Soulmates Part 18 ആദി പിന്നെ ഒട്ടും സമയം കളയാതെ തന്റെ ചോദ്യങ്ങൾ ഓരോന്നായി അവളുടെ മുന്നിലേക്ക് ഇട്ടു. "താരയെന്താ ഈ വിവാഹത്തിന് സമ്മതിക്കാത്തത്.  എനിക്ക് എന്തെങ്കിലും കുറവുകളുണ്ടോ? എന്നോട് ഇഷ്ട്ടമല്ലാഞ്ഞിട്ടാണോ?"  അവൻ അക്ഷമയോടെ ചോദിച്ചുകൊണ്ടിരുന്നു. അവന്റെ ചോദ്യങ്ങൾക്കു മുന്നിൽ സത്യം തുറന്നു പറയാനാകാതെ താര ഒഴിഞ്ഞുമാറാൻ ശ്രമിച്ചു. "ഇപ്പോൾ എനിക്ക് കല്യാണത്തിന് താല്പര്യമില്ല, പഠിത്തം കഴിയണം. ഇപ്പോ കല്യാണത്തെ കുറിച്ച് ചിന്തിക്കാനുള്ള മാനസികാവസ്ഥയിൽ അല്ല ഞാൻ"  പല കാരണങ്ങൾ അവൾ നിരത്തി. എന്നാൽ ആദി പിന്മാറാൻ തയ്യാറായിരുന്നില്ല. അവളുടെ ഓരോ ഒഴിവുകഴിവുകളെയും സ്നേഹത്തോടെയും വാശിയോടെയും തിരുത്തിക്കൊണ്ട് അവൻ അവളെ കൺവിൻസ് ചെയ്യാൻ പരമാവധി ശ്രമിച്ചു. അവളുടെ മനസ്സിലേക്ക് നടന്നു കയറാൻ അവൻ വാക്കുകൾ കൊണ്ട് കിണഞ്ഞു ശ്രമിച്ചുകൊണ്ടേയിരുന്നു. അവന്റെ വാക്കുകൾ കൂടിവന്നപ്പോൾ മറുപടിയില്ലാതെ, ഇനി അവിടെ ഇരുന്നാൽ ശരിയാകില്ലെന്ന് മനസ്സിലാക്കി താര ഗത്യന്തരമില്ലാതെ എഴുന്നേറ്റു. "എനിക്ക് സമയമായി, ഞാൻ പോകുന്നു" എന്ന് പറഞ്ഞ് അവൾ തിരിഞ്ഞു നടക്കാൻ ആഞ്ഞു. "താരേ, ഞാൻ പറഞ്ഞു തീർന്നില്ല" പെട്ടെന്നുള്ള ദേഷ്യത്തിലും സങ്കടത്തിലും ആദി മുന്നോട്ട് വന്ന് അവളുടെ കയ്യിൽ കയറിപ്പിടിച്ച് തടഞ്ഞു നിർത്തി. അവളിൽ നിന്നും അനുകൂലമായൊരു മറുപടി കേൾക്കാതെ അവളെ വിടാൻ അവന് ഉദ്ദേശമില്ലായിരുന്നു. "ആദീ... കൈ വിട്! എന്നെ വിടാൻ" താര ദേഷ്യത്തോടെ തന്റെ കൈ വലിച്ചെടുക്കാൻ നോക്കി. പക്ഷേ, ആദി അവളുടെ വാക്കുകൾ കേട്ടതായി നടിച്ചില്ല. താര അവനിലെ നിയന്ത്രണം നഷ്ടപ്പെടുത്തിയിരുന്നു. അവൻ അവളുടെ കയ്യിലെ പിടി കൂടുതൽ മുറുക്കി. വേദന കൊണ്ടും ദേഷ്യം കൊണ്ടും താരയുടെ നിയന്ത്രണം വിട്ടു. മറ്റൊന്നും ചിന്തിക്കാൻ അവൾക്ക് കഴിഞ്ഞില്ല. സർവ്വശക്തിയുമെടുത്ത് അവൾ തന്റെ മറുകൈ വീശി ആദിയുടെ കവിളത്ത് ഒരൊറ്റ അടി വെച്ചു കൊടുത്തു. ആ പാർക്കിലെ കായൽക്കാറ്റിനെപ്പോലും നിശ്ചലമാക്കിക്കൊണ്ട് ആ ശബ്ദം അവിടെ മുഴങ്ങിപ്പൊങ്ങി. ആദി അറിയാതെ അവളുടെ കൈ വിട്ടു പോയി. അവൻ ഞെട്ടലോടെ കവിളിൽ കൈവെച്ച്, വിശ്വസിക്കാനാകാതെ താരയെത്തന്നെ നോക്കി നിന്നുപോയി. താരയുടെ കൈ അന്തരീക്ഷത്തിൽ നിശ്ചലമായി നിന്നു. അടിക്കാൻ ഓങ്ങിയ കൈയാണെങ്കിലും, അവളുടെ വിരലുകളിലെ വിറയൽ അവൻ അറിഞ്ഞു. പെട്ടെന്നുണ്ടായ ആ ഭാവമാറ്റത്തിൽ ആദി സത്യത്തിൽ ഞെട്ടിപ്പോയിരുന്നു. താരയുടെ കണ്ണുകൾ നിറഞ്ഞ് തുളുമ്പുന്നുണ്ടായിരുന്നു. അവളുടെ കണ്ണുനീർ അവനെ കൂടുതൽ വേദനിപ്പിച്ചു. അവളുടെ ഉള്ളിൽ വല്ലാത്തൊരു മാനസിക സംഘർഷം ഉണ്ടെന്ന് ആ മുഖം വിളിച്ചോതി. അവളുടെ മാനസികാവസ്ഥ അത്രമേൽ അസ്വസ്ഥമാണെന്ന് മനസ്സിലായ നിമിഷം, ആദിയുടെ ഉള്ളിലെ ദേഷ്യം  അലിഞ്ഞുപോയി. "സോറി..." അത്രമാത്രം പറഞ്ഞ്, ഒരു നിമിഷം പോലും അവിടെ നിൽക്കാതെ അവൻ മുന്നോട്ട് നടന്നു. താര ശൂന്യമായ മനസ്സോടെ അവിടെതന്നെ ഇരുന്നു പോയി. ആരെങ്കിലും കണ്ടോ എന്ന് ചുറ്റും നോക്കാൻ പോലും അവൾ മറന്നു പോയിരുന്നു. അവിടം വിജനമായിരുന്നത് അവൾക്ക് അല്പം ആശ്വാസം നൽകി. അന്ന് താരയുടെ അടുത്തുനിന്ന് ഇറങ്ങിയതിൽ പിന്നെ ആദിക്ക് സ്വസ്ഥത കിട്ടിയിട്ടില്ല. മനസ്സിനെ അലട്ടുന്ന ചിന്തകളിൽ നിന്ന് ഒളിച്ചോടാൻ അവൻ പരമാവധി ശ്രമിച്ചു. കമ്പനിയിലെ ഫയലുകളിലും മീറ്റിംഗുകളിലും റൂമിലെ വർക്കൗട്ടുകളിലും അവൻ ഭ്രാന്തമായി വ്യാപൃതനായി. പക്ഷേ, ഉള്ളിലെ അസ്വസ്ഥത അവന്റെ ദേഷ്യമായി പുറത്തുവന്നു തുടങ്ങി. ചെറിയ കാര്യങ്ങൾക്ക് പോലും അവൻ ജീവനക്കാരോടും മറ്റുള്ളവരോടും തട്ടിക്കയറി. അങ്ങനെയൊരു സായാഹ്നത്തിലാണ് അവൻ കാറുമായി ടൗണിലേക്ക് ഇറങ്ങിയത്. മനസ്സ് മറ്റെവിടെയോ ആയിരുന്നു. പെട്ടെന്നാണ് ഒരു വളവിൽ വെച്ച് എതിർദിശയിൽ നിന്ന് വന്ന കാർ നിയന്ത്രണം വിട്ട് അവന്റെ വണ്ടിയുടെ മുന്നിലേക്ക് ഇടിച്ചു കയറിയത്. ഒരു വലിയ ശബ്ദത്തോടെ ആദിയുടെ കാറിന്റെ ഹെഡ്‌ലൈറ്റ് തകർന്നു തരിപ്പണമായി. വണ്ടിയിൽ നിന്നിറങ്ങുമ്പോൾ ആദിയുടെ ഉള്ളിൽ ആളിക്കത്താൻ കാത്തുനിന്ന ദേഷ്യത്തിന് ഒരു തീപ്പൊരി വീണതുപോലെയായിരുന്നു. "കണ്ണുകാണില്ലേടോ തനിക്ക്? നോക്കിയും കണ്ടും വണ്ടി ഓടിക്കാൻ അറിയില്ലെങ്കിൽ ഇറങ്ങരുത്" മറുഭാഗത്തുനിന്നിറങ്ങിയ ആൾ ആദിക്കു നേരെ ആക്രോശിച്ചു. തെറ്റ് പൂർണ്ണമായും അയാളുടേതായിരുന്നു. എങ്കിലും അയാൾ വാക്കുകൾ കൊണ്ട്  പിടിച്ചു നിക്കാൻ നോക്കി. "താൻ ആരെയാ പഠിപ്പിക്കുന്നത്. ഇങ്ങോട്ട് വന്നിടിച്ചിട്ട് ?" ആദിയുടെ ശബ്ദം ഗർജ്ജനം പോലെയായിരുന്നു. തർക്കം വാക്കേറ്റമായി, അയാൾ ആദിയുടെ കോളറിൽ കയറിപ്പിടിച്ചതും അത് പെട്ടെന്ന് തന്നെ കൈയാങ്കളിയിലേക്ക് നീങ്ങി. തന്റെ ഉള്ളിൽ തിളച്ചുമറിഞ്ഞ സകല ദേഷ്യവും ആദി അയാളുടെ മേൽ തീർത്തു. ഒടുവിൽ നാട്ടുകാർ ഇടപെട്ട് രംഗം ശാന്തമാക്കുമ്പോഴേക്കും സംഭവം പോലീസ് സ്റ്റേഷൻ വരെ എത്തിയിരുന്നു. സ്റ്റേഷനിലെ ബഞ്ചിലിരിക്കുമ്പോഴും ആദിയുടെ മുഖത്ത് യാതൊരു ഭാവവ്യത്യാസവുമുണ്ടായിരുന്നില്ല. വിവരമറിഞ്ഞ് പത്മ പരിഭ്രാന്തിയോടെ സ്റ്റേഷനിലേക്ക് ഓടിയെത്തി.  ഒരുവിധത്തിലാണ് പത്മ കേസ് ഒത്തുതീർപ്പാക്കാൻ  സമ്മതിപ്പിച്ചത്. സി.ഐ.യുടെ റൂമിൽ ഒത്തുതീർപ്പ് ചർച്ചകൾ നടക്കുകയാണ്. ഏറെ നേരത്തെ ചർച്ചക്കൊടുവിൽ പ്രശ്നം തീർപ്പാക്കി. ആദിയുടെ അടിയേറ്റ് മുഖം നീരുവന്ന് വീർത്ത പരാതിക്കാരൻ ഒരു വശത്ത് ഇരിപ്പുണ്ട്. സി.ഐ. ആദിയെ അടിമുടി ഒന്നു നോക്കി. "എന്തായാലും തടിയും മിടുക്കും ഉള്ള ചെറുപ്പക്കാരനാണ്. പക്ഷേ, റൗഡിസത്തെക്കാൾ നല്ലത് ഇത് വല്ല ഗോദയിലും കാണിക്കുന്നതാണ്. എന്ത് ഇടിയാണ് താൻ അയാളെ ഇടിച്ചത്? മുഖത്തിന്റെ ഷേപ്പ് മാറിയിട്ടുണ്ട്" സി.ഐ. ഗൗരവത്തിൽ ചോദിച്ചു. ആദി ഒന്നും മിണ്ടാതെ ഇരുന്നതേയുള്ളൂ. എന്നാൽ ഒപ്പമുണ്ടായിരുന്ന പത്മ സി.ഐ.യെ നോക്കി ചെറുപുഞ്ചിരിയോടെ പറഞ്ഞു "അത് സാർ...  ആദിത്ത്  ബോക്സിങ് ചാമ്പ്യനാണ്. അവന്റെ പഞ്ച് അത്ര പെട്ടെന്ന് ആർക്കും താങ്ങാൻ പറ്റില്ല." പത്മയുടെ വാക്കുകൾ കേട്ടതും അതുവരെ ആദിയെ നോക്കി പല്ലുകടിച്ചുകൊണ്ടിരുന്ന പരാതിക്കാരൻ പെട്ടെന്ന് ഒന്നു പരുങ്ങി. അയാൾ സീറ്റിൽ നിന്നല്പം പുറകോട്ട് നീങ്ങി ഇരുന്ന് ആദിയെ ചെറിയ ഭയത്തോടെ നോക്കി. ആദിയുടെ ഒരു ഇടികൂടി കൊണ്ടിരുന്നെങ്കിൽ തന്റെ താടിയെല്ല് തകർന്നേനെ എന്ന് അയാൾക്ക് മനസ്സിലായി. കേസ് ഒത്തുതീർപ്പാക്കി സ്റ്റേഷന് പുറത്തേക്കിറങ്ങുമ്പോൾ പത്മ ആദിയെ രൂക്ഷമായി ഒന്നു നോക്കി. പക്ഷേ, ആദിയുടെ മനസ്സ് അപ്പോഴും ആ സ്റ്റേഷനിലെ ബഹളങ്ങൾക്കും അപ്പുറം, താരയുടെ നിറഞ്ഞ കണ്ണുകളിൽ ആയിരുന്നു കുടുങ്ങിക്കിടന്നിരുന്നത്. ✍🏻അസ്ര #💞 പ്രണയകഥകൾ #😍 ആദ്യ പ്രണയം #👩 Sisters Love #📙 നോവൽ #👨‍👨‍👧‍👦 ജീവിതം

