Soulmates Part 4
താരയുടെ വീട്ടിൽ നിന്നും മടങ്ങിയെത്തിയ ഭൂമിയെ വീടിന്റെ ഉമ്മറത്ത് തന്നെ രേണുക കാത്തിരിപ്പുണ്ടായിരുന്നു. ഒന്നും മിണ്ടാതെ, അമ്മയുടെ കണ്ണുകളിൽ നോക്കാതെ മുറിയിലേക്ക് കയറാൻ തുടങ്ങിയ ഭൂമിയെ രേണുക കൈയ്ക്കു പിടിച്ചു നിർത്തി.
"എന്താ ഭൂമി... നീ എന്താ ഒന്നും മിണ്ടാത്തത്? നിന്റെ മുഖം കണ്ടാൽ അറിയാം എന്തോ സംഭവിച്ചെന്ന്. എന്താ അവിടെ കിടക്കാതിരുന്നേ.... നിങ്ങൾ വഴക്കിട്ടോ. ഇന്ന് വന്നപ്പോ മുതൽ ഞാൻ ശ്രദ്ധിക്കുന്നുണ്ട്. എന്താ പ്രശ്നം???"
ഭൂമിക്ക് സങ്കടം അണപൊട്ടി. അവൾ എല്ലാം അമ്മയോട് തുറന്നു പറഞ്ഞു. മുകിലിന് തന്നെയായിരുന്നു ഇഷ്ടമെന്നും, അത് കേട്ട് താര തകർന്നുപോയെന്നും വിവരിക്കുമ്പോൾ അവളുടെ ശബ്ദം വിറയ്ക്കുന്നുണ്ടായിരുന്നു. എന്നാൽ, തന്റെ ഉള്ളിൽ മുകിലിനോടുണ്ടായിരുന്ന തീവ്രമായ പ്രണയത്തെ അവൾ ഒരു രഹസ്യമായി തന്നെ കാത്തുസൂക്ഷിച്ചു.
"എനിക്ക് അവനോട് ഇഷ്ട്ടമല്ലെന്നു പറഞ്ഞു അമ്മേ..."
അത് പറയുമ്പോഴും അവളുടെ ഉള്ളിലെ പ്രണയം മഴമേഘം പോലെ വിങ്ങിനിൽക്കുന്നുണ്ടായിരുന്നു.
മകളുടെ വാക്കുകൾ കേട്ട് രേണുക ഒരു നിമിഷം മൗനിയായി.
"ഞാൻ പോയി കിടക്കട്ടെ "
"ഒറ്റക്ക് നീയവിടെ കിടക്കണ്ട. ഇന്ന് ഞാൻ നിന്റെ മുറിയിൽ കിടക്കാം."
ഒന്നിച്ചു ഒരേ കട്ടിലിൽ ഭൂമിയോടൊപ്പം രേണു കിടന്നു. ഭൂമി അപ്പോഴും എന്തോ ആലോചനയിലായിരുന്നു. അവളുടെ ചിന്തകളുടെ ഭാരം കൊണ്ട് കട്ടിൽ തേങ്ങി.
ആ രാത്രി, ജനാലയ്ക്കപ്പുറം പെയ്യുന്ന മഴയുടെ തണുപ്പിൽ നിന്നും ഒളിച്ചോടാനെന്നവണ്ണം ഭൂമി രേണുകയോട് ചേർന്ന് കിടന്നു. വലിയൊരു ഭാരം ഇറക്കിവെച്ച ആശ്വാസമുണ്ടായിരുന്നെങ്കിലും, മുകിലിന്റെ വാക്കുകൾ അവളുടെ കാതുകളിൽ മുഴങ്ങിക്കൊണ്ടിരുന്നു.
രേണുക മകളുടെ തലയിൽ തലോടിക്കൊണ്ട് പതുക്കെ പറഞ്ഞു തുടങ്ങി.
"നീ വിചാരിക്കുന്നത് പോലെയല്ല ഭൂമി...
ശാരിക ഇപ്പോഴും വിചാരിക്കുന്നത് അവൾ എനിക്ക് വേണ്ടി ത്യാഗം ചെയ്തു എന്നാണ്. ആ കഥയിൽ ഒരു വലിയ സത്യം അവൾ പോലുമറിയാതെ മറഞ്ഞുകിടപ്പുണ്ട്. "
അമ്മ എന്താണ് പറയുന്നതെന്നറിയാൻ ഭൂമി അമ്മയെ നോക്കി.
"നീ കരുതുന്നത് ഞങ്ങൾ പിരിയാതിരിക്കാൻ വേണ്ടി അവൾ എന്റെ ഭർത്താവിന്റെ കൂട്ടുകാരനെ കെട്ടി എന്നാണ്, അല്ലേ? എന്നാൽ സത്യം അതല്ല."
