🍃🍃🌼🍃🍃 🥀શ્રાવણ સુદી - ૧૧ પુત્રદા એકાદશી.             યુધિષ્ઠિરે પૂછ્યું :- હે શ્રી કૃષ્ણ ? શ્રાવણ સુદ એકાદશીના વ્રતની મને કથા કહેવા કૃપા કરો. તેનું નામ તથા પ્રકાર કહો.            શ્રી કૃષ્ણ કહે છે :- હે રાજન ? જેની કથા સાંભળવાથી વાજપેય યજ્ઞનું ફળ મળે છે અને સર્વે પાપો નો નાશ થાય છે તે ઉત્તમ કથા કહું છું તે તમે સાંભળો.                 પૂર્વે દ્વાપરયુગના આરંભમાં  માહિષ્મતી નગરીમાં મહિજીત નામે રાજા રાજ્ય કરતો હતો. રાજા ધર્મનિષ્ઠ હતો પરંતુ તેને પુત્ર ન હતો. તેથી તે ઉદાસ રહેતો ને રાજ્યમાં પણ મન લાગતું નહિ. આમ ઘણા વર્ષ નીકળી ગયા. રાજાએ વિચાર્યું કે આમને આમ વૃદ્ધાવસ્થા નજીક આવી જશે માટે કાંઈક ઉપાય કરવો જોઈએ. પછી તેણે પ્રજા અને બ્રાહ્મણોને કીધું કે મેં પુત્રવત પ્રજાનું પાલન કર્યું છે. બ્રાહ્મણ કે દેવનું દ્રવ્ય ક્યારેય લીધું નથી. ધર્મ ક્યારેય ચુક્યો નથી તો પણ મને પુત્ર પ્રાપ્તિ કેમ થતી નથી ?          રાજાના આ વચન સાંભળીને બ્રાહ્મણો , રાજાના પુરોહિત અને પ્રજા બધાય વનમાં જઈને લોમશ મુનિના આશ્રમે દર્શન કર્યા. બધાને આવેલા જોઈને મુનિએ પૂછ્યું કે તમે બધા શા માટે આવ્યા છો ? મારો જન્મ પરોપકાર માટે જ થયો છે તો જણાવો હું તમારું શું કાર્ય કરું ??              બધા જનોએ કહ્યું હે સમર્થ મુનિ શ્રેષ્ઠ ? અમારા રાજાને ઘણા વર્ષોથી પુત્ર નથી તો તેનો ઉપાય જણાવો. લોમશ ઋષિ ધ્યાનમાં બેઠા ને તેના પૂર્વ જન્મનું વૃતાંત જોયું. પછી ધ્યાનમાંથી બહાર આવીને કહ્યું કે આ રાજા પૂર્વ જન્મમાં વણિક હતો. તે નિર્ધન હતો ને નીચ કર્મ કરતો. એક વાર જ્યેષ્ઠ સુદ એકાદશીના દિવસે એ વાણિયો ગામના સીમાડામાં આવ્યો. તેને તૃષા લાગવાથી જળાશય પાસે આવ્યો.  ત્યારે તરત વિયાયેલી ગાય વાછરડા સાથે ત્યાં આવી એ પાણી પીવા લાગી. તે ગાયને તૃષા તૃપ્તિ થાય તે પહેલાજ તે વણીકે ગાયને તગેડી મૂકી ને પોતે જળ પીવા લાગ્યો. આ દોષથી તેને પુત્ર  નથી. પણ પૂર્વનું પુણ્ય ઘણું હતું તેથી રાજ્ય મળ્યું તે ભોગવે છે.              આ સાંભળીને સર્વે બોલ્યા કે હે મુનિ શ્રેષ્ઠ ? કોઈ ઉપાય બતાવો જેથી અમારા રાજાને આ પાપ થકી મુક્તિ મળે ને પુત્ર પ્રાપ્ત થાય.             લોમશ મુનિ કહે છે કે તમે બધા શ્રાવણ સુદ પુત્રદા એકદશીનું વ્રત વિધિ પૂર્વક કરો. રાત્રીએ જાગરણ કરીને વિષ્ણુનું ભજન કરો. અને પછી વ્રતનું પુણ્ય રાજાને આપો તો અવશ્ય પુત્ર થશે આ સાંભળીને સર્વે પ્રજાજનો અને બ્રાહ્મણો મુનિને નમસ્કાર કરીને નગરમાં આવ્યા. પછી શ્રાવણ સુદ પુત્રદા એકાદશી આવી ત્યારે સઘળી પ્રજાએ આ  વ્રત કર્યું. ને બારસના દિવસે રાજાને વ્રતનું પુણ્ય આપ્યું. આથી સમય જતા રાણીએ સુંદર, સ્વસ્થ અને બળવાન પુત્રને જન્મ આપ્યો.  આ લોકમાં પુત્ર પ્રાપ્તિ ની ઈચ્છા વાળા મનુષ્યોએ આ વ્રત અવશ્ય કરવું. જે કોઈ આ પુત્રદા એકાદશીનું મહાત્મ્ય સાંભળે છે તે સર્વ પાપોથી મુક્ત થઇને અને પુત્ર સુખ ભોગવીને સ્વર્ગમાં જાય છે.               આવી રીતે ભવિષયપુરાણમાં શ્રાવણ સુદ - ૧૧ પુત્રદા એકાદશીનું મહાત્મ્ય કહેલું છે.                  🍃🍃🌼🍃🍃 #💐પુત્રદા એકાદશી #એકાદશી ની શુભકામના