*_Weather Update: వేసవిలో చల్లని కబురు, తెలుగు రాష్ట్రాలకు వర్షసూచన... రేపు ప్రాంతాలకు రెయిన్ అలర్ట్_*
#🆕Current అప్డేట్స్📢
_తెలుగు రాష్ట్రాల్లో విభిన్న వాతావరణం కొనసాగుతుంది. వేసవిలో ఓవైపు భానుడి భగభగలు కొనసాగుతుండగా... మరోవైపు ద్రోణి ప్రభావంతో వర్షాలు కురుస్తున్నాయి._
_తెలంగాణ, ఆంధ్రప్రదేశ్లలోని పలుచోట్ల వడగాళ్ల వానలు...ఉరుములు, మెరుపులతో కూడిన వర్షాలు పడుతున్నాయి. అయితే మరో రెండు, మూడు రోజులు తెలుగు రాష్ట్రాల్లో వర్షాలు కురిసే అవకాశం ఉందని వాతావరణ నిపుణులు చెబుతున్నారు. వేసవిలో ఎండల తీవ్రత మధ్య కురుస్తున్న వర్షాలు... వేసవి తీవ్రత నుంచి జనాలకు ఉపశమనం కలిగించగా, రైతులు మాత్రం చేతికి వచ్చిన పంట దెబ్బతింటుతుందని ఆందోళన చెందుతున్నారు. ఈ క్రమంలోనే తెలుగు రాష్ట్రాల్లో సోమవారం రోజున వెదర్ ఏ విధంగా ఉండనుందనే దానిపై వాతావరణ శాఖ అంచనాలు ఎలా ఉన్నాయనేది తెలుసుకుందాం..._
_ఐఎండీ హైదరాబాద్ విభాగం ప్రకారం... తెలంగాణలో రానున్న నాలుగైదు రోజులు ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉంది. అదే సమయంలో రానున్న రెండు రోజులు రాష్ట్రంలో గరిష్ట ఉష్ణోగ్రతల్లో ఎలాంటి మార్పు ఉండదని హైదరాబాద్ వాతావరణ కేంద్రం తెలిపింది. అయితే ఆ తర్వాత మూడు రోజులలో రాష్ట్రంలో ఉష్ణోగ్రతలు రెండు నుంచి మూడు డిగ్రీలు తగ్గే అవకాశం ఉందని అంచనా వేసింది._
_సోమవారం (మే 4) రోజున రాష్ట్రంలోని జయశంకర్ భూపాలపల్లి, ములుగు, భదాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హునుమకొండ, జనగాం, సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజ్గిరి, వికారాబాద్, సంగారెడ్డి, మెదక్, నాగర్ కర్నూలు జిల్లాలలో అక్కడక్కడ ఉరుములు, మెరుపులు, ఈదురుగాలులతో కూడిన వర్షాలు కురుస్తాయని హైదరాబాద్ వాతావరణ కేంద్రం పేర్కొంది. ఈ జిల్లాలకు ఎల్లో అలర్ట్ కూడా జారీ చేసింది._
_ఇక, ఆంధ్రప్రదేశ్ విషయానికి వస్తే... ద్రోణి ప్రభావంతో రాష్ట్రంలోని పలు ప్రాంతాల్లో వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. ద్రోణి ప్రస్తుతం దక్షిణ ఛత్తీస్గఢ్ నుంచి తెలంగాణ, ఆంధ్రప్రదేశ్, తమిళనాడు మీదుగా కొమోరియన్ ప్రాంతం వరకు సగటు సముద్ర మట్టానికి 1.5 కి.మీ ఎత్తులో విస్తరించి కొనసాగుతుందని వెల్లడించింది. కోస్తాంధ్రలో వర్షాలు కురుస్తాయని, రాయలసీమలో పొడి వాతావరణం ఉంటుందని తెలిపింది._
_సోమవారం రోజున ఉత్తర కోస్తాంధ్రలోని కొన్ని చోట్ల తేలికపాటి వర్షాల నుంచి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉందని అమరావతి వాతావరణ కేంద్రం తెలిపింది. దక్షిణ కోస్తాంధ్రప్రదేశ్లో, రాయలసీమలో ఒకటి లేదా రెండు చోట్ల తేలికపాటి నుంచి మోస్తరు వర్షం లేదా ఉరుములతో కూడిన జల్లులు పడే అవకాశం ఉందని పేర్కొంది._