ഭൂമി അമ്പരപ്പോടെ അമ്മയെ നോക്കി. രേണുക തുടർന്നു
"നിന്റെ അച്ഛന്റെ ആ ഉറ്റ സുഹൃത്ത്, അതായത് ശാരികയുടെ ഭർത്താവ്... അയാൾ പണ്ട് മുതൽക്കേ ശാരിയെ ജീവനോളം സ്നേഹിച്ചിരുന്ന ആളാണ്. അത് ശാരിയ്ക്ക് അറിയില്ലായിരുന്നു. ഞാനും ശാരികയും വിവാഹം കൊണ്ട് തമ്മിൽ പിരിയേണ്ടി വരുമെന്ന ഘട്ടത്തിൽ, അവളുടെ ആ പഴയ കാമുകൻ തന്നെയാണ് എന്റെ ഭർത്താവിനോട് ഈ ആലോചന മുന്നോട്ട് വെച്ചത്. ശാരികയെ തന്റെ ജീവിതത്തിലേക്ക് ചേർക്കാൻ അയാൾ കണ്ടെത്തിയ വഴിയായിരുന്നു അത്."
രേണുകയുടെ കണ്ണുകളിൽ ആ പഴയ കാലം മിന്നിമറഞ്ഞു.
"നിന്റെ അജയൻ അങ്കിളിന് (ശാരികയുടെ ഭർത്താവ്) ശാരിയോടുണ്ടായിരുന്ന പ്രണയം, വർഷങ്ങൾക്ക് മുൻപ്...ഞങ്ങൾ സ്കൂളിൽ പഠിക്കുന്ന കാലം മുതൽ തുടങ്ങിയതാണ്. അന്ന് അജയൻ ശാരിയുടെ പിന്നാലെ കുറെ നടന്നിരുന്നു. ശാരി അന്ന് പാട്ടിലും നൃത്തത്തിലും ഒക്കെ മിന്നിനിൽക്കുന്ന സമയം. പക്ഷേ, ഞാനും അവളും തമ്മിലുള്ള ആത്മബന്ധം കാരണം, പ്രണയത്തെ അവളുടെ ജീവിതത്തിലേക്ക് കടത്തിവിടാൻ അവൾ തയ്യാറായിരുന്നില്ല."
രേണുക ഒരു ദീർഘനിശ്വാസമെടുത്ത് തുടർന്നു
"അജയൻ തന്റെ പ്രണയം അവളോട് തുറന്നു പറഞ്ഞതാണ്. പക്ഷേ, അവൾ അത് വളരെ നിസ്സാരമായി തള്ളിക്കളഞ്ഞു. തന്റെ സഹോദരിയെക്കാൾ മറ്റൊരാളെ സ്നേഹിക്കേണ്ടി വരുമെന്ന പേടിയായിരുന്നു അവൾക്ക്. ആ നിഷേധം ഏറ്റുവാങ്ങി അയാൾ മടങ്ങിപ്പോയി. പക്ഷേ കാലം കരുതിവെച്ചത് ഇങ്ങനൊക്കെ ആയിരുന്നു. വർഷങ്ങൾക്ക് ശേഷം ഞങ്ങൾക്ക് വിവാഹാലോചനകൾ വന്നപ്പോൾ, നിന്റെ അച്ഛന്റെ സുഹൃത്തായി അജയൻ വീണ്ടും ഞങ്ങളുടെ മുന്നിലെത്തി."
ഭൂമി അമ്മയുടെ കണ്ണുകളിലേക്ക് ഉറ്റുനോക്കി. ഇരുട്ടിലും ആ കഥയുടെ ആവേശം രേണുകയുടെ മുഖത്തുണ്ടായിരുന്നു.
"അജയൻ അന്ന് വിചാരിച്ചിരുന്നെങ്കിൽ മറ്റേതെങ്കിലും ഒരു പെൺകുട്ടിയെ വിവാഹം കഴിക്കാമായിരുന്നു. ചെറിയ പ്രായം കൊണ്ട് പറ്റാവുന്നതൊക്കെ അയാൾ ഓടി നടന്നു സമ്പാദിച്ചു കൂട്ടി. വലിയ കാശുള്ള കുടുംബത്തിൽ നിന്നും അവളെക്കാൾ സുന്ദരികളായ പഠിപ്പും ജോലിയും എല്ലാം ഉള്ള പെൺകുട്ടികളെ അയാൾക്കു കിട്ടുമായിരുന്നു. പക്ഷേ അയാൾ കാത്തിരുന്നു. നിന്റെ അച്ഛനോട് അയാൾ പറഞ്ഞത് ഒരേയൊരു കാര്യമാണ്
'എനിക്ക് ശാരികയെ വിവാഹം കഴിക്കണം. നിങ്ങളിൽ നിന്ന് ഒരിക്കലും അവളെ പിരിക്കില്ലെന്ന് ഞാൻ ഉറപ്പു നൽകാം.'
