अकोला: अकोला शहराच्या मध्यवर्ती भागात असलेल्या रामदास पेठ पोलीस स्टेशनच्या हद्दीतील अलंकार मार्केट परिसरात काल रात्री एका तरुणावर धारदार शस्त्राने जीवघेणा हल्ला करण्यात आल्याची धक्कादायक घटना घडली आहे. या हल्ल्यात गंभीर जखमी झालेल्या तरुणाचा उपचारादरम्यान मृत्यू झाला असून, या घटनेमुळे संपूर्ण परिसरात कमालीची भीती आणि खळबळ उडाली आहे. राहुल सारासर असे मृत तरुणाचे नाव मिळालेल्या प्राथमिक माहितीनुसार, राहुल सारासर असे मृत पावलेल्या तरुणाचे नाव आहे. काल रात्री साधारण साडेआठ ते पाऊण वाजेच्या सुमारास अलंकार मार्केट परिसरात अज्ञात हल्लेखोरांनी राहुलवर धारदार शस्त्राने सपासप वार केले. या भीषण हल्ल्यात राहुल गंभीररित्या रक्ताच्या थारोळ्यात पडला. घटनेची माहिती मिळताच परिसरात एकच गोंधळ उडाला. उपचारादरम्यान घेतला अखेरचा श्वास घटनेची माहिती मिळताच रामदास पेठ पोलीस स्टेशनचे पोलीस निरीक्षक (पीआय) खंडारे यांच्यासह पोलिसांचे पथक तात्काळ घटनास्थळी दाखल झाले. पोलिसांनी गंभीर जखमी असलेल्या राहुलला तातडीने उपचारासाठी जवळच्या आयकॉन हॉस्पिटलमध्ये दाखल केले. मात्र, जखमा गंभीर असल्याने उपचारादरम्यान त्याची प्राणज्योत मालवली. जुन्या वादातून हत्येचा संशय; पोलिसांकडून तपास गतिमान या घटनेची गांभीर्य लक्षात घेता रामदास पेठ पोलीस आणि स्थानिक गुन्हे शाखा (LCB) चे पथक तात्काळ तपासात गुंतले आहे. हल्लेखोरांचा शोध घेण्यासाठी पोलिसांनी परिसरातील सीसीटीव्ही फुटेज तपासण्यास सुरुवात केली असून विविध पुराव्यांची गोळाबेरीज केली जात आहे. हल्ल्याचे नेमके कारण अद्याप अधिकृतपणे स्पष्ट झालेले नसले, तरी हा खून जुन्या वादातून झाला असावा असा प्राथमिक संशय पोलिसांकडून व्यक्त केला जात आहे. "हल्लेखोरांना अटक करण्यासाठी पोलिसांची वेगवेगळी पथके रवाना करण्यात आली असून, त्यांना लवकरच बेड्या ठोकल्या जातील," अशी माहिती पोलीस प्रशासनाकडून देण्यात आली आहे. या घटनेचा पुढील तपास रामदास पेठ पोलीस करत आहेत.