇങ്ങടെ കുരുത്തം കെട്ട മോള് ഐഷൂട്ടി ഇവളോടും എന്റെ കുറ്റം പറഞ്ഞീന് എന്ന് പറഞ്ഞതും ഉമ്മി ചിരിച്ചു! ശേഷം ഫഹദയേയും കൊണ്ട് വീട് മുഴുവൻ കാണിച്ചു കൊടുത്തും സൊറപറഞ്ഞും അവർ ഡ്യൂട്ടി ആരംബിച്ചു, കൂട്ടത്തിൽ പെരുന്നാൾ കച്ചവടം കഴിഞ്ഞ കോഴിക്കോട് മുട്ടായി തെരുവ് പോലെ അത്ര വൃത്തിയുള്ള എന്റെ റൂമും ഷെൽഫിൽ അടുക്കി വെച്ച പുസ്തകങ്ങളും ഡയറികളും മറ്റും അവൾ യുദ്ധഭൂമിയിലെന്ന പോലെ കൗതുകത്തോടെ നോക്കിയിരുന്നു, ആ സമയം ഞാൻ താഴെ ഇറങ്ങി കാളവണ്ടി പോലുള്ള എന്റെ കാറ് കഴുകാൻ തുടങ്ങി, ചായ സൽക്കാരം കഴിഞ്ഞ് ഉമ്മീം സഫിയാത്തയും ചേർന്ന് ഫഹദയുടെയും കുടുംബത്തിന്റേയും സ്വഭാവ സുവിഷേശതകളും, സ്ത്രീധനത്തിലെ കുറവും മറ്റും പോസ്റ്റ്മോർട്ടം നടത്തുന്ന ജോലിയിൽ ഏർപ്പെട്ടപ്പോൾ ! ഫഹദ പുറത്ത് കാറ് കഴുകുന്ന എന്റെ അരികിൽ വന്നു ചോദ്യങ്ങളുടെ ഭാണ്ഡകെട്ടുകൾ വീണ്ടും അഴിച്ചു., ഇങ്ങള് ആള് കൊള്ളാലോ കാക്കാ, ഭയങ്കര സംഭവമാണല്ലേ ! കുത്തഴിഞ്ഞ ജീവിതവും , ചുരുളഴിയാത്ത ചിന്തകളും എന്ന തലക്കെട്ടിൽ ഡയറിയിൽ എഴുതിയ കവിത കൊള്ളാം, സത്യത്തിൽ ഇങ്ങക്ക് പിരാന്ത് തന്നെയാണന്ന് റൂം കണ്ടപ്പോൾ മനസ്സിലായി., വെറുതെയല്ല അനിയത്തി ഇങ്ങടെ അടുത്തേക് ആരേം അടുപ്പിക്കാത്തത് ലെ , ഓഹ് ,, ത്യാങ്ക്സ് ട്ടാ ! നീ റൂമിൽ കയറി ഡയറിയും മറിച്ച് നോക്കിയോ.? ഏതാ നിന്റെ രാജ്യം.? എന്ന് ചോദിച്ച് ഞാൻ വീണ്ടും കാറ് കഴുകാൻ തുടങ്ങി , ഇന്റെ നാട് കുറ്റിപ്പുറം, ഇങ്ങക്ക് ഈ പൊട്ടക്കാറ് മാറ്റി വല്ല ബി എമ്മും എടുത്തൂടെ.? ങെ! പിന്നെ അതിനെന്താ, ബി എമ്മ് എടുക്കാലോ ഇയ്യ് ആസ്വർണ്ണം മുഴുവൻ ഊരി തന്നാൽ മതി അയ്യട മോനെ അത് ഇച്ചിരി പുളിക്കും , ഇത്രം സ്വർണം എന്റെ ബാപ്പച്ചി കൊടുത്തിട്ടും പോരാന്ന് പറഞ്ഞ് മുഖം വീർപ്പിച്ച് ഇങ്ങടെ ഉമ്മീനോടും ഞങ്ങളുടെ കുറ്റം പറഞ്ഞു കൊടുക്കുന്നുണ്ട് എന്റെ അമ്മായിയമ്മ തള്ള ഹ ഹ ഹ ഞാനൊന്നു ചിരിച്ചു, ഇങ്ങള് ചിരിക്കണ്ട ഇങ്ങളെ പെങ്ങളെ കെട്ടിക്കുമ്പോൾ അറിയാം അതിന്റെ പ്രയാസം, അല്ല ഇക്കാ ഇങ്ങളെ ബീവി എന്തിനാ പിണങ്ങി പോയത് ഇങ്ങള് ഈ അന്തം കുന്തവുമില്ലാതെ എഴുതുന്നത് കൊണ്ടാണോ..? ടീ പുത്യണ്ണേ ! ഇയ്യ് ഓനേം കെട്ടി കുറ്റീം പറച്ച് വന്നത് എന്നെ മക്കാറാക്കാനാണോ.! എന്റെ ഭാര്യ പോയത് അതിനൊന്നുമല്ല എന്ന് പറയുമ്പോഴേക്കും ഫഹദ ഇടക്ക് കയറി സംസാരിച്ചു വേണ്ടക്ക അതും എനിക്കറിയാം ഐഷുവും എന്റെ നാത്തൂനും എല്ലാം എന്നോട് പറഞ്ഞിരുന്നു., ഐഷൂട്ടിയെ ബാത്റൂമിലെ ലൈറ്റ് ഓഫ് ചെയ്യാൻ മറന്നതിന്റെ പേരിൽ തല്ലി ചുമരിൽ തലയടിച്ച് ചോര വന്നപ്പോൾ ഇങ്ങള് ദേഷ്യപ്പെട്ട് വഴക്കായതിന്റെ പേരിൽ ആണന്നറിയാം ചെറ്യേ കുട്ടികളെ അവൾ ഇങ്ങനെ തല്ലാൻ പാടുണ്ടോ, സാരല്യ ഇക്ക അവളോട് പോവാൻ പറ അഹങ്കരി , ഞാനൊന്നു മൂളി ! ശ്ശോ ഇങ്ങളൊരു മുത്താണ് ' എന്നെ ഇങ്ങക്ക് വന്ന് കെട്ടിക്കൂടാർന്നോ എനിക്ക് ഈ വട്ടൊക്കെ വല്യ ഇഷ്ടാന്നേ എന്ന് പറഞ്ഞ് വാ പൊത്തി ചിരിച്ചു., ഞാൻ പുച്ഛഭാവത്തിൽ ഒന്ന് നോക്കുക മാത്രം ചെയ്തു ശേഷം ജോലി തുടർന്നു., അല്ലിക്കാ ഐഷൂട്ടി എന്തിനാ എന്നോട് അങ്ങനെ പറഞ്ഞത്..? അതോ ! അവളുടെ കഴിഞ്ഞ ബർത്ത്ഡേക്ക് വീട്ടിൽ വന്ന ഫ്രണ്ട്സിനോട് അവൾ ഏഴ് വയസ് വരെ കിടക്കയിൽ മുള്ളിയ കഥ പറഞ്ഞ് കൊടുത്തതിന് , പിന്നെ ഏഴാം ക്ലാസിൽ പഠിക്കുമ്പോൾ തെന്നി വീണ് മുൻനിരയിലെ പല്ല് പോയിരുന്നു., നിന്റെ അമ്മായിയപ്പൻ ഇല്ലേ കുഞ്ഞിപ്പ ഹാജി മൂപ്പര് തൊണ്ണീമാ (പല്ലില്ലാത്തവൾ ) എന്ന് വിളിച്ച് കളിയാക്കിയിരുന്നു, മൂപ്പർക്കും പല്ലില്ലല്ലോ ,വെപ്പ് പല്ലല്ലേ കുഞ്ഞിപ്പാജീം ഐഷൂട്ടിയും ലൈനാണന്നും രണ്ടാളും വെപ്പ് പല്ല് വെച്ചവരാണ് എന്നും ഞാൻ അവളുടെ ഫ്രണ്ട്സിനോട് പറഞ്ഞു കൊടുത്തു., അവരത് സ്കൂളിൽ പാട്ടാക്കി കളിയാക്കി ചിരിച്ചു അയിനാണ്., ഫഹദ ഒന്നൂടെ ചിരിച്ചു കഷ്ടണ്ട്ട്ടോ അവൾ ചെറ്യേ കുട്ടിയല്ലേ ഇങ്ങനെ കളിയാക്കുന്നതെന്തിനാ.? അയ്യട !! ചെറ്യേ കുട്ട്യോ ആര് ആ കുരിപ്പോ അവൾക്ക് ബർഗർ വാങ്ങി കൊടുക്കാത്തതിന്റെ ദേഷ്യത്തിൽ എന്റെ റൂമിൽ വന്ന് ഷെൽഫിൽ അടുക്കി വെച്ച പുസ്തങ്ങളിൽ വായിക്കാൻ അടയാളപ്പെടുത്തിയ പുസ്തകം എടുത്ത് അടയാളപ്പെടുത്തിയതിന് ശേഷമുള്ള പേജുകൾ മാത്രം പറിച്ചെടുത്ത് വിമാനം പറത്തിക്കളിക്കുന്ന അവളേ പിന്നെ ഞാനെന്ത് വേണം ..? അതിനാണോ അവൾ ഇങ്ങനെ പ്രതികാരം ചെയ്യുന്നത്..? അതിനും കൂടിയാണ് ! ഒരു വല്യ കാരണം വേറെയുണ്ട് ' ആകാംശയുടെ കുന്നിൻ മുകളിൽ കയറിയ ഭാവത്തിൽ ഫഹദ ഒന്നൂടെ അരികിലേക് വന്ന ശേഷം അതെന്താപ്പാ ആ കഥ എന്ന് ചോദിച്ചു..? അത് പിന്നെ ! മുമ്പൊരിക്കൽ പാരൻസ് മീറ്റിംഗിന് ഉമ്മീന്റെ കൂടെ ഡ്രൈവറായി ഞാനും പോയിരിന്നു, അവള് പഠിക്കാറില്ലന്നും , കുളിക്കാറില്ലന്നും നമസ്കരിക്കാറില്ലന്നും , ചില ദിവസങ്ങളിൽ പല്ല് പോലും തേക്കാതെ ചായ കുടിക്കാറുണ്ടന്നും ആ സഭയിൽ ഞാൻ ഉറക്കെ വിളിച്ച് പറഞ്ഞു, അത് കേട്ട് എല്ലാവരും ഉറക്കെചിരിച്ചു, ഹ ഹ ഹ അതിന് ശേഷം അവൾടെ സ്കൂളിലെ ഒരു മിസ്സിനെ ഞാൻ ലൈനടിച്ച് വീഴ്ത്തി ഫ്രണ്ടാക്കി , അവളോട് ദിവസവും ചാറ്റുമ്പോൾ ഇവളുടെ കുറ്റം പറഞ്ഞു കൊടുക്കും, ഇപ്പോൾ ആ മിസ്സ് അവളെ സ്കൂളിൽ അനങ്ങാൻ സമ്മതിക്കാറില്ല , അവിടെ നടക്കുന്നത് എന്നോടും ,ഞാൻ ഉമ്മീനോടും പറയും അവൾക്ക് ഇടക്ക് രണ്ടണ്ണം കിട്ടും , ഇത്രയേ ഞാൻ ചെയ്തുള്ളൂ അതിനാണ് അവൾ എന്നെ കുറിച്ച് കുറ്റം പറഞ്ഞ് നടക്കുന്നത്! അമ്പട വീരാ ഇത്രയൊക്കെ ഒപ്പിച്ചിട്ടും അവൾ നിങ്ങളെ കൊല്ലാതെ വിട്ടത് തന്നെ ഭാഗ്യം , ഞാനാണേൽ ഇങ്ങളേം കൊന്ന് ജയിലിൽ പോയെനെ എന്ന് പറഞ്ഞ് ചിരിച്ചു, അവൾടെ സ്കൂൾ ബസ്സ് വരാറായി, ഇന്ന് ക്ലാസ് ടെസ്റ്റിൽ മാർക്ക് കുറവാണന്ന് മിസ്സ് വിളിച്ച് പറഞ്ഞിട്ടുണ്ട് വരട്ടെ ബാക്കി കൊടുക്കുന്നുണ്ട് ഞാൻ എന്ന് പറഞ്ഞതും ഫഹദയുടെ മുഖത്തിന് എന്തന്നില്ലാത്ത ഒരു വിഷാദം വന്നു തുളുമ്പുന്ന പോലെ തോന്നി, നല്ല ഇക്കയും അനിയത്തിക്കുട്ടിയും , അല്ലടോ അവളെ കെട്ടിച്ചു വിട്ടാൽ നിങ്ങൾ എന്ത് ചെയ്യും തല്ല് കൂടാൻ.? ആ പഷ്ട് , അത്ര