வெள்ளை மாளிகை: ஒரு ராஜபோகமான குடிசை! வெள்ளை மாளிகை என்பது அமெரிக்க ஜனாதிபதியின் உத்தியோகபூர்வ இல்லமாகும், அவர் பொதுவான ஜனநாயக வழக்கப்படி சாமானியர்களால் தேர்ந்தெடுக்கப்படுபவர். அவர்களில் பலர் டிரெய்லர்களில், (அதாவது மொபைல் குடிசைகளில்?) வாழ்கிறவர்கள். அதை 'ராயல்' என அழைப்பதற்கு காரணம் அங்கு வசிக்கும் அமெரிக்க ஜனாதிபதி ஒரு அரச அரண்மனையில் வாழ்வதற்கு தகுதியுள்ள உலகின் மிக சக்திவாய்ந்த நபர். ஆகவே, வெள்ளை மாளிகை ஒரு ராஜபோகமான குடிசை என்பது ஒரு முரண்பாடான உவமையாகத் தோன்றினாலும் அதுதான் உண்மை. பிரமாண்டமான நடன அரங்கம் மற்றும் தங்க கழிப்பறையின் சகாப்தம்: ஜனாதிபதி ட்ரம்ப் இரண்டாவது முறையாக பதவிக்கு வந்ததிலிருந்து வெள்ளை மாளிகையில் விரிவான புனரமைப்புகளை மேற்கொண்டார். இதில் இரண்டு சர்ச்சைக்குரிய திட்டங்கள் அடங்கியுள்ளன. ஒன்று புதிய நடன அரங்கம் (பால்ரூம்), மற்றது மறுவடிவமைக்கப்பட்ட குளியலறை. இதில் முதலாவது திட்டம் ஒரு புதிய, 90,000 சதுர அடியில் நடன அரங்கத்தை நிர்மாணிப்பதாகும். அதற்காக வரலாற்று சிறப்புமிக்க வெள்ளை மாளிகையின் கிழக்கு பிரிவை இடிக்க வேண்டியிருந்தது. இதற்கு 400 மில்லியன் டாலர் செலவாகும் என்று மதிப்பிடப் பட்டுள்ளது. இந்த திட்டம் தனியார் வழங்கிய நன்கொடைகள் மூலம் நிறைவேற்றப்பட்டது. எவ்வாறாயினும், மார்ச் 2026 இன் பிற்பகுதியில் ஒரு நீதிமன்றத்தின் தீர்ப்பினால் நடன அரங்கத் திட்டம் தற்காலிகமாக நிறுத்தப்பட்டது. அமெரிக்க காங்கிரஸின் ஒப்புதல் இல்லாமல் இதுபோன்ற குறிப்பிடத்தக்க கட்டுமானத்தை மேற்கொள்ள ஜனாதிபதியான டிரம்புக்கு அதிகாரம் இல்லை என்று தீர்ப்பு அளிக்கப்பட்டது. இந்த தீர்ப்பை எதிர்த்து வெள்ளை மாளிகை மேல்முறையீடு செய்துள்ளது. அதே நேரத்தில், ட்ரம்ப் நிர்வாகம் ஜனாதிபதியின் படுக்கை அறையுடன் இணைக்கப்பட்ட குளியலறையை தங்க சாதனங்களுடன் புதுப்பித்தது. மார்ச் 2026 இன் பிற்பகுதியில் "தி சீக்ரெட் ஹேண்ட்ஷேக்" என்ற அநாமதேய கலைக் குழு "நேஷனல் மால்" என்ற இடத்தில் அந்த கழிப்பறையின் மாதிரி சிற்பத்தை நிறுவி அதனை பொதுவெளியில் நையாண்டிக்கு உள்ளாக்கியது. மேலும் அது, 'எ த்ரோன் ஃபிட் ஃபார் எ கிங்' என்ற தலைப்பில், "முன்னெப்போதும் இல்லாத அசாதாரண சூழ்நிலை நிலவும் ஒரு காலகட்டத்தில் ஜனாதிபதி டிரம்ப், தனது குளியலறையை தங்கமயமாக மறுவடிவமைக்கும் முக்கியமான விஷயத்தில் கவனம் செலுத்தியுள்ளார்" என்று ஒரு கல்வெட்டையும் நிறுவி அந்த புதுப்பித்தல் பணியினை கேலி செய்தது. இது விஷயமாக வெள்ளை மாளிகையின் செய்தித் தொடர்பாளர் பேசியதுதான் விசேஷமாக குறிப்பிடத்தக்கது. அதாவது, "வெள்ளை மாளிகையில் 'முன்னெப்போதையும் விட அழகான' மாற்றங்களை ஏற்படுத்த டிரம்ப் முயற்சி செய்தார்" என்று அவர் தெரிவித்தார்! பின்னே? MAGA (Make America Great Again) அதாவது, அமெரிக்காவின் பெருமையை மீட்டெடுப்பது என்றால் சும்மாவா? இதில் "கத்தோலிக்க கிருஸ்துவ மதத் தலைவர் போப் ஆகும் தகுதி எனக்கு உண்டு" என அமெரிக்க அதிபர் பேசியது உலகையே அதிர்ச்சியில் ஆழ்த்தியது. அயத்தொல்லா கொமேனி போன்ற ஒரு மதத் தலைவர் அரசியல்வாதியாகலாம். ஆனால், 'முதல் தர' ரியல் எஸ்டேட் புரோக்கரும், எப்ஸ்டீன் பைல்களின் நாயகனும், அரசியல்வாதியுமான டிரம்ப்பை போப் கோலத்தில் கற்பனை செய்து பார்க்கவே பயமாக இருக்கிறது! வெள்ளை மாளிகை தர்பாரில் காமெடிகளுக்குப் பஞ்சம் இல்லை. அதன் கூற்றுப்படி, ஈரானுடனான போர் ஒரு தெய்வீக பணி; எப்ஸ்டீன் ஃபைல்கள் எல்லாம் வெற்றுப் புனைகதைகள். அப்படி இருக்கும்போது, வெள்ளை மாளிகை அதிகாரிகளை நாம் முட்டாள்தனமாக ஏதாவது பேசி விமர்சனம் செய்து வைத்தால் அது மீண்டும் "வேதங்களை" துணைக்கு அழைக்கலாம்! நமக்கெதற்கு வம்பு? #🚹உளவியல் சிந்தனை #📺அரசியல் 360🔴