*_నీ తలరాతను కూడా మార్చగలిగే నీ దాన-ధర్మం_*.
*_రామాపురం అనే గ్రామంలో రామయ్య అనే ఒక వ్యక్తి ఒక పచారి దుకాణాన్ని నడిపిస్తున్నాడు. అతడు తన దుకాణం ముందుకు వచ్చిన ఏ బిచ్చగాడి కైనా తన దుకాణంలో తనకు చేతికి అందిన ఏ దానినైనా దానం చేసేవాడు. అది ధన రూపంలోనో, వస్తు రూపంలోనో, బియ్యం రూపంలోనో, పండ్ల రూపంలోనో అలా తన చేతికి దొరికిన దాన్ని దానంగా ఇచ్చేవాడు. అలా తన దుకాణం ముందుకు వచ్చిన ప్రతి బిచ్చగాడికి తప్పనిసరిగా దానం చేసేవాడు._*
*_అలా రామయ్య దుకాణం ముందు దానం కోసం వచ్చే బిచ్చగాళ్లలో రంగయ్య అనే బిక్షగాడు ఒక ప్రత్యేకతను సంతరించుకొని ఉన్నాడు. అదేమిటంటే అతడు తాను రోజంతా భిక్షం రూపంలో తాను పొందిన మొత్తాన్ని ఆరోజు తనకు అవసరమైనంత మాత్రమే తన వద్ద ఉంచుకుని మిగిలిన దాన్ని ఊరి చివరన చెట్టు కింద ఉండి స్వతహాగా తాము ఏమీ సంపాదించుకోలేని కుంటి, గుడ్డి వాళ్లకు దానంగా ఇచ్చేవాడు_*.
*_ఈ విషయాన్ని రామయ్య దుకాణంలో పనిచేసే గుమస్తా అనుకోకుండా ఒకసారి గమనించడం జరిగింది. ఆ గుమస్తా తన యజమాని అయిన రామయ్యతో ఈ విషయాన్ని చెప్పడం జరిగింది. అందుకు రామయ్య, అతడు తన వద్ద అదనంగా ఉన్న బియ్యాన్ని వారికి ఇచ్చి వారి నుండి ఎంతో కొంత ధనాన్ని తీసుకొని ఉంటాడు అని అనగా, లేదు లేదు అతను అలా ఏమీ తీసుకోకుండానే వారికి అతడు వాటిని దానంగానే ఇచ్చేశాడు అని అనగా, ఆశ్చర్యపోయిన రామయ్య ఇది నిజమా కాదా అని పరీక్షించాలి అనుకున్నాడు._*
*_అలా రామయ్య మరుసటి రోజు తానే స్వయంగా వెళ్లి అక్కడ జరుగుతున్నదంతా చూసి ఆశ్చర్యపోయి అలా ఎందుకు చేస్తున్నాడో బిక్షగాడినే అడిగి తెలుసుకోవాలి అనుకున్నాడు. మరుసటి రోజు బిక్షం అడగడానికి వచ్చిన రంగడికి ఒక అరటి పండును దానంగా ఇస్తూ ఈ అరటిపండును ఏం చేస్తావు అని అడిగాడు రామయ్య. అందుకు రంగడు ఈ పండును నేను సగం తిని మిగతా సగాన్ని బిక్షం ఎత్తుకోలేని ఇంకొకరికి "ప్రతిఫలం ఆశించకుండానే " దానంగా ఇస్తాను అన్నాడు. అయితే మరి ఒక అరటి పండు నీకే కడుపు నింపదు కదా అలాంటి అరటిపండులో తిరిగి సగం ఎందుకు దానం చేస్తున్నావు అని అడిగాడు._*
*_అందుకు రంగడు నేను రోజంతా భిక్షం ఎత్తుకోగా వచ్చిన దానిలో నుండి తప్పనిసరిగా సగభాగాన్ని దానం చేస్తాను. అది నా ధర్మం అన్నాడు. అందుకు రామయ్య అలా చేయడం వల్ల నీకు వచ్చే లాభమేమిటి అని అడుగగా, ఒకరోజు నేను బిక్షం అడగడానికి ఈ వీధి చివర వున్న ఒక పెద్దాయన ఇంటి ముందు నిల్చొని భిక్షం అడిగాను. నా కేక విన్న ఆ ఇంటి పెద్దాయన ఏమేవ్.. ఇదిగో "మూడు జన్మల బిచ్చగాడు " వచ్చాడు వాడికి ఎంతో కొంత భిక్ష ఇచ్చి పంపు అని అన్నాడు._*
*_అది విన్న నాకు ఆశ్చర్యం వేసి అదే విషయాన్ని ఆయనతో అడిగాను, అయ్యా ! ఎందుకు మీరు నన్ను "మూడు జన్మల బిచ్చగాడు " అని అంటున్నారు అని అడుగగా, అందుకు ఆ పెద్దాయన ఇలా సమాధానమిచ్చాడు, నీవు గత జన్మలో కూడా బిక్షగాడివే. ఆ జన్మలో నీవు నీకు భిక్షంగా వచ్చిన మొత్తాన్ని ఎవరికి దానం చేయకుండా నీవు నీ కడుపుకు మాత్రమే తినడం జరిగింది. అది మహాపాపం, అందువల్లనే ఈ జన్మలో కూడా తిరిగి నీవు బిక్షవాడిగానే పుట్టావు_*.
*_మరి ఈ జన్మలో కూడా నీ కొచ్చిన బిక్షాన్ని మొత్తంగా నీవు మాత్రమే తింటున్నావు. కాబట్టి రాబోయే జన్మలో కూడా నీవు తిరిగి బిక్షగాడి గానే పుట్టబోతావు. అందుకే నేను అలా నిన్ను "మూడు జన్మల బిక్షగాడు " అని అనడం జరిగింది అని తెలియజేశాడు. అంటే "ఇతరులకు సహాయం చేయగల స్థితిలో ఉండీ కూడా ఇతరులకు సహాయం చేయకపోవడం మహాపాపం " అని నాకు అర్థం అయింది. అందుకే అప్పటి నుండి నేను సంపాదించిన దేనినైనా సగభాగాన్ని దానంగా ఇస్తూ నా ధర్మాన్ని నేను ఖచ్చితంగా నిర్వర్తిస్తున్నాను. అని చెప్పాడు. మనo కూడా స్థోమత కలిగిన వారైతే తప్పని సరిగా అవసరమైన వారికి తప్పని సరిగా సాయం చేసి మీ జన్మను సార్థకం చేసుకోవాలి._* #మన సంప్రదాయాలు సమాచారం