ಅವ್ವ. ***** ಅ(ವ್ವ)ಮ್ಮಂದಿರ ದಿನವಂತೆ ಇಂದು.!! ಎಲ್ಲಿ ಹುಡುಕಲಿ ನಿನ್ನ...? ಎಲ್ಲಿ ಹುಡುಕಿದರೆ ಸಿಗಬಹುದು ನೀನು? ನಾನೂ ನಿನ್ನಂತೆ ಮಣ್ಣಾದರೆ ನೀ ಬರುವೆಯಾಗಿದ್ದರೆ ನಾ ಎಂದೋ ಮಣ್ಣಾಗಿಬಿಡುತ್ತಿದ್ದೆ. ನಿನ್ನ ಕಳೆದು ಕೊಂಡು ನಾ ನೋವು ಅನುಭವಿಸುವಂತೆ.. "ನಮ್ಮ ಮಕ್ಕಳೂ ಕೂಡ ಈ ಚಿಕ್ಕ ವಯಸ್ಸಿನಲ್ಲಿ ತಾಯಿಯಿಲ್ಲದ ನೋವು ಅನುಭವಿಸಬೇಕಾ?"ಎನುವ ನನ್ನವರ ಮಾತು ತಾಯಿಯ ಜವಾಬ್ದಾರಿ ನೆನಪಿಸುತ್ತದೆ. "ಮಡಿದ ನಿನ್ನ ತಾಯಿಯ ಆತ್ಮ ಖುಷಿಯಾಗಿರಬೇಕೆಂದರೆ ನೀ ನಿನ್ನ ಮಕ್ಕಳ ಕುರಿತು ಯೋಚಿಸಲೇಬೇಕು" ಎಂದು ಪತಿ,ಮಕ್ಕಳು ಹೇಳಿದಾಗಲೆಲ್ಲ ಮನಕೆ ನಿನದೇ ಬದುಕಿನ ರೀತಿ ಮೈಗೂಡಿಸಿಕೊಂಡು ಪುಟಿದೇಳುತ್ತೇನೆ. ಎದೆಯುದ್ದ ಬೆಳದ ಮಕ್ಕಳಿದ್ದರೂ ನಿನ್ನ ತೊಡೆಯ ಮೇಲೆ ನಾವು ಮಕ್ಳಂತೆ ಮಲ್ಗಿ ಅವ್ವ.‌ಅವ್ವ..ಎಂದಾಗ "ಅವ್ವ ಅಂತೀರಿ ಮುಂದ ಏನು ಹೇಳಲ್ಲ" ಎನುತ ನಮ್ಮ ತಲೆ ಸವರುವಾಗ ನಮ್ಮ ಮನದಾಳದ ತುಮುಲ ನೀ ಗ್ರಹಿಸುವಂತೆ ಬೇರ್ಯಾರು ಗ್ರಹಿಸಲು ಸಾಧ್ಯವಿತ್ತು ಹೇಳು!? ನಿನ್ನನುಪಸ್ಥಿತಿ ನನ್ನ ಬದುಕಿಗೆ ಈ ತರಹದ ನಿರ್ಲಿಪ್ತ ಭಾವದ ಪಾಠ ಕಲಿಸುವುದೆಂದು ನಾನೆಣಿಸಿರಲಿಲ್ಲ.! ಹಿಡಿ ಪ್ರೀತಿಗಾಗಿ ಹಂಬಲಿಸುವ ಮನಕೆ ನಿನ್ನಂತೆ ಬೇರ್ಯಾರು ಪ್ರೀತಿ ನೀಡಲಾರರು ಎನುವ ಕಹಿಸತ್ಯದ ಅರಿವು ನನಗಾಗಿದೆ. ಅದಕ್ಕೆ ಅಲ್ಲವೇನೂ "ತಾಯಿಗಿಂತ ದೊಡ್ಡದಿಲ್ಲ ಸ್ಥಾಯಿ" ಅಂತ ತಿಳಿದವರು ಹೇಳಿದ್ದು. ಈ ನಾಲ್ಜೈದು ವರ್ಷಗಳಲ್ಲಿ ನೀ ಇರದ ಅಮೂಲ್ಯ ಕ್ಷಣಗಳ ನೆನದಾಗ ಮನ ಜೀವಂತವಿದ್ದೂ ನಿರ್ಜೀವವಾಗಿಬಿಡುತ್ತದೆ. ನಿನ್ನ ನೆನಪು ನನ್ನೊಳಗಿನ ಅಂತಃಸತ್ವವನೇ ಬದುಕಿಗೆ ವಿಮುಖ ಮಾಡೋದು ಎಷ್ಟು ಸತ್ಯವೋ.. ಬದುಕಿಗೆ ಜೀವನ್ಮುಖಿಯಾಗಿಸೋದು ಅಷ್ಟೇ ಸತ್ಯ.! ಶ್ರೀಮಂತರ ಮನೆಯ ಒಬ್ಬಳೇ ಮಗಳಾಗಿ ಉದ್ಯೋಗಸ್ಥ ಪತಿಯಿದ್ದರೂ ಛಲಕ್ಕೆ ಬಿದ್ದು ಹೊಲ ಮನೆಯಲಿ ದುಡಿದು ಏಳು ಮಕ್ಕಳನ್ನು ಸಲಹಿ ಎಲ್ಲರಿಗೂ ಬೇಕಾದ ಗೌಡಶ್ಯಾನಿಯಾಗಿ ನೀ ಬದುಕು ಕಟ್ಟಿಕೊಂಡ ರೀತಿ ನನ್ನ ಜೀವನಕ್ಕೆ ಮಾದರಿ. ಒಟ್ನಲ್ಲಿ‌ ನೀ‌ ಬದುಕಿದ ಆದರ್ಶದ ಬದುಕಿನ ರೀತಿಯೇ ನನ್ನ ಬದುಕಿಗೆ ದಾರಿದೀಪ. ಇರಲಿ ಅನವರತ ನಿನ್ನಾಶೀರ್ವಾದ ನಿನ್ನ ಮಕ್ಕಳಿಗೂ,ನನ್ನ ಮಕ್ಕಳಿಗೂ, ನಿನ್ನ ಮೊಮ್ಮಕ್ಕಳಿಗೂ...ನನಗೂ! ಎಲ್ಲಿಯಾದ್ರೂ ಹಿರಿಯ ಜೀವಗಳನ್ನು ನೋಡಿದಾಗ ಆ ದೇವರು ನನ್ನವ್ವನಿಗೇಕೆ ಹೀಗೆ ದೀರ್ಘಾಯುಷ್ಯ ನೀಡಲಿಲ್ಲ ಎಂದು ಮನ ಮೌನದಿ ರೋಧಿಸುತ್ತದೆ. ಮತ್ತೊಮ್ಮೆ ನಿನ್ನ ಮಡಿಲಲ್ಲಿ ಮಗುವಾಗುವಾಸೆ ಆ ಆಸೆ ಇನ್ನೆಂದೂ ವಾಸ್ತವದಿ ಈಡೇರಲಾರದು ಎನುವ ಅರಿವಿದ್ದರೂ!!! ನನ್ನುಸಿರು ನಿಂತಾಗಲೇ ನಿನ್ನ ನೆನಪುಗಳ ಅವಸಾನ ನನ್ನೊಂದಿಗೆ. ನನ್ನೆದೆಯಾಳದಿ ನೀನೆಂದಿಗೂ ಜೀವಂತ ನೀನೇ ನನಗೆ ಅಂತಃಶಕ್ತಿಯ ಪ್ರೇರಣೆ. #✍️ ಮೋಟಿವೇಷನಲ್ ಕೋಟ್ಸ್ #😍 ನನ್ನ ಸ್ಟೇಟಸ್ #🖋️ ನನ್ನ ಬರಹ #💓ಮನದಾಳದ ಮಾತು #💖ಅಮ್ಮಂದಿರ ದಿನದ ಸ್ಟೇಟಸ್👩‍👦‍👦