நேற்றுதான் தங்கம், வெள்ளி ஏற்றமெல்லாம் நிரந்தரமில்லை; பல லட்சம் கோடிகள் அதில் புகுந்து விளையாடுகின்றன, எனவே நிதானமாக (சூதானமாக) இருங்கள் என்று எழுதினேன். இன்று காலை அமெரிக்க பங்குச்சந்தை திறந்ததும் வெள்ளி சுமார் 30% சரிந்தது, தங்கம் 10% சரிந்தது. காரணம்? அமெரிக்க ஃபெடரல் ரிசர்வ் (Reserve Bank) தலைவராக (Chairman), டிரம்ப் கெவின் வார்ஷ் (Kevin Warsh) என்பவரைத் தேர்ந்தெடுத்ததுதான். இந்த வார்ஷுக்கும் வெள்ளிக்கும் என்ன சம்பந்தம்? வார்ஷ் ஒரு 'டாலர் ஹாக்' (Dollar Hawk) என அழைக்கப்படுபவர். அமெரிக்க டாலரின் மதிப்பை மிக அதிகமாக வைத்திருக்கும் திட்டங்களை வகுக்கக்கூடியவர். டாலர் மதிப்பு அதிகரித்தால் இம்மாதிரியான மாற்றுச் செலாவணிகள் (Alternative Currencies) எல்லாம் சரியும் என்பதால், யூக வணிகர்கள் (Speculators) தம்மிடம் இருக்கும் பங்குகளை (Positions) எல்லாம் விற்க, வெள்ளியின் விலை 30% சரிந்தது. ஒரு பொருளின் விலை ஒரே நாளில் இப்படி 30% சரிவதெல்லாம் பூகம்பத்திற்குச் சமம். அமெரிக்க பங்குச்சந்தை ஓர் ஆண்டில் 30% சரிந்ததையே 'கிரேட் டிப்ரஷன்' (Great Depression) என்று அழைக்கிறார்கள். ஒரே நாளில் பங்குச்சந்தை 30% சரிந்தால் உலகப் பொருளாதாரமே அலோலகல்லோலப்பட்டுப் போகும். ஆனால் சரிந்தது வெள்ளி என்பதால், யூக வணிகர்களைத் தவிர யாருக்கும் பெரிய இழப்பில்லை. சில்லறை முதலீட்டாளர்கள் (Retail Customers), பொதுமக்கள் பலரும் இதனால் சில பல ஆயிரங்களை, லட்சங்களை இழந்திருக்கலாம். அவர்களும் வருத்தத்தில் இருக்கலாம். ஆனால் ஒரு லாஜிக்கை யோசியுங்கள். நேற்றெல்லாம் தங்கம் விலை அதிகரித்தது என வருத்தத்தில் இருந்தோம். இன்று 10% சரிந்தவுடன் அவர்கள் எல்லாம் ஓடிப்போய் தங்கத்தை வாங்கினார்களா என்ன? இல்லை. ஒன்று இன்னும் இறங்கும் என நம்பிக்கொண்டிருக்கலாம், அல்லது பயத்தில் சந்தைக்குள் நுழையாமல் ஒதுங்கிவிடலாம். இது எல்லாமே தவறுதான். ஒழுக்கமான (Disciplined) முதலீட்டில் இம்மாதிரி உணர்ச்சிகள், அச்சம், பேராசைக்கு எல்லாம் இடமே இல்லை. பணம் சேர்க்க ஒரே வழி, பணத்தின் மேலான அதீத ஆசையை விடுவதுதான். பார்க்கும் எல்லாவற்றிலும் பணத்தைப் போட முன்வரக்கூடாது. சில வாய்ப்புகள் எவ்வளவு கவர்ச்சிகரமாகத் தோன்றினாலும், அவற்றைத் தவிர்த்துதான் தீர வேண்டும். பிட்காயின் லட்சம் மடங்கு ஏறிவிட்டது என்பார்கள், வெள்ளி 550% சதவிகிதம் ஏறியது என்பார்கள். இம்மாதிரி ஓவியத்தை வாங்கு, என்.எஃப்.டி-யை (NFT) வாங்கு, முயல் வளர்ப்பு, ஈமு கோழி வளர்ப்பு எனப் பல ஸ்கீம்கள் வரும். பலவிதமாக ஆசை காட்டுவார்கள். "ஒரு சிறந்த முதலீட்டாளனாக மாற, பல நல்ல முதலீட்டு வாய்ப்புகளுக்கும் கூட 'நோ' (No) சொல்லப் பழக வேண்டும்" என்றார் வாரன் பஃபெட் (Warren Buffett). கண்முன் தெரியும் அத்தனை வாய்ப்புகளிலும் பணத்தை வாரி இறைத்துக்கொண்டே போனால், அதில் 75% வாய்ப்புகள் வெற்றி அடைந்தாலும், மீதமுள்ள 25% தோல்விகள் அந்த 75% வெற்றியையும் முழுமையாகத் துடைத்து எடுத்துவிடும். "தவறான வழியில் (அல்லது சீக்கிரமாய்) தேடிய செல்வம் குறைந்துபோகும்; கஷ்டப்பட்டுச் சேர்க்கிறவனோ தன் செல்வத்தைப் பெருகப்பண்ணுவான்." - நீதிமொழிகள் இண்டெக்ஸ் ஃபண்ட் (Index Fund), ரியல் எஸ்டேட், தங்கம் எதுவுமே உங்களை ஒரே இரவில் (Overnight) பணக்காரன் ஆக்காது. உங்கள் வளர்ச்சி நிதானமானதாக, மெதுவானதாக ஆனால் நிச்சயமானதாக இருக்கும் முயல்கள் உங்களை முதலீட்டு பந்தயத்தில் முந்திக்கொன்டு ஓடும். ஆனால் ஆமை மெதுவாக அடி எடுத்து வைத்து இலக்கை அடையும் நாற்பது வருடங்களுக்கு முன்பு மூவாயிரத்திற்கு வாங்கிப் போட்ட நிலம் இன்று மூன்று கோடியாகும். இது மெதுவான வளர்ச்சிதான், ஆனால் நிரந்தரமான, நிதானமான வளர்ச்சி. பணம் எல்லாரிடமும் வரும், ஆனால் தன்னை முறையாகக் கையாளத் தெரிந்தவனிடம் தான் தங்கும். வாழ்க்கை கற்பிக்கும் பாடம் இதுவே. #🤔 Unknown Facts