ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/X31kmjO?d=n&ui=v64j8rk&e1=cപറയെടാ... നീ വരുമോ? ഇല്ല.. ഞാൻ വരില്ല. അയാൾക്ക് ഒന്നും ആലോചിക്കാനില്ലായിരുന്നു അതെന്താ? ഞാൻ അതൊക്കെ നിർത്തി ഋഷി പറഞ്ഞു. ഒന്ന് ജയിലിൽ കിടന്നപ്പോഴേക്കും നീ പേടിച്ചു പോയോ.പെട്ടന്ന് പണമുണ്ടാക്കാനും, സുഖമായി ജീവിക്കാനും ഇതിനേക്കാൾ നല്ലൊരു മാർഗ്ഗമില്ല.നീ ഒന്നുകൂടി ഒന്ന് ആലോചിക്ക്. അയാൾ കോൾ കട്ടാക്കി ഇല്ല.. എന്തായാലും ഇനിയീ പണിക്കില്ല. അന്ന് പോലീസ് പിടിച്ചപ്പോൾ ഏറ്റ മർദ്ദനങ്ങളുടെ പാട് ഇപ്പോഴും ശരീരത്തിൽ അവശേഷിക്കുന്നുണ്ട്. ആളുകൾ പറയുന്നതുപോലെ അത്ര സുഖജീവിതം ഒന്നുമല്ല ജയിലിൽ. ചിലപ്പോഴൊക്കെ ഒന്ന് ചത്തു തുലഞ്ഞാൽ മതിയെന്ന് വരെ തോന്നിയിരുന്നു. ആരോഗ്യമുള്ള ശരീരം ഉണ്ടായിരുന്നല്ലോ എന്തെങ്കിലും ഒരു തൊഴിൽ ചെയ്ത് ജീവിക്കാമായിരുന്നു എന്നൊക്കെ തോന്നിയിട്ടുണ്ട്. ജയിലിൽ കിടന്നു വർഷങ്ങളിൽ തന്നെ കാണാൻ ഈ പറയുന്ന ആരും വന്നിട്ടില്ല. വന്നത് അമ്മ മാത്രമാണ്. ലക്ഷ്മിക ഒരുതവണ പോലും വന്നില്ലല്ലോ എന്ന് താൻ ആലോചിച്ചിട്ടുണ്ട്. അമ്മയാണ് പറഞ്ഞത് അവൾക്ക് വരണമെന്ന് താല്പര്യമുണ്ടായിരുന്നു. അമ്മ കൊണ്ടുവരാത്തതാണെന്ന് അവൾക്ക് ഇപ്പോൾ ഒരു ലക്ഷ്യമുണ്ടെന്നും, പഠിച്ച്‌ ഒരു ജോലി വാങ്ങി ജീവിക്കണമെന്ന് ആഗ്രഹമുണ്ടെന്നും അമ്മ പറഞ്ഞു. താൻ ജയിലിൽ ആയതുകൊണ്ട് അങ്ങനെ ഒരു ഗുണമെങ്കിലും ഉണ്ടായി ഇനിയെങ്കിലും തനിക്കും ജീവിക്കണം മനുഷ്യനായി. സ്നേഹിക്കാനോ സ്നേഹം പ്രകടിപ്പിക്കാനോ ഒന്നും തനിക്കറിയില്ല.