#🙏 ഭക്തി Status #🙋‍♀️ എൻ്റെ സ്റ്റാറ്റസുകൾ #💑 സ്നേഹം #വാടാമലരുകൾ #❤ സ്നേഹം മാത്രം 🤗 ശ്രീ മാത്രേ നമഃ 🙏* *മൂകാംബിക ക്ഷേത്രം - ചരിത്രം ഭാഗം 21* *ദുർഗമഹിഷാസുരനെ വധിച്ചുവെന്ന കഥ അജ്ഞാനാന്തകാരം നശിച്ച് വിദ്യ അഥവാ വെളിച്ചം നിറഞ്ഞതിൻ്റെ സൂചനയായി കണക്കാക്കാം. അതിനാൽ ജീവിത വിജയത്തിന് ഉപകരിക്കുന്ന സകല കലകളുടെയും അഭ്യാസാരംഭത്തിന് ഏറ്റവും അനുയോജ്യമായ സന്ദർഭമായി ഇതിനെ പരിഗണിക്കുന്നു. നവരാത്രിയിൽ ആദ്യ മൂന്ന് ദിവസം പാർവ്വതിയേയും അടുത്ത മൂന്ന് ദിവസം ലക്ഷ്മിയേയും അവസാനം മൂന്ന് ദിവസം സരസ്വതിയേയുമാണ് പൂജിക്കുന്നത്. കേരളത്തിൽ നവരാത്രി ആയുധപൂജയുടേയും വിദ്യാരംഭത്തിൻ്റെയും സമയമാണ്. അഷ്ടമി രാത്രിയിൽ എല്ലാവരും പണിയായുധങ്ങൾ പൂജയ്ക്ക് വയ്ക്കുന്നു, മഹാനാവമി ദിവസം പൂജ വെച്ചശേഷം വിജയദശമി ദിവസം കുട്ടികളെ എഴുത്തിന് ഇരുത്തുന്നു. ശ്രീരാമൻ രാവണനെ നിഗ്രഹിച്ചത് നവരാത്രിയുടെ അവസാനമാണെന്നും ഐതീഹ്യം ഉണ്ട്*. *ഫാൽഗുണ അഥവാ മീന മാസത്തിലെ ഉത്രം നാളിൽ കൊടിയേറി ഒമ്പത് ദിവസം നീണ്ടുനിൽക്കുന്ന ഉത്സവമാണ് മൂകാംബിക ക്ഷേത്രത്തിലെ പ്രധാനപ്പെട്ട ആണ്ട് വിശേഷം. ഇതിനോട് അനുബന്ധിച്ച് മൂലം നാളിൽ നടക്കുന്ന രഥോത്സവവും വളരെ വിശേഷമാണ്. രഥോത്സവം എട്ടാം നാൾ വരുന്ന രീതിയിലാണ് ഉത്സവം നടത്തപ്പെടുന്നത്. കർണാടക മാതൃകയിൽ നടത്തുന്ന ഉത്സവമാണെങ്കിലും കേരളീയരും ഉത്സവത്തിൻ്റെ ഭാഗമാകും. ഒൻപത് ദിവസം വിശേഷാൽ പൂജകളും വഴിപാടുകളും നടത്തപ്പെടുന്നു. ഉച്ചക്കുള്ള ശത രുദ്രാഭിഷേകമാണ് പ്രധാന താന്ത്രിക വിശേഷം. നൂറ് തരം അഭിഷേകദ്രവ്യങ്ങൾകൊണ്ട് സ്വയംഭൂലിംഗത്തിൽ അഭിഷേകം നടത്തുന്നതുകൊണ്ടാണ് ഇതിന് ശത രുദ്രാഭിഷേകം എന്ന പേര് വന്നത്. വൈകിട്ട് അഞ്ചുമണിക്കും രാത്രി പത്ത് മണിക്കും ദേവിയെ പുറത്തേക്ക് എഴുന്നള്ളിക്കുന്ന ചടങ്ങുണ്ടാകും. ഓരോ ദിവസവും ഓരോ വാഹനത്തിൽ ഇരുത്തിയാണ് എഴുന്നള്ളത്ത്. എട്ടാം ദിവസമായ മൂലം നാളിലാണ് ക്ഷേത്രത്തിലെ മഹാരഥോത്സവം. ദേവിയുടെ ജന്മനക്ഷത്ര ദിവസമാണ് ഫാൽഗുണ മാസത്തിലെ മൂലം നക്ഷത്രം എന്ന് വിശ്വസിക്കപ്പെടുന്നത്. ബ്രഹ്മരഥം എന്നറിയുന്ന ഏഴ് നിലകളോടുകൂടിയ മഹാരഥം അന്നാണ് എഴുന്നള്ളിക്കുന്നത്. ഈ ദിവസം പതിവിലും രണ്ട് മണിക്കൂർ നേരത്തെ നട തുറക്കും. തുടർന്ന് ഗണപതി ഹോമം നടത്തും. അതിനുശേഷം രാവിലെ എട്ടു മണിയോടെ രഥോത്സവത്തിനുള്ള പൂജകൾ തുടങ്ങും. മുഹൂർത്ത ബലി, ക്ഷിപ്രബലി, രഥബലി തുടങ്ങിയവയാണ് രഥോത്സവത്തിന് മുന്നോടിയായ പ്രധാന ചടങ്ങുകൾ. തുടർന്ന് രഥാരോഹണവും പ്രതീകാത്മക രഥചലനവും തുടങ്ങും. ക്ഷേത്രത്തിൽനിന്നും ഏതാനും ദൂരം വരെ രഥം എഴുന്നള്ളിക്കുന്നതാണ് ഈ ചടങ്ങ്.* *ദേവിയുടെ രണ്ട് വിഗ്രഹങ്ങൾ ഒന്നിച്ച് എഴുന്നള്ളിക്കുന്ന ഏക അവസരം ഇതാണ്. പ്രധാന എഴുന്നള്ളത്ത് നടക്കുന്നത് വൈകിട്ട് അഞ്ച് മണിക്കാണ് ക്ഷേത്രത്തിന്റെ കിഴക്കെ നടയിൽ നിന്ന് സൗപർണികാ നദി തീരത്തെ ഓലകമണ്ഡപം അഥവാ ആറാട്ടുമണ്ഡപം വരെയാണ് എഴുന്നള്ളുന്നത്. രഥം വലിക്കാൻ ആയിരക്കണക്കിന് ഭക്തരാണ് വിവിധ സ്ഥലങ്ങളിൽ നിന്ന് മൂകാംബിക സന്നിധിയിലേക്ക് വരുന്നത് രഥം വലിക്കുന്നത് ഭാഗ്യമായി ഭക്തർ കരുതുന്നു രഥം വലിക്കാം എന്ന വഴിപാട് നേരുന്നവരുമുണ്ട്. വാദ്യമേളങ്ങളുടെയും ദേവി മന്ത്രങ്ങളുടെയും അകമ്പടിയോടെ രഥം വലിച്ച് ഓലകമണ്ഡപത്തിൽ എത്തിക്കുകയും അവിടെ വിശേഷാൽ പൂജകൾ കഴിഞ്ഞ് തിരിച്ച് എഴുന്നള്ളിക്കുകയും ചെയ്യും.* *തുടരും.....* *എഴുതി സമർപ്പിക്കുന്നത് ജെ പി കെ നായർ (കണ്ണൻ സ്വാമി)*