Soulmates (3) Part 3 ആ രാത്രിയുടെ നിശബ്ദതയിൽ, മഴയുടെ നേർത്ത സംഗീതം മാത്രം അവശേഷിക്കെ, ഭൂമി താരയുടെ വീടിന്റെ പടികൾ കയറി.  മുകിലിനെ കണ്ടുമുട്ടിയ നിമിഷങ്ങൾ ഒരു ഭാരം പോലെ അവളുടെ ഉള്ളിൽ തങ്ങിനിൽക്കുന്നുണ്ട്.  താരയുടെ മുറിക്ക് മുന്നിൽ ചെന്ന് നോക്കിയപ്പോൾ വാതിൽ അടച്ചിട്ടിരിക്കുകയാണ്. അങ്ങനെ ഒരു പതിവില്ല. രണ്ടു വീട്ടിൽ ആണെങ്കിലും അവർ ഒരേ മുറിയിലാണ് കിടക്കാറ്. ചില ദിവസങ്ങൾ താരയുടെ മുറിയിൽ,  ചിലപ്പോൾ ഭൂമിയുടെ...അങ്ങനെ മാറിക്കിടക്കാൻ മാത്രമുള്ള മാറാവ്യാധി വന്നിട്ടുള്ളത് പണ്ട് ഒരിക്കൽ സ്കൂളിൽ പഠിക്കുമ്പോളാണ്. കുറച്ചു ദിവസം മാറിക്കിടന്നതു തന്നെ വളരെ വേദനയോടെയാണ്. അസുഖം ഭേദമായപ്പോൾ തൊട്ട് ഒന്നിച്ചു തന്നെയാണ് പിന്നീടങ്ങോട്ട് കിടന്നിട്ടുള്ളത്. ഇന്നാദ്യമായി പതിവ് തെറ്റുകയാണ്. അടഞ്ഞു കിടക്കുന്ന വാതിൽ തുറക്കാൻ ഭൂമിയുടെ കൈകൾ പൊങ്ങിയെങ്കിലും അതിനുള്ള ധൈര്യം ഇല്ലാതെ വന്നു. ഭൂമി വാതിലിൽ പതുക്കെ മുട്ടി. "താരേ... നീ ഉറങ്ങിയോ?" മറുപടി ഉണ്ടായില്ല.  നേരിയ തേങ്ങലടക്കാനുള്ള ശ്രമത്തിൽ ഭൂമി  വീണ്ടും വിളിച്ചെങ്കിലും താര മിണ്ടിയില്ല. ഹൃദയത്തിൽ കല്ല് കയറ്റിവെച്ചതുപോലെ ഭൂമി തിണ്ണയിൽ വന്നിരുന്നു. അപ്പോഴാണ് താരയുടെ അമ്മ ശാരിക അവിടേക്ക് വന്നത്. "എന്ത് പറ്റി " "അമ്മാ...." ജന്മം കൊണ്ടല്ലെങ്കിലും കർമ്മം കൊണ്ട് അവരും അവളുടെ അമ്മ തന്നെയാണ്. "താര...." "അവൾക്ക് തലവേദന ആണെന്ന് പറഞ്ഞു നേരത്തെ കയറി കിടന്നു. ഞാൻ മരുന്നൊക്കെ കൊടുത്തിട്ടുണ്ട്. ഉറങ്ങിയിട്ടുണ്ടാകും." "ഉം " അവൾ മൂളി. അവരവരുടെ അടുത്ത് വന്നിരുന്നു. നോക്കെത്താ ദൂരത്തേക്ക് കണ്ണു നട്ട് ഇരിക്കുന്ന അവളെ കാണെ അവർക്ക് സങ്കടം തോന്നി. ശാരിക അവളുടെ കൈപ്പത്തിമേൽ കൈ വെച്ചു. "മോളെ ഭൂമി,  നിങ്ങൾ തമ്മിൽ എന്താണ് പ്രശ്‌നം എന്നെനിക്കറിയില്ല. ഞാനത് ചോദിക്കുന്നില്ല, എന്ത് തന്നെയായാലും അത് നിങ്ങൾക്കുള്ളിൽ തന്നെ ഇരുന്നോട്ടെ." അവരൊന്നു നിർത്തി. ഭൂമി താരയുടെ വാതിൽക്കലേക്ക് വെറുതെ നോക്കി. "മോളെ..നിങ്ങളെ രണ്ടുപേരെയും നിങ്ങളെക്കാൾ മറ്റാർക്കും മനസ്സിലാവില്ല. കുറച്ചു ദിവസങ്ങളുടെ വ്യത്യാസത്തിലാ നീയും അവളും ജനിച്ചത്. ഒന്നിച്ച് ഒരമ്മയുടെ വയറ്റിൽ കിടന്നതാ ഞാനും രേണുവും. ഒന്നിച്ചു വളർന്നു  ഒരേപോലെ സ്വപ്നം കണ്ടു. വളർന്നപ്പോൾ ഞങ്ങളെ പേടിപ്പിച്ചത് പ്രണയമായിരുന്നു. ഒരാൾ പ്രണയിച്ചാൽ, അവൾ മറ്റൊരാളോടൊപ്പം പോയാൽ ഞങ്ങൾക്കിടയിലെ ബന്ധം മുറിഞ്ഞുപോകുമെന്ന് ഞങ്ങൾ ഭയന്നു. അതുകൊണ്ട് ഞങ്ങൾ പ്രണയിച്ചില്ല. സ്നേഹം തോന്നിയ ഇടങ്ങളിൽ നിന്നെല്ലാം ഞങ്ങൾ ഓടിയൊളിച്ചു." ശാരിക ഭൂമിയുടെ കൈകൾ ചേർത്തുപിടിച്ചു. "പിരിയാതിരിക്കാൻ ഞങ്ങൾ കണ്ടുപിടിച്ച വഴി വിചിത്രമായിരുന്നു. വിവാഹം കൊണ്ട് ഞങ്ങൾ വേർപിരിയരുതെന്ന് വാശിയുണ്ടായിരുന്നു. അങ്ങനെയാണ് രേണുകയുടെ ഭർത്താവിന്റെ ഏറ്റവും അടുത്ത സുഹൃത്തിനെത്തന്നെ ഞാൻ വിവാഹം കഴിക്കുന്നത്. ഇന്നിതാ, അടുത്തടുത്ത വീടുകളിൽ, ഒരേ മുറ്റത്ത് ഞങ്ങൾ ജീവിക്കുന്നു. ഈ സ്നേഹം നിലനിർത്താൻ ഉള്ളിൽ കുഴിച്ചുമൂടിയ ചില പ്രണയങ്ങൾ  അന്ന് ഞങ്ങളുടെ ജീവിതത്തിൽ ഉണ്ടായിരുന്നു. അതൊക്കെ പ്രായത്തിന്റെ പക്വത ഇല്ലായ്മയായിട്ടാണ് ഇപ്പോ ആലോചിക്കുമ്പോ തോന്നുന്നത്. ഞങ്ങളെ ഒരേ കുടുംബത്തിലേക്ക് പറഞ്ഞയക്കണമെന്നായിരുന്നു ഞങ്ങളുടെ വീട്ടുകാർക്ക്. അങ്ങനെ കുറെയൊക്കെ ആലോചനകൾ നോക്കി. ഒന്നും ശെരിയായില്ല. ഞാൻ കാരണം അവൾക്കും കൂടെ ആണ് നല്ലൊരു ജീവിതം കിട്ടാതാവുന്നതെന്ന് കരുതി ആദ്യം അവളുടെ കല്യാണം ഉറപ്പിച്ചു. എവിടെ പോയാലും എന്റെ കൂടെ കല്യാണം കഴിഞ്ഞ് ഒരേ സ്ഥലത്ത് ജീവിക്കണമെന്ന് ഭർത്താവിനെ കൊണ്ടും എന്നെകൊണ്ടും എല്ലാം സത്യം ചെയ്യിപ്പിച്ചിട്ടാണ് അവൾ കല്ല്യാണ ദിവസം അങ്ങോട്ട് പോയത്." അതു പറയുമ്പോൾ അവരുടെ വാക്കുകളിൽ തന്റെ സഹോദരിയോടുള്ള സ്നേഹം നിറയുകയായിരുന്നു. അവർ ഭൂമിയുടെ മുഖം കൈകുമ്പിളിലെടുത്തു. "ഞങ്ങളുടെ പൊന്നുമക്കളും സ്നേഹത്തോടെ ജീവിക്കണമെന്നേ ഒരാശ ഉണ്ടായിരുന്നുള്ളൂ ഞങ്ങൾക്ക്. നിങ്ങളുടെ സ്നേഹം കാണുമ്പോ ആരുടെയും കണ്ണു തട്ടരുതേ എന്ന് ഉള്ളുരുകി പ്രാർത്ഥിച്ചിട്ടുണ്ട്. ദൈവം നിങ്ങളിൽ അസൂയപ്പെട്ടിട്ടുണ്ടാകും എന്നു കരുതിക്കോളാം. എന്നാലും എന്റെ മക്കൾ പിരിയല്ലേ...." അവരുടെ കണ്ണുകൾ നനയുന്നത് കണ്ടപ്പോൾ ഭൂമിയുടെ നെഞ്ചോന്ന് പിടച്ചു. "നീ വിഷമിക്കണ്ട ഭൂമി." സ്വയം കണ്ണീരിനെ മറച്ചു പിടിച്ചു കൊണ്ട് ഭൂമിയുടെ തോളിൽ ഒന്നു തട്ടി അവർ എഴുന്നേറ്റ് പോയി. ശാരിക പോയപ്പോൾ ഭൂമി എഴുന്നേറ്റ് ഒരു തവണ കൂടി വാതിൽക്കൽ വന്നു നിന്നു. "ഞാൻ പോവാ താരേ... നീ കേൾക്കുന്നുണ്ടെന്നറിയാം. നിന്നെക്കാൾ വലുതല്ല എനിക്കാരും. നിന്നെ കരയിപ്പിച്ചിട്ട് എനിക്കൊന്നും വേണ്ട. എനിക്കെന്റെ പഴയ താരയെ മതി." അത്രയും പറഞ്ഞു കൊണ്ട് ഭൂമി വീട്ടിലേക്കു നടന്നു. അപ്പോൾ മുറിക്ക് ഉള്ളിൽ നിന്നും നേർത്ത ഒരു കരച്ചിൽ പുറത്തേക്ക് കേട്ടു.  അകത്ത് എല്ലാം കേട്ട് കൊണ്ട് വാതിൽക്കൽ തന്നെ ഇരിക്കുകയായിരുന്നു താര. അവൾ കാലുകൾക്കിടയിൽ മുഖം ചേർത്ത് വെച്ച് ഉള്ളിലെ സങ്കടം കരഞ്ഞു തീർക്കുകയായിരുന്നു. ആ രാത്രിയിൽ, രണ്ടു പെൺമനസ്സുകൾ പ്രണയത്തിനും സഹോദരസ്നേഹത്തിനുമിടയിൽ പെട്ട് മഴയത്ത് നനയുന്ന ഇലകൾ പോലെ വിറച്ചുനിന്നു. #👩 Sisters Love #📙 നോവൽ #📔 കഥ #💞 പ്രണയകഥകൾ #😍 ആദ്യ പ്രണയം