കാലം അതിനെ സഹിക്കാനോ, ഇപ്പഴേ ആർക്കേലും ദത്ത് കൊടുക്കാൻ ആളെ കിട്ടുമോ എന്ന് നോക്കുവാണ് ഞാൻ, എന്ന് പറഞ്ഞതും കരയാൻ വെമ്പി നിൽക്കുന്ന സങ്കടങ്ങൾ ആനന്ദക്കണ്ണീരിൽ കലർത്തി പുഞ്ചിയിൽ തുള്ളി തുളുമ്പി പുറത്തേക്ക് ഒഴുകി.! ന്തിനാടോ താൻ കരയണേ ..! എന്നെ കെട്ടാൻ പറ്റാത്ത സങ്കടമാണോ..? അവൾ ഒന്നൂടെ തേങ്ങിചിരിച്ചു കൊണ്ട് സ്വർണ്ണവളകൾക്കിടയിൽ മെഹന്തിയിട്ട ചിത്രകലയുള്ള കൈകളാൽ കണ്ണും മൂക്കും തുടച്ചു, ശേഷം തുടർന്നു.. ഹേയ് ഒന്നുല്യപ്പാ!! സത്യത്തിൽ എഫ്ബിയിൽ പെങ്ങളെ തേടുന്നു എന്ന ഭൂലോക കോഴികളുടെ പരസ്യങ്ങളൊന്നുമറിയാതെ സ്വന്തം പെങ്ങളോട് ആത്മാർത്ഥമായി അടി കൂടി സ്നേഹിച്ചും അവരെ സസൂക്ഷ്മം ശ്രദ്ധിച്ചും നിൽക്കുന്ന ആങ്ങളമാരാണ് ഏതോരു പെണ്ണിന്റെയും ബാല്യത്തിലേയും കൗമാരത്തിലേയും മഹാ ഭാഗ്യം! അങ്ങനെ ഒരു ആങ്ങളയുള്ള ഒരു പെൺകുട്ടിയും ആരുടെയും വലയിൽ വീഴാനും പ്രണയമെന്ന് പറഞ്ഞ് കാമ ചേഷ്ഠകൾക്ക് നടക്കുന്ന നാറികളുടെ വിശപ്പകറ്റാനുള്ള ഇരയായി മാറാനും കഴിയില്ലന്ന് ഉറപ്പാണ്., യഥാർത്ഥത്തിൽ അവളറിയുന്നുണ്ടോ ഐഷുട്ടിയുടെ ഈ പ്രായമാണ് പെൺകുട്ടികളുടെ നല്ല കാലമെന്ന് പറയുമ്പോൾ അവളുടെ കണ്ണുകളിൽ തളം കെട്ടിയ കണ്ണീർ സമ്മതമില്ലാതെ ഒഴുകി തുടങ്ങിയിരുന്നു.., റബ്ബേ !' ഇയ്യ് കരയാണോ പുത്യണ്ണേ , ഹേയ് ഞാനിങ്ങനെ എന്റെ ജീവിതം ഒന്ന് ഓർത്തു പോയതാടോ., ആഹാ ! അത് പിന്നെ ഓർക്കാം നീ ആ ചെടിയുടെ ഇടയിലെ ടാപ്പ് ഒന്ന് തിരിച്ച് വിട്ടേ സോപ്പിട്ട് കഴിഞ്ഞു ,ഇനി വണ്ടീനെ കുളിപ്പിക്കാം, ശേഷം കാറിന് മുകളിൽ പൈപ്പ് പിടിച്ച് വെള്ളം നനച്ച് തരുന്നതിനോടൊപ്പം ഞാൻ ചക്രങ്ങളിൽ ചകിരിയിട്ട് വൃത്തിയാക്കുമ്പോൾ അവൾ വീണ്ടും തുടർന്നു.! ഇങ്ങക്കറിയോ ഇക്കാ എനിക്കും ഒരാങ്ങള ഉണ്ടായിരുന്നു, ആ വീട്ടിൽ ഇങ്ങനെ ഒരു പെങ്ങളുണ്ടെന്ന് പോലും അവനറിയില്ല , എന്റെ റൂമിൽ പോലും അവൻ കയറാറില്ല, പലപ്പോഴും സങ്കടം വരുമ്പോൾ അവന്റെ റൂമിൽ പോയി അരികിൽ ഇരിക്കും, എന്തെങ്കിലും