"പണ്ടത്തെ ഓണായിരുന്നു ഓണം. ഇപ്പഴത്തേത് കാറ്ററിങ്ങാരുടെ ഓണല്ലേ......" അടുക്കള ഭാഗത്തേക്ക് റിവേഴ്സെടുത്ത് പോകുന്ന കാറ്ററിംഗ് വണ്ടിയും നോക്കിയിരുന്ന് വല്ല്യമ്മാവൻ നെടുവീർപ്പിട്ടു. തിരുവോണമായിട്ട് രാവിലേ തന്നെ കുളിച്ച്, പുതിയ ഡ്രെസ്സും ഇട്ട് സ്വസ്ഥമായിട്ട് എല്ലാവരെയും ഭരിക്കാമെന്ന് കരുതിയാണ് തറവാട്ടിലേക്ക് എത്തിയത്. പക്ഷെ പണ്ടത്തെപ്പോലെ ആർക്കും, ഒട്ടും മൈൻഡ് ഇല്ല. ആദ്യം അടുക്കളയിൽ കയറി പെണ്ണുങ്ങളെ ചാടിക്കാമെന്ന് കരുതിയപ്പോൾ അവിടെ മൊത്തം ആണുങ്ങള്. ഓണമായിട്ട് പെണ്ണുങ്ങൾക്ക് അവധി കൊടുത്തുവത്രേ... "ദൈവമേ, തറവാട് മുച്ചൂടും മുടിയാൻ പോകുവാണല്ലോ...." എന്നാപ്പിന്നെ ആണുങ്ങളെ ഭരിക്കാമെന്ന് കരുതിയപ്പോൾ അവർ ദോശയും, ചായയും ഉണ്ടാക്കി, പാത്രവും കഴുകി വച്ച ശേഷം അടുക്കളയും പൂട്ടി സ്ഥലംവിട്ടു. അടുത്ത ലക്‌ഷ്യം കുട്ടികളായിരുന്നു. പക്ഷെ ആ പ്ലാൻ തുടക്കത്തിൽ തന്നെ ഫ്ലോപ്പായി. കളിച്ചുകൊണ്ടിരുന്ന കുഞ്ഞുങ്ങളുടെ പിറകെ ഈ വയസ്സാംകാലത്ത് തലങ്ങും, വിലങ്ങും ഓടിയിട്ടും മൂത്ത മരുമകന്റെ ഏറ്റവും ഇളയ മകളെ മാത്രമാണ് കയ്യിൽ കിട്ടിയത്. "മക്കള് ഇവിടെ നിന്നേ.... വല്യമ്മാവന് ഒരു ഓണപ്പാട്ട് പാടിത്തന്നേ..." "ഓക്കേ...." ആ കുഞ്ഞ് അകത്ത് പോയി ഒരു ബ്ലൂടൂത്ത് സ്പീക്കറുമായി വന്ന് 'ഓണം മൂഡ്' പാട്ടും വച്ച് ഡാൻസ് തുടങ്ങി. ഒരു വിധത്തിലാണ് അമ്മാവൻ ചെവിയും പൊത്തി അവിടന്ന് എസ്‌ക്കേപ്പായത്. അപ്പോഴും അപ്പുറത്തെ തോപ്പിൽ ഓണക്കളികൾ തകൃതിയായി നടക്കുന്നുണ്ടായിരുന്നു. അക്കൂട്ടത്തിൽ തന്റെ പ്രിയ പത്നി വസുധരയും നിന്ന് ആവേശത്തോടെ വടം വലിക്കുന്നത് കണ്ടതോടെ അമ്മാവന്റെ ദേഷ്യം ഇരട്ടിച്ചു. "അതേ.........." അമ്മാവന്റെ നീട്ടിയുള്ള വിളി കേട്ട് അമ്മായി അവിടന്ന് എത്തിനോക്കി. "ഉരുളി തേച്ച് വച്ചോ? പായസം ഉണ്ടാക്കണ്ടേ? എവിടെയാണ് അടുപ്പ് കൂട്ടുന്നത്?" "അതൊക്കെ ഞങ്ങള് വാങ്ങിയിട്ടുണ്ട്. നല്ലൊരു ഓണമായിട്ട് വീടിനകത്ത് തന്നെയിരിക്കാതെ ഇവിടെ വന്ന് കുട്ടികളുടെ കൂടെ കളിക്ക് മനുഷ്യനേ....." 