​कल्याण : कल्याण पूर्व विजय नगर प्रभागातील मातोश्रीनगर परिसरात नागरिकांच्या सुरक्षेच्या आणि सोयीच्या दृष्टीने नव्याने बसविण्यात आलेल्या पथदिव्यांचे लोकार्पण नुकतेच दिमाखात संपन्न झाले. नगरसेवक महेश गायकवाड यांच्या हस्ते या दिव्यांचे अनावरण करण्यात आले. या नवीन प्रकाशयोजनेमुळे मातोश्रीनगरचा परिसर आता प्रकाशमान झाला असून स्थानिक रहिवाशांनी समाधान व्यक्त केले आहे. मातोश्रीनगर भागात रात्रीच्या वेळी अंधाराचे साम्राज्य असल्याने नागरिकांना येण्या-जाण्यासाठी मोठ्या अडचणींचा सामना करावा लागत होता. ही समस्या ओळखून शिवसेना उपविभागप्रमुख आणि समाजसेवक सुमेध हुमणे यांनी सातत्याने पाठपुरावा केला होता. त्यांच्या या प्रयत्नांना यश आले असून, प्रशासनाकडून या ठिकाणी आधुनिक पथदिवे बसविण्यात आले आहेत. ​ लोकार्पण प्रसंगी बोलताना महेश गायकवाड म्हणाले की, सामान्य नागरिकांच्या मूलभूत सोयी-सुविधांना आमचे नेहमीच प्राधान्य राहिले आहे. पथदिव्यांमुळे केवळ रस्ते उजळणार नाहीत, तर परिसरातील सुरक्षितता वाढण्यासही मदत होईल. प्रभागाचा सर्वांगीण विकास करण्यासाठी आम्ही कटिबद्ध असून आगामी काळातही अशी लोकोपयोगी कामे सुरूच राहतील. ​ या कार्यक्रमाला शिवसेनेचे विविध पदाधिकारी, स्थानिक कार्यकर्ते आणि मातोश्रीनगरमधील नागरिक मोठ्या संख्येने उपस्थित होते. अनेक वर्षांची मागणी पूर्ण झाल्याने परिसरातील महिला व ज्येष्ठ नागरिकांनी सुमेध हुमणे यांचे विशेष आभार मानले. अंधारामुळे रात्रीच्या वेळी चोरीच्या घटनांची किंवा अपघाताची भीती वाटायची, मात्र आता पथदिव्यांनी परिसर उजळून निघाल्याने मोठी सोय झाली आहे, अशा भावना स्थानिकांनी व्यक्त केल्या.