Solumates പാർട്ട്‌ 17 താരയുടെ ആ അപ്രതീക്ഷിത ചോദ്യത്തിന് മുന്നിൽ മറുപടിയില്ലാതെ ഭൂമി മൗനിയായിപ്പോയി. അവളുടെ നിശബ്ദതയിൽ തന്നെ എല്ലാറ്റിനുമുള്ള ഉത്തരമുണ്ടെന്ന് താരക്ക് തോന്നി. ഒരു വലിയ നിശ്വാസത്തോടെ, വളരെ സൗമ്യമായി താര വീണ്ടും ഭൂമിയോട് ചോദിച്ചു "നിനക്ക് മുകിലിനോടുള്ള ഇഷ്ടം... അത് നിനക്കെന്നോട് നേരത്തെ പറയാമായിരുന്നില്ലേ ഭൂമീ? ഞാൻ എനിക്ക് തോന്നിയ ഇഷ്ടത്തെ പറ്റി നിന്നോടല്ലേ ആദ്യം പറഞ്ഞത്. എനിക്ക് മുമ്പേ അങ്ങനെ ഒരിഷ്ടം നിന്റെ മനസ്സിൽ ഉണ്ടായിരുന്നെങ്കിൽ എന്തേ അതെന്നോട് പറഞ്ഞില്ല. നീയൊരു സൂചന പോലും തന്നില്ല. അതറിഞ്ഞിരുന്നെങ്കിൽ ഞാൻ ഒരിക്കലും മുകിലിനെ മോഹിക്കില്ലായിരുന്നു. എന്റെ മനസ്സിൽ അങ്ങനെയൊരു സ്ഥാനം അവന് ഞാൻ കൊടുക്കില്ലായിരുന്നു..." താരയുടെ കണ്ണുകൾ നിറഞ്ഞു തുളുമ്പി. അവൾ ഭൂമിയുടെ കൈകൾ ചേർത്തുപിടിച്ചു. "ഈ കല്യാണം എനിക്ക് വേണ്ട ഭൂമീ... അത് മുകിലിനു വേണ്ടി അല്ല. അങ്ങനെ നീ കരുതരുത്. പെട്ടെന്നൊരു ദിവസം മറ്റൊരാളെ എന്റെ മനസ്സിലേക്ക് പ്രതിഷ്ഠിക്കാൻ എനിക്ക് കഴിയില്ല. അതിനൊട്ട് വയ്യ താനും. നീയെങ്കിലും എനിക്ക് വേണ്ടി ഇതൊന്ന് അമ്മയോട് പറയണം. എന്നെ ഇതിൽ നിന്ന് രക്ഷിക്കണം. എനിക്ക് കുറച്ചു കൂടി സമയം വേണം ഭൂമി." താരയുടെ വാക്കുകളിലെ ആത്മാർത്ഥതയും നിസ്സഹായതയും ഭൂമിയുടെ ഉള്ളിൽ തട്ടി. അവളുടെ വേദന ഭൂമിക്ക് പൂർണ്ണമായും മനസ്സിലാകുന്നുണ്ടായിരുന്നു. അധികം വൈകാതെ തന്നെ ഭൂമി അമ്മമാരോട് ഈ കാര്യങ്ങളെക്കുറിച്ച് തുറന്നു സംസാരിച്ചു. രേണുകക്ക് അറിയാവുന്ന അത്ര പോലും ശാരികക്ക് അറിയില്ലായിരുന്നു. എല്ലാം പറഞ്ഞു മനസ്സിലാക്കാൻ ഭൂമിക്ക് കുറച്ചു സമയമെടുത്തു. അവൾ തന്റെ മുറിയിൽ അമ്മമാരോട് സംസാരിക്കുമ്പോൾ താര പുറത്ത് ബാൽക്കണിയിലെ കസേരയിൽ വന്നിരിക്കുകയായിരുന്നു. താരയുടെ മനസ്സിലെ മുകിലിനോടുണ്ടായിരുന്ന പ്രണയവും,  എന്നാൽ മുകിലിന്റെ മനസ്സിൽ താൻ ആണെന്നും അവൾ അനുഭവിക്കുന്ന അസ്വസ്ഥതകളും ഭൂമി ശാരികയ്ക്ക് മുന്നിൽ വിവരിച്ചു. അതിലുപരി തനിക്കും പണ്ട് മുതൽക്കേ മുകിലിനെ ഇഷ്ട്ടമായിരുന്നെന്നും അവൾ വേദനയോടെ തുറന്നു പറഞ്ഞു. താരയെ അറിയിക്കാതിരുന്നത് ഞങ്ങൾക്കിടയിൽ ഒരു വിള്ളലായി പ്രണയം വരരുതെന്ന് കരുതിയാണ്. അവനെ മനഃപൂർവം മറന്നു കളഞ്ഞതാണ്. പക്ഷെ, ഇപ്പോൾ വീണ്ടും. എല്ലാം കേട്ടുകഴിഞ്ഞപ്പോൾ അമ്മയുടെ മറുപടി ഇങ്ങനെയായിരുന്നു "നിങ്ങൾ രണ്ടുപേരും ഒരേ മനസ്സുള്ളവരാണ്. അതുകൊണ്ട് തന്നെ  നിങ്ങൾ രണ്ടുപേരും ഒരേ ആളെത്തന്നെ സ്നേഹിച്ചു പോയതിൽ ഒട്ടും തെറ്റ് പറയാൻ പറ്റില്ല മോളേ. ഇതു പോലൊക്കെ ഞങ്ങളും ഒരു സമയത്ത് ചിന്തിച്ചിരുന്നു. ഇപ്പോൾ ഇവിടെ താരയുടെ ഭാഗത്ത്‌ തന്നെയാണ് ശരി. മനസ്സിൽ ഒരാളുള്ളപ്പോൾ മറ്റൊരാളെ സ്വീകരിക്കാൻ അവൾക്ക് കഴിയില്ല. കഴിഞ്ഞതെല്ലാം മറക്കാൻ അവൾക്ക് സമയം വേണം. ആ സമയം കൊടുക്കാൻ ഞങ്ങൾ തയ്യാറാണ്. നല്ലൊരു ആലോചന വന്നപ്പോൾ ഒരു നിമിഷം എന്റെയുള്ളിൽ അവളെകുറിച്ചോർത്ത് സ്വാർത്ഥത നിറഞ്ഞു. തെറ്റു പറ്റിപോയേനെ." ശാരിക ഒരു നെടുവീർപ്പോടെ പറഞ്ഞു. ആദിയുടെ അമ്മയോട് തിടുക്കപ്പെട്ട് ഇപ്പോൾ ഒരു മറുപടി പറയേണ്ടതില്ലെന്ന് അവരും ഉറപ്പിച്ചു. "ഞാൻ താരക്ക് വേണ്ടി അവരോട് സംസാരിക്കാം. അവളൊരു വിവാഹത്തിന് തയ്യാറാകുമ്പോൾ മാത്രമേ ഇനി ഞങ്ങൾ അക്കാര്യം ആലോചിക്കുന്നുള്ളൂ. അജയേട്ടനോട് ഞാൻ പറഞ്ഞോളാം. എന്റെ മക്കളെ നോവിക്കുന്ന ഒന്നിനും അദ്ദേഹവും കൂട്ട് നിക്കില്ല." താരയുടെ മനസ്സ്  മനസ്സിലാക്കി അവർ ആ പ്രതിസന്ധിഘട്ടത്തിൽ അവൾക്കൊപ്പം നിൽക്കാൻ തന്നെ തീരുമാനിച്ചു. അവരുടെ പിന്തുണ താരയ്ക്കും ഭൂമിക്കും വലിയൊരു ആശ്വാസമായി മാറി. എന്നാൽ അങ്ങ് ദൂരെ, ആദിയുടെ വീട്ടിൽ കാര്യങ്ങൾ തികച്ചും വ്യത്യസ്തമായിരുന്നു. താരയുടെ മറുപടിക്കായി അവൻ അക്ഷമനായി കാത്തിരുന്നു. വീട്ടിലൂടെ അവൻ ഒരു ഭ്രാന്തനെപ്പോലെ അങ്ങോട്ടുമിങ്ങോട്ടും നടന്നു. അവന്റെ ഊണിലും ഉറക്കത്തിലും ചിന്തകളിലും എല്ലാം ഇപ്പോൾ താര മാത്രമായിരുന്നു. അവളുടെ മുഖം മാത്രമാണ് അവന്റെ കണ്ണുകളിൽ തെളിഞ്ഞുനിന്നത്. ദിവസങ്ങൾ കടന്നു പോകുംതോറും അസ്വസ്ഥത മൂലം അവൻ മര്യാദയ്ക്ക് ആഹാരം കഴിക്കാതായി. രാത്രികളിൽ ഉറക്കം അവനെ പാടെ കൈൊഴിഞ്ഞു. വിരഹവും കാത്തിരിപ്പും അവനെ അത്രമേൽ തളർത്തുന്നുണ്ടായിരുന്നു. ഒടുവിൽ, ഇനി ഇങ്ങനെ കാത്തിരുന്നാൽ പറ്റില്ലെന്ന് അവൻ ഉറപ്പിച്ചു. വീട്ടുകാരുടെ മറുപടിക്ക് കാത്തുനിൽക്കാതെ താരയെ നേരിട്ട് കണ്ട് സംസാരിക്കാൻ തന്നെ ആദി തീരുമാനിച്ചു. നാലാം ദിവസം ബാങ്കിൽ പോയി തിരികെ വരുന്ന വഴിക്കാണ് ആദി താരയെ കാണുന്നത്. അവളുടെ മുന്നിലേക്ക് ബൈക്ക് നിർത്തുമ്പോൾ അവന്റെ കണ്ണുകളിൽ ദിവസങ്ങളായുള്ള ഉറക്കമില്ലായ്മയുടെയും കാത്തിരിപ്പിന്റെയും ആധി വ്യക്തമായിരുന്നു. "താരേ... എനിക്ക് നിന്നോട് കുറച്ചു സംസാരിക്കാനുണ്ട്. പ്ലീസ്, നോ പറയരുത്" അവന്റെ ശബ്ദത്തിലെ ദയനീയത കണ്ടപ്പോൾ താരയ്ക്ക് പെട്ടെന്ന് നിരസിക്കാൻ തോന്നിയില്ല. വീട്ടിലേക്ക് ആലോചനയുമായി വന്നതിനു ശേഷം ആദ്യമായാണ് അവനിങ്ങനെ മുന്നിൽ വന്നു നിൽക്കുന്നത്. കാര്യങ്ങൾ ഒന്നു തുറന്നു പറയാൻ ഇതാവും നല്ലതെന്നു കരുതി അവളും സമ്മതിച്ചു. അവർ അടുത്തുള്ള കായൽത്തീരത്തെ പാർക്കിലേക്ക് നടന്നു. കായലിൽ നിന്നുള്ള തണുത്ത കാറ്റേറ്റ് അവർ ഒരു ബെഞ്ചിൽ ഇരുന്നു. താരക്ക് ആദിയെ നോക്കാൻ വല്ലാത്ത മടി തോന്നി. എങ്ങനെ തുടങ്ങുമെന്നറിയാതെ അവർ രണ്ടു പേരും രണ്ടു ദ്രുവങ്ങളിലേക്ക് നോട്ടം പായിച്ചു. ✍🏻asra #😍 ആദ്യ പ്രണയം #👩 Sisters Love #💞 പ്രണയകഥകൾ #📙 നോവൽ #👨‍👨‍👧‍👦 ജീവിതം

Soulmates Part 16 "എനിക്കറിയാം ശാരികേ, നിങ്ങൾക്ക് ഇത് കേൾക്കുമ്പോൾ പെട്ടെന്ന് അക്‌സെപ്റ്റ് ചെയ്യാൻ ബുദ്ധിമുട്ടുണ്ടാവും . പക്ഷേ  അവന്റെ മനസ്സിൽ താരയ്ക്ക് എത്രമാത്രം വലിയ സ്ഥാനമാണ് ഉള്ളതെന്ന് ഒരമ്മയെന്ന നിലയിൽ എനിക്ക് മനസ്സിലായിട്ടുണ്ട്. അവന് അത്രയ്ക്ക് ആഗ്രഹമാണ് ഈ ബന്ധത്തോട്." പത്മ മകന്റെ ഭാഗം ന്യായീകരിച്ചുകൊണ്ട് പറഞ്ഞു. അങ്ങോട്ടേക്ക് വരാൻ തുടങ്ങിയ താര ആ സംസാരം കേട്ട് അവിടെതന്നെ നിന്നു. അവൾക്ക് വിശ്വസിക്കാനായില്ല. ഇതെല്ലാം കേട്ട് ആലോചിച്ച ശേഷം ശാരിക പതുക്കെ പറഞ്ഞു "അത് പത്മജേ... മോളുടെ കാര്യത്തിൽ ഞങ്ങൾ ഇപ്പോൾ ഒരു കല്യാണം ആലോചിക്കുന്നില്ല. അവൾക്ക് ഇനിയും പഠിക്കണം എന്നാണ്. അതിനിടയിൽ..." ശാരിക പറഞ്ഞു തീർക്കും മുൻപേ പത്മ സ്നേഹത്തോടെ അത് തിരുത്തി. "അയ്യോ... അതിനെന്താ ശാരികേ, കല്യാണം ഇപ്പോൾ വേണമെന്ന് ഞങ്ങളും പറയുന്നില്ലല്ലോ. അവളുടെ പഠിത്തമെല്ലാം കഴിഞ്ഞ് സമയം പോലെ മതി കല്യാണം. അതിന് ആദിക്കും പൂർണ്ണ സമ്മതമാണ്. പക്ഷേ... ഈ ബന്ധം നമുക്ക് നേരത്തെ തന്നെ ഉറപ്പിച്ചു കൂടേ? ഒരു വാക്കുപറഞ്ഞ് ഉറപ്പിച്ചു വെച്ചാൽ രണ്ടു കൂട്ടർക്കും സമാധാനമാകുമല്ലോ. അതാ ഞങ്ങളുടെയും ആഗ്രഹം." പത്മ ഇരുന്നിടത്തു നിന്ന് എഴുന്നേറ്റു ശാരികയുടെ കൈ പിടിച്ചു. "മോളോടും അജയനോടും ഒന്ന് ആലോചിച്ചിട്ട് ഞങ്ങൾക്ക് മറുപടി തരണം." പത്മയുടെ ആ ഉറപ്പുള്ള വാക്കുകൾ കേട്ടപ്പോൾ ശാരികക്ക് പെട്ടെന്ന് മറുപടിയൊന്നും പറയാൻ കഴിഞ്ഞില്ല. അവർ എങ്ങോ നോക്കി ആലോചനയിലാണ്ടു. മകളുടെ ഭാവിക്ക് ഇതൊരു നല്ല ബന്ധമാണെന്ന് തോന്നുമ്പോഴും, കാര്യങ്ങളുടെ ഈ പെട്ടെന്നുള്ള പോക്ക് അവരെ അല്പം ആശയക്കുഴപ്പത്തിലാക്കുന്നുണ്ടായിരുന്നു. ശാരികയും രേണുകയും ഉമ്മറത്തിരുന്ന് സംസാരിക്കുകയായിരുന്നു. ആദിയും അമ്മയും താരയെ വിവാഹം ആലോചിച്ചു വന്ന കാര്യമായിരുന്നു അവരുടെ ചർച്ചാ വിഷയം "നീ ഇത് അജയനോട് പറഞ്ഞോ?" രേണുക ചോദിച്ചു. "ഞാൻ അപ്പോ തന്നെ വിളിച്ചു പറഞ്ഞു" കേട്ടയുടനെ അജയേട്ടൻ പറഞ്ഞത് താരയോട് സംസാരിക്കാനാണ്. അവളുടെ ഇഷ്ടം എന്താണെന്ന് നോക്കിയിട്ട് ബാക്കി കാര്യങ്ങൾ ആലോചിക്കാം എന്ന്." താരയെ അരികിലേക്ക് വിളിച്ചിരുത്തി കാര്യം അവതരിപ്പിച്ചു. അവൾക്ക് വലിയ ഭാവമാറ്റം ഒന്നും ഉള്ളതായി അവർക്കു തോന്നിയില്ല. അതിൽ നിന്നു തന്നെ അവളെല്ലാം കേട്ട് കാണുമെന്ന് ശാരികക്ക് മനസ്സിലായി. "ഞാനെന്താ അവരോട് പറയണ്ടേ..." താരയുടെ മുഖം ഇരുണ്ടു മങ്ങി.  ഒന്നു കണ്ടപ്പോഴേക്കും കല്യാണം ഉറപ്പിക്കാൻ ഓടിവന്നത് അവൾക്ക് ഒട്ടും ഉൾക്കൊള്ളാൻ കഴിയുന്നതായിരുന്നില്ല. ഉള്ളിൽ അമർഷവും സങ്കടവും ഒരുപോലെ ഇരച്ചുകയറി. "എനിക്ക്... എനിക്കിപ്പോൾ കല്യാണം വേണ്ട" താര ശബ്ദമിടറാതെ പറയാൻ ശ്രമിച്ചു. എന്നാൽ ശാരികയും രേണുകയും അവളെ ചേർത്തുപിടിച്ച് അനുനയിപ്പിക്കാൻ നോക്കി. "നിന്റെയും ഭൂമിയുടെയും കല്യാണം ഒന്നിച്ച് നടത്തണം എന്നാണ് ഞങ്ങളുടെ ആഗ്രഹം. ഇതിപ്പോൾ ഉറപ്പിച്ചു വെക്കുകയേ ഉള്ളൂ. അവർക്കും ഞങ്ങൾക്കും ഒരു സമാധാനത്തിന് വേണ്ടി മാത്രം. ബാക്കി ഒക്കെ നിങ്ങളുടെ പഠിത്തവും കാര്യങ്ങളും കഴിഞ്ഞിട്ട് പോരേ?" ആ ന്യായത്തിനു മുന്നിൽ എന്ത് പറയണമെന്നറിയാതെ താര ഒരു നിമിഷം മൗനമായി പോയി. എങ്കിലും അവൾക്ക് സമ്മതിക്കാൻ ഭാവമില്ലായിരുന്നു. "ഇത്ര തിരക്ക് പിടിച്ച് ഒന്നും വേണ്ട" അവൾ വീണ്ടും വാശി പിടിച്ചു. എത്രയൊക്കെ ന്യായങ്ങൾ കേട്ടാലും മനസ്സിൽ ആഴത്തിൽ പ്രതിഷ്ഠിച്ച മുകിലിനെ അത്ര പെട്ടെന്ന് ഇറക്കിവിടാൻ അവൾക്കാകുമായിരുന്നില്ല. ആ ഓർമ്മകളെ മറക്കാൻ അവൾക്ക് ഇനിയും ഒത്തിരി സമയം വേണ്ടിവരും. തന്റെ ഹൃദയത്തിൽ അത്ര പെട്ടെന്ന് മറ്റൊരാൾക്ക് സ്ഥാനം കൊടുക്കാൻ അവളുടെ മനസ്സ് വിസമ്മതിച്ചു. അവൾ ഒന്നും മിണ്ടാതെ ഭൂമിക്കരികിൽ വന്നിരുന്നു. താരയുടെ ഉള്ളം  ചുട്ടുപൊള്ളുന്ന ഒരു വേനൽക്കാലം പോലെ, ആകെ വരണ്ടുണങ്ങി, എരിഞ്ഞുതീരുന്ന ഒരവസ്ഥ. ആലോചനകളുടെ കനൽക്കാറ്റ് അവളുടെ മനസ്സിൽ ആഞ്ഞടിച്ചു. ഒരു വശത്ത് തങ്ങളെ ജീവനായി കാണുന്ന വീട്ടുകാരുടെ പ്രതീക്ഷകൾ, മറുവശത്ത് നെഞ്ചോട് ചേർത്തുവെച്ച പ്രണയത്തിൽ നിന്നും പുറത്തു കടക്കാനുള്ള കാലതാമസം. എങ്ങനെയീ ആലോചനയിൽ നിന്നും വീട്ടുകാരെ പിന്തിരിപ്പിക്കും എന്നറിയാതെ അവൾ നിസ്സഹായതയുടെ പരകോടിയിൽ ഉരുകിത്തീർന്നു. താരയുടെ ഈ അവസ്ഥ കണ്ട് ഒന്നും പറയാനാകാതെ, ഒരു തണലാകാൻ പോലുമാകാതെ ഭൂമിയും അരികിലിരുന്ന് കുഴങ്ങി. അവൾ നഷ്ട്ടപ്പെട്ടു പോകുമോ എന്നൊരു നിമിഷം ഓർത്തത്തും ഭൂമിയുടെ മനസ്സ് വെള്ളം വറ്റിപ്പോയ ഒരു പഴയ കുളം പോലെ, ഒരു ആശ്വാസവാക്ക് പോലും പറയാകാതെ വരണ്ടുണങ്ങി. വിണ്ടുകീറിയ ആഴങ്ങളുമായി അവൾ നിർവികാരയായി നിന്നു. താരയെ ആശ്വസിപ്പിക്കാനോ, സ്വന്തം ഉള്ളിലെ ശൂന്യത മറയ്ക്കാനോ കഴിയാത്തവിധം അവളുടെ വികാരങ്ങളെല്ലാം വറ്റി വരണ്ടുപോയിരുന്നു. അന്ന് രാത്രി... മുറിയിലെ ഇരുട്ടിൽ, നിശബ്ദതയെ ഭേദിച്ചുകൊണ്ട് താര പെട്ടെന്നാണ് ആ ചോദ്യം ചോദിച്ചത്. "ഭൂമീ... നിനക്ക്... നിനക്ക് മുകിലിനെ ഇഷ്ടമല്ലേ?" ആ അപ്രതീക്ഷിത ചോദ്യം കേട്ടതും ഭൂമി ഒന്ന് പതറിപ്പോയി. മറുപടിയില്ലാത്ത ആ ചോദ്യം രാത്രിയുടെ നിശബ്ദതയിൽ ഭൂമിയുടെ കാതിൽ അലയടിച്ചു. ✍🏻അസ്ര #❤ സ്നേഹം മാത്രം 🤗 #😍 ആദ്യ പ്രണയം #📙 നോവൽ #💞 പ്രണയകഥകൾ #👩 Sisters Love

