छत्रपती संभाजी महाराजांची दक्षिणेतील एकजूट...🚩 उत्तरेत राजपुतांचे बंड मोडून काढल्यानंतर औरंगजेब दक्षिणेतील सर्व शाह्यांचा घास घेण्यासाठी लवकरच दक्षिणेत उतरणार ही गोष्ट स्पष्ट होती. अशा प्रसंगी दक्षिणेतील सर्व राज्यांनी मिळून मुघलांचा प्रतिकार करावा हे छत्रपती शिवाजी महाराजांचे धोरण छत्रपती संभाजीराजांनीही स्वीकारले व त्या दृष्टीने योग्य त्या हालचाली सुरु केल्या. १६८० च्या अखेरीस छत्रपती संभाजी महाराजांविरुद्ध झालेल्या कटात सामील असल्यामुळे कर्नाटकचा सुभेदार रघुनाथ नारायण हणमंते यास अटक केली व त्या जागी हरजीराजे महाडिक यांची संभाजी महाराजांनी नियुक्ती केली. दक्षिणेत त्यावेळी म्हैसूर, मदुराई, तंजावर, रामनाड, इक्केरी इ. छोटी छोटी हिंदू पाळेगारांची राज्ये व आदिलशाही, कुतुबशाही ही दोन मोठी राज्ये अस्तित्वात होती... विजापूरची आदिलशाही व गोवळकोंड्याची कुतुबशाही यांच्याशी संभाजी महाराजांनी योग्य ते संबंध प्रस्थापित केले व प्रसंगी अनेकवेळा त्यांना आर्थिक व लष्करी मदत करून मोगलांविरुद्धच्या लढाईत साहाय्य देखील केलं. या सर्वांमधे म्हैसूरच्या राजा चिक्कदेवराय हा शिवरायांच्या दक्षिण दिग्विजयापासून मराठ्यांविरोधात होता. शिवाजी महाराजांनी या मोहीमेत तंजावर, वेल्लूर, जिंजी, होसकोट, दोड्डाबाळापूर हा सबंध प्रदेश स्वराज्यात आणला होता. मराठ्यांच्या या विजयामुळे संपूर्ण कर्नाटकावर राज्य करण्याचे चिक्कदेवरायाचे स्वप्न भंग पावले होते. व्यंकोजीराजांची राजधानी बंगळूरला होती तोपर्यंत चिक्कदेवरायाच्या उत्तरेतील हालचालींना आळा बसला होता. मात्र व्यंकोजीराजांनी राजधानी तंजावरला हलवल्याने चिक्कदेवरायाच्या राज्यविस्ताराच्या आकांक्षेला नवं बळ मिळालं. त्याने मदुराईच्या नायकावर हल्ला करून त्याचे गड घेण्यास सुरवात केली. यात त्याचा सेनापती कुमारय्या याने मदुराईची राजधानी त्रिचनापल्लीपर्यंत धडक मारली. हरजीराजांनी व व्यंकोजीराजांनी वेळेत येऊन मदुराईकरांची मदत केल्याने म्हैसूरकरांना माघार घ्यावी लागली. हरजीराजांनी म्हैसूरकरांना मदुराईच्या राज्यातून हाकलून लावण्याचा सपाटा लावला व म्हैसूरकरांकडून जिंकलेला नवीन मदुराईचा मुलुख स्वराज्यात सामील केला, हरजीराजे, जैताजी काटकर, दादजी काकडे यांनी म्हैसूरकर चिक्कदेवरायाचा सेनापती कुमारय्या याचा पराभव करत २,००० घोड़ी पाडाव केली... #🙏शिवदिनविशेष📜 #📜इतिहास शिवरायांचा #😇आमचे प्रेरणास्थान: छत्रपती🙏 #🚩शिवरायांचे भक्त #🚩मी शिवबा भक्त