విజయదశమి అనగానే తెలంగాణ ప్రాంతంలో జమ్మీ గుర్తుకొచ్చినట్లే, పాల పిట్ట సైతం గుర్తొస్తుంది. దసరా రోజున పాలపిట్టను చూడటం అనాది కాలం నుంచి ఒక అనవాయితీగా వస్తుంది. పాలపిట్టను ఇండియన్ రోలర్, నీలకంఠ పక్షి ఇలా ప్రాంతాన్ని బట్టి వివిధ పేర్లతో పిలుస్తారు... విజయదశమిని సమస్త విజయాలకు సంకేతంగా భావిస్తారు. ఆశ్వయుజ మాసంలో నవరాత్రుల సందర్భంగా అమ్మవారిని నవదుర్గలుగా పూజించి, దశమి నాడు అపరాజితాదేవిని రాజరాజేశ్వరిగా ఆరాధిస్తారు. విజయాన్ని ప్రసాదించాలని కోరుకుంటారు. దసరా నాడు సీమోల్లంఘనం చేసి (గ్రామశివారు దాటి) ఈశాన్య భాగంలో అమ్మవారికి ప్రత్యేక పూజలు చేస్తారు. శమీవృక్షాన్ని పూజించి దసరా వేడుకను ఉత్సాహంగా చేసుకుంటారు. తర్వాత పాలపిట్టను దర్శించుకోవడం ఆనవాయితి. నీలం, పసుపు రంగుల కలబోతతో ఎంతో అందంగా కనిపించే పాలపిట్టను విజయానికి ప్రతీకగా భావిస్తారు. పాలపిట్టను దర్శించడం వెనుక కొన్ని ఐతిహాసిక కథలు కూడా ప్రచారంలో ఉన్నాయి. రావణుడితో యుద్ధానికి బయల్దేరిన రాముడికి పాలపిట్ట దర్శనమిచ్చిందని చెబుతారు. అలాగే అజ్ఞాతవాసం ముగించిన పాండవులు విజయదశమి నాడు జమ్మిచెట్టును పూజించి, దానిపై ఉంచిన ఆయుధాలు తీసుకున్న తరుణంలోనూ వారికి పాలపిట్ట దర్శనమిచ్చిందన్న కథ ప్రచారంలో ఉంది. త్రేతాయుగంలో శ్రీరాముడికి, ద్వాపరంలో పాండవులకు పాలపిట్ట దర్శనం తర్వాతే విజయం లభించిందని విశ్వసిస్తారు. ఈ మేరకు దసరా నాడు విజయోత్సాహానికి సూచకంగా శమీ వృక్షాన్ని పూజించడం, సీమోల్లంఘనంతోపాటు పాలపిట్టను చూడాలనే సంప్రదాయం ఏర్పడింది... పురాణాలు, సాంస్కృతిక ప‌రంగా పాలపిట్ట‌కు ఇంత‌టి ప్రాధాన్యం ఉంది కాబట్టే.. దీన్ని మ‌న రాష్ట్ర ప‌క్షిగా గుర్తించి గౌర‌వం ఇచ్చుకున్నాం. తెలంగాణలోనే కాకుండా ఆంధ్ర‌ప్ర‌దేశ్‌, క‌ర్ణాట‌క‌, ఒడిశా, బిహార్ రాష్ట్రాల అధికార ప‌క్షి కూడా పాలపిట్ట‌నే... అయితే ఇన్ని ప్రాముఖ్యతలు కలిగిన నీలకంఠ పక్షి ఉనికి ప్రశ్నార్థకంగా మారుతుందని పర్యావరణవేత్తలు ఆందోళన వ్యక్తం చేశారు... మనుషుల స్పర్శ తాకినా పాలపిట్టలు సహించలేవు. రాష్ట్ర పక్షి పాలపిట్టను బంధించడం, హింసించడం వంటి చర్యలకు పాల్పడితే నాన్బెయిలబుల్ కేసులు నమోదవుతాయని అటవీ అధికారులు హెచ్చరిస్తున్నారు. కనీసం మూడేళ్ల జైలుశిక్ష లేదా రూ.25వేల వరకు జరిమానా విధించే అవకాశం ఉందన్నారు... చివరగా చెప్పేదేంటంటే పాలపిట్టను స్వేచ్ఛగా ఎగురనిద్దాం, అవి ఎగురుతూ అప్పుడప్పుడు తళుక్కున మెరిసినపుడే చూసే మన కళ్లకు అందం, ఆనందం...🙏🌹 #🕉️విజయ దశమి శుభాకాంక్షలు🙏🎉 #🏹దసరా శుభాకాంక్షలు🎉 #విజయ దశమి శుభాకాంక్షలు🙏 #విజయ దశమి శుభాకాంక్షలు