#⚽ఫుట్‌బాల్ #⚽ఫుట్‌బాల్ వరల్డ్ కప్ ఫీవర్🌏 *FIFA … 39 రోజులపాటు భూభ్రమణం ఓ బంతి చుట్టూ… హైఫీవర్ షురూ…‼️* June 11, 2026🏀 ( Gopu Vijaya Kumar Reddy ) ….. “ప్రపంచంలో అత్యధిక మంది చూసే క్రీడ ఏది?” క్రికెట్ అభిమానులున్న భారత్‌లో ఈ ప్రశ్న అడిగితే చాలామంది క్రికెట్ అనే సమాధానం చెబుతారు. కానీ ప్రపంచ స్థాయిలో చూస్తే ఫుట్‌బాల్‌దే ఆధిపత్యం. ఇక మరికొన్ని గంటల్లో ప్రారంభం కానున్న FIFA ప్రపంచకప్‌తో మరోసారి ప్రపంచం మొత్తం ఒకే బంతి చుట్టూ తిరగబోతోంది… మరికొన్ని గంటల్లో ప్రపంచంలోనే అతిపెద్ద క్రీడా మహోత్సవాల్లో ఒకటైన FIFA పురుషుల ఫుట్‌బాల్ ప్రపంచకప్ ప్రారంభం కానుంది. ఈ సందర్భంగా ముందుగా ఒక ఆసక్తికరమైన విషయం తెలుసుకుందాం. అసలు సాకర్ (Soccer)కి, ఫుట్‌బాల్ (Football)కి తేడా ఏమిటి..? అమెరికా, కెనడా దేశాల్లో ఈ ఆటను “సాకర్” అని పిలుస్తారు. ప్రపంచంలోని మిగతా చాలా దేశాలు మాత్రం “ఫుట్‌బాల్” అనే పేరునే ఉపయోగిస్తాయి. అయితే “సాకర్” అనే పదం మొదట ప్రాచుర్యంలోకి వచ్చినది కూడా ఇంగ్లాండ్ నుంచే. Football Association అనే పదంలోని “Assoc” నుంచి “Soccer” అనే పదం పుట్టింది. అమెరికాలో ఇప్పటికే “అమెరికన్ ఫుట్‌బాల్” అనే మరో ప్రముఖ క్రీడ ఉండటంతో, గందరగోళం రాకుండా ఈ ఆటను “సాకర్”గా పిలవడం ప్రారంభించారు. అంతే తేడా. ఇప్పటివరకు 22 సార్లు ఫుట్‌బాల్ ప్రపంచకప్ నిర్వహించగా, బ్రెజిల్ అత్యధికంగా 5 సార్లు విజేతగా నిలిచింది. జర్మనీ, ఇటలీ చెరో 4 సార్లు, అర్జెంటీనా 3 సార్లు, ఫ్రాన్స్, ఉరుగ్వే చెరో 2 సార్లు ప్రపంచకప్‌ను గెలుచుకున్నాయి. “ఫుట్‌బాల్ ఎందుకు ప్రపంచాన్ని ఏలుతోంది, భారత్ ఎందుకు వెనుకపడింది?” భారత్ విషయానికి వస్తే, 1950లో ఒక్కసారి మాత్రమే ప్రపంచకప్‌కు అర్హత సాధించింది. అయితే అది కూడా ఆసియా జోన్‌లోని ఇతర దేశాలు వైదొలగడం వల్లే సాధ్యమైంది. కానీ అప్పటి పరిస్థితులు, ప్రయాణ వ్యయాలు, బూట్లు ధరించి ఆడాలనే నిబంధన, అలాగే ప్రపంచకప్ కంటే ఒలింపిక్స్‌కు ఎక్కువ ప్రాధాన్యం ఇవ్వాలనే భారత ఫుట్‌బాల్ సమాఖ్య ఆలోచనల కారణంగా జట్టు టోర్నమెంట్ నుంచి తప్పుకుంది. ఆ తర్వాత 1984 వరకు భారత్ కనీసం ప్రపంచకప్ అర్హత పోటీల్లో కూడా సరిగా పాల్గొనలేదు. 1983లో కపిల్ దేవ్ నాయకత్వంలోని భారత క్రికెట్ జట్టు ప్రపంచకప్ గెలిచిన తర్వాతే భారత క్రీడా వ్యవస్థ అంతర్జాతీయ టోర్నమెంట్ల ప్రాధాన్యాన్ని మరింతగా గుర్తించడం ప్రారంభించింది. అయితే అప్పటికే జరగాల్సిన నష్టం జరిగిపోయింది. అంతర్జాతీయ స్థాయిలో నిరంతరం ఆడకపోవడం వల్ల భారత ఫుట్‌బాలర్లు ఇతర దేశాల ఆటగాళ్లతో పోలిస్తే చాలా వెనుకబడ్డారు. దీనికి తోడు భారత క్రీడా సంఘాల్లో రాజకీయాల ప్రభావం కూడా తక్కువేమీ కాదు. 