#ఏపీ అప్ డేట్స్..📖 *బాబుపై ఆశలు ఆవిరి❗* FEBRUARY 2, 2026🎯 ఇంతకాలం సీఎం చంద్రబాబుపై మెజార్టీ ప్రజానీకంలో ఒక రకమైన పాజిటివ్ ఇమేజ్ వుండింది. సీఎంగా చంద్రబాబు వుంటే అభివృద్ధి జరుగుతుందని, శాంతిభద్రతలుంటాయని, పరిశ్రమలు వస్తాయని తదితర అభిప్రాయాలుండేవి. ఈ రకమైన సానుకూల అభిప్రాయం చంద్రబాబుపై ఏర్పడడానికి ఆయన చేసిన పనుల కంటే, అనుకూల మీడియా ప్రచారమే కీలకంగా పని చేసింది. చంద్రబాబు రాజకీయ చరమాంకంలో ఆయనపై సానుకూల ప్రచారమంతా ఎటూ వెళ్లిపోతోంది. చంద్రబాబు నుంచి ఇంత అధ్వానమైన పాలనను అసలు ఊహించలేదనే మాట ఎక్కువగా వినిపిస్తోంది. ఇంకా చెప్పాలంటే, టీడీపీ సీనియర్ నాయకుల నుంచి ఇలాంటి అభిప్రాయం వ్యక్తమవుతుండడం ఆందోళన కలిగించే అంశం. ఒకప్పుడు హైదరాబాద్లో హైటెక్ సిటీని చంద్రబాబే కట్టారంటూ గొప్పలు చెబుతూ వచ్చారు. అదే నిజమైతే ఇప్పుడు అమరావతిని ఎందుకలా అద్భుతంగా తీర్చిదిద్దలేదనే ప్రశ్న ఉత్పన్నమవుతోంది. నిజంగా చంద్రబాబులో డెవలప్మెంట్ విజన్ వుంటే, విభజిత ఆంధ్రప్రదేశ్లోనూ కనిపించాలి కదా? అనే ప్రశ్నకు సమాధానం దొరకడం లేదు. అమరావతిని అలా గాలికి వదిలేయడంపై ఆ ప్రాంత వాసుల్లోనే తీవ్ర వ్యతిరేకత కనిపిస్తోంది. ఎంతసేపూ చంద్రబాబు విజన్ అంటే, 1995-2004 మధ్య ఉమ్మడి ఆంధ్రప్రదేశ్లో పాలించడాన్ని మాత్రమే చూపుతున్నారు. విభజిత ఆంధ్రప్రదేశ్లో చంద్రబాబు రెండో సారి అధికార పగ్గాలు చేపట్టారు. ఎందుకో గానీ, ఈ దఫా చంద్రబాబు ముద్ర అంటూ ఏదీ కనిపించడం లేదు. చంద్రబాబు ఏలుబడిలో శాంతిభద్రతల గురించి ఎంత తక్కువ మాట్లాడుకుంటే అంత మంచిదని పెద్ద ఎత్తున జనం మాట్లాడుకుంటున్నారు. పేరుకే చంద్రబాబు సీఎం అని, దేనిపైనా ఆయనకు పట్టులేదని కూటమి శ్రేణులే నిట్టూర్చుతున్నాయి. బాబు అంటే అది, ఇది అని ఇంత కాలం గొప్పలు చెప్పేవాళ్లు సైతం, తాజాగా రాష్ట్రంలో చోటు చేసుకున్న పరిస్థితులపై తీవ్ర అసంతృప్తి వ్యక్తం చేస్తున్నారు. ఇలాగైతే మళ్లీ అధికారంలోకి రావడం అనుమానమే అని నిట్టూర్చుతున్నారు. అసలు కళ్లెదుటే పరిపాలన ఇలా అవుతోందేంటి? అని కూటమి నాయకులు ప్రశ్నించుకునే పరిస్థితి. బాబు పేరుతో మరెవరో రాష్ట్రాన్ని పరిపాలిస్తున్నారా? అనే అనుమానాన్ని కొందరు వ్యక్తం చేస్తున్నారు. చంద్రబాబు అయితే ఇంత ధ్వానంగా పాలన సాగించరని బల్లగుద్ది మరీ చెప్పేవాళ్లు లేకపోలేదు. ఇలాంటి పరిపాలనను ఆశించడం లేదన్న మాట జనం నుంచి బలంగా వినిపిస్తోంది. క్షేత్రస్థాయిలో పాలనపై ప్రజాభిప్రాయాన్ని చంద్రబాబు తెలుసుకుని, దిద్దుబాటు చర్యలు చేపట్టాల్సిన అత్యవసర పరిస్థితి నెలకుంది. బాబు ఏం చేస్తారో చూడాలి.