"വിധി നോക്കിയേ ഭൂമി... എന്നെ പിരിയാൻ വയ്യാതെ പ്രണയം ഉപേക്ഷിച്ച അവൾക്ക് മുന്നിലേക്ക്, അവളെയും അവളുടെ സഹോദരിയെയും തമ്മിലകറ്റാത്ത, അവളെ ജീവന് തുല്യം സ്നേഹിക്കുന്ന പ്രണയം മറ്റൊരു രൂപത്തിൽ തിരിച്ചുവന്നു."
രേണുക ഭൂമിയുടെ നെറ്റിയിൽ ചുംബിച്ചു.
"ശാരി ഇന്നും കരുതുന്നത് പിരിയാതിരിക്കാൻ വേണ്ടി താൻ എടുത്ത തീരുമാനമായിരുന്നു ആ വിവാഹം എന്നാണ്. എന്നാൽ സത്യത്തിൽ അജയന്റെ വർഷങ്ങൾ നീണ്ട പ്രാർത്ഥനയുടെയും കാത്തിരിപ്പിന്റെയും ഫലമായിരുന്നു അത്. അയാൾ ഇന്നും അത് അവളോട് പറയാത്തത് എന്താണെന്നറിയുമോ? പണ്ട് അയാൾ പ്രണയം പറഞ്ഞപ്പോൾ അവൾ അത് നിരസിച്ചിരുന്നു. ഇന്ന് സത്യം അറിഞ്ഞാൽ, തന്നെ ജീവനോളം സ്നേഹിച്ച ഒരാളെ വേദനിപ്പിച്ചതോർത്ത് ശാരിയ്ക്ക് കുറ്റബോധം തോന്നരുത് എന്ന് അയാൾക്ക് നിർബന്ധമുണ്ട്. അതുകൊണ്ട് ഇന്നും അയാൾ ആ പഴയ കാമുകനെ ഉള്ളിൽ ഒളിപ്പിച്ചു വെച്ച്, അവളുടെ നല്ല പാതിയായി ജീവിക്കുന്നു. പ്രണയം സത്യമാണെങ്കിൽ ഭൂമി, അത് എത്ര വലിയ മഴയായാലും കാറ്റായാലും നമ്മളെ തേടി വരും."
അമ്മയുടെ വാക്കുകൾ കേട്ട് കിടക്കുമ്പോൾ ഭൂമി മുകിലിനെക്കുറിച്ച് ഓർത്തു. തന്റെയുള്ളിലെ പ്രണയം ഒളിപ്പിച്ചു വെച്ചാലും, അത് അജയൻ അങ്കിളിനെപ്പോലെ എന്നെങ്കിലും തന്നെ തേടി വരുമോ? അതോ താരയുടെ സങ്കടത്തിന് മുന്നിൽ ആ പ്രണയം ഒരു മഴത്തുള്ളി പോലെ മണ്ണിൽ അലിഞ്ഞു പോകുമോ?
ഒരു നിമിഷം അവിടെ നിശബ്ദത തളംകെട്ടി നിന്നു.
"മുകിലിന് നിന്നെ മാത്രമാണോ ഇഷ്ടം? നിനക്ക് അവനെ ഇഷ്ടമല്ലേ ഭൂമി?"
ആ ചോദ്യം ഒരു ഇടിമിന്നലായി ഭൂമിയുടെ ഉള്ളിൽ പതിച്ചു. ഒളിപ്പിച്ചു വെച്ച പ്രണയം പുറത്തു ചാടുമെന്ന പേടിയോടെ അവൾ മുഖം താഴ്ത്തി. മഴ കഴിഞ്ഞ് മണ്ണിൽ നിന്നും ആവി ഉയരുന്നത് പോലെ, അവളുടെ ഉള്ളിലെ വികാരങ്ങൾ പുറത്തേക്ക് വരാൻ വെമ്പിനിന്നു. ഒരു വശത്ത് സഹോദരിയുടെ സങ്കടം, മറുവശത്ത് മുകിലിന്റെ ആത്മാർത്ഥത, അതിനപ്പുറം പ്രണയം ഉള്ളിലൊളിപ്പിച്ച് എത്ര കാലം ജീവിക്കേണ്ടി വരുമെന്ന ഭയം.
ആ രാത്രിയിൽ, മഴയുടെ ശേഷിപ്പുകൾക്കൊപ്പം ഭൂമിയുടെ മനസ്സും പെയ്തു തുടങ്ങുകയായിരുന്നു. അമ്മ ചോദിച്ച ചോദ്യം അവളുടെ ഉള്ളിൽ തളം കെട്ടിനിന്നു.
ആ രാത്രിയുടെ അന്ത്യയാമങ്ങളിൽ, മഴ തോർന്നിട്ടും ഭൂമിയുടെ കണ്ണുകളിൽ ഉറക്കം വന്നില്ല. അവളുടെ ഓർമ്മകൾ വർഷങ്ങൾ പുറകിലേക്ക് പാഞ്ഞു പോയി.
✍🏻asra
#😍 ആദ്യ പ്രണയം #💞 പ്രണയകഥകൾ #👩 Sisters Love #📙 നോവൽ #📔 കഥ