1988 నుంచి 2022 వరకు దాదాపు మూడు దశాబ్దాల కాలంలో ప్రధానంగా ఇద్దరే వ్యక్తులు భారత ఫుట్‌బాల్ సమాఖ్య అధ్యక్షులుగా కొనసాగారు. కాంగ్రెస్ నాయకుడు ప్రియరంజన్ దాస్‌మున్షి సుమారు 20 ఏళ్లు, బీజేపీ నాయకుడు ప్రఫుల్ పటేల్ దాదాపు 13 ఏళ్లు అధ్యక్ష పదవిలో ఉన్నారు. నిజం చెప్పాలంటే, భారత్‌లో ఫుట్‌బాల్ ఇప్పటికీ క్రికెట్ స్థాయిలో ప్రజాదరణ పొందలేదు. ఆట పరంగా అయినా, ప్రేక్షకాదరణ పరంగా అయినా అది ఇంకా పరిమితంగానే ఉంది. దీనికి ఒక ఉదాహరణ ప్రసార హక్కుల విలువ. భారత క్రికెట్ ఐపీఎల్ ప్రసార హక్కులు 10 ఏళ్ల కాలానికి సుమారు రూ.48 వేల కోట్ల విలువ పలికితే, FIFA ప్రపంచకప్ ప్రసార హక్కుల విలువ అదే కాలానికి కేవలం కొన్ని వందల కోట్ల రూపాయల స్థాయిలోనే ఉంది. ఇది భారత మార్కెట్లో ఫుట్‌బాల్‌కు ఉన్న వాణిజ్య విలువను చూపిస్తుంది. ఈసారి ప్రపంచకప్ అమెరికా, కెనడా, మెక్సికో దేశాల్లో జరుగుతుండటంతో భారత కాలమానం ప్రకారం చాలా మ్యాచ్‌లు అర్ధరాత్రి నుంచి ఉదయం వరకు ప్రసారం కానున్నాయి. అది కూడా భారత ప్రేక్షకాదరణపై కొంత ప్రభావం చూపే అంశమే. ఈ టోర్నమెంట్‌లో 48 జట్లు పాల్గొంటున్నాయి. వాటిని 12 గ్రూపులుగా విభజించారు. ప్రతి జట్టు తన గ్రూపులోని ఇతర జట్లతో మ్యాచ్‌లు ఆడుతుంది. ప్రతి గ్రూప్ నుంచి తొలి రెండు స్థానాల్లో నిలిచిన జట్లు తదుపరి దశకు అర్హత సాధిస్తాయి. ఈసారి విజేతగా నిలిచే అవకాశాలు స్పెయిన్‌కు కాస్త ఎక్కువగా కనిపిస్తున్నాయని చాలా మంది విశ్లేషకులు భావిస్తున్నారు. సెమీఫైనల్స్‌కు స్పెయిన్, ఫ్రాన్స్, అర్జెంటీనా, అలాగే బ్రెజిల్ లేదా పోర్చుగల్ చేరే అవకాశం ఉందని అంచనాలు ఉన్నాయి. అయితే ఉత్తర అమెరికా వాతావరణ పరిస్థితులు యూరోపియన్ జట్లకు సవాలుగా మారవచ్చు. 29 నుంచి 34 డిగ్రీల సెల్సియస్ ఉష్ణోగ్రతల్లో ఆడటం అంత సులభం కాదు. అందుకే ప్రతి ప్రపంచకప్‌లాగే ఈసారి కూడా కొన్ని అండర్‌డాగ్ జట్లు సంచలనాలు సృష్టించే అవకాశం ఉంది. నార్వే, జపాన్, మొరాకో వంటి జట్లపై ప్రత్యేక దృష్టి పెట్టాల్సిందే. ఇక అభిమానుల మధ్య ఎప్పుడూ కొనసాగే మెస్సీ- రోనాల్డో చర్చకు కూడా ఈ ప్రపంచకప్ ఒక విధంగా ముగింపు పలికే అవకాశం ఉంది. ఇద్దరూ తమ తరం గొప్ప ఆటగాళ్లే. అయితే ఒకరు ప్రపంచకప్ విజేతగా చరిత్రలో నిలిచారు, మరొకరు ఆ ఘనత కోసం ఇంకా ఎదురుచూస్తున్నారు. వయసు, కెరీర్ దశను దృష్టిలో ఉంచుకుంటే, ఇద్దరికీ ఇదే చివరి ప్రపంచకప్ అయ్యే అవకాశముంది. అందుకే ఈ టోర్నమెంట్ కేవలం మరో ప్రపంచకప్ మాత్రమే కాదు… ఫుట్‌బాల్ చరిత్రలో ఒక యుగానికి వీడ్కోలు పలికే వేదిక కూడా కావచ్చు.