'പായസം വാങ്ങിയെന്നോ? ന്റെ കൃഷ്ണാ.....' അമ്മായിയെ ഒന്ന് മാറ്റി നിർത്തി ചീത്തപറയാൻ തീരുമാനിച്ച അമ്മാവൻ നൈസായിട്ട് അവരെ അകത്തേക്ക് വിളിച്ചു. "അതേ ഒന്ന് വന്നേ. എനിക്കിത്തിരി ചൂടുവെള്ളം വേണം..." 'ചൂടുവെള്ളമൊക്കെ ഫ്‌ളാസ്‌ക്കിൽ എടുത്ത് വച്ചിട്ടുണ്ട്. എടുത്ത് കുടിച്ചോളൂ..." അമ്മായി വീണ്ടും വടംവലിക്കാൻ പോയി. അമ്മാവനാകട്ടെ അതിനേക്കാൾ ചൂടിൽ പുകയുന്ന തലയുമായി വന്ന് ഉമ്മറത്തെ കിഴവൻ കസേരയിൽ അമർന്നിരുന്നു. ഈ ഇരുപ്പ് മുതൽ ഉച്ചയൂണ് വരെയുള്ള സമയം കൊണ്ട് ഒട്ടനേകം അഗ്നിപർവ്വതങ്ങളാണ് ആ മനസ്സിൽ പൊട്ടിക്കൊണ്ടിരുന്നത്. ചുറ്റും ഓടിക്കളിക്കുന്ന കുട്ടികളെ കാണിക്കേണ്ടെന്ന് കരുതി മാത്രം അമ്മാവൻ അതെല്ലാം കടിച്ചുപിടിച്ച് ഇരുന്നു. എന്നാൽ സദ്യ വിളമ്പാൻ നേരത്ത് കലവറയിൽ നിന്ന് വലിയ പ്ലാസ്റ്റിക്ക് പാത്രങ്ങളിൽ വന്ന കറിക്കൂട്ടങ്ങൾ കണ്ടതും വല്ല്യമ്മാവന്റെ കണ്ട്രോള് പോയി. "ഇതാണോ സദ്യ? നിനക്കൊക്കെ എന്താണ് വസുധരേ ഇവിടെ ജോലി? ഓണമായിട്ടെങ്കിലും ഈ ഹോട്ടൽ ഭക്ഷണം ഒഴിവാക്കി നമുക്കൊരുമിച്ച് ഉണ്ടാക്കി കഴിക്കായിരുന്നില്ലേ. അതല്ലേ ഈ തിരുവോണത്തിന്റെ ഒരു ഐശ്വര്യം." "ഹോട്ടൽ ഭക്ഷണമല്ല അച്ഛാ...." തൊട്ടപ്പുറത്തിരുന്ന മകൻ വിവേക് തിരുത്തി. "മണിയാശാന്റെ കാറ്ററിംഗാണ്. നിങ്ങളുടെ കല്യാണത്തിന് വരെ ഭക്ഷണമുണ്ടാക്കിയ കുടുംബല്ലേ... പിന്നെന്താ പ്രശ്നം?" "അങ്ങനല്ല മോനേ.... ഇതാണോ ഓണം? ഓണമെന്ന് പറഞ്ഞാൽ എല്ലാവരും ഒത്തുകൂടി കളികളും, വിശേഷങ്ങളും മാത്രമല്ല. നമ്മുടെ വീട്ടിലുള്ള എല്ലാവരും കൂടി നമ്മുടെ അടുക്കളയിൽ ഉണ്ടാക്കുന്ന സദ്യ കൂടെ ഉണ്ടാകുമ്പോഴാണ്.... അതല്ലേ ഓണം..." "ഠിമ്................." പെട്ടെന്ന് സിമ്പലടിച്ചത് പോലെ ഒരു സൗണ്ട് കേട്ടു. ചോറ് മൂടുന്ന കലത്തിന്റെ മൂടിയെടുത്ത് അമ്മായി ദേഷ്യത്തിൽ താഴേക്ക് എറിഞ്ഞതാണ്. എന്നിട്ട് ഫുൾസ്‌പീഡിൽ അമ്മാവന്റെ അടുക്കലേക്ക് പറന്നുവന്നു. "അതേ.... ഈ 'എല്ലാവരും' എന്ന് പറയുന്നതെന്താണെന്ന് മനസ്സിലായില്ല. കുറച്ച് നേരം വന്നിരുന്ന് കഷ്ണങ്ങൾ അരിയുന്നതും, തേങ്ങ ചിരകുന്നതും മാത്രമല്ല