🩸 ప్రపంచ రక్తదాతల దినోత్సవ శుభాకాంక్షలు 🩸
"గ్రూపులు తప్ప కులం, మతం లేనిది రక్తం...
మనుషులంతా ఒక్కటేనని చెప్పే గొప్ప సందేశం రక్తదానం.
మీరు ఇచ్చే రక్తం మరొకరికి పునర్జన్మను ఇస్తుంది."
రక్తదానం గురించి నా జీవితంలో జరిగిన ఒక సంఘటనను ఈ సందర్భంగా గుర్తు చేసుకుంటున్నాను.
1992 సంవత్సరం...
స్థానిక సింగరేణి ప్రసూతి ఆసుపత్రిలో ఒక అత్యవసర పరిస్థితి ఏర్పడింది. అప్పట్లో రాజకీయంగా బీజేపీ తర్వాత ప్రజారాజ్యం, ప్రస్తుతం కాంగ్రెస్లో ఉన్న నాయకులు గట్ల రమేష్ గారి బంధువులకు రక్తం అవసరం ఏర్పడి, డోనర్ కోసం వెతుకుతున్న సమయంలో అదే ఆసుపత్రిలో ఉన్న పరిచయస్తులు వారి పరిస్థితిని గమనించి నా గురించి చెప్పి రాత్రి వేళ నన్ను సంప్రదించారు.
వెంటనే నన్ను సింగరేణి ఆసుపత్రికి తీసుకెళ్లి నా నుంచి ఒక బాటిల్ రక్తం సేకరించి పేషెంట్కు ఎక్కించడం జరిగింది. ఆ రక్తంతో ఒక ప్రాణం ప్రమాదం నుంచి బయటపడింది.
అయితే అంతకుముందే నాకు రక్తదానం గురించి అవగాహన ఉండేది. అత్యవసర పరిస్థితుల్లో ఎవరికైనా నా రక్తం అవసరమైతే ఎప్పుడైనా అందించడానికి సిద్ధంగా ఉంటానని చాలామందికి తెలియజేసేవాడిని.
అందులో భాగంగానే 1991లో మార్వాడీ యువ మంచ్ వారు లయన్స్ క్లబ్ ఆధ్వర్యంలో నిర్వహించిన రక్తదాన శిబిరంలో మొదటిసారి రక్తదానం చేశాను. ఆ సమయంలో కూడా నేరుగా ఒక పేషెంట్కు, గట్ల రమేష్ గారి అక్కగారికి రక్తం అందించడం జరిగింది. అప్పటి నుంచి ఇప్పటి వరకు ఎంతోమందికి రక్తదానం చేసే అవకాశం నాకు లభించింది.
రక్తదానం — ఒకరి ప్రాణానికి వెలుగు
ఈ రోజుల్లో ఎన్నో కారణాల వల్ల రక్తదానం ఎంతో అవసరంగా మారింది. మనం ఇచ్చే రక్తం అవసరమైన వ్యక్తికి జీవితం ఇస్తుంది. అదే సమయంలో రక్తదాతకు కూడా ఆరోగ్యపరంగా అనేక ప్రయోజనాలు ఉంటాయి.
రక్తంలో ఉన్న జీవకణాలు అనేక చికిత్సలకు ఉపయోగపడుతూ ఎంతోమంది ప్రాణాలను కాపాడుతాయి. ఒకరి జీవితాన్ని కాపాడుతున్నామనే ఆత్మసంతృప్తి, ఆనందం రక్తదానం ద్వారా లభిస్తుంది.
సాధారణంగా ఆరోగ్యంగా ఉన్న 18–60 సంవత్సరాల వయస్సు కలిగిన, 50 కిలోల కంటే ఎక్కువ బరువు ఉన్న వ్యక్తులు రక్తదానం చేయవచ్చు. పురుషులు ప్రతి 3 నెలలకు ఒకసారి, మహిళలు ప్రతి 4 నెలలకు ఒకసారి రక్తదానం చేయవచ్చు.
రక్తదానం వల్ల కలిగే కొన్ని ప్రయోజనాలు:
1. శరీరంలో ఇనుము స్థాయిని సమతుల్యం చేయడంలో సహాయపడుతుంది.
2. గుండె ఆరోగ్యానికి మేలు చేస్తుంది.
3. శరీరంలోని కొవ్వు, కేలరీలను నియంత్రించడంలో సహాయపడుతుంది.
4. కొత్త రక్తకణాల ఉత్పత్తికి ప్రోత్సాహం ఇస్తుంది.
5. రక్త ప్రసరణ మెరుగుపడుతుంది.
6. ఒక ప్రాణాన్ని కాపాడిన ఆనందం, మానసిక సంతృప్తిని ఇస్తుంది.
ఒక ముఖ్యమైన విజ్ఞప్తి
ఇటీవల టాటూలు, పచ్చబొట్లు ఫ్యాషన్గా మారాయి. శరీరంపై రకరకాల డిజైన్లు వేయించుకోవడం కొందరికి ఆనందం కలిగించవచ్చు. కానీ అత్యవసర సమయంలో రక్తం అవసరమైన వారికి ఇది సమస్యగా మారే సందర్భాలు ఉన్నాయి.
కాబట్టి ప్రతి ఒక్కరూ రక్తదానం యొక్క విలువను గుర్తించి, ఆరోగ్యపరమైన జాగ్రత్తలు తీసుకోవాలి. "తోటి మనిషి ప్రాణం కాపాడటానికి నా రక్తం ఉపయోగపడాలి" అనే ఆలోచనతో ముందుకు రావాలని కోరుకుంటున్నాను.
చివరగా...
గత 35 సంవత్సరాలుగా సంవత్సరానికి ఒకటి లేదా రెండుసార్లు, దాదాపు 50 సార్లకు పైగా రక్తదానం చేస్తున్నాను. ఈరోజు కూడా సంపూర్ణ ఆరోగ్యంతో ఉన్నాను.
రక్తదానం చేయండి... ప్రాణదాతలుగా నిలవండి.
🩸 ప్రపంచ రక్తదాతల దినోత్సవ శుభాకాంక్షలు 🩸
— అశోక్ వేముల
రాజకీయ నాయకులు, సినీ నటులు, సామాజిక సేవకులు.
#🗞పాలిటిక్స్ టుడే #😎మా నాయకుడు గ్రేట్✊
