நிழல் அரசாங்கம் நாடு இப்போது அரசியல் ரீதியாக முக்கியமானதொரு கால கட்டத்தில் இருக்கிறது. பல்வேறு மாநிலங்களில் பல நிழல் அரசாங்கங்கள் உருவெடுத்து வலிமை அடைந்து வருவதை நம்மால் காண முடிகிறது. அரசியலிலும் சமுதாயத்திலும் அவற்றின் தாக்கம் அதிகரித்து வருகிறது. அதை தேர்தல் நேரத்தில் அதிகமாகக் காணப்படுகிறது.    ஒரு நிழல் அரசு கட்சியாகவோ, அமைப்பாகவோ அல்லது நிறுவனமாகவோ இருக்கலாம். அரசியல் கட்சியாக இருந்தால், நிழல் அரசின் கைப்பிடியில் கட்சி இருப்பதாக அர்த்தம். அது ஆட்சியை இழந்து எதிர்க் கட்சி வரிசையில் அமர்ந்தாலும் அதன் அதிகாரத்தையும் ஆதிக்கத்தையும் அசைத்துப் பார்ப்பது அவ்வளவு சுலபமில்லை. அவர்களுடைய பிரச்சார பலம் பெரிது, உத்திகள் வெகு தந்திரமானவை. நிழல் அரசுகள் ஓர் அரசாங்கத்தைப் போல வலிமையான அடித்தளங்ளுடன் செயல் படுகின்றன. மத்திய அரசு அதன் நிர்வாகத்தை சோதனையிட முயன்றாலும், அவற்றின் சட்ட விரோதமான செயல்களை ஒடுக்க முயன்றாலும் நிழல் அரசுகள், கீழ்க்கண்ட அம்சங்களுடன் அவற்றைச் சமாளிக்க தயாராக இருக்கின்றன.   - பணபலம்   - வலிமையான கட்டமைப்பு   - மாவட்டம் மற்றும் வட்டார அளவில் வாரிசுகள் அல்லது விசுவாசமான அதிகாரிகள்   - மேலிருந்து கீழ் வரை சிறப்பான கட்டுப்பாட்டுடன் கூடிய நடைமுறை   - நாளேடுகள், வார இதழ்கள் ஆகியவற்றின் பலம் - தொலைக்காட்சி மற்றும் திரைதுறையில் ஆதிக்கம்   - அரசு அதிகாரிகளிடம் செல்வாக்கு   - நெளிவு சுளிவுகள் தெரிந்த ஏஜெண்டுகள்   - நம்பகமான பினாமிகளின் நெட் ஒர்க்   - திறமையான சட்ட வல்லுனர்கள் குழு   - நேரடியாகவும் மறைமுகமாகவும் சாதி மதத் தலைவர்களுடன் நல்ல விதமான புரிதல் மற்றும் அந்த அமைப்புகளுடன் இணக்கமான உறவு   அரசின் நடவடிக்கைகளைப் பற்றிய தகவல்கள் அதிகாரிகள் மூலம் நிழல் அரசுகளுக்கு தடையின்றி கிடைக்கின்றன. அவற்றுக்கு, எந்த ஆட்சி நடந்தாலும் முக்கியமான தகவல்கள் மற்றும் காண்ட்ராக்டுகள் கிடைக்கிற வசதி உண்டு.   ஜனநாயக அரசியலில் இந்த பரிணாம வளர்ச்சி தவிர்க்க முடியாதது. நிழல் அரசுகளுக்கு நிழல் நிறுவனங்களும், நிழல் பாதுகாப்பு படைகளும் பக்க பலமாக இருக்கின்றன. இவற்றிடம் சக்தி வாய்ந்த, தொழில்நுட்ப ரீதியாக மேம்பட்ட, உயர் ரக உபகரணங்கள், சாதனங்கள், ஆயுதங்கள், மென்பொருள், தொலை தொடர்பு கருவிகள் ஆகியவை இருப்பதாக சொல்லப்படுகிறது.   நிழல் அரசுகள் மாநில எல்லைகளைத் தாண்டி ஒருங்கிணைந்து செயல் படும்போது அவர்களது வலிமை பல மடங்காகக உயர்கிறது.  பல்வேறு நிகழ்வுகள், செய்திகள் மற்றும் சந்திப்புக்களை உன்னிப்பாக நோக்கும்போது இது தெளிவாகத் தெரிகிறது. இந்த நிழல் அரசுகள் எல்லாம் ஒரிரு வருடங்களில் உருவானவை அல்ல. இது பல வருடங்களுக்கும் மேலான கட்டுமானமாகும்.   நிழல் அரசுகள் அரசு எந்திரத்தைப் பயன் படுத்தி சிறப்பாகச் செயல்படுகின்றன. ஆனால், அதன் வரவு செலவுகள் அரசின் வரவு செலவுகளுக்கு அப்பாற்பட்டவை. இதில் நாம் அரசியலைக் கலந்து யோசித்தால் குழப்பங்களே மிஞ்சும். கட்சிகளின் அரசியல் நிலைப் பாட்டிற்கும், சம்பந்தப்பட்ட நிழல் அரசுகளின் செயல்பாட்டிற்கும் சம்பந்தம் இல்லை. அதாவது, நிழல் அரசுகள் வணிக ரீதியானவை, ஓட்டு அரசியலுக்கு அப்பாற்பட்டவை.  இன்னொன்றையும் நாம் நினைவில் கொள்ள வேண்டியது அவசியம். ஒரு மாநிலத்தில் நிழல் அரசுகள் ஒன்றுக்கு மேல் இருக்கலாம். அவற்றுக்குள் போட்டி இருந்தாலும் அவை ஒன்றுக்கொன்று புரிதலுடன் செயல்படும். பல நிழல் அரசுகள் ஏற்கனவே செயல்பட்டு வருகின்றன, புதிய நிழல் அரசுகள் காலப்போக்கில் உருவாக்கிக் கொண்டு இருக்கின்றன.   #🚹உளவியல் சிந்தனை #📺அரசியல் 360🔴