പാചകം. പത്തിരുപത് പേർക്കുള്ള സദ്യ ആകണമെങ്കിലേ രാവിലെ അടുക്കളയിൽ കയറിയാൽപ്പോരാ, അതിന്റെ പണികൾ തലേന്നേ തുടങ്ങണം. എന്നാലേ നേരത്ത് ഇലയിടുമ്പോ കഴിക്കാനുണ്ടാകൂ. പിന്നെ അതൊക്കെ എടുത്ത് വയ്ക്കണം, വിളമ്പണം, പാത്രങ്ങള് കഴുകണം, വൃത്തിയാക്കണം. ഇതൊക്കെ കഴിഞ്ഞിട്ട് ഞങ്ങൾക്ക് ആഘോഷിക്കാൻ സമയം കിട്ടില്ലെന്നത് പോട്ടെ, ഒന്ന് വിശ്രമിക്കാനുള്ള സമയം കിട്ടുമോ? അതിന്റെയിടയില് തട്ടുമ്പുറത്തുള്ള ഉരുളി ഉരുട്ടിയിറക്കി, അത് പുളിയിട്ട് പിടിച്ച് തേച്ചിട്ട് അടുപ്പത്ത് പായസം വയ്ക്കണം പോലും... നിങ്ങൾക്ക് വേണമെങ്കിൽ കഴിച്ചാൽ മതി.... ആരും നിർബന്ധിക്കുന്നില്ലല്ലോ...." എഴുന്നേൽക്കാൻ തുടങ്ങിയതാണ്. മൂത്ത മരുമകൻ ജയദേവൻ വന്ന് പിടിച്ചിരുത്തി. "അമ്മാവാ ഈ തിരുവോണത്തിന് നമ്മൾ മാത്രം ആഘോഷിച്ചാൽ മതിയോ? അവർക്കും വേണ്ടേ ആഘോഷങ്ങളും, സന്തോഷങ്ങളുമെല്ലാം. അതുകൊണ്ടാണ് ഇങ്ങനെ തീരുമാനിച്ചത്. അമ്മാവൻ പിണങ്ങാതെ ഭക്ഷണം കഴിച്ചേ. ദേ, കുട്ടികളൊക്കെ വിശന്നിരിക്കുന്നത് കണ്ടില്ലേ. അമ്മാവൻ കഴിക്കാതെ ഇവിടാരും കഴിക്കില്ല.." വേറെ വഴിയില്ലെന്ന് മനസ്സിലാക്കിയ അമ്മാവൻ അവിടെത്തന്നെ കുത്തിയിരുന്നു. അങ്ങിനെ എല്ലാവരും വളരെ സന്തോഷത്തോടെ തന്നെ ഓണമുണ്ടു. അവസാനം പായസം വിളമ്പിയപ്പോൾ ഷുഗർ ഉള്ളതുകൊണ്ട് അമ്മാവന് മാത്രം കൊടുത്തില്ല. പക്ഷെ എല്ലാവരും ഇലയെടുത്ത് പുറത്തേക്ക് പോയ തക്കം നോക്കി, അമ്മായി ഒരു കുഞ്ഞ് ഗ്ലാസിൽ കുറച്ച് പാലടയുമായി വന്ന് അടുത്തിരുന്നു. "ഇതെന്താപ്പോ ഇങ്ങനെ?" ആകെ ചമ്മി കൺഫ്യൂഷനിൽ ഇരുന്ന അമ്മാവൻ ചോദിച്ചു. "നിങ്ങള് കുടിച്ച് നോക്ക്!!!" അത് കുടിച്ചതും അമ്മാവന്റെ കണ്ണ് തള്ളിപ്പോയി. വർഷങ്ങൾക്ക് മുൻപ് കല്യാണത്തിന് കുടിച്ച പായസത്തിന്റെ അതേ രുചി. "ഇപ്പൊ ഓണം എങ്ങനുണ്ട്?" ഒട്ടും ആലോചിക്കാതെ അമ്മാവൻ മറുപടി കൊടുത്തു. "ഈ ഓണം കെങ്കേമം!!!" PS: ഒരുപാട് ഓണം ഓർമ്മകളുടെ പുനരാവിഷ്കരണത്തിനൊപ്പം അടുക്കളയിൽ പുകഞ്ഞ് തീർന്ന ആഘോഷങ്ങൾക്ക് ഒരു സമർപ്പണം. രചന - Shine Warwick #📝 ഞാൻ എഴുതിയ വരികൾ #📙 നോവൽ #💞 പ്രണയകഥകൾ