ജനാലയ്ക്കൽ മഴ നോക്കി നിൽക്കുകയായിരുന്നു മീനു. പെട്ടെന്നാണ് അടുക്കളയിൽ നിന്ന് ആ 'യുദ്ധകാഹളം' ഉയർന്നത്. "മീനൂ... എടി പെണ്ണേ, നിന്നോട് എത്ര വട്ടം പറഞ്ഞിട്ടുണ്ട് ആ തോർത്ത് അവിടെ വിരിച്ചിടരുതെന്ന്? നിനക്ക് ഒരിക്കലും നന്നാവണം എന്നില്ലേ?" മീനു പതിയെ ചിരിച്ചു. ഒന്നും മിണ്ടാതെ അടുക്കളയിലേക്ക് നടന്നു. അവിടെ അമ്മ കലിപ്പിലാണ്. കയ്യിൽ മീനു അലക്ഷ്യമായി ഇട്ട തോർത്തുണ്ട്...... "നിന്റെ ഈ മടി ഇങ്ങനെ പോയാൽ മതി... കല്യാണം കഴിഞ്ഞ് ചെല്ലുന്നിടത്ത് അവർ നിന്നെ അടിച്ചു പുറത്താക്കും..." അമ്മയുടെ ശകാരം തുടർന്നു കൊണ്ടിരുന്നു. മീനു ഒന്നും പറയാതെ അമ്മയുടെ അരികിൽ ചെന്ന് നിന്നു. "അമ്മേ, ഒരു കാപ്പി കിട്ടുമോ? നല്ല കടുപ്പത്തിൽ." "ഇത്രയും തെറി കേട്ടിട്ടും നിനക്ക് കാപ്പി കുടിക്കണോ? പോയി പണി നോക്കെടി!" അമ്മ ദേഷ്യത്തിൽ പറഞ്ഞു...... മീനു തിരികെ മുറിയിലേക്ക് പോയി. അഞ്ചു മിനിറ്റ് കഴിഞ്ഞില്ല, മുറിയിൽ കാപ്പിയുടെ മണം പടർന്നു. നോക്കുമ്പോൾ കയ്യിൽ ആവി പറക്കുന്ന കാപ്പിയുമായി അമ്മ മുന്നിൽ നിൽക്കുന്നു. കൂടെ മീനുവിന് ഏറ്റവും ഇഷ്ടപ്പെട്ട ഉണ്ണിയപ്പവും..... കാപ്പി കപ്പിൽ നിന്ന് ഒരു സിപ്പ് എടുക്കുമ്പോൾ മീനു ചോദിച്ചു, "അല്ല, ഇപ്പോഴല്ലേ എന്നെ തെറി പറഞ്ഞത്? എന്നിട്ട് ഇതെപ്പോഴുണ്ടാക്കി?" അമ്മ ഒന്ന് കണ്ണ് ഉരുട്ടിയിട്ട് പറഞ്ഞു, "ഇതൊക്കെ നിനക്ക് വേണ്ടിയല്ലേടി ഉണ്ടാക്കുന്നത്. എന്റെ വായിൽ ഇരിക്കുന്നത് കേട്ടാലേ നിനക്ക് ഭക്ഷണം ഇറങ്ങൂ എന്ന് എനിക്കറിയില്ലേ?" അമ്മ പുറത്തേക്ക് പോകുമ്പോൾ മീനു ആ കാപ്പിയിലേക്ക് നോക്കി ചിരിച്ചു. ആ ശകാരത്തിന്റെ കൈപ്പും സ്നേഹത്തിന്റെ മധുരവും ആ കാപ്പിയിലുണ്ടായിരുന്നു. അമ്മമാരുടെ ഒരു കാര്യമേ! 😌☕🦋 #💭 എന്റെ ചിന്തകള്‍ #📝 ഞാൻ എഴുതിയ വരികൾ #💖 അമ്മ ഇഷ്‌ടം #📔 കഥ #📔 കഥ #😘 അമ്മയ്ക്കായി👇