#💏 മലയാള നടി വിവാഹിതയാകുന്നു; വരൻ യുവ സംവിധായകൻ വിവാഹിതയാകാൻ ഒരുങ്ങുന്നുവെന്ന സന്തോഷ വാർത്ത പങ്കുവച്ച് കരിക്ക് താരം നിലീൻ സാന്ദ്ര. സംവിധായകനായ ശ്യാമിൻ ഗിരീഷ് ആണ് നിലീന്റെ പ്രതിശ്രുത വരൻ. സമൂഹമാധ്യമങ്ങളിലൂടെ നലീൻ തന്നെയാണ് സന്തോഷ വാർത്ത പങ്കുവച്ചത്. ദൈവം തനിക്കായി അയച്ചുതന്ന അനുഗ്രഹത്തെയാണ് വിവാഹം കഴിക്കാൻ പോകുന്നതെന്ന് നിലീൽ സമൂഹമാധ്യമങ്ങളിൽ കുറിച്ചു. ശ്യാമിനൊപ്പമുളള്ള സുന്ദര നിമിഷങ്ങൾ കോർത്തിണക്കിയ വിഡിയോയ്ക്കൊപ്പമാണ് നിലീൻ വിവാഹ വാർത്ത പങ്കുവച്ചത്. പ്രണയാർദ്രമായ കുറിപ്പും നിലീൻ വിഡിയോയ്ക്കൊപ്പം ചേർത്തു. നിലീൻ സാന്ദ്രയുടെ വാക്കുകൾ: ‘ഒരു സ്ത്രീയെ അനുഗ്രഹിക്കാൻ ദൈവം തീരുമാനിക്കുമ്പോൾ, അവളുടെ ആത്മാവിനെ തൊട്ടറിയുന്ന, അവളെ സ്നേഹത്തോടെ പരിചരിക്കുന്ന ഒരാളെ അവളുടെ ജീവിതത്തിലേക്ക് അയക്കുമെന്ന് പറയാറുണ്ട്. 2017-ൽ ദൈവം എനിക്കായി എന്റെ ആളെ അയച്ചുതന്നു. ഒരു കാമുകനായല്ല, മറിച്ച് എന്റെ ഏറ്റവും പ്രിയപ്പെട്ട സുഹൃത്തായി. വർഷങ്ങൾക്കിപ്പുറം, അന്ന് എനിക്കൊപ്പം സുഹൃത്തായി നടന്ന അതേ മനുഷ്യനൊപ്പം എന്നെന്നേക്കുമായി ഒന്നാകാൻ ഞാൻ ഒരുങ്ങുകയാണ്. ഞാൻ വെറുതെ വിവാഹിതയാവുകയല്ല... വർഷങ്ങൾക്ക് മുൻപ് ദൈവം എനിക്കായി അയച്ചുതന്ന ആ വലിയ അനുഗ്രഹത്തെയാണ് ഞാൻ വിവാഹം കഴിക്കുന്നത്’’. ‘കരിക്ക്’ വെബ് സീരീസിലൂടെയാണ് പ്രേക്ഷകരുടെ ഇഷ്ട താരമായ നടിയാണ് നിലീൻ സാന്ദ്ര. നിരവധി പുരസ്‌കാരങ്ങൾ വാരിക്കൂട്ടിയ ‘ആവാസവ്യൂഹം’ എന്ന ചിത്രത്തിൽ നായികാ വേഷത്തിലെത്തിയ താരത്തിനു നിരൂപക പ്രശംസയും ലഭിച്ചു. ‘2018’ എന്ന ചിത്രത്തിലൂടെ നിലീൻ വീണ്ടും പ്രേക്ഷകരുടെ കയ്യടി നേടി. ചിത്രത്തിൽ നരേൻ അവതരിപ്പിച്ച മൽസ്യത്തൊഴിലാളിയുടെ ഭാര്യയുടെ വേഷത്തിലാണ് നിലീൻ എത്തിയത്. അഭിനയം മാത്രമല്ല തിരക്കഥാ രംഗത്തും നിലീൻ തന്റെ കഴിവു തെളിയിച്ചിരുന്നു. ‘റോക്ക് പേപ്പർ സിസേഴ്സ്’, ‘സാമർഥ്യശാസ്ത്രം’ എന്നീ വെബ് സീരീസുകൾ എഴുതിയത് നിലീന്‍ ആണ്. എറണാകുളം അരൂർ സ്വദേശിയാണ് താരം. അച്ഛൻ ജൂഡി തഹസിൽദാർ ആയി റിട്ടയർ ചെയ്തു. അമ്മ മേരി ഹൈക്കോടതിയിൽ ജോലി ചെയ്യുന്നു. ഒരു സഹോദരനാണ് നിലീനുള്ളത്. സംഗീത് പ്രതാപ്, ഷറഫുദ്ദീൻ എന്നിവരെ കേന്ദ്ര കഥാപാത്രങ്ങളാക്കി ഒരുക്കുന്ന ‘ഇറ്റ്സ് എ മെഡിക്കൽ മിറാക്കിൾ’ എന്ന ചിത്രത്തിന്റെ സംവിധായകനാണ് ശ്യാമിൻ ഗിരീഷ്. അഖില ഭാർഗവനാണ് ചിത്രത്തിലെ നായിക.