బుగ్గన మధుసూదనరెడ్డి, ఎం.బి.ఏ
574 views
చదువుల ఒత్తిడి,ప్రేమ వంటి అంశాలు యువతను అల్పఆయుష్షువులుగా మారుస్తున్న వైనం!
లేదా
ఎంతో బంగారు భవిష్యత్ గల యువత ఇష్టం లేని చదువులు,అపరిణతితో కూడిన ప్రేమల వల్ల అర్ధాంతరంగా తనువు చలిస్తున్న వైనం దురదృష్టకరం,అత్యంత దయనీయం!
ఈ మధ్యకాలంలో ఎక్కువ భాగం చదువుల ఒత్తిడి,అపరిణతితో కూడిన ప్రేమ వంటి అంశాల మూలాన అనేక మంది యువత అల్పఆయుష్షువులుగా మారుతున్న వైనం అత్యంత దురదృష్టకరం,తీవ్ర దయనీయం.దీంతో వీరిపై ఎన్నో మరెన్నో కోటి ఆశలు పెట్టుకున్న వారి తల్లిదండ్రులు ఇలాంటి కడు దుఃఖమైన పరిస్థితిని,హఠాత్ పరిణామాన్ని భరించలేక నీరుగారిపోతున్నారు,విగత జీవులుగా మారిపోతున్నారు అనే మాట సత్య దూరం కాదు.ఎందుకనో ఈ చదువుల ఒత్తిడిని భరించలేక తమ తల్లిదండ్రులు తమ పై పెట్టుకున్న కొండంత ఆశలను అడియాసలు చేస్తున్నామనే నిరాశ వారిలో అవహించి చివరకు వారిని ఆత్మహత్యల వైపు ప్రేరరేపిస్తున్నది అనే మాట అక్షర సత్యం.ఇది ఇలా వుంటే నేటి యువత అపరిణతితో కూడిన ప్రేమ వలలో పీకలదాకా కూరుకుపోయి ఏ కారణం చేతనైనా వారి తల్లిదండ్రులు వారి ఇరువురి ప్రేమలను తిరస్కరిస్తే వారిరువురు కూడా ఈ పరిణామాన్ని ఏ మాత్రం జీర్ణించుకోలేక ఉన్నఫలంగా,తృణప్రాయంగా తమ విలువైన ప్రాణాలను సైతం త్యజించేందుకు సిద్దపడుతుండటం ఈ సమాజానికి సంబంధించి అత్యంత ఆనారోగ్యకరమైన,అనాగరిక పరిణామంగా చెప్పుకోవొచ్చు.అయితే తమ పిల్లలపై వారి తల్లిదండ్రులకు తగిన,సరిఅయిన పర్యవేక్షణ కోరవడటం,ఏదో డబ్బు పెట్టుబడిగా పెట్టి ఓ మంచి పేరుమోసిన కాలేజీలో చేర్పించడంతోనే తమ పని అయిపోయిందని చేతులు దులుపుకొని మరీ అంతా వారే చూసుకుంటారులే అనే తీవ్ర నిర్లక్ష్య వైఖరితో తమ పిల్లల నడవడిక ఎలా వుంది,వారి చదువులు ఏ విధంగా సాగిపోతున్నాయి అనే ముఖ్య విషయాలు పట్టించుకోకపోవడంతో ఈ ఆత్మహత్యలు వంటి హృదయవిదారక ఘటనలు,దారుణాలు పదే పదే పొడచూపుతున్నాయి నేటి సమాజంలో అనే మాటలో ఎంతో సత్యం దాగి వుంది.అదేవిధంగా తల్లిదండ్రులు అనే వారు ' చేతులు కాలిన తరువాత ఆకులు పట్టుకునే కన్నా ' ముందే కడు జాగ్రత్త వహించి తమ పిల్లలపై ఒక నిఘా పెట్టి ఉంచడం,ఒక వేళ వారికి ఆ కోర్సు ఇష్టం లేకపోతే తక్షణమే వారిని ఆ కోర్సు నుంచి తప్పించి వారికి ఇష్టమైన రంగంలో చేర్పించడం,అలా కాకుండా వారిరువురు ప్రేమలో పడితే తప్పనిసరి పరిస్థితుల్లో వారి ప్రేమను అంగీకరించే విషయంలో ఏ మాత్రం కఠిన వైఖరి అవలంబించకుండా ఆ ప్రేమ వ్యవహారాన్ని చాలా సున్నితంగా పరిష్కరించే గురుతర బాధ్యత నేటి తల్లిదండ్రులపై ఎంతైనా వుంది.అదేమాదిరి తల్లిదండ్రులు ఎలాంటి పరిస్థితుల్లో తమ పిల్లలపై అనవసరంగా మితిమీరిన ఆశలు పెట్టుకోకుండా వారి శక్తి,సామర్థ్యం మేరకే వారు చదువును కొనసాగించే సంపూర్ణ స్వేచ్ఛను వారికివ్వడం ఎంతైనా సర్వదా శ్రేయస్కరమైన విషయం.
