नांदेड : शहरात कोणते मोठे षड्यंत्र रचले जात होते का? असा सवाल निर्माण करणारी धडाकेबाज कारवाई नांदेड पोलिसांनी केली आहे. पोलीस अधीक्षक अविनाश कुमार यांच्या मार्गदर्शनाखाली सुरू करण्यात आलेल्या ‘ऑपरेशन क्लीन आऊट’ अंतर्गत पोलिसांनी विविध प्रकारच्या शस्त्रांचा मोठा साठा जप्त केला आहे. या कारवाईदरम्यान पोलिसांनी हजारोंच्या संख्येने खंजीर, धारदार शस्त्रे आणि इतर घातक साहित्य हस्तगत केले. जप्त करण्यात आलेल्या मुद्देमालाची एकूण किंमत तब्बल 43 लाख 48 हजार रुपये इतकी असल्याचे सांगण्यात येत आहे. नांदेड जिल्ह्याच्या इतिहासात इतक्या मोठ्या प्रमाणावर शस्त्रसाठा जप्त होण्याची ही पहिलीच मोठी कारवाई मानली जात आहे. पोलीस सूत्रांच्या माहितीनुसार, गुप्त माहितीच्या आधारे ही कारवाई करण्यात आली. शहरात कायदा व सुव्यवस्था बिघडवण्याचा मोठा कट रचला जात असल्याची शक्यता लक्षात घेऊन पोलिसांनी तात्काळ सापळा रचला आणि हा साठा उघडकीस आणला. या प्रकरणी काही संशयितांना ताब्यात घेण्यात आले असून त्यांची सखोल चौकशी सुरू आहे. या घटनेमुळे शहरात एकच खळबळ उडाली असून, “नांदेडमध्ये युद्धासारखी परिस्थिती निर्माण करण्याचा प्रयत्न होता का?” असा प्रश्न नागरिकांमध्ये चर्चेचा विषय ठरत आहे. पोलीस अधीक्षक अविनाश कुमार यांनी सांगितले की, “गुन्हेगारीवर आळा घालण्यासाठी ‘ऑपरेशन क्लीन आऊट’ सातत्याने राबवले जात असून, अशा प्रकारच्या बेकायदेशीर कृत्यांना कडक कारवाई केली जाईल. जिल्ह्यात शांतता आणि कायदा सुव्यवस्था राखणे ही आमची प्राथमिकता आहे.” दरम्यान, या कारवाईनंतर नांदेड पोलिसांच्या कार्यक्षमतेचे सर्व स्तरांतून कौतुक होत असून, पुढील काळात अशा धडक मोहिमा अधिक तीव्र करण्याचे संकेतही देण्यात आले आहेत.