എല്ലാം പഠിക്കേണ്ടിയിരിക്കുന്നു. എന്തായാലും ഒരു പണി കണ്ടെത്തണം കൂലിപ്പണിയെങ്കിൽ അത്. അല്ലെങ്കിലും ജീവിച്ചു പോകാൻ അതാണെങ്കിലും മതിയല്ലോ. എന്തായാലും പെണ്ണുമ്പിള്ളയുടെ സാലറി കൊണ്ട് ജീവിക്കാൻ എനിക്ക് സൗകര്യമില്ല. അയാൾ പലയിടത്തും ഒരു ജോലി അന്വേഷിച്ചു. പറമ്പിലെ പണിക്കോ, തെങ്ങുകയറാനോ എന്ത് ജോലി വേണമെങ്കിലും ചെയ്യാൻ തയ്യാറാണ്. പക്ഷേ വേദനയോടെ അയാൾ ഒരു കാര്യം മനസ്സിലാക്കി. ഇവിടെ ആരും തനിക്ക് ഒരു ജോലി തരാൻ തയ്യാറല്ല. എന്തിനേറെ അവരുടെ പറമ്പിലെ കള പറിക്കാൻ പോലും അവർ തന്നെ നിർത്തില്ല. അയാൾക്ക് ആകെ നിരാശ തോന്നി. അതിലേറെ വിഷമവും. ജയിലിൽ കിടന്ന സമയത്ത് പോലും താൻ ഇത്രയ്ക്ക് വിഷമിച്ചിട്ടില്ല. ആളുകൾ തന്നെ വല്ലാതെ ഒറ്റപ്പെടുത്തുന്നു. പലയിടത്തും ഒരു പണികിട്ടുമെന്ന് കരുതി കയറിച്ചെന്നെങ്കിലും ഒന്നും ശരിയായില്ല. അയാൾ നിരാശയോടെ വീട്ടിൽ തിരിച്ചെത്തി. എന്നാലും അയാൾ ലക്ഷ്മികയോടോ ജാനകിയോടോ എന്തെങ്കിലും സംസാരിക്കാൻ പോലും തയ്യാറായില്ല. എങ്കിലും അവർ അയാൾക്കായി ഭക്ഷണം ഉണ്ടാക്കി, വിളമ്പി വച്ചു. ഗത്യന്തരമില്ലാത്തതുകൊണ്ട് അയാൾ അത് കഴിച്ചു. ആയിടക്കാണ് കോളനിയിൽ തന്നെയുള്ള ജനാർദ്ദനന്റെ മകളുടെ വിവാഹം നടന്നത്. കോളനിയിലുള്ള എല്ലാവരെയും വിവാഹത്തിനും ക്ഷണിച്ചിട്ടും തന്റെ വീട്ടിൽ മാത്രം വിളിച്ചില്ലല്ലോ എന്ന കാര്യം ഋഷി ശ്രദ്ധിച്ചു. ജയിലിൽ കിടന്ന ഒരുത്തനേയും കുടുംബത്തെയും ആ ചടങ്ങിൽ പങ്കെടുപ്പിക്കാൻ അവർക്ക് കുറച്ചിൽ തോന്നിയിരിക്കാം. സമൂഹത്തിൽ തനിക്കൊരു വിലയുമില്ലെന്ന് അയാൾക്ക് ബോധ്യമായി. എന്തെങ്കിലും ഒരു ജോലി കണ്ടുപിടിച്ചേ പറ്റൂ.. മതിയായ വിദ്യാഭ്യാസം നേടാൻ തനിക്കായില്ല. മടി തന്നെയായിരുന്നു മുഖ്യകാരണം. പിറ്റേന്ന് അയാൾ അടുത്ത് തന്നെയുള്ള ഒരു പരിചയക്കാരന്റെ വർക്ക് ഷോപ്പിൽ ചെന്ന് പണി ചോദിച്ചു. മര്യാദയ്ക്ക് നിൽക്കാൻ പറ്റുമെങ്കിൽ, ജോലിക്ക് കയറിക്കോ എന്ന് അയാൾ പറഞ്ഞു. അത് കേട്ടപ്പോൾ ഋഷിക്ക് വിശ്വസിക്കാൻ കഴിഞ്ഞില്ല