అమలక ఏకాదశి.. ఒక సంవత్సరంలో మొత్తం 24 ఏకాదశులు ఉంటాయి. హిందూ సంప్రదాయంలో ఏకాదశి తిథి చాలా ప్రాముఖ్యత ఉంది. ప్రతి ఏకాదశి ప్రత్యేకమైనదే! ఒక్కో ఏకాదశికి ఒక్కో విశిష్టత ఉంటుంది. అమలక ఏకాదశి ఫాల్గుణ మాసంలో హోలీ పండుగకు ముందు వచ్చే ఏకాదశిని అమలక ఏకాదశి లేదా అమలకి ఏకాదశి అంటారు. ఈ రోజు ఉసిరి చెట్టును శ్రీ మహావిష్ణువు స్వరూపంగా భావించి విశేష పూజలు చేస్తారు. అమలక అంటే ఉసిరికాయ అని అర్థం. ఉసిరిక చెట్టును పూజించడమే ఈ రోజు ప్రాధాన్యత కాబట్టి ఈ ఏకాదశికి అమలకు ఏకాదశి అని పేరు వచ్చింది. ఉత్తరాదిన ఈ నాటి నుంచి హోలీ వేడుకలు ప్రారంభం అవుతాయి. ఏకాదశి రోజు ఉపవాసం, జాగారం చేసి శివకేశవులను ఆరాధిస్తే మోక్షం కలుగుతుందని శాస్త్ర వచనం. ఏకాదశి అంటే పదకొండు అని అర్థం. మనకు ఉన్నటువంటి ఐదు జ్ఞానేంద్రియాలు, ఐదు కర్మేంద్రియాలు వీటిని పనిచేయించే అంతరేంద్రియం అయిన మనసు కలిపితే పదకొండు. ఈ పదకొండును భగవంతునిపై కేంద్రీకరించి ఉపవాస జాగారాలతో గడపడమే ఏకాదశి ప్రత్యేకత. ప్రతినెలా వచ్చే ఏకాదశి రోజున శ్రీహరిని పూజిస్తే అష్టైశ్వర్యాలు చేకూరుతాయి. ఏకాదశి రోజున ఉపవాసం చేసి, శేషశాయి అయిన లక్ష్మీనారాయణ మూర్తిని స్తుతిస్తే కోటి పుణ్యాల ఫలం లభిస్తుందని విశ్వాసం. తెలుగు పంచాంగం ప్రకారం, ఫాల్గుణ శుద్ధ ఏకాదశి తిథి మార్చి 9 ఆదివారం ఉదయం 10:45 గంటలకు ప్రారంభమై మార్చి 10 సోమవారం ఉదయం 9:52 గంటలకు ముగుస్తుంది. సూర్యోదయ తిథి అనుసరించి అమలక ఏకాదశి మార్చి 10 సోమవారం జరుపుకోవాలి. అమలక ఏకాదశి వ్రతాన్ని చేసేవారు ఈ రోజు ఉపవాసం చేసి, లక్ష్మీనారాయణుల స్వరూపమైన ఉసిరిక చెట్టును పసుపు కుంకుమలతో, ధూప దీపాలతో పూజించడం సంప్రదాయం. సాయంత్రం వరకు ఉపవాసం ఉన్న తరువాత చంద్ర దర్శనం చేసి ఉపవాసాన్ని విరమించవచ్చు. మరికొంత మంది ఎంతో నియమనిష్టలతో ఏకాదశి వ్రతాన్ని చేస్తుంటారు. వారు ఏకాదశి ఘడియలు ముగిసి ద్వాదశి ఘడియలు వచ్చిన తరువాతనే ఉపవాస విరమణ చేస్తుంటారు. ఈ నియమాలు వారివారి పూర్వీకుల కాలం నుంచి పాటిస్తున్న సంప్రదాయాలను అనుసరించి మారుతుంటాయి. అమలక ఏకాదశి వ్రతాన్ని ఆచరించే వారు సూర్యోదయంతోనే నదీస్నానం లేదా సముద్ర స్నానం చేయాలి. వీలుకాకుంటే స్నానం చేసే నీటిలోకి పుణ్య నదులను ఆవాహన చేసుకొని స్నానం చేయాలి. ఇంట్లో పూజామందిరాన్ని శుభ్రం చేసుకుని శ్రీలక్ష్మీ నారాయణుల విగ్రహాలకు పంచామృతాలతో అభిషేకం చేయాలి. అనంతరం శ్రీలక్ష్మీనారాయణులను గంధం, కుంకుమ, పసుపు రంగు పూలు, తులసీదళాలతో పూజించాలి. విష్ణు సహస్రనామ పారాయణ విధిగా చేయాలి. ఉసిరిక చెట్టును పూజించాలి. సమీపంలోని విష్ణు ఆలయానికి వెళ్లి ఆవునేతితో దీపం పెట్టి తులసీమాలను సమర్పించాలి. అమలక ఏకాదశి వ్రతం చేసేవారు అన్నదానం, గోదానం, వస్త్రదానం, జలదానం చేయడం శ్రేష్ఠం. అమలక ఏకాదశి వ్రతం ఆచరించినవారు మరుసటి రోజు శుచిగా నిత్య పూజాదికాలు ముగించుకొని శ్రీలక్ష్మీ నారాయణునికి మహా నైవేద్యం సమర్పించాలి. అనంతరం ఒక బ్రాహ్మణునికి భోజనం పెట్టి దక్షిణ తాంబూలాలతో సత్కరించి నమస్కరించాలి. అనంతరం భోజనం చేసి ఉపవాసాన్ని విరమించాలి. ఈ విధంగా అమలక ఏకాదశి వ్రతాన్ని భక్తిశ్రద్ధలతో ఆచరిస్తే శ్రీమహావిష్ణువు అనుగ్రహంతో ధనధాన్యాలు, సిరిసంపదలు కలుగుతాయని భక్తుల విశ్వాసం. ఓం నమో నారాయణాయ 🙏 🙏🙏🙏🙏🙏🙏 #అమలక ఏకాదశి శుభాకాంక్షలు #శుభాకాంక్షలు #🕉️🙏 ఓం శ్రీ నమో నారాయణాయ 🕉️🙏 #🙏🏻భక్తి సమాచారం😲 #దేవుళ్ళ స్టేటస్