Soulmates Part 15 ആദി പറഞ്ഞതുപോലെ തന്നെ കാര്യങ്ങൾ വളരെ പെട്ടെന്നായിരുന്നു നീങ്ങിയത്. ഒട്ടും സമയം കളയാൻ അവൻ തയ്യാറല്ലായിരുന്നു. അങ്ങനെ  ആദി തന്റെ അമ്മ പത്മയെയും കൂട്ടി താരയുടെ വീട്ടിലേക്ക് വന്നെത്തി. അവരുടെ വരവ് തികച്ചും അപ്രതീക്ഷിതമായിരുന്നു. എങ്കിലും അവർക്കിടയിൽ വലിയൊരു കുടുംബബന്ധത്തിന്റെ പശ്ചാത്തലം ഉണ്ടായിരുന്നു. അജയന്റെ ചേച്ചി ദേവകിയുടെ ഭർത്താവിന്റെ അനിയത്തിയായിരുന്നു പത്മ. ആ പഴയ കുടുംബബന്ധത്തിന്റെ ഊഷ്മളത പുതുക്കാൻ വന്ന മട്ടിലാണ് പത്മയും ആദിയും അവിടെ വന്നിരുന്നത്. സ്വീകരണമുറിയിൽ ശാരിക അവരെ സ്നേഹത്തോടെ സ്വീകരിച്ചു. ചായയും പലഹാരങ്ങളും കഴിക്കുന്നതിനിടയിൽ പത്മ വളരെ തന്ത്രപരമായി, എന്നാൽ പതിയെ താരയെക്കുറിച്ചുള്ള ചോദ്യങ്ങൾ ചോദിക്കാൻ തുടങ്ങി. "അല്ല ശാരി...  മോൾ ഇപ്പോൾ എന്താ പഠിക്കുന്നത്? പഠിത്തം കഴിഞ്ഞോ?" വളരെ സ്വാഭാവികമെന്നോണം പത്മ ചോദിച്ചു. "അവൾ പി ജി കഴിഞ്ഞു നിൽക്കുകയാ... ഇനിയും എന്തൊക്കെയോ പഠിക്കണം എന്ന് പറയുന്നുണ്ടായിരുന്നു." ചോദിക്കുന്ന ചോദ്യങ്ങളൊക്കെ താരയെക്കുറിച്ചാണെങ്കിലും, തന്റെ മകൻ ആദിക്ക് വേണ്ടി പെണ്ണ് ചോദിക്കാനാണ് വന്നതെന്ന പ്രധാന കാര്യം എങ്ങനെ അവതരിപ്പിക്കും എന്ന ടെൻഷനിലായിരുന്നു പത്മ. ആദിയുടെ മുഖത്തേക്ക് അവർ നോക്കിയപ്പോൾ അവൻ അതീവ ശാന്തനായി, എന്നാൽ ദൃഢമായ ഭാവത്തോടെ അവിടെ ഇരിപ്പുണ്ടായിരുന്നു. അവന്റെ കണ്ണുകൾ താരയെ ഒന്നു കാണാൻ വേണ്ടി ചുറ്റും തിരയുന്നുണ്ടായിരുന്നു. സമയം കടന്നുപോയിട്ടും അമ്മ വിഷയം മാറ്റാത്തത് കണ്ടപ്പോൾ ആദിക്ക് അക്ഷമയായി. അവൻ പത്മയുടെ അരികിലേക്ക് അല്പം നീങ്ങിയിരുന്ന് താഴ്ന്ന സ്വരത്തിൽ അമ്മയോട് പറഞ്ഞു "അമ്മേ... വന്ന കാര്യം പറ. ഇങ്ങനെ സംസാരിക്കാതെ കാര്യം അവതരിപ്പിക്ക്. എനിക്ക് പെണ്ണ് ചോദിക്കാനല്ലേ നമ്മൾ വന്നത്?" ആദിയുടെ ആ പെട്ടെന്നുള്ള തിടുക്കവും കട്ടായം പറയലും കേട്ടപ്പോൾ പത്മയ്ക്ക് ഉള്ളിലൊരു ടെൻഷൻ തോന്നി. കാരണം, സാധാരണ ഒരു ആലോചന പോലെയല്ല ഇത്. മകന് പെൺകുട്ടിയെ കണ്ട ഉടനെ തന്നെ ഉറപ്പിക്കണം എന്ന വാശിയിലാണ് അവൻ. തന്റെ ബന്ധുക്കളോട് പെട്ടെന്ന് ഒരു ദിവസം വന്ന്  'നിങ്ങളുടെ മകളെ എന്റെ മകന് വേണം' എന്ന് ചോദിക്കുമ്പോൾ അവർ എങ്ങനെ പ്രതികരിക്കും എന്ന ഭയം പത്മയെ അസ്വസ്ഥയാക്കി. ആദിയുടെ വാക്കുകൾ കേട്ട പത്മജ ശാരികയുടെ മുഖത്തേക്ക് നോക്കി പതുക്കെ തൊണ്ടയനക്കി. ആകെ മൊത്തം ആ അന്തരീക്ഷത്തിൽ ഒരു നിശബ്ദത പടർന്നു. പത്മയുടെ ആ ഭാവമാറ്റവും ആദിയുടെ ഒളിച്ചുകണ്ണാലുള്ള നോട്ടവും കണ്ടപ്പോൾ താരയുടെ അമ്മയ്ക്കും എന്തോ ഒരു പ്രത്യേകത തോന്നിത്തുടങ്ങിയിരുന്നു. വലിഞ്ഞു മുറുകിയ ആ നിമിഷത്തിൽ, പത്മ തന്റെ വാക്കുകൾക്കായി തപ്പിത്തടഞ്ഞു. തന്റെ വീട്ടിൽ ഇത്രയധികം നാടകീയമായ നിമിഷങ്ങൾ അരങ്ങേറുന്നതൊന്നുമറിയാതെയാണ് താര അപ്പോഴും മുന്നോട്ട് നീങ്ങിയത്. അവൾ പതിവുപോലെ ഭൂമിയുടെ അരികിലായിരുന്നു. ഭൂമിക്ക് മരുന്നുകൾ കൃത്യസമയത്ത് എടുത്തു നൽകിയും, അവൾക്ക് വേണ്ട മറ്റെല്ലാ കാര്യങ്ങളും സ്നേഹത്തോടെ ചെയ്തു കൊടുത്തും സഹായിച്ച ശേഷമാണ് താര സ്വന്തം വീട്ടിലേക്ക് തിരിച്ചെത്തിയത്. വീട്ടിലെ സ്വീകരണമുറിയിലേക്ക് കയറിവന്ന താര പെട്ടെന്നാണ് അവിടെയിരിക്കുന്ന അതിഥികളെ കണ്ടത്—ആദിയും പത്മയും! അവരെ അവിടെ ഒട്ടും പ്രതീക്ഷിക്കാതിരുന്നതിനാൽ അവൾ ഒരു നിമിഷം അത്ഭുതത്തോടെ നിന്നു. ഈ സമയം താരയുടെ അമ്മ ശാരിക മകളുടെ അരികിലേക്ക് വന്ന് അവരെ പരിചയപ്പെടുത്താനായി തുടങ്ങി. "താര മോളേ... ഇത് പത്മജ. ദേവകേച്ചിയുടെ നാത്തൂനാണ്. കൂടെയുള്ളത് മകൻ ആദി..." ശാരിക പറഞ്ഞു പൂർത്തിയാക്കുന്നതിന് മുൻപ് തന്നെ ആദിയും താരയും പരസ്പരം നോക്കി ഒരേ സ്വരത്തിൽ പറഞ്ഞു "ഞങ്ങൾ ഇന്നലെ കണ്ടിരുന്നു!" അവരുടെ ആ ഒപ്പമുള്ള മറുപടി കേട്ട് ശാരികയും പത്മയുമെല്ലാം അല്പം അത്ഭുതത്തോടെ അവരെ മാറി മാറി നോക്കി. താര അവരോട് മര്യാദപൂർവ്വം ഒന്ന് പുഞ്ചിരിച്ചു. "ഞാനിപ്പോ വരാം ആന്റി " താര വസ്ത്രം മാറാനും മറ്റുമായി അകത്തെ മുറിയിലേക്ക് നടന്നു. താര അകത്തേക്ക് പോയതുടനെ, പത്മ തന്റെ മനസ്സിലെ പ്രധാന വിഷയം അവതരിപ്പിക്കാൻ തന്നെ തീരുമാനിച്ചു. അവർ ശാരികയുടെ മുഖത്തേക്ക് നോക്കി വളരെ മടിച്ചു മടിച്ചുകൊണ്ട് സംസാരിച്ചു തുടങ്ങി. "അല്ല ശാരികേ... ഞങ്ങൾ ഈ ബന്ധം പുതുക്കാൻ മാത്രമല്ല വന്നത്. ഇന്നലെ ആദിയും താരയും തമ്മിൽ അപ്രതീക്ഷിതമായി കണ്ടിരുന്നു. " അവരൊന്നു നിർത്തികൊണ്ട് ആദിയെ നോക്കി. അവന്റെ മുഖത്തെ ഭാവം എന്താണെന്ന് അവർക്ക് നിർവചിക്കാൻ കഴിഞ്ഞില്ല "തുറന്നു പറയാമല്ലോ ശാരി....എന്റെ മകന്റെ മനസ്സിൽ താരയെ ലൈഫ് പാർട്ണർ ആയി വേണം എന്നൊരു വലിയ ആഗ്രഹം . അവളെ വിവാഹം കഴിക്കാൻ താല്പര്യമുണ്ടെന്ന് അവൻ എന്നോട് തുറന്നു പറഞ്ഞു. അത് നിങ്ങളോട് നേരിട്ട് ചോദിക്കാനാണ് ഞങ്ങൾ ഇപ്പോൾ ഇത്ര പെട്ടെന്ന് ഇങ്ങോട്ട് വന്നത്. താരയെ എനിക്കെന്റെ മോളായിട്ട് തന്നുകൂടെ" പത്മയുടെ വാക്കുകൾ കേട്ട് ശാരിക ശരിക്കും ഞെട്ടിപ്പോയി! അവരത് ഒട്ടും പ്രതീക്ഷിച്ചിരുന്നില്ല. ഇന്നലെ മാത്രം കണ്ട ഒരു പെൺകുട്ടിയെ വിവാഹം കഴിക്കണം എന്ന് പറഞ്ഞ് അത്രയും വലിയൊരു കുടുംബത്തിലെ പയ്യൻ വീട്ടിൽ വന്നിരിക്കുന്നു എന്ന് വിശ്വസിക്കാൻ അവർക്ക് പ്രയാസമായിരുന്നു. ശാരികയുടെ മുഖത്തെ അമ്പരപ്പ് കണ്ട പത്മ, ആദിക്ക് താരയോടുള്ള ഇഷ്ടത്തിന്റെ ആഴം അവർക്ക് വിവരിച്ചു കൊടുക്കാൻ ശ്രമിച്ചു. ✍🏻അസ്ര #👩 Sisters Love #❤ സ്നേഹം മാത്രം 🤗 #😍 ആദ്യ പ്രണയം #📙 നോവൽ #💞 പ്രണയകഥകൾ

Soulmates Part 14 "ആദി....." വാതിലിൽ മുട്ടാൻ തുടങ്ങിയ അവരെ അമ്പരപ്പിച്ചു കൊണ്ട് ആദി വാതിൽ തുറന്നു. ആദിയെ ഉറക്കത്തിൽ നിന്ന് വിളിക്കാൻ വന്ന പത്മ കണ്ടത് കുളിച്ചു റെഡി ആയി വാതിൽ തുറന്നു മുന്നിൽ വന്ന് നിൽക്കുന്ന ആദിത്തിനെ ആണ്. അവന്റെ മുഖത്തെ ക്ഷീണവും എന്നാൽ കണ്ണുകളിലെ അസാധാരണമായ തിളക്കവും പത്മ ശ്രദ്ധിക്കുന്നുണ്ടായിരുന്നു. "നീയെന്താ ഇത്ര നേരത്തെ എഴുന്നേറ്റത്." "അതിന് ഞാൻ ഉറങ്ങിയില്ലാലോ " "ഇന്നലെ ഉറങ്ങിയില്ലേ നീ? മുഖമൊക്കെ വല്ലാതെ ഇരിക്കുന്നു, വയ്യേ നിനക്ക് " പത്മ അവന്റെ നെറ്റിയിൽ കൈവെച്ചു നോക്കി. അവൻ അമ്മയുടെ കൈകൾ മെല്ലെ മാറ്റി. "ഒന്നും ഇല്ലമ്മാ...