ఏదిఏమైనా నేటి యువత విషయంలో వారి తల్లిదండ్రులు నిత్యం అప్రమత్తంగా వుంటూ,వారికి సరిఅయిన రీతిలో గైడేన్స్ ఇస్తూ వారికి అన్ని విషయాలలో మేమున్నాము మీకు అండగా వంటి భరోసాను వారికి కల్పిస్తూ,ఎలాంటి పరిస్థితులు ఎదురైనా ముందు ఆ విషయాలను తమతో షేర్ చేసుకోవాలి, పంచుకోవాలి అనే ముఖ్య అంశాన్ని వారికి బహు బాగుగా విశదీకరించాలి.అంటే ఒక విధంగా తల్లిదండ్రులు వారి పిల్లలతో ఒక పెద్దగా కాకుండా ఒక ఆత్మీయులు లాగా,ప్రాణ స్నేహితుల లాగా వ్యవహరిస్తూ,వారి ప్రతికదలికపై అత్యంత శ్రద్ధాశక్తులు కనబరిస్తే మాత్రం ఎలాంటి దుష్పరిణామాలు,అన్యూహ ఘటనలు,గుండెల్ని పిండి చేసే పరిస్థితులు వారి నుంచి ఉత్పన్నం కావు కాక కావు.ఏమైనా నేటి యుక్త వయస్సు పిల్లలను వారి తల్లిదండ్రులు అత్యంత జాగ్రత్తతో పర్యవేక్షించడం,వారిని ఉన్నత విద్యావంతులను చేయడం అనుకున్నంత ఆషామాషి వ్యవహారం మాత్రం కాదు.ఒక విధంగా చెప్పాలంటే నేటి ఆదునాతనమైన టెక్నాలజీ యుగంలో అది వారికి ' కత్తి మీద సాము లాంటిదే ' అనడంలో ఎలాంటి సందేహానికి తావు లేదు.కాబట్టి నేటి యువత తల్లిదండ్రులు తమ పిల్లల పెంపకం విషయంలో ఏ మాత్రం తొందర పడకుండా,హడావిడి చేయకుండా అతి చూచి వ్యవహరించడం,తమ పిల్లలకు ఈ సమాజం,ఈ సమాజంలోని పరిణామాల గురించి నిత్యం హితబోధ చేయడంతో పాటు ఎల్లవేళలా వారి వెన్నంటి వుంటూ వారికి సరిఅయిన మార్గదర్శకం చేస్తే మాత్రం తాము కోరుకున్న విధంగా తమ పిల్లలను ఒక యోగ్యులుగా,ఈ సమాజాన్ని,ఈ సమాజంలోని ప్రజలను ఉద్దరించే అత్యంత బాధ్యతాయుతమైన వ్యక్తులుగా బాసిల్లేలా,ఒక వెలుగు వెలిగేలా చూడగలిగిన వారు కావడం తథ్యం.అదేవిధంగా నేటి యువత మంచి నడవడిక,క్రమశిక్షణతో మసలుకొని,ఒక స్ఫూర్తిదాయకమైన పంథాలో ముందుకు సాగి భవిష్యత్ లో ఒక మంచి ఉన్నత విద్యావంతులుగా,చదువులమ్మ చెట్టు నీడలో ఒక గొప్ప సరస్వతీ పుత్రులుగా మారి వారికి జన్మనిచ్చిన,పుట్టుకను సంప్రాప్తించిన వారి జననీ,జనకులకు గొప్ప కీర్తి,పేరు,ప్రఖ్యాతలను తీసుకురావాలని మనమంతా మనసా,వాచ,కర్మణ,హృదయపూర్వకంగా కోరుకుందాం!✍️✍️✍️
- బుగ్గన మధుసూదనరెడ్డి,సామాజిక విశ్లేషకుడు,బేతంచెర్ల,నంద్యాల జిల్లా! #యువత
8 likes
11 shares
