కోటప్పకొండ ప్రభల ఉత్సవం :
కోటప్పకొండలో మహాశివరాత్రి సంబరాల్లో ప్రభలదే ప్రధాన భూమిక. ఈ తిరునాళ్లకే ప్రభల తిరునాళ్లు అని పేరు. కోటప్పకొండ పరిసర ప్రాంతాల నుంచి, ఇతర జిల్లాల నుంచి కూడా ప్రభలతో ఈ క్షేత్రానికి తరలివస్తారు. ప్రభలతో దర్శనానికి వస్తామని మొక్కుకోవడం రివాజు. ప్రభలను సమున్నతంగా తీర్చిదిద్దడానికి గ్రామీణులు పోటీపడతారు. ఈ ప్రభలు, దివ్యప్రభా భాసితమైన సూర్యశక్తిని ఆవాహన చేసుకుని, భక్తులకు ఆరోగ్యాన్ని, ఆయుష్షును కలిగిస్తాయనేది ఆంతర్యం. తళుకుబెళుకుల చెమ్కీలు, రంగుకాగితాలు, విద్యుద్దీపాలు, వర్ణమయ జెండాలతో ప్రభల ఉత్సవం కోటప్పకొండ తిరునాళ్లకు ప్రధాన ఆకర్షణ. సమస్త విద్యలకు మూలపురుషుడు, సకల శాస్త్రాలకు ఆధారభూతుడు పరమేశ్వరుడు. అఖిల విద్యలకు అధినాయకుడు. లోకైక విజ్ఞాన స్ఫూర్తిగా, అమేయ విద్యామూర్తిగా దక్షిణామూర్తి స్వరూపంలో పరమేశ్వరుడు లీలావిభూతిని ప్రకటించాడు. ఆ అపురూప మూర్తిమత్వం ప్రకటితమయ్యే దివ్యస్థలి కోటప్పకొండ శైవక్షేత్రం. మూడు శిఖరాల సమాహారమైన కొండ, కొలిచిన వారి కొంగుబంగారు కొండపై వెలిసిన దైవం త్రికూటేశ్వర స్వామి. దక్షిణ భారతదేశంలోనే సుప్రసిద్ధ శైవ సన్నిధానం. పురాణ ప్రశస్తి, చారిత్రక ప్రసక్తి ఉన్న ఈ క్షేత్రం ప్రభలకి ప్రసిద్ధిగాంచింది. బ్రహ్మోత్సవాల సందర్భంలో కోటప్పకొండ భువిపై వెలిసిన కైలాసంగా భాసిల్లుతుంది. కోటివరాల్ని అందించే ఈ స్వామిని కోటీశ్వరునిగా భక్తులు ఆరాధిస్తారు.
#☀️శుభ మధ్యాహ్నం #🙏🏻సోమవారం భక్తి స్పెషల్ #🌻సోమవారం స్పెషల్ విషెస్ #🙏ఓం నమః శివాయ🙏ૐ #🛕కొటప్పకొండ శ్రీ త్రికోటేశ్వర స్వామి🕉️