പറയാൻ ശ്രമിക്കുന്ന മുൻപ് ഒന്ന് പോയേ എന്ന് പറഞ്ഞ് എന്നെ ആ റൂമിൽ നിന്നുംആട്ടിവിടാറാണ് പതിവ്! കോളേജിൽ ആരേലും എന്തേലും പറഞ്ഞാൽ ഉമ്മയോട് വന്ന് പറയും, അവനറിഞ്ഞാൽ എന്നെ നല്ലോണം വഴക്ക് പറയും മതി പഠിക്കാൻ വിട്ടത് ,വേഗം കെട്ടിച്ച് വിടാൻ നോക്കീം എന്നൊക്കെ ഉമ്മയോടും പറഞ്ഞ് കച്ചറയാക്കും, സ്നേഹത്തോടെ ഒന്ന് മിണ്ടാറ് പോലും ഇല്ല, കല്യാണം കഴിഞ്ഞ് ഞാൻ ഇറങ്ങാൻ നേരത്ത് പോലും എന്നോട് ഒരു നല്ല വാക്ക് പറഞ്ഞില്ല, ഒന്ന് കെട്ടിപ്പിടിച്ച് കരയാൻ ശ്രമിച്ചപ്പോഴേക്കും എന്നെ കാറിൽ കയറ്റാൻ തിടുക്കം കാണിച്ച് ഫ്രണ്ട്സിന്റെ കൂടെ ഫോട്ടോ എടുപ്പിൽ മാത്രമായിരുന്നു ശ്രദ്ധ ചെലുത്തിയത് എന്ന് പറഞ്ഞ് നടുവീർപ്പിടുമ്പോഴാണ് ഉമ്മയും സഫിയാത്തയും മുറ്റത്തേക്ക് വന്നത്., റബ്ബേ ആ കുട്ടീനേ കൊണ്ടാണോ കഴുതെ ഇയ്യ് കാറ് കഴുകിക്കുന്നത് എന്ന് പറഞ്ഞ് ഉമ്മി വഴക്ക് പറഞ്ഞു., അത് സാരല്യ പാത്തോ അവൻ എന്റെ ഷാനിമോളെ കൊണ്ടും ചെയ്യിക്കാറുള്ളതല്ലേ, ഇവളും ഇവിടുത്തെ കുട്ടിയല്ലേ എന്ന് സഫിയാത്തയും പറഞ്ഞു., മോള് അത് അവിടെ ഇട്ടേക്ക് അവന് പ്രാന്താണ് , മോള് വീട്ടിലേക്ക് പൊക്കോ ഞങ്ങൾ അപ്പുറത്തെ വീട്ടിലെ റുഖ്യാത്തയേ കണ്ടിട്ട് വരാം എന്ന് എന്റെ ഉമ്മീ പറഞ്ഞു, സെഫിയാത്തയേയും കൊണ്ട് മുന്നിൽ നടന്നു പോയി, ടാപ്പ് താഴെ ഇട്ട് ഫഹദ കൈ കഴുകുന്നു, അതേ പുത്യണ്ണേ സത്യായിട്ടും ഞാൻ ബാൽക്കണിയിൽ നിന്ന് നോക്കിയത് നിന്നെയല്ലാട്ടോ , അതെനിക്കറിയാം മാഷേ , ഇങ്ങക്ക് " പ്രേമം ഞങ്ങളുടെ തൊടിയിലേ മൂവാണ്ടൻ മാവിനോടാണന്ന്, ഇങ്ങള് അതുമ്മലാ നോക്കുന്നതെന്ന് എനിക്കും മനസ്സിലായതാണ്, എന്നാ ശെരി എഴുത്തുകാരാ ഞാൻ പോട്ടെ എന്റെ കെട്ട്യോൻ വരാറായി., അവൾ തിരിഞ്ഞ് നോക്കാതെ നടന്ന് ഗേറ്റിലെത്തിയപ്പോൾ ഞാൻ വീണ്ടും വിളിച്ചു ഫഹദ ഒരു കാര്യം കൂടി ചോദിക്കട്ടെ, അവൾ ചെറുപുഞ്ചിരിയോടെ ഇമ്മേയ് , പൊന്നു മാഷേ രണ്ടാഴ്ചയായിട്ടുള്ളൂ കല്യാണം കഴിഞ്ഞിട്ട് , ഐഷൂന്റെ ടീച്ചറെ വളച്ചപോലെ വളക്കരുത്ട്ടോ ' ഇങ്ങളെ വായിലെ നാക്ക് കണ്ടാൽ ഏത് പെണ്ണും മൂക്കും കുത്തി വീണ് പോകും, ഹണിമൂണൊക്കെ പ്ലാൻ ചെയ്തതാണ് ചുറ്റിക്കല്ലിം മനുഷ്യാ എന്ന് പറഞ്ഞ് കൈകൂപ്പി, ഓ പിന്നെ ഒന്ന് പോടോ പുത്യണ്ണേ എന്ന് പറഞ്ഞ് അരികിലേക് ചെന്ന ശേഷം അതെ നീ നേരത്തേ ഒരു ചോദ്യം ചോദിച്ചില്ലേ ഐഷുവിനെ കെട്ടിച്ച് വിട്ടാൽ തല്ല് കൂടാൻ എന്ത് ചെയ്യുമെന്ന്.? അന്ന് ഐഷുവിന്റെ പോസ്റ്റ് ഞാൻ നിനക്ക് തരട്ടെ എന്ന് പറഞ്ഞതും കലങ്ങിയ കണ്ണുകളോടെ അവൾ തലയാട്ടി., പക്ഷേ ഒരു കണ്ടീഷൻ ഉണ്ട്, ഇങ്ങളെ തൊടിയിലെ ആ മൂവാണ്ടൻ മാവിൽ ഈ കൊല്ലം ആദ്യം കായ്ക്കുന്ന മൂവാണ്ടൻ മാങ്ങ എനിക്ക് തരണം ഡീൽ ഓർ നോ ഡീൽ..? കരയാൻ വെമ്പുന്ന കലങ്ങിയ കണ്ണുകളിൽ മയിൽ പീലി വിടർന്നത് ഞാനറിഞ്ഞു, നവരസങ്ങളുടെ ആ പത്താം ഭാവം കണ്ണിൽ നിറച്ച് അവളൊന്നു ചിരിച്ചു, ആ മൂവാണ്ടൻ മാങ്ങ എന്റെ പ്രിയപ്പെട്ട ഭർത്താവിന് വേണ്ടി മാറ്റി വെച്ചതായിരുന്നു ഞാൻ, ഐഷൂട്ടിയുടെ ആ പോസ്റ്റ് സ്ഥിരമാക്കാനുള്ള കൈക്കൂലിയായി അതിൽ എനിക്ക് കഴിക്കാൻ കിട്ടുന്ന കഷ്ണത്തിന്റെ പാതി ഇങ്ങൾക്കും തരാം, എന്ന് പറഞ്ഞ് തിരിഞ്ഞും മറിഞ്ഞും നോക്കാതെ നടന്ന് പോകുന്ന അവളെ ഗേറ്റിൽ ചാരി നോക്കി നിന്നു..! ശുഭം ! NB ,ബന്ധങ്ങളിൽ സ്വാർത്ഥയിൽ കലർന്ന വഞ്ചനയുടെ കഴുകൻ കണ്ണുകൾ പടി കയറിവരാത്ത കാലത്തോളം ഏതൊരു ബന്ധവും പവിത്രമായ സാഹോദര്യങ്ങളാകുന്നു., എഫ്ബിയിൽ പെങ്ങന്മാരെ തേടുന്ന പുണ്യാളന്മാരോട് മോഹൻലാൽ പറഞ്ഞ ഒരു ഡയലോഗ് ഓർമ്മപ്പെടുത്തുന്നു., ''വീട്ടിൽ സ്വർണ്ണം വെച്ചിട്ടെന്തിനു നാട്ടിൽ തേടി നടപ്പൂ '' രചന, സാഹിർ അഹമ്മദ് ..!! Sameeha Sami
1.3k views
3 days ago
Share on other apps
Facebook
WhatsApp
Copy Link
Delete
Embed
I want to report this post because this post is...
Embed Post
Share on other apps
Facebook
WhatsApp
Unfollow
Copy Link
Report
Block
I want to report because