உங்களுடைய மகிழ்ச்சியின் அளவு என்ன? மனிதன் சுதந்திரமானவன். அவன் வாழ்வதற்காக தனது சுதந்திரத்தை கொஞ்சம் கொஞ்சமாக விட்டுக் கொடுக்கிறான், சில சமயங்களில் விலை பேசுகிறான். மனிதனுடைய மகிழ்ச்சி அவனது சுதந்திரத்துடன் தொடர்புடையது. - o O o - ஒரு மனிதன் தனது சுதந்திரத்தை எப்போது விலை பேசுகிறான்? "தேவைகள் அதிகமாகும்போது." தேவைகள் ஏன் அதிகமாகின்றன? "ஆசைகள் அதிகமாகும்போது தேவைகள் அதிகமாகின்றன. அவை இரட்டைப் பிறவிகள்." ஆசை, தேவை, சுதந்திரம் ஆகியவை ஒன்றுக்கொன்று தொடர்புள்ளவையா? "இது ஒரு விஷச்சுழல். (Viscious Cycle)" இதை மேலும் கொஞ்சம் விளக்க முடியுமா? - o O o - நீங்கள் ஏன் ஒரு வேலைக்கு போகிறீர்கள்? "பணம் சம்பாதிப்பதற்காக." பணத்தை ஏன் சம்பாதிக்க வேண்டும்? "தேவைகளை பூர்த்தி செய்வதற்காக." நீங்கள் இப்போது 9 To 5 வாழ்கையில் தள்ளப்பட்டதால் வாரம் 5 நாட்களில் உங்கள் சுதந்திரத்தை விலை பேசி ஒரு சுழலுக்குள் வந்து விட்டீர்கள். "அதுமட்டுமல்ல, அதற்காக 7 மணிக்கே எழுந்து தயாராகி பஸ் பிடித்து அலுவலகத்திற்கு ஓட வேண்டும்." ஒன்றை இழந்துதான் ஒன்றை அடைகிறோம். பிறக்கும்போது இருந்த சுதந்திரம் ஒன்றுதான் நமது வாழ்க்கைக்கு மூலதனம். பணம் மட்டுமல்ல, அதிகாரம், ஆரோக்கியம், புகழ், மணவாழ்க்கை ஆகிய எல்லாவற்றுக்கும் தெரிந்தோ தெரியாமலோ சுதந்திரத்தை விலையாகக் கொடுக்கிறோம். ஒரு அரசியல்வாதிக்கும் நடிகனுக்கும் இது நன்கு புரியும். "ஆம். அவர்களால் சுதந்திரமாக நடமாடக்கூட முடிவதில்லை." இந்த அடிப்படை தத்துவத்தை நீங்கள் அறியும்போது உங்களுடைய சுதந்திரம் விலைமதிப்பற்றது என்பதை உணர்கிறீர்கள். உங்களுடைய சுதந்திரத்தை விட்டுக்கொடுக்க நேரும்போது யோசிப்பீர்கள். ஏனென்றால், "உங்களுடைய சுதந்திரத்தின் அளவுதான் உங்கள் மகிழ்ச்சியின் அளவு" என்பது உங்களுக்குத் தெரியும். "ஆம், சுதந்திரம் என்றால் என்ன என்று புரிந்துவிட்டால் அது ஒரு புதிர் இல்லை!" சுதந்திரம்தான் மகிழ்ச்சி என உணர்ந்த ஞானிகள் அதை விற்றுவிட்டு வேறொரு மகிழ்ச்சியை வாங்க ஓடுவதில்லை. நீங்கள் சுதந்திரமான மனநிலையில் வரைந்த ஓவியம் மிகவும் அழகாக இருக்கிறது. "நன்றி!" அதே சமயம், அடுத்தவர்களின் சுதந்திரத்தை மதிக்கவேண்டும் என்பதையும் நினைவில் கொள்ளும்போது உங்கள் எதிர்பார்ப்புகள் குறைகின்றன. அப்போது கவலைகள் தாமாகவே மறைகின்றன. #மகிழ்ச்சி #மணவாழ்க்கை #சுதந்திரம் #கவலை #விஷச்சுழல் #VisciousCycle #தேவைகள் #ஆசைகள் #அதிகாரம் #ஆரோக்கியம் #புகழ் Have you subscribed to our channel? If not, please subscribe now. This is your channel! #🚹உளவியல் சிந்தனை #📺அரசியல் 360🔴