തന്നെ ആട്ടിപായിക്കുമെന്നാണ് അയാൾ വിചാരിച്ചിരുന്നത്. ഋഷിക്ക് മറ്റൊന്നും ആലോചിക്കാൻ ഉണ്ടായിരുന്നില്ല. അത്യാവശ്യം പണികളൊക്കെ അറിയാവുന്നതാണ്. അതുകൊണ്ടുതന്നെ അവിടെ ജോലി ചെയ്യാം എന്ന് അയാൾ തീരുമാനിച്ചു. എന്റെ പൊന്നു മോനെ,നീ എനിക്കിട്ട് പണി തന്നേക്കരുത് കേട്ടോ. സാധനമൊന്നും ഇവിടെ കൊണ്ടുവന്നു വച്ചേക്കരുത്.എന്റെ ജീവിതമാണ് ഇത്. ഉടമ പറഞ്ഞു. ഇല്ല ചേട്ടാ ഞാൻ അങ്ങനെ ഒന്നും ചെയ്യില്ല. ചെയ്യരുത്.നീ മറ്റെവിടെയെങ്കിലും പോയാലും നിനക്ക് ജോലി കിട്ടില്ല എന്ന് എനിക്ക് ഉറപ്പുണ്ട്.അതുകൊണ്ടാണ് നിന്നോട് ഇവിടെ നിന്നോളാൻ പറഞ്ഞത്. അല്ലെങ്കിൽ നീ ഒന്ന് ചോദിച്ചു നോക്കൂ.. ഒരുത്തനും നിനക്ക് ജോലി തരില്ല. ശരിയാണ് ഞാൻ പലയിടത്തും ഒരു ജോലി അന്വേഷിച്ചു ഒന്നും ശരിയായില്ല. അതങ്ങനെയാ മോനെ. ആ വിഷമം എനിക്കറിയാവുന്നതുകൊണ്ടാ ഞാൻ നിന്നോട് ഇവിടെ നിന്നോളാൻ പറഞ്ഞത്. നീ രക്ഷപെടുമെങ്കിൽ ആവട്ടെ. അതിന്റെ പേരിൽ എനിക്ക് പിന്നീട് വിഷമിക്കാൻ ഇടവരരുത് അത്രയേ ഞാൻ പറഞ്ഞുള്ളൂ.. ഇല്ല, എന്റെ ഭാഗത്തുനിന്ന് ഒരു തെറ്റും ഉണ്ടാവില്ല.അത് ഞാൻ ഉറപ്പു തരാം അത് കേട്ടാൽ മതി. ഒക്കെ ശരിയാവും. അയാൾ അവന്റെ തോളിൽ തട്ടി. ഋഷി ആത്മാർത്ഥമായി തന്നെ ജോലി ചെയ്തു പോന്നു. ആരുടെയും നിർബന്ധത്താൽ അല്ലാതെ, സ്വയം തോന്നി ചെയ്യുന്ന ജോലി ആയതുകൊണ്ട് അയാൾക്കതിൽ ഒരു മടുപ്പും തോന്നിയില്ല. വിശ്രമമില്ലാതെ ജോലി ചെയ്യാൻ അയാൾ തയ്യാറായിരുന്നു. മകനിൽ ഉണ്ടായ മാറ്റങ്ങൾ ജാനകി ശ്രദ്ധിക്കുന്നുണ്ടായിരുന്നു. എത്രയൊക്കെയായാലും ജീൻ വഴി പകർന്നു കിട്ടുന്ന പലതുമുണ്ട്. അവന്റെ അച്ഛന്റെ നന്മയുടെ ഒരംശം അവനിൽ ഇല്ലാതിരിക്കുമോ? ചിലപ്പോൾ അവൻ നന്നായേക്കാം എന്ന് ആ അമ്മയ്ക്ക് തോന്നി. അല്ലെങ്കിലും എല്ലാ അമ്മമാരും അങ്ങനെ തന്നെയാണല്ലോ. എത്ര തെറ്റ് ചെയ്താലും ആരൊക്കെ ഉപേക്ഷിച്ചാലും തന്റെ കുഞ്ഞുങ്ങളെ ഉപേക്ഷിക്കാൻ അവർക്കാകുമോ. 