|| श्रीमाता || अश्विन शु., दिनांक ०१ ऑक्टोबर २०२५ पूजा क्रमांक १० / महाविद्या क्र.५ || श्रीमहाविद्या भैरवीमाता || (त्रिपुर भैरवी) ध्यानम – उद्यदभानु सहस्त्रकांति अरुणक्षौमां शिरोमालिकां । रक्तालिप्त पयोधरां जपवटीं-विद्यामभीतिंवरम् || हस्ताब्जैर्दधतीं त्रिनेत्रविलसत् वक्त्रारविंद श्रियम् | देवीं बद्धहिमांशु रत्नमुकुटां वंदे सुमंदस्मिताम् || स्वरूप - हजारो उगवत्या सूर्याप्रमाणे जिचा प्रखर तेजस्वी वर्ण आहे, जिच्या केशजटांमध्ये चंद्रकला शोभत आहे, रक्तचंदनरंजित जिच्या चारही हातात जपमाळा, ग्रंथ, अभय व वरदहस्त शोभत आहेत, जी त्रिनेत्री असून, मंदस्मित मुखमंडल असलेल्या श्रीत्रिपुरभैरवी मातेला मी सादर नमस्कार करतो. इतिहास - जेव्हा महाकाली माता स्वतः मूळ रुपात व्यक्त होण्याच्या इच्छेने, काही काळ गुप्त झाली. तेव्हा शिवांनी कालीमातेला शोधण्यासाठी देवर्षी नारदांना आज्ञा केली, शिवाज्ञेनुसार नारदांना सुमेरू पर्वताच्या उत्तरेस श्री देवीमाता दिसली, तेव्हा तिच्यासमोर नारदांनी शिवांशी विवाहाचा प्रस्ताव ठेवला, तेव्हा तिच्या शरीरातून एका सुकोमल, तेजस्वी षोडशवर्षी युवती प्रगट झाली, श्री काली मातेच्या शरीरातून व्यक्त झालेल्या, या छायाविग्रहास 'त्रिपुरभैरवी' म्हणतात. ही दशमहाविद्यांमधील ५ वी देवता असून, कल्पभेदानुसार श्री दक्षिणामूर्ति अथवा श्री बटुकनाथ हे हिचे भैरव आहेत, मार्गशीर्ष पौर्णिमेस प्रगट झालेली, ही देवी श्रीकुलातील असून, उत्तराम्नायपीठस्था आहे. उपासना भेद - त्रिपुरभैरवी, कोलेशीभैरवी, रुद्रभैरवी, चैतन्यभैरवी, क्रियाभैरवी, सिद्धिभैरवी, कामेश्वरीभैरवी, षट्कूटाभैरवी इ. या देवीचे उपासनाभेद व प्रकार आहेत. फल - हिच्या उपासनेने संकटनाश, इंद्रियविजय, सर्वत्रउत्कर्ष प्राप्ती, शत्रुनाश, सकलसिद्धिलाभ, आरोग्यप्राप्ती, सौख्यलाभ इ. लाभ होतात. आधार लेखन वेदमूर्ती सुहास जोशी गुरुजी, कोल्हापूर #🙏नवरात्रि Status🙏 #🔱शक्तिपीठ 🛕 #🙏 देवी दर्शन🌸 #🙏शुभ नवरात्रि💐 #🏹दशहरा Status⌛