മഴപെയ്യുമ്പോൾ ഒരു കുടക്കീഴിൽ ഒന്നിച്ചു നിൽക്കുന്നതല്ല, ഒപ്പമുള്ളയാൾക്ക് സ്വയം കുടയായി മാറുന്നതാണ് യഥാർത്ഥ സ്നേഹം ! നമുക്കു ചുറ്റുമുള്ള എത്രയെത്ര മനുഷ്യരാണ് ഒപ്പം ഒരാൾ ഉണ്ടായിട്ടും ഒറ്റപ്പെട്ടു ജീവിക്കുന്നത് ! വാക്കുകൾ കൊണ്ടുള്ള പ്രകടിപ്പിക്കലുകളല്ല, പ്രവൃത്തിയിലുള്ള പ്രകടിപ്പിക്കലാവണം സ്നേഹം !! ഒപ്പമുള്ളവരുടെ ഉള്ളിൽ സങ്കടങ്ങളുടെ കടലിരമ്പുമ്പോൾ അതുകേൾക്കാൻ നമുക്ക് കഴിയുന്നില്ലെങ്കിൽ പിന്നെ എന്തർത്ഥമാണ് ആ ബന്ധത്തിനുള്ളത് ? അരികിലുണ്ടായിട്ടും പ്രിയപ്പെട്ടവരുടെ മനസ്സ് വായിക്കാൻ നമുക്ക് കഴിയുന്നില്ലെങ്കിൽ നമ്മളൊരു പരാജയമാണ്. സന്തോഷം കേൾക്കാൻ നൂറു പേർ ഉണ്ടായെന്നുവരും സങ്കടം കേൾക്കാനുണ്ടാകുമെന്ന് ഒരു മനുഷ്യൻ പ്രതീക്ഷിക്കുന്നത് ഏറ്റവും പ്രിയപ്പെട്ടവരെയാണ്. അവരുടെ സങ്കടങ്ങൾക്ക് കാതോർക്കാൻ നമുക്ക് സമയമില്ലാതാകുമ്പോൾ, അവരുടെ പ്രതീക്ഷകൾ തെറ്റുമ്പോൾ, കേൾക്കാൻ തയ്യാറുള്ള കാതിനെ അവർ തിരഞ്ഞുപോകും .. പ്രിയപ്പെട്ടവർക്കു മുന്നിൽ മാത്രം തുറക്കാൻ ഇഷ്ടപ്പെടുന്ന മനസ്സിൻ്റെ ഒരു രഹസ്യ അറ എല്ലാവർക്കുമുണ്ടാകും .. അതു മറ്റൊരാൾക്കുമുന്നിൽ തുറക്കേണ്ടിവരുന്നത് അവരുടെ നിസ്സഹായതയാണ്. നമുക്ക് ഏറ്റവും പ്രിയപ്പെട്ട ഒരാൾക്ക് അവരുടെ സങ്കടങ്ങൾ മറ്റൊരാളോട് പറയേണ്ടിവരുന്നെങ്കിൽ അതിനുത്തരവാദി നമ്മളാണ്. നമ്മളോടൊപ്പം ഇരിക്കുമ്പോഴും ഒറ്റയ്ക്കാണെന്ന തോന്നൽ അവരിലുണ്ടാകുന്നെങ്കിൽ അവർക്ക് നമ്മളിൽ നിന്ന് അവഗണന നേരിടുന്നുണ്ട്. കൺമുന്നിലൂടെ ഒരു പുഴയൊഴുകിയിട്ടും ദാഹിച്ചുവലഞ്ഞ് വേലിയ്ക്കിപ്പുറം നിൽക്കേണ്ടിവരുന്ന ഒരു മൃഗത്തിൻ്റെ അവസ്ഥയാകും അവരുടേത് .. !! പ്രിയപ്പെട്ടവരുടെ കണ്ണിലെ തിളക്കം മങ്ങുന്നത് തിരിച്ചറിയാൻ നമുക്ക് കഴിയുന്നില്ലെങ്കിൽപ്പിന്നെ അവരുടെ ആത്മാവിനെ നമ്മളെങ്ങനെയാണ് തൊട്ടറിയുന്നത് !! പ്രിയപ്പെട്ടവരുടെ മൗനംപോലും കേൾക്കാൻ കഴിയണം .. അവരുടെ വേദനകളൊക്കെ പറയും മുൻപേതന്നെ അറിയാൻ കഴിയണം അല്ലെങ്കിൽപ്പിന്നെ, പ്രിയപ്പെട്ടത് എന്ന വാക്കിന് അവിടെ സ്ഥാനവുമില്ല !! പരസ്പര സ്നേഹമെന്നത് സങ്കടങ്ങളുടെ പങ്കുവയ്ക്കൽ കൂടിയാണ് .. ഒരാളുടെ ചേർത്തുപിടിക്കലിൽ അടുത്തയാളുടെ സങ്കടം അലിഞ്ഞില്ലാതാകലാണ് .. അതിലൊരാൾക്ക് സങ്കടം പറയാൻ മറ്റൊരാളെ തിരയേണ്ടിവരുന്നത് ബന്ധത്തിൻ്റെ തകർച്ചയാണ്. ഓർക്കുക, ഒട്ടുമിക്ക ബന്ധങ്ങളും തകർന്നുപോകുന്നത് ഒരു ചില്ലുപാത്രം ഉടയുംപോലെ ഒരു നിമിഷം കൊണ്ടല്ല, മഞ്ഞുരുകി മാറുന്നതുപോലെ സാവധാനത്തിലാണ് .. അതു തിരിച്ചറിയുമ്പോഴേക്ക് തിരിച്ചുകിട്ടാനാവാത്ത വിധം തകർന്നു പോയിട്ടുണ്ടാവും .. നമ്മൾ ഒപ്പമുള്ളപ്പോൾ നമ്മുടെ പ്രിയപ്പെട്ടവർക്ക് ഒറ്റപ്പെട്ടെന്ന തോന്നൽ ഉണ്ടാകാതിരിക്കട്ടെ .. ....................................... 💞Mashinte Mathram Paruss 💞 #😢വിരഹം സ്റ്റാറ്റസ് #😔 ഇമോഷണൽ സ്റ്റാറ്റസ് 😍 #🙋‍♀️ എൻ്റെ സ്റ്റാറ്റസുകൾ #💞 നിനക്കായ് #❤️ പ്രണയം സ്റ്റാറ്റസുകൾ