Wallet Install
తెలుగు సంవత్సరం శుభాకాంక్షలు
6 Posts • 6K views
👣🌿🧿 PRIYADARSHI 🧿🌿👣
959 views • 1 days ago
పరమార్థాన్ని బోధించే పండుగ ఉగాది..........!! యుగాది అనే సంస్కృత పదానికి యుగానికి ఆది లేక ప్రారంభం అని అర్థం. యుగముకు వికృత రూపమే ఉగము. ఈ ఉగము నుండి పుట్టినదే ఉగాది. ప్రాచీన కాలంలో ఆశ్వయుజ శుద్ధపాడ్యమి, తరువాత మార్గశిర శుద్ధపాడ్యమి, ఆ తరువాత చైత్ర శుద్ధపాడ్యమి.. ఈ మూడింటినీ ఉగాదిగా జరుపుకునే వారని పురాతన గ్రంథాల ద్వారా తెలుస్తోంది. తెలుగు వారిది, కన్నడిగులది చాంద్రమానం. కేరళ, తమిళనాడు ప్రాంతాల వారిది సౌరమానం. మనం జరుపుకొనే పండుగలు, చేసే శుభకార్యాలు, చెప్పుకునే సంకల్పాలన్నీ చాంద్రమానం ప్రకారమే! మనకు జ్యోతిష శాస్త్రరీత్యా శుభాశుభ ఫలితాలను తెలిపే పండుగ ఉగాది. దీనినే 'సంవత్సరాది' అని కూడా అంటారు. ఉగాది నుండి తెలుగు వారికి కొత్త పంచాంగం ప్రారంభమవుతుంది. *ఉగాది సంప్రదాయం:* ఈ పర్వదినాన ఉదయమే ఇల్లు అలికి, ముగ్గుపెట్టి, అటకలతో సహా అన్ని గదులలోనూ బూజు దులిపి ఊడ్చి, శుభ్రంగా కడుక్కుని, మామిడి ఆకులతో, లేదంటే వివిధ రకాల పుష్పాలతో తోరణాలు కట్టాలి. గడపలకు పసుపు, కుంకుమలు అలంకరించాలి. ఇంటిలో మనం పూజించే ఇష్టదేవతల విగ్రహాలను షోడశోపచారాలతో పూజించి, శుచిగా చేసిన పిండివంటలనూ, ఉగాది పచ్చడిని నివేదించాలి. *ఆరోగ్యాన్నిచ్చే అభ్యంగనం:* నువ్వుల నూనెలో లక్ష్మి, జలంలో గంగాదేవి ఉంటారని శాస్త్రోక్తి. కాబట్టి ఉగాది నాడు పొద్దున్నే లేచి అభ్యంగన స్నానం చేయాలి. అంటే ఒళ్ళంతా నువ్వుల నూనె, సున్నిపిండి పట్టించి, కుంకుడురసంతోనో, సీకాయ పొడితోనో తలారా స్నానం చేయాలి. అనంతరం నూతన వస్త్రాలు లేదా శుభ్రంగా ఉతికిన దుస్తులు ధరించి, నిత్యకర్మానుష్ఠానాలు ముగిసిన అనంతరం పంచాంగ శ్రవణం చేయాలి. *పంచాంగం:* తిథి, వారం, నక్షత్రం, యోగం, కరణం అనే ఐదు భాగాలనూ కలిపి పంచాంగం అంటారు. తిథి వల్ల సంపద, నక్షత్రం వల్ల పాపపరిహారం, యోగంతో వ్యాధి నివృత్తి, కరణం ద్వారా కార్యానుకూలత పొందవచ్చు. కాబట్టి చేసే పనులలో అనుకూలతనూ, జయాన్నీ కాంక్షించేవారూ, కాలాన్ని తెలుసుకొని కర్మలు చేసేవారందరూ పంచాంగం చూడాలి. *ఆరు రుచులలో అర్థాలు:* మానవునికీ, ప్రకృతికీ ఉన్న అవినాభావ సంబంధాన్ని గుర్తుచేస్తుంది ఈ పండుగ. ఉగాదికి సంకేతంగా చెప్పుకొనే ఆరు రుచుల కలయికలో అనంతమైన అర్ధముంది. ప్రకృతి అందించే తీపి, పులుపు, ఉప్పు, కారం, వగరు, చేదు రుచుల సమ్మేళనంతో తయారయ్యే ఉగాది పచ్చడి సేవనం ఆరోగ్యదాయకం. జీవితమంటే కేవలం కష్టాలు, సుఖాలే కాదు, అన్ని విధాలైన అనుభవాలూ, అనుభూతులూ ఉంటాయి. ఉండాలి! అలా ఉన్నప్పుడే జీవితానికి అర్ధం పరమార్థం. ఈ సత్యాన్ని బోధిస్తూనే ఆరోగ్యాన్ని చేకూరుస్తుంది ఉగాది పచ్చడి. *ప్రాచీనం నుండి ఆధునికం వరకూ:* ప్రపంచంలో ఎక్కువ పూలు వికసించేది, పండ్లలో రాజయిన మామిడి పండు విరివిగా లభించేదీ, పరమశివునికి అత్యంత ప్రీతికరమైన కుందపుష్పాలు అంటే మల్లెపూలు పూసేదీ, ఆమని పాడేదీ వసంత ఋతువులోనే! అందుకనే ప్రాచీన కాలం నుండి ఆధునిక కాలం వరకు వసంత ఋతువర్ణన చేయని కవులు లేరంటే అతిశయోక్తి కాదు. *సంప్రదాయమే శ్రేష్టం:* పాశ్చాత్య సంస్కృతి మనదేశంలో ప్రవేశించిన తరువాత తెలుగు వారి నూతన సంవత్సరం ఉగాదితోనే ఆరంభమవుతుందన్న విషయాన్ని మరచి జనవరి 1వ తేదీనే నూతన సంవత్సర వేడుకలను అంగరంగ వైభవంగా జరుపుకొంటున్నాం. అందులో తప్పేమీ లేకపోయినప్పటికీ, మన మూలాలను మరవడం మాత్రం క్షంతవ్యం కాదు. కాబట్టి సంప్రదాయాన్ని అనుసరించి ఉగాది వేడుకలు జరిపించాలి. బ్రహ్మదేవుడు సృష్టిని ప్రారంభించినదీ, ప్రజానురంజకంగా పాలించిన శ్రీరాముడికి పట్టాభిషేకం జరిగినదీ, వెయ్యేళ్ళపాటు రాజ్యపాలన చేసిన విక్రమార్క చక్రవర్తి రాజ్యాన్ని చేపట్టినదీ, శకకారుడైన శాలివాహనుడు కిరీట ధారణ చేసినది, కౌరవ సంహారం అనంతరం ధర్మరాజు హస్తిన పీఠాన్ని అధిష్ఠించినదీ ఉగాది నాడేనని చారిత్రక, పౌరాణిక గ్రంథాలు చెబుతున్నాయి. కాబట్టి నూతన కార్యాలు ప్రారంభించడానికి ఉగాదిని మించిన శుభతరుణం మరొకటి లేదనే కదా అర్థం. శ్రీ పరాభవ నామ సంవత్సర ఉగాది పండుగ శుభాకాంక్షలు. #తెలుగు నూతన సంవత్సర (ఉగాది ) శుభాకాంక్షలు #తెలుసుకుందాం #🍃ఉగాది స్టేటస్🌟 #🎈ఉగాది శుభాకాంక్షలు🥳 #📘ఉగాది ప్రాముఖ్యత🍀
17 likes
12 shares