🍀🍀🍀🍀🍀 ലക്ഷ്മിക ഋഷിയെ തെല്ലും ശ്രദ്ധിച്ചതേയില്ല തനിക്കൊപ്പം ജോലിചെയ്യുന്ന സന്ദീപ് കുറേയായി തന്നോട് അടുപ്പം കാണിക്കുന്നുണ്ട്. തന്റെ കാര്യങ്ങളൊക്കെ അയാൾക്ക് നന്നായി അറിയാം വിവാഹം കഴിക്കാൻ ആഗ്രഹമുണ്ടെന്ന് അയാൾ സൂചിപ്പിച്ചിരുന്നു. അയാൾ നല്ലവനാണ്.അച്ഛനും അമ്മയും ഒരു അനിയനും ഉള്ള കുടുംബമാണ് അയാളുടേത്. സഹപ്രവർത്തകരൊക്കെ പലപ്പോഴും തന്നോട് പറഞ്ഞു എന്തുകൊണ്ടും സന്ദീപ് നിനക്ക് ചേരുമെന്ന്. ഒരു കോളനി ചെറുക്കന്റെ കൂടെ ജീവിച്ച് നീ നിന്റെ ജീവിതം നശിപ്പിക്കരുത് അവർ പറയുന്നുണ്ട്. അവൻ ഇനിയും തെറ്റ് ചെയ്യും,ജയിലിൽ പോകും. അതുമല്ലെങ്കിൽ ആരുടെയെങ്കിലും കു ** ത്ത് കൊണ്ട് തീരും.അപ്പോൾ നിന്റെ ജീവിതമാണ് നഷ്ടപ്പെടുകയെന്ന്.തന്നോട് അടുപ്പമുള്ള പലരും പലവട്ടം പറഞ്ഞു. ഒരു കണക്കിന് നോക്കിയാൽ അതുതന്നെയാണ് ചെയ്യേണ്ടത്. എന്തിനാണ് സ്വന്തം ജീവൻ ഹോമിക്കാൻ തയ്യാറാകുന്നത്? രാവിലെ തിരക്കിട്ട ജോലിക്കിടയിൽ ലക്ഷ്മിക ജാനകിയോട് സന്ദീപിന്റെ കാര്യം പറഞ്ഞു മോൾക്ക് ശരിയെന്ന് തോന്നുന്നത് ചെയ്യ്....നിന്റെ ജീവിതമാണ്. നല്ലത് മാത്രമേ ഇനിയെങ്കിലും തിരഞ്ഞെടുക്കാവൂ.. ജാനകി പറഞ്ഞു. ഹാളിൽ ഇരുന്ന് അവരുടെ സംസാരം ശ്രദ്ധിക്കുകയായിരുന്ന ഋഷിയുടെ നെഞ്ചിലൂടെ ഒരു കൊള്ളിയാൻ പാഞ്ഞു. എന്താണ് താനീ കേൾക്കുന്നത്? ലക്ഷ്മിക മറ്റൊരാളോടൊപ്പം ജീവിതം തുടങ്ങാൻ പോവുകയാണെന്നോ. കാര്യം താനൊരു തെമ്മാടിയും അലമ്പനും ജയിൽ പുള്ളിയും ഒക്കെയായിരുന്നിരിക്കും. പക്ഷേ ജീവിതത്തിൽ ഒരു പെണ്ണിനെ മാത്രമേ താൻ സ്നേഹിച്ചിരുന്നുള്ളൂ.. അവളെ നോച്ചിട്ടുണ്ട് മാനസികമായും ശാരീരികമായും. പക്ഷേ അവൾ ഇല്ലാത്ത ഒരു ജീവിതത്തെക്കുറിച്ച് ചിന്തിക്കാനാവില്ല. എല്ലാം തന്റെ കുഴപ്പമാണ്.