ಕಾಮನ ಬಿಲ್ಲಿನ ಸೀರೆಯ ಹೆಣ್ಣೆ, ಜಡೆಯಲಿ ತಾರೆಯ ಮುಡಿದಿಹ ಹೆಣ್ಣೆ, ಮಿಂಚುವ ಕಂಗಳ ಸಂಚಿನ ಹೆಣ್ಣೆ, ಬಿಂಕದ ಹೆಣ್ಣೆ, ನೀನಾರು ? ಎತ್ತಿದ ಮುಖವೊ ಚೆಲುವಿನ ಗೋಪುರ ; ಕಂಗಳೊ ಕಳಸದ ಜೊತೆದೀಪ, ಕೊರಳೊ ಕೇಳದ ದನಿಯ ವಿಮಾನ - ಹೃದಯದ ಮರುಳೆ, ನೀನಾರು ? ವಸಂತ ಹಸೆಮಣೆ ನಿನ್ನ ಹಣೆ; ನಡುವೆ ಕುಂಕುಮದ ಚಿತ್ರಲತೆ - ಕರೆದರೆ ನಿಲ್ಲದೆ ತಿರುಗಿ ನೋಡದೆ ತೆರಳುವ ಹೆಣ್ಣೆ, ನೀನಾರು ? ಕನಸಿನ ಬನದಲಿ ಕಮಲಾಕರದಲಿ ಕನಕ ವೀಣೆಯನು ದನಿಮಾಡಿ, ನನ್ನ ನೆರಳಿಗೇ ಯೋಜನ ಹಾರುವ ಒಲಿಯದ ಹೆಣ್ಣೆ, ನೀನಾರು ? ಕೆನ್ನೆಯ ಬಾನಲಿ ಮುತ್ತಿನ ಚಂದಿರ ಮೂಡದ ಹೆಣ್ಣೆ, ನೀನಾರು ? ಪ್ರೇಮಪದಪದುಮ ಸೋಂಕದ ಮಂದಿರ ಮಾಯಾಮೋಹಿನಿ, ನೀನಾರು ? #💓ಮನದಾಳದ ಮಾತು