#എനിക്ക് പ്രണയിക്കണം
എന്റെ വരികളുടെ വിടവുകളിലെ,
ഉപ്പ് നുണയുന്നൊരുവനെ.
എന്റെ നിലയ്ക്കാത്ത ഭ്രാന്തിന്റെ,
ജനാലകളെ ബന്ധിക്കുന്നൊരുവനെ
എനിക്ക് പ്രണയിക്കണം.....
എന്റെ ദുഃഖത്തിന്റെ കടലാഴങ്ങളെ,
തൊടുന്നൊരുവനെ...
എന്റെ അസ്വസ്ഥതയുടെ ചില്ലകളെ,
പുഷ്പിക്കുന്നൊരുവനെ..
എന്റെ നിഴലിന്റെ അളവുകോൽ,
കട്ടെടുക്കുന്നൊരുവനെ..
എന്റെ മൗനത്തിന്റെ വാല്മീകത്തെ, തകർക്കുന്നൊരുവനെ..
എനിക്ക് പ്രണയിക്കണം...
എന്റെ ഉദയത്തെയും
അസ്തമയത്തെയും
നിലയ്ക്കാത്ത പ്രവാഹമായ്,
ഭയപ്പെടുന്നൊരുവനെ.
എന്റെ കനിവും കരുതലും,
സ്വയം പൂർണ്ണതയാൽ
ശ്വാസമാക്കുന്നൊരുവനെ..
എന്റെ പകലും രാത്രിയും
എന്നും നേർരേഖയിൽ
പ്രാണനാക്കുന്നൊരുവനെ.
എന്റെ സ്വപ്നവും ഭാഷയും,
അനേകായിരം ജന്മങ്ങളിൽ
തടവിലാക്കുന്നൊരുവനെ.
എനിക്ക് പ്രണയിക്കണം....
എന്റെ വിഷാദങ്ങളെ,
തൂനിലാവാക്കി
ഒഴുക്കുന്നൊരുവനെ..
എന്റെ അജ്ഞതകളെ,
സൂര്യപ്രഭയായ്
ജ്വലിപ്പിക്കുന്നൊരുവനെ..
എന്റെ മറവികളെ
നക്ഷത്രനിബിഡത്താൽ, ഓർമ്മയാക്കുന്നൊരുവനെ..
എന്റെ കുറുമ്പുകളെ,
തെന്നലായ് തഴുകുന്നൊരുവനെ..
എനിക്ക് പ്രണയിക്കണം..
എന്റെ മഴയെ ആർത്തലച്ച് പെയ്യിക്കുന്നൊരുവനെ,
എന്റെ വേനലിനെ,
നീലത്തടാകമാക്കി
വരയ്ക്കുന്നൊരുവനെ..
എന്റെ കുളിരിനെ പുതപ്പാക്കി
അണിയുന്നൊരുവനെ,
എന്റെ ഋതുക്കളെയെല്ലാം,
വസന്തമാക്കി
ആഘോഷിക്കുന്നൊരുവനെ.
എനിക്ക് പ്രണയിക്കണം
എന്റെ മണ്ണിൽ വേരുകൾ കൊണ്ട്,
പുണരുന്നൊരുവനെ..
എന്റെ ആകാശത്തിൽ,
ചിറകുകൾ ചേർത്ത്
പറക്കുന്നൊരുവനെ..
എന്റെ ജീവനിൽ,
സ്വർഗ്ഗം തേടുന്നൊരുവനെ..
എന്റെ പ്രണയത്തിൽ,
പ്രണയം നിറയ്ക്കുന്നൊരുവനെ
എനിക്ക് പ്രണയിക്കണം...
✍🏻ആമി ♥️
#😔 ഇമോഷണൽ സ്റ്റാറ്റസ് 😍 #📝 ഞാൻ എഴുതിയ വരികൾ #😍 ആദ്യ പ്രണയം #❤️ പ്രണയം സ്റ്റാറ്റസുകൾ #💔 നീയില്ലാതെ