ഒരുപക്ഷേ യോഗ്യനായ ഒരാളെ കണ്ടപ്പോൾ അവൾ നല്ലൊരു ജീവിതം മോഹിച്ചിരിക്കും. അവൾക്കൊരു തടസ്സമായി താൻ നിൽക്കാതിരിക്കുന്നതാണ് നല്ലത്. അവളെങ്കിലും രക്ഷപ്പെടട്ടെ. ജാനകി, സന്ദീപിന്റെ ആലോചന ലക്ഷ്മികക്ക് വന്ന കാര്യം ഋഷിയോട് പറഞ്ഞില്ല. അവൾ രക്ഷപ്പെടുന്നെങ്കിൽ രക്ഷപ്പെട്ടു പോട്ടെ എന്നൊരു ചിന്ത മാത്രമേ ജാനകിക്കുള്ളൂ.. പലപ്പോഴും അവൾ പറഞ്ഞിട്ടുണ്ട്, കുട്ടിക്കാലം മുതൽ അവൾ അനുഭവിച്ച ഒറ്റപ്പെടൽ, അവൾ അല്പം മുതിർന്നപ്പോൾ മുതൽ തുടങ്ങിയ അച്ഛന്റെ ശല്യം. നിസ്സഹായയായ അവളുടെ അമ്മയുടെ വേദന.. ഒക്കെ. അങ്ങനെ ഒരുപാട് ദുഃഖങ്ങൾക്കിടയിലാണ് അവൾ വളർന്നു വന്നത്. ഒരു ജീവിതം പ്രതീക്ഷിച്ച്‌ ഒരുവന്റെ കൈപിടിച്ചു വന്നപ്പോൾ അവനാവട്ടെ അവളെക്കുറിച്ച് ഓർമ്മിക്കാതെ,അവൾ എങ്ങനെ ജീവിക്കും എന്ന് പോലും ഓർക്കാതെ, പലതിലും ചെന്നു ചാടി, കുറെ വർഷങ്ങൾ ജയിലിലും പാവം ലക്ഷ്മിക,അതൊരു മനുഷ്യ ജീവനല്ലേ... ഇനിയെങ്കിലും അത് സന്തോഷം അറിയട്ടെ. സന്ദീപിന്റെ കാര്യം അറിഞ്ഞതിൽ പിന്നെ,ഋഷി കൂടുതൽ സമയവും വർക്ക്ഷോപ്പിൽ തന്നെയായിരുന്നു. 🍀🍀🍀🍀🍀 അന്നൊരു വെള്ളിയാഴ്ച ആയിരുന്നു. ജോലിസ്ഥലത്തേക്ക് പോവുകയായിയിരുന്ന ലക്ഷ്മികയുടെ ഫോണിലേക്ക് ഒരു കോൾ വന്നു. അയ്യോ... എന്നിട്ട്...? അവളുടെ പരിസരം മറന്നുള്ള പരിഭ്രമത്തോടെയുള്ള ശബ്ദം കേട്ട് ബസ്സിലുള്ള മറ്റുള്ളവർ അവളെ തുറിച്ചു നോക്കി. അവൾ പെട്ടെന്ന് അവിടെ ബസ് ഇറങ്ങി. അതിലെ വന്ന ഒരു ഓട്ടോയ്ക്ക് കൈ കാട്ടി. ഹോസ്പിറ്റലിലേക്ക് വിട്. അവർ പറഞ്ഞു. ഓട്ടോ അതിവേഗം ഹോസ്പിറ്റലിലേക്ക് പാഞ്ഞു. 💚💚💚💚 തുടരും. കണ്ണൂർകാരൻ ❤️❤️❤️❤️ #📙 നോവൽ #📔 കഥ #💞 പ്രണയകഥകൾ #📚 ട്വിസ്റ്റ് കഥകൾ #✍ തുടർക്കഥ