നമുക്ക് ഇന്ന് ഒരിടം വരെ പോണം." "എങ്ങോട്ട്... ഇത്ര നേരത്തെ എഴുന്നേറ്റ് എങ്ങോട്ടാ. ഇന്നലെ ഒന്നും പറഞ്ഞില്ലാലോ... " "അതിന്ന് തീരുമാനിച്ചതാ... എങ്ങാട്ടെന്നൊക്കെ പറയാം." "നീ പറഞ്ഞാലേ ഞാൻ വരൂ " "ഓഹോ... എന്നാ കേട്ടോ, പെണ്ണുകാണാൻ പോവാ " പത്മ വിശ്വാസം വരാതെ അവനെ നോക്കി. "അമ്മയിങ്ങനെ കണ്ണ് മിഴിച്ചു നോക്കൊന്നും വേണ്ട. ഞാൻ കാര്യമായിട്ട് പറഞ്ഞതാ... എനിക്ക്..... എനിക്കൊരു കുട്ടിയെ ഇഷ്ട്ടാണ് അമ്മാ.." "എന്നിട്ട് നീയിത് വരെ എന്നോട് പറഞ്ഞില്ലാലോ. അമ്മ ബെസ്റ്റ് ഫ്രണ്ട് ആണെന്ന് പറച്ചിലെ ഉള്ളൂ " പത്മ പിണക്കം കാണിച്ചുകൊണ്ട് പറഞ്ഞു. അവൻ അമ്മയെ കട്ടിലിൽ പിടിച്ചിരുത്തി. അവരുടെ കൈപ്പത്തികൾ തന്റെ കൈക്കുള്ളിലാക്കി ആദി വളരെ വികാരധീനനായി അമ്മയുടെ മുഖത്തേക്ക് നോക്കി. അവന്റെ ശ്വാസത്തിന് പോലും ഒരു പ്രത്യേക ദ്രുതതയുണ്ടായിരുന്നു. "അമ്മാ... അതൊക്കെ എപ്പഴും അങ്ങനെ തന്നെ ആണ്. ഇതങ്ങനെ കൊറേ ആയിട്ടൊന്നുല്ല. ഞങ്ങൾ കൊറേ കാലങ്ങൾക്ക് ശേഷം വീണ്ടും ഇന്നലെ ആണ് കാണുന്നത്. പക്ഷെ, ഇത് വരെ ഉണ്ടായിരുന്ന പോലെ അല്ല. ഐ ഫീൽ സംതിങ്......." അവൻ വാക്കുകൾ കിട്ടാതെ മൗനമായി. പത്മക്ക് ആദി പറയുന്ന കാര്യത്തിന്റെ ഗൗരവം മനസ്സിലായി. "എനിക്ക് ഇതുവരെ മറ്റൊരു പെണ്ണിനോടും തോന്നാത്തൊരു വികാരം... അത് ഇന്നലെ ഞാൻ കണ്ട അവളോട് എനിക്ക് തോന്നിയിട്ടുണ്ട് അമ്മേ. അവളെ എനിക്ക് വേണം. അത് വെറുമൊരു കൗതുകമല്ല, എന്റെ ജീവന്റെ പാതിയായി അവളെ എനിക്ക് മാറ്റണം." അവന്റെ വാക്കുകളിൽ പ്രണയത്തിന്റെ തീവ്രതയും ഒരുതരം വാശിയും കലർന്നിരുന്നു. മകൻ പറയുന്നതിലെ ഗൗരവവും ആത്മാർത്ഥതയും പത്മയ്ക്ക് പെട്ടെന്ന് തന്നെ മനസ്സിലായി. ആദി ഒരു കാര്യം പറഞ്ഞാൽ അതിൽ അത്രമേൽ ഉറച്ചുനിൽക്കുന്നവനാണെന്ന് അവർക്കറിയാം. എങ്കിലും ഒരു അമ്മയെന്ന നിലയിൽ അവർക്ക് ചെറിയൊരു ആശങ്ക തോന്നി. "ആദി... നീ പറയുന്നത് എനിക്ക് മനസ്സിലാകുന്നുണ്ട്. പക്ഷേ... ഇത്ര പെട്ടെന്ന് ഒരു പെണ്ണുകാണലും കല്യാണാലോചനയുമായി പോകുന്നത് ശരിയാണോ? നീ കുറച്ചുകാലം അവളുമായി 'ഡേറ്റ്' ചെയ്യ്... രണ്ടുപേർക്കും പരസ്പരം കുറച്ചുകൂടി മനസ്സിലാക്കാൻ സമയം കിട്ടുമല്ലോ. അതിനുശേഷം പോരെ ഈ ആലോചന?" പത്മ അവനെ സ്നേഹത്തോടെ ഉപദേശിക്കാൻ ശ്രമിച്ചു. എന്നാൽ ആദി ആ നിർദ്ദേശം പൂർണ്ണമായും തള്ളിക്കളഞ്ഞു. അവന്റെ മുഖത്ത് അക്ഷമ നിഴലിച്ചു. "അതിനൊന്നും എനിക്ക് താല്പര്യമില്ല അമ്മേ... അതിനുള്ള ക്ഷമയും എനിക്കില്ല!" അവൻ എഴുന്നേറ്റ് മുറിയിലൂടെ നടന്നു. "ഡേറ്റ് ചെയ്യാനും കാത്തിരിക്കാനും ഒന്നും എന്നെക്കൊണ്ട് പറ്റില്ല. കല്യാണം ഒക്കെ സമയം പോലെ പതുക്കെ നടക്കട്ടെ, അതിന് ഞാൻ നിർബന്ധിക്കുന്നില്ല. പക്ഷേ... ഉറപ്പിക്കൽ എത്രയും പെട്ടെന്ന് വേണം. അവളെ മറ്റാർക്കും വിട്ടുകൊടുക്കാൻ എനിക്ക് കഴിയില്ല. നഷ്ടപ്പെടുത്താൻ വയ്യ അമ്മേ എനിക്ക് അവളെ..." അവന്റെ വാക്കുകളിലെ തീക്ഷ്ണത പത്മയെ നിശബ്ദയാക്കി. ആദിക്ക് താരയോടുള്ളത് വെറുമൊരു മോഹമല്ല, മറിച്ച് അവളെ സ്വന്തമാക്കാനുള്ള അടങ്ങാത്ത ആഗ്രഹമാണെന്ന് അവർ ഉറപ്പിച്ചു. തന്റെ മകന്റെ സന്തോഷം മാത്രമാണ് വലുതെന്ന് ചിന്തിച്ച പത്മ ഒടുവിൽ ആദിയുടെ വാശിക്ക് മുന്നിൽ സമ്മതം മൂളി. "ശരിടാ... നിനക്ക് അത്രയ്ക്ക് നിർബന്ധമാണെങ്കിൽ നമ്മൾ ഉടനെ തന്നെ ആലോചനയുമായി മുന്നോട്ട് പോകും." പത്മ പറഞ്ഞത് കേട്ടപ്പോഴാണ് ആദിയുടെ മുഖത്ത് ഒരാശ്വാസം നിറഞ്ഞത്. അമ്മയുടെ സമ്മതം കൂടിയായപ്പോൾ ആദിയുടെ മനസ്സിൽ താരയെ സ്വന്തമാക്കാനുള്ള വഴികൾ കൂടുതൽ തെളിഞ്ഞു വന്നു. 'ഇനി താര തന്നിൽ നിന്നും അകന്നു പോകരുത്.' ✍🏻അസ്ര #💞 പ്രണയകഥകൾ #👩 Sisters Love #📙 നോവൽ #😍 ആദ്യ പ്രണയം #❤ സ്നേഹം മാത്രം 🤗