அபத்தமான அரசியல் கணிப்புகள்! தமிழகம் ஒரு யூனியன் பிரதேசம் இல்லை! இங்கு 234 சட்டமன்றத் தொகுதிகளும் ஒரே மாதிரி இல்லை. "விஜய் யார் ஓட்டை பிரிப்பார்?" என்பதைப் பற்றியே அரசியல் விமர்சகர்கள் பேசுகிறார்கள். முதலில் யாருடைய ஓட்டும் யாருக்கும் சொந்தமில்லை. 1967 இல் அரசியல் நிலைமை தலைகீழானதில் திமுக ஆட்சிக்கு வந்தது. மெகா கூட்டணி அமைந்து காங்கிரஸ் தோற்கடிக்கப் பட்டாலும், எதிர்பாராத விதமாக திமுக தனியாக ஆட்சி அமைத்தது. 1967 தேர்தலில் காங்கிரஸ் ஓட்டுக்களை திமுக பிரித்தது என்று சொல்வது அபத்தம் அல்லவா? இரண்டாவதாக பல்வேறு காரணங்களால் தொகுதிக்குத் தொகுதி மக்களுடைய மனநிலை வேறுபடுவதற்கும் மாறுபடுவதற்கும் வாய்ப்பு உள்ளதால், எல்லா தொகுதிகளுக்கும் ஒரே அளவுகோல் வைத்தூப் பேசுவது சரியில்லை. விஜயின் தாக்கம் தொகுதிக்குத் தொகுதி வேறுபடும். உதாரணமாக கன்னியாகுமரி மாவட்டத்தில் கிருத்துவர்கள் அதிகம் என்பதால் விஜய்க்கு அதிக ஓட்டுக்கள் விழ வாய்ப்பு உள்ளது. பாரம்பரியமாக தேசியக்கட்சிகளுக்கு ஆதரவு தந்த மக்கள் இந்த முறை அப்படிச் செய்வார்கள் என உறுதியாகச் சொல்ல முடியாது. அடுத்து சென்னை, கோவை, மதுரை, திருச்சி போன்ற பெரு நகரங்களில் பிற கட்சி அமைப்புகளுக்கு நிகராக கட்டுக்கோப்பான விஜய் ரசிகர் மன்றங்கள் உள்ளன. இங்கு பெண்களுடைய ஆதரவும் விஜய்க்கு இருக்கிறது. தேர்தல் நாளன்று தவெக தொண்டர்கள் தாமாகவே முன்வந்து வேலை செய்ததை வாக்குச் சாவடிகளுக்கு வெளியே பார்க்க முடிந்தது. அடுத்து புதிதாகச் சேர்ந்த 20 லட்சம் சொச்ச வாக்காளர்கள் மட்டுமே விஜய்க்கு வாக்களிப்பார்கள் என்பது தவறு. ஏன், 18 வயதுக்கு மேற்பட்ட மக்களில் விஜய் ரசிகர்களே இல்லையா? அவர்கள் தவெகவிற்கு வாக்களித்தால் திமுக/அதிமுக ஓட்டுக்களை பிரிக்கிறார்கள் என எப்படிச் சொல்ல முடியும்? நெல்லை, வேலூர் போன்ற மாநகரங்களில் கல்லூரிகள் அதிகம். இங்கு இளைஞர்கள் பெருவாரியாக விஜயை ஆதரிக்க வாய்ப்பு உள்ளது. எனவே பொத்தாம்பொதுவாக கடந்த காலத்தைய தேர்தல் முடிவுகளை வைத்து விஜய் கிட்டத்தட்ட 15 சதவீதம் ஓட்டுக்களை வாங்குவார், ஆனால் அந்த ஓட்டுக்கள் சீட்டுக்களாக மாறாது என்று சொல்வது சரியாக இருக்காது. தவெக கணிசமான தொகுதிகளை கைப்பற்ற வாய்ப்பு உள்ளது; மக்கள் ஒரு மாற்றத்தை எதிர்பார்க்கலாம். எனவே தவெக 2 அல்லது 3 இடங்களில்தான் வெல்லும் என்று மனப்பால் குடிப்பவர்களுக்கு நிச்சயம் மே மாதம் நான்காம் தேதி ஏமாற்றம் காத்திருக்கிறது. கடந்த காலங்களில் "எக்ஸிட் போல்" முடிவுகள் முற்றிலும் பொய்த்துப் போய் திமுகவினால் எதிர்க்கட்சி அந்தஸ்தைக்கூடப் பெறமுடியாமல் போனதுண்டு! அதே போல ஜெ தோற்றதும் உண்டு! இதில் "யார் அடுத்து தமிழக முதலமைச்சராக வருவார்?" என்ற ஜோதிடர்களின் அலப்பறைகள் வேறே! அடுத்து பகுத்தறிவு முகாம்களில் இருக்கும் பெரிய புள்ளிகளின் வீடுகளில் நடக்கும் ஹோமங்கள் மற்றும் யாகங்கள் பற்றிய செய்திகள்! தேர்தல் முடிவுகள் எப்படி இருந்தாலும் இளைஞர்கள் அதை ஸ்போர்ட்டிவாக எடுத்துக்கொள்ள வேண்டும் என ஒரு நீதிபதி பேசியதைப் பார்த்தால் கொஞ்சம் கலக்கமாகவும் உள்ளது. #TVK #DMK #ADMK #TamilnaduElections #TNPolitics #JosephVijay #